SERKAWN TUALCHHUNG KOHHRAN

PROGRAMME

PATHIANNI ZING INKHAWM PROGRAMME:

10:00 AM, 20th FEBRUARY 2022

PROGRAMME:

KOHHRAN MEMBERTE HNENA HRIATTIRNA : 20th FEBRUARY 2022

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi leh ang u.
2. Chhungtinin Pathian biakna nung leh tha mahni in lamah kan buatsaih theih nan Thlarau thianghlim awmpuina i dil ang u.
3. Kohhran member tinte Pathian thutak hriatna leh nunpui kawnga hma kan sawn zel theih nan Pathian tanpuina i dil ang u.
4. Kan kohhrana member damlo, a bik takin Covid-19 positive home isolation a awm leh quarantine mek lai te tan i tawngtaisak ang u. Kan khawtlangah Covid case a tam chho ve ta hle a, Pathian tanpuina dil ila, alo ziaawm theih nan i ngen zel ang u.
5. Kan khawtlanga khawhar chhungte tan Pathian thlamuanna leh awmpuina i dil chhunzawm sak zel ang u.
6. Sikul naupang Board exam hmachhawn turte tan i dil sak ang u.
7. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : “ “KRISTA LEH KOHHRAN TAN””

Audio

Naupang pual: Aw le, tukin chu thu dang kan sawi hmain KNP ho tan kan sawi hmasa ang: Hman lai German rama Hitlera’n ro a rel lai khan sipai hotu pakhat Isua Krista leh Kristiante haw em em mai hi a awm a. A nupui chuan nau a lo pai ta a, a hrin a lo hun dawn ta a. An awmna khuaah chuan Kristian Hospital chauh a awm si a. Nau nei tur chuan chu Kristian Hospitalah chuan an in-admit ta a. A nupui pawh chu a pasal ang bawk a Isua Krista leh Kristian haw em em tu a ni. Damdawiin khuma nau nei tura a han mut chuan banga Isua lem tar te chu a hmuh chuan a thin a rim em em a, tar lo turin a hrilh a. “Heng Isua lem in tar hi la thla vek rawh u, ka hmu peih lo. Ka naute lo piang tur pawh hian a hmuh ka rem ti lo” a ti a. Nimahsela, a ngenna chu an tihlawhtling ta lo a. Nakinah chuan naute chu a lo piang ta a. Vanduaithlak takin a mit a lo del sa reng mai. Pathian hian mi nun rawng lutuk leh awm chin tawk hre lote laka tih dan tur hi chu a lo hre khawp mai.
THUCHAH
Thupui: KRISTA LEH KOHHRAN TAN

Aw le, Kohhran hote, in zavaiin Kohhran lu ber Isua Krista, kan Lalpa hmingin chibai ka buk a che u. Kum 2016 April thlaah BCM Office-a thawk turin AICS atangin kan chhungkuain kan rawn pem a. Aizawl-a kan kohhran leh Serkawn kohhran chu an inang lo hle mai. Serkawnah chuan Pathianni tin mai hi inkhawmpui ang maiin kan tam a. A nuam kan ti em em a ni. Tunah chuan AICS lamah bawk kan chhungkuain kan let a lo tul leh ta a. Serkawna kan cham chhung hian kohhran zeizia ka thlirin entawn tur tam tam ka hmu a, ka lawm hle mai. Tukinah hian ka thupui thlan hi KRISTA LEH KOHHRAN TAN tih a ni a. Serkawn khua leh Kohhran chanchin ka chhui hian “Krista leh Kohhran tan” tih hi Serkawn VC, YMA, MHIP, MUP te leh Kohhran hian thupuiah nei theuh reng ila a inhmeh hlein ka hria. Serkawn hi Mission khua/kohhran khua a ni a. Kristianna avang liau liaua awm a ni ve tlat. Uangpui chang suh ila, Bible-a “ka tlang thianghlim” a tih te pawh kha kan nih duh hmel viau mai. Mizo lal awp loh, Kristian Mission awp khua a ni a. Chuvangin Serkawn khua hi KRISTA LEH KOHHRAN TAN-a lo ding chhuak a ni ngawih ngawih bikin ka hria. Khaw tam tak chu khua a nih tawh hnuah kristianna a lut ve chauh a. Serkawn erawh chu Kristianna leh Mission a luh hmain khua tih tlak a ni lo. Lal Isua thisen vang liau liau khaw din a ni tlat a. Lunglei veng dang ang mai mai a nun te, chet te hi kan tan a rem ve lo.

Thil pahnih ka sawi duh erawh chu, in huatthu lo ni suh se la.

Pakhatna chu, Kohhran Commt member-te hi in inzah tawn hle mai a, a that viau laiin kohhran than dan tur anga thang lo khawp hian inzah tawn theih a ni ve a nia. Commt rorelah te hian in in-debate vak na nge aw! Ka ti thin….(ngaihtuahna seng zui tawh mai ila).

Pahnihnaah chuan, kan sawi tak ang khan kan zosapte avang liau liau a, khua lo ni leh chhungkua hial din ta hi kan awm a. Chuvangin Mission sap ho khan min haw san tawh mahse, keini hian kan thlah thei lo. Chu chu kan bat pawh a ni vein ka hria. Chutih lai mek erawh chuan, Pastor Chuautera te, Pastor Zathanga te, Pastor Challiana te, Pi Nuchhungi te, Pu Lalmama te aaa, Upa C. Saizawna te leh midang tam tak, he Serkawn khua leh Kohhran tana mi tangkai leh ban tling kan Mission sapte meuh pawh heng ho tel lova Mission hna thawk chak lo sawt tur te kha..Serkawn ka cham kum 6 (ruk) chhung hian tuman Pulpit atanga in sawi ngai lo erawh chu ka dem deuh che u a ni. Mahni inngainep khawpa midang ngaihsan hi Sap ho duh loh zawng tak hi a ni zawk mah mah lehnghal a sin aw..! ka lo ti thin che u. BMS Mission-ah hian Mizoramah na na na chuan heng kan tualchhung mite hian tangkaina tam tak an nei ve ngeiin ka ring si a. Mission hnaah reng reng chuan Local mi tel lovin hlawhtlinna a awm thei tak tak lo, tih kan hriat fo hi a tha a ni. Hengte hi in zingah ka thuruk vawn reuh reuh a ni a, kan sawi chhuak ta phawng a, in huat thute a lo nih hlauh chuan in mi ngaidamna ka dil nghal pawh ni mai se.

THUHMAHRUAI: Lal Isua lo pian hma, Thuthlung Hlui leh Thar inkar kum 200 emaw chhung zet chu zawlnei thupuan a awm lo. A ruh no no chhuakah ti ang hrimin hmun tin hel an awm a. Hel pawl lian ho bakah suamhmang rual Bandit an tih ho group hrang hrang an tam em em. Chutih laiin sakhuana thilah an in nek luih luih bawk a. Khawvel hi a rumin a rum tak zet a ni.

Sumndawng hausa leh ram roreltu lian an an mi leh sa awm thei tawntaw te, an sawrkar hnathawk liante an in tel khawm a. Chung ram milian leh thiltithei intel khawm chu Crony-capitalism an ti. Mirethei tan chet lak ngaihna hlawl a awm lo.

Chung hun lai chuan Puithiam ho thuneihna leh sawrkar roreltute thuneihna an inzawm, Pathian hre ve si, a thiltihtheihna ring zo hlawl lo sakhaw hruaitute, sakhaw kal hmang a dik thei tawh lo a ni ber mai. Chutiang sawkhaw hruaitu leh ram roreltu lian inzawm chu Ceaeseropapism an ti a. An puithiamte’n an ram hruaitu polotician-te an vuan tlat a, An puithiamte’n rin tur tak an ring zo tawh lo. Eng sakhua mai pawh chuan khawvel thiltihtheihna an thlahlel em em a, roreltu leh thiltithei nia an hriat apiang an thawhpui zel a, Puithiamin puithiam ka ni ti hek suh. An sakhaw rawngbawlna chu sum leh pai hmuh nan chiah an hmang a.

