Ka tlantu chu a nung tih ka hria,
Khawvelah ro a rel leh ang,
Chatuan nun min pe thei tih ka hria,
Ropui leh thuneihna a chang.

A nung ka hria, ka Tlantu duh tak,
Khawvelah ro a rel leh ang,
Min pe ngei dawn chatuana nun hlu,
Ropui leh thuneihna a chang.

RA thutiam hlen zel fova khanin,
Min tiam thlawn dawn o tih ka hria;
Ka taksa hi ral mah selangin,
Amah ka la hmu dawn si a.

Ka tan hmun min siamsak tih ka hria,
A chennaa cheng ve turin,
Aw, a va mak em min hmangaihna!
A lo kal dawn min hruai turin.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi leh ang u. Kan kohhranin malsawmna tam tak a dawn thin avangin leh midang tanpui ve thei tura Pathianin min ruat avangin a hnenah lawmthu i sawi ang u.
2. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u.
3. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
4. Kan Biak in sak chhunzawm zel a ni a, thawktu leh a buaipuitute tan i tawngtai ang u.
5. Serkawn VLTF memberte tan i tawngtai ila, Contact tracing , transportation leh relief ang zawnga hma an lakna hrang hrangah Pathian tih chakna i dil sak ang u.
6. Kan tualchhung kohhran committee leh a hnuaia Fellowship hrang hrang, KNP, Jr TKP, TKP ,BMP leh BKHP ten an theih ang angin hma an la ve reng a, an hmalakna ah Pathian awmpuina i dil sak ang u. Vawiina Fellowship prog awm turte tan pawh tawngtaina i hmang ang u.
7. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : THLAMUANNA LEH LUNGAWINA

Audio

Mihringte nunah hian Thlamuanna leh Lungawina hi mitinin kan zawn leh nei tura kawng hrang hranga kan dap, kan nun min tinuamtu leh nun tihlutu pawh niin kan chanvo a a lo lum luh theih nana theih tawp a kan um leh zawn a ni ti ila kan sawi sual awm love. Mi lungawi nun hi nun itawm tak pawh a ni hrim hrim awm e. mi hi a chan tawka a lungawi a, a thlamuan tlat chuan chu chuan hlimna leh lawmna pein a nun hmabak zel atan pawh chakna thar a siam sak zel thin a ni. Kan nunah hian lungawina leh thlamuanna a awm tawh loh chuan nun hian awmzia pawh a nei tawh lova hriain, mahni chunga pawikhawih duhna hial pawh a lo thleng mai thin a ni. Thlamuanna leh lungawina nun neitute chu mi vannei, mi itawm an nih laiin lungawina nei lo nun chu mi hausa leh mithiam pawh nise, an nun a hahthlakin an bula awm pawh a hrehawm mai thin a ni. Hlauthawng reng reng a awm, nun thlamuang lo reng reng a khawsa nun chu hahthlak tak a niin, an mahni pawh an hlim ngai lo a ni.

Chu ti taka thil hlu leh pawimawh chu nimahse lungawina leh thlamuanna nun chu neih har tak, tawk chin tih nei lo nun neitute kan nih avang hian mihring hau hi chuan neih theih loh tluk hial a thil harsa a ni awm e. Hlauhna hmuna awm te, lungawilohna rama chen reng te hi hun reilo te pawh ni se thil hrehawm tak a ni thin. …… Heti taka mihring tana hlu leh duhawm nimahse neih erawh chu thil har tak ni si hi Kristiante tan chuan awlsam te a kan neih theih leh kan nun chanvo, kan nihdan a lo nih tlat si zia hi Paula testimony atang hian zir ho kan tum dawn a ni. Paula chuan, “Eng nag pawhin awm mah ila lungawi zel ka ching tawh si a, rethei/hausa/puar leh riltama awm dan ka thiam tawh.” a ti a . chu a nun chan chuan eng ang dinhmuna a awm pawhin thlamuanna a pe a ni. Hei hi Paula nun chan bik mai a ni lova Kristian zawng zawng te nun chan pawh a ni tih hi kan hriat theih nan tukinah hian zirlai atan ka han la chhuak a ni.

Lungawina nun leh Thlamuanna nun hi ringtute nun chanvo, kan ta a nih theihna chhan hi a innghahna pawimawh tak a awm a. chu chu kawng thumin kan enzui dawn a ni.

1. Pathian chhandamna avangin: Ringtute thlamuanna leh lungawina hi Pathian chhandamna-ah a innghat tlat a ni.Lk 10:20 kan en chuan Lal Isuan a zirtirte hnenah ramhuaite an thuhnuaia an awm tir avanga lawm mai lo turin a hrilh a. an lawmna leh an thlamuanna chhan tur a hrilh chu Vana an hming ziak a nih avanga lawm turin a ti a ni. Pathian chhandamna avanga vana an hming ziak sak an nih kha an thlamuanpui zo lo ang, an lungawi pui zo lo ang tih a hlau hle a, Petera thawn hnih 1:5-9 kan chhiar chuan, ringtu kalsual ta te chan chin sawiin, hmanlai sualte tlenfaisakna chu an nunah thlamuanpui zo lovin an theihnghilh a, an kalsan ta a. lungawina reng an nei tawh lo a ni a ti a. Pathian chhandamna an thlamuan pui zo tawh lo a nih chu.Kristian tam tak te zingah khawvel mite ai pawha harsatna sut dan leh hmachhawn dan thiam lo zawk, vanduaina leh hlawhchhamna a lo thlen chang tea che chhe zawk hi kan ni fo awm e. Harsatna te, natna te, Buaina leh Manganna te a lo thlen pawh a, lungawi thin, hlim thin ,thlamuang thin Pathian mite nun hi a ropuiin a hlu a. Chu chu kan nun dan tur pawh a lo ni a. A chhan chu he khawvela thil thleng Natna te, Hripui te, Tuarna leh channa te, thihna pawhin a tih chhiat theih loh ,engmahin a tih chhiat theih loh Pathian chhandamna nun neitu kan nih tlat avangin lungawina leh thlamuanna nun chuan ringtute nun a kaihruai thin a ni. He nun hlu tak mai changtute kan nih avang hian mangang tur kan ni lo ve, hlau tur kan ni lo ve.

2. Pathian thuawi: Ringtute thlamuanna leh lungawina nun innghahna chu Pathian thuawina-ah a ni. Hun thu-ah te, nunna thu-ah te thuneihna tawp neitu chu Pathian a ni. A duh apiang te chawikanga titlawm thei tu. Hnam tlawmte tung ding a, Lalte paihthla thei tu chu Pathian a ni. Bible hian thil pathum pawimawh tak tak a sawi a, Thuthlung, Thupek leh Thutiam te an ni. Thupek awi a zawm tute hnenah malsawmna leh vannneihna a tiam a chu chu kan thlamuanna leh lungawina tura thutiam chu a ni. Pathian thuawitute reng reng chu mi lungawi, mi hlim, thlamuanna nun-in a thlenchilh te an ni fo thin. Eg Mery, Josepha,Ruth etc.

3. Beiseina: Kristiante nuna thlamuanna leh lungawina ,hlimna thlentu chu Hmalam Beiseina hi a ni. He hmalam beiseina hi mihringte nunphung pangngaiah pawh a dikna thui tak a awm ,hmalam beiseina a awm tawh loh chuan lungawina te thlamuanna te hlimna te a awm thei thawh lova, Depression neih mai loh chu hmabak a awm tawh lo a ni.

Kristiante chu Pathian thutiam avangin Beiseina nung hmu turin hrin kan ni a, chu chu thawhlehna thiltihtheihnain min chan tir a ani.


He beiseina nung avang hian he khawvelah hian hrehawmna te manganna te tuarna leh thihna te lo thleng thin mah se, rochan chhe thei lo, chuai thei lo, vana kan tana khek hmu turte kan nih thutiam avang hian lungawina leh nun thlamuanna in ringtute a kaihruai thin in Paula chuan thil zawng zawng ah leh thil tinrengah hian nundan thiamna thuruk chu ka hre tawh a lo tih theihna chu. Hei hi kan nihna leh nun chanvo a nih hi kan bosalh a, mangang leh hlau te, thlaphangtea kan awm leh thinna turin Natna leh Hri te buaina kawng hrang hrang hmangte hian hmelma pa hian min tihthaih a tum fo thin. Mahse ringtute hi Krista thawhlehna a zara khawvel leh a chhunga thil awm ten a tihchhiat leh tih chet rualloh ,engmahin a khawih chhiat phak loh nun chang tute kan ni tih hriain kan hrehawm leh tuar lai pawhin lawmin I awm fo vang u ti a Pathian thu in min kohna hi vawiin a kan nun min neitu leh luahtu lo ni mawlh rawh se.

Habakuka chuan, Theipui thing par vul dawn lovin grep hrui rah dawn hek suh seng, Olive thing pawh rah lovin, Lovin ei tur chhuah dawn lo seng, Huang ata ranrual tibovin, Ran in-ah ran awm lo mah seng, ka lawm zel ang Lalpa-ah chuan , Ka chhandamna Pathianah chuan ka lawm cheu dawn a ni, a tih theihna chhan chu khawvelin a tihchhiat theih loh nun a nei a ni tih a hriatfiahna avang a ni , Fakhla siamtu chuan, Thihna te hlau tawp lo turin kan nunna thuhruk a ni. Amah a lan hun apiangah ropuiin kan lang ve ang . a lo tih angin, kan manganna leh buainate a hnen a kan hlan chuan , kan buainate min chinfel sak turin a ni chu rinawmin a awm reng a ni tih I hre reng ang u. Lalpan a thu mal min sawm sak theuh rawh se. Amen.

Pathian fakna hla:- KHB - Khawvel tuifinriat zauvah hian