Lalpa i thu hi a hlu ber,
Khawvel sum zawng zawng aiin,
Lalpa, i thu hi a mawi ber,
Khawvel ropuina aiin,
Khuai aiin a thlum si,
Ka thinlung a tilawm thin.
Thlaler ram ro kal tlang turin,
I thu hian min hruai zel ang;
Hei hi chhumding eng chu a ni,
Israel faten an zui kha;
Keini m in hruai turin
A eng a la chuai chuang lo.
Khawvel tuifinriat zauvah hian,
Hlauthawnga ka len laiin;
Hmar arsi angin i thu hian,
Kan van kawng min hriattir se;
Tin, kan zui hlen ang che,
Chatuana bo tawh lovin.
Thlemna tuifawn, thlemna ral lian,
Khawvel nen min do mah se;
Lalpa, min thuam la, i thu hian,
Thlarau ngunhnam a ni si;
Kan hlau lo'ng, Setana,
Nangma chakna hmachhuanin.
TAWNGTAI RUALNA
Tawngtaina a Hriat Turte
Pathian malsawmna leh venhimna kan chan avangin lawmthu i sawi ang u. Pathian thutak ngaina a, Pathian thutaka kan awm reng theih nan.
Pathianni leh 14th March atangin a huhova Pathian biak inkhawm nei tawh turin hma kan la ta a, Pathian hruaina a hlim tak leh him taka kan inkhawm theih nan i dil ang u. lTin, chhungkaw tinin chhungkaw maicham kan vawn nun zui zel theih nan i dil ang u.
Kan Biak in sak mek, Building Committe, work supervisor leh thawktu zawng zawngte tan.
Kan thenawm ram Myanmar nasa takin a buai a, an tan i dil ang u.
-Mipui ten muanna leh zalenna an lo neih thuai theih nan.
-Buaina chhuak avanga thi leh hliam tuar chhungte tan.
-Kan Mizo unaute manganga awm zawng zawngte tan.
Kan kohhran member khumbet a na leh natna khirhkhan veite tan.
Thuchah kan ngaihthlak tur hmangin malsawmna dil ila, kan thawhlawmte Pathian hnenah i hlan ang u.
Pathian thu chhiar
Jh 3:14-17
“Tin, Mosian thlalêrah rûl a khai kân ang khân Mihring Fapa hi khai kânin a awm bawk tûr a ni; tu pawh amah ring apiangin amah avânga chatuana nunna an neihna tûrin. Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân. Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e.
Heb:4:12
Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni.
Heb 13:8
Isua Krista chu niminah nên, vawiinah nên, kumkhua pawhin a pângngaiin a awm fo vang.
THUCHAH
Thupui : Thupui –“ Kan mamawh – Pathian thutak”
- Upa C. Laldingliana Jr
Audio a awm lo
Kohhran chhung tin te kan Lalpa Isua Krista Pa Pathian hmingin chibai ka buk a che u.
Khawvel hripui Corona Virus (covid 19) leng avangin Kohhran ho te Pathian biak Inah a huhovin vawi 51 zet Pathianni zingah kan inkhawm thei ta lova,a lunglenthlakin a khawharthlak hle mai.Chhung tin te duhsakna ka hlan che u a,Pathianin vengin awmpuiin hruai zel che u rawh se,Pathianni leh atang chuan kan inkhawm theih ngei te pawh ka beisei a ni.
Hetih lai hian kan Kohhran hruaitute thahnem ngaihna avangin Pathianni zingah Pathian thuchah (sermon) tha tak kan ngaithla thei thin a, a lawmawm hle a ni.
Aw le…… kan thupui – “Kan mamawh Pathian thutak” chungchang tukinah hian ngaihtuahpui che u ka duh a ,ka tum a ni.In rilru khawih che lawih thei khawp a sawi thiam ka chak hle chungin ka rilrua awm ang leh ka ngaihtuahnaa awm ang ang te pawh ka sawichhuak thiam vek lovang tih ka in hre chiang hle mai.Mahse Corona Virus (covid 19) leng avanga Kohhranhote inkhawm thei lova hun kan hman atang khan, ka ngaihtuahna leh rilruah mihring hian enge kan mamawh? Tih hi a in zawt tlut tlut reng mai a ni.
Hriselna tha, ei leh bar,silh leh fen,in leh lo leh thil dang tam tak kan mamawhna khawvelah hian kan nun min kaihruai tur a kan mamawh ber chu – “Pathian thutak” hi a lo ni.Min siamtu leh min dintu Pathian leh A hmangaihna thutak hi kan mamawh ber chu a lo ni.
Pathian thutak ---------
* Pathian thawkkhum anih avangin a nung a, thil a ti thei a, thinlunga ngaihtuah leh tumte pawh a hretlang nghal vek thei a ni.(Heb 4:12).
* Pathian thu hi Pathian thawkkhuma pek a nih avangin a nunga thil a ti thei a ni.(2 Tim 3:16).
* Pathian thutak chu Lal Isua Krista a min hmangaihna chanchin tha hi a ni a, boral mek te chhandam/ chhanchhuah nan a hlu em em a ni.
* Pathian thutak (chhandamna) chu thu nung leh thil ti thei a nih avangin Kohhran ho tan chw tak, ei tur tak leh intur tak a ni.Chu Pathian thutak chu kan thlarau tan thanlenna leh mamawh ber a ni.
1 . Chu Pathian thutak chu ‘a ngheta, a danglam ve ngai lo’ khawvel leh a chhunga cheng mihring te hi chu nitin mai hian kan danglama, nimin maia mawi leh nalh em em kan tih te kha vawinah chuan a lo mawi leh tawh lova,a lo nalh leh tawh lova, a lo ropui leh tawh thin lo a ni ti rawh u…. Pathian thutak erawh chu a pangngai renga, niminah nen,vawinah leh kumkhua pawhin a danglam ve ngai lova, a panggai renga, a rintlaka,innghahna tlak a ni a, kan mamawh leh pawmtlak ber a ni.
Chhandamna kan neih theihna tura Pathian thu chu(Pathian hmangaihna) a la panggai renga,keini mihring sualbawia bopil tawh a chhandam mek te hi chu kan danglam leh zung zung thin a,a pawi hle a ni. “Thutak”(Pathian hmangaihna) in hria anga, chu thutak chuan bawi a ban ang che u.
Sam ziaktu chuan – ka nunna hi i chhandamna ngaiin a chau ta a,nimahsela i thu ka beisei thin a ti(Sam 119:81)
Sual bawi, thihna bawih atanga min chhanchhuah a, min chhuah zalentu Pathian thutak, thu nung leh thil ti thei hi nitina kan chhiar a,kan ngaihtuah a,kan vawn tlata, kan nunpui tlat loh chuan min hmangaihtu duhdan angin ka nung thei lo fo thina,Pathian rilru kan tin a fo thin a ni.chuvangin Pathian thutak kan mamawh em em reng te hi Pathian duhdan anga kan nunpui a,kan nun min khalhngiltu atan kan hman theih nan i khawlkhawm zel ang u.Kan nunkawng saltanna theuh atanga min chhuah zalen tu,engthawl leh nun hahdam a min awmtir a,hnehna min pe leh thin tu chu Pathian thutak bawk hi a lo ni.
“ I chunga thil ka tih sualloh nan I thu chu ka thinlungah ka khawl khawm a”(Sam 119:11)
2. Pathian thutak – khawvelin a mamwh :
Pathian thuin ‘Khawvel’ a tih hian kan mihring nihna (humanity) angin a sawia , sualna khawvel (sinful world) ang te, kan chenna khawvel (inhabited world) ang leh lei leh van angin a sawi thin a.Chu khawvel chu suala tlu, sual lam awm tlat borala chhe mai tur,hun rei lo te atan,Pathian rorelna hmaa la ding tur leh chhandam ngai,thenfai ngai ang te in a sawi fo thin a ni.Hei hian Pathian thutak, thu nung leh thil ti thei Isua Krista leh Pathian thu chu kan khawvel siam tha a,dinthar leh turin a mamawh ngawi ngawi a ni tih a lan chian tir hle a ni.Chatuan daih,awm reng tur chu Pathian thutak hi a ni a ,chu Pathian thutak chu khawvelin ( nang leh kei hian) kan man fuh a,kan nunpui a pawimawh em em a ni.
Khawvel ,ram, chhungkua,kan mimal nun a kal dika a damna tak tak hi chu Pathian thutak a kan awm chauh hian a lo ni.
Billy Graham chuan – khawvel hian natna chi hrang hrang Doctor thiam, Scientist,Sociologist,Psychiatrist leh mithiam rual ten an tihdam theih reng reg loh natna a vei a chu chu sual natna hi a ni a ti tawl mai.Khawvel sualna, natna mithiam ten an tih dam theih loh tih damna tha ber leh awm chhun chu ‘Pathian thutak’ hi a ni.
3. Chhungkaw mamawh – ‘Pathian thutak’
Kan vaiin Kristian Lal Isua neitu leh zuitu kan ni veka,Kohhranah kan chhungkaw hming a chuang kima ,Kohhran inchhiarnaah pawh min chhiar tel theuh mai.Mahse Kristian chhungkua angin kan nung chiah lo niin a lang a a pawi hle a ni.Pathian leh a thu tak pawh hi kan chhungkaw bulpui berah leh innghahnan kan hmang tak tak lo em ni aw?.
Kan rama chhungkaw tam ber nihphung leh khawsak dan han bihchian hian Pathian thu tak hian min chen chilh lo hle niin a hriat theiha,chuvangin kan rama chhungkaw tin te mamawh chu Pathian thutak hi a ni.Chungkua hlim tak leh thlamuang taka kan chen ho theihna tur pawh he Pathian hmangaihna thutak bawk hi a ni.
Chuvangin chhungkua tana pawimawh ber chu Pathian leh a hmangaihna thutak hi a ni a,Pathian leh a mi hmangaihna thutak chuan kan chhungkua theuh min luah tlat sela,min chen chilh tlat sela chhungkua chu a lo himin a lo zahawm anga,a lo thanglian zel dawn a ni.
4 . Pathian thutak hi chhuan tlak leh chhuan ber tur a ni.(1 kor 1:29-31).
He khawvela kan awm lai hian enge kan chhuan ber le? Kan thiamna, finna,felna,hausakna,hmelthatna leh duhawmna te hi maw kan chhuan thin ang? Pathianin heng zawng zawng hi min pe a,a hlua,a ropuia,a lawmawmin an hlu hle mai.Mahse heng zawng zawng hi chhuan tlak a ni lova, in duh phah nan leh chapo pui tur a ni hauh lo ang le.Heng zawng zawng hi he khawvela kan cham chhung reilo te atan a ni a,chhuang mai lovin Pathian rawngbawlnan leh chawimawi nan i hmang zawk ang u.
Hla siamtu chuan ---“Kan chhuan ber chu lo ni fo la,chatuan hmun thleng pawhin” a lo ti a ni.
Pathian hmangaihna thutak hi mimawl ber leh tlak tlai lo ber tan pawh finna a ni a,fello te tan felna a ni a, chaklo thin te tan chakna a ni a,mi bawlhhlawh ber te tan pawh kan thianghlimna a ni a.A mahah Pathian thutak ah chuan kan tlanna, silfaina,thianghlimna kan nei a ni,a va ropui em!!! Chuvangin Pathian hmangaihna thutak hi I chhuang ber zawk ang u.
“Chutichuan,Pathian hmaah mi tumah an inchhuang thei lo vang.Nangni erawh chu ama zarah Krista Isuaah chuan in awm a ni,a ni chu Pathian hnen ata kan tan finnaah siam a ni,felnaahte,thianghlimnaahte,tlannaah ten en.Chutichuan,an ziak ang khan a chhuang a piangin Lalpa chhuang rawh se” (1 kor 1:29-31).
Kan thu tawp nana ka sawi lan hram duh chu – “He rilru,Krista Isua pawha awm bawk kha,nangmahniah awm rawh se”Phil.2:5 – a Tirhkoh Paula`n Lal Isua Krista rilru Pathian hmangaihna thutak,a hmangaihna vawrtawp a rawn tarlanna hi a ni. Lal Isua Krista inngaihtlawmna zawng zawng te ,a inpumpekna zawng zawng te, min hmangaihna zawng zawng te leh a Pa Pathian thu zawma Kros – a thina leh a thawhlehna kha a bul ber chu nang leh kei boral tur chhandam ngai,chhandama kan awm thei nan a ni a, fello thin te felna, chaklo thin te chakna,bawlhhlawh ber te silfaina,thianghlim zo tawh lo te thianghlimna leh thimhnuaia thu te tan enna a lo ni.Chu Krista rilru Pathian thutak chu ringtu zawng zawng leh vawina Kohhran ho te hian i tawmpui zel ang u. Pathian thutak hi zir zel ila,nunpui zel ila,i vawng reng ang u.
Pathianin a thu kan sawi te mal min sawm sak theuh rawh se,AMEN.