Ram rorelna ni se pa tar pui pui sum leh pai lama huamhap chak lutuk ho leh thuneihnaa riltam hovin ro an rel a. Chutiang ho rorelna chu Gerontocracy an ti a. Chung ho ram hruaitu rawng tak tak vision nei thlawt si lote chuan rorelna an chuh chak em em a. Chung ho chu Snollygoster tiin an ko bawk thin. An value chu Kingdom value ni lovin Earthly value a ni a. Lei lam thil ngaihsannain an khat zo ta. Thuneitu leh roreltu a piangin chak hi an in ti em em a. Hei hi Lal Isua hun lai thleng khan a ni. Tum khat chu, Lal Isua’n Ramhuai Nuaiha a hnawh chhuah pawh khan Lal Isuan enge i hming a tih khan “I am legion” ti ngat duh kha a ni. Chu mi awmzia chu “mi chak thiltithei ka nih hi” tihna a ni thei ang. Heng avang hian suamhmang rual group tam tak an lo pian chhuah phah ta a nih kha.

Aw le, kan ram dinhmun nen pawh a inang thial thial khawp ang. Khang ka han sawi takte kha kan ram dinhmun angah lo ngai mai ula. Chuvangin tun hunah hian KRISTA LEH KOHHRAN TAN tih hi a tul thlawt a ni. Hetiang hian kan sawi ang: 1) Krista leh Kohhran tan heta hi ka awm e, (2) Krista leh kohhran tan thlarauva rawng bawl a pawimawh, tih te mai hi zaninah kan ngaihtuah ho dawn a ni. Chumi kan sawi hma chuan kan thil sawi hmasak tak kha kan chhun zawm leh lawk ang e.

Khati ang dinhmuna khawvel a din mek lai khan kan Lalpa Isua chu a lo piang ta kha a ni a. A ni chuan earthly value (lei lam thil ngaihhlutna) paih thlain kingdom value (van lam thil ngaihhlutna) tun din a rawn tum. Pathian ram a lo zauva, a lo lan fiah deuh deuhna tur leh a lo ngheh deuh deuh theihna turin mahni hrehawm pawisa lovin Kross-ah min rawn thih sak ta kha a ni a.

Chu Lal Isua hnungzui chuan Apostolte chuan rawng an bawl a. An hnu zelah Kohhran Pate an lo chhuak leh ta. Chumi lo kal zel chu tunah hian keini Pastor-te Upa leh rawngbawltute hi kan ni. Pastor leh upate mai ni lovin kohhran member mimir thlarau lam dinhmun a hniam em em bawk. Kristian, Lal Isua hnungzui inti siin sum leh pai kan um a, sum leh pai hnung kan zui a ni ta zawk mah a. Kan zavai mai hian (a chhe zawnga kan thlir chuan) khawvel thila rualawmhna lakah leh khawsak nawmna umin ka phe buai a ni bert mai. Lei lama thil awmah te ni lo, chunglama thil awma kan rilru nghat tlat tura beisei kan ni a. Tunah hian Serkawn Tualchhung kohhran member zingah hian eng zat nge “Krista leh Kohhran tan” ti ngam awm ang i aw?

KRISTA LEH KOHHRAN TAN “HETA HI KA AWM E” (Is. 6: 8) A awmzia: Hebrai tawng chuan “hineni” tih a ni a. Chu chu hineh tih leh ani tih atanga lo kal a ni. Hineh chu ‘heta hi’ tihna a ni a; ani chu ‘keimah’ tihna a ni. Mahse hineh tih tak hi “heta hi” tih ai maha imperative hian a lehlin theih a, chu chu a literal zawk nghe nghe a. Kei chuan a literal translation hi ka duh zawk a. Chutianga kan lehlin chuan a saptawngin ‘certainly or surely’ tih emaw a ni a, a chang chuan ‘behold’ ti pawhin an letling bawk. Chutichuan, ‘certainly leh surely’ tih chu ka la duh zawk fo a. A chhan chu ‘certainly emaw surely’ emaw a kan chhan chuan powerful declaration emaw solemn declaration (tih tak zetin Lalpa tan kan awm tihna a ni), chu chuan ka awmna geographical location mai ni lovin Pathian tana hman theiha buatsaih a kawk nghal a ni. “Krista leh kohhran tan heta hi ka awm e” tia kan chhan chuan a location zawnga ka awm hnaih leh hlat lam ni lovin ‘tak zet, mai mai lo, awm tak tak” a kawk a. Chutiang a nih chuan “Krista leh kohhran tan ka awm tak zet a ni” kan ti thei ang. Tin, chu bakah complete availability a kawk bik bawk. Krista leh kohhran tan ka zavai hian ka awm a, ka engkim hi a in-ready a ni kan tihna a ni. ‘A rawngbawl turin ka zavai mai hian ka inpeih a ni’ tih kan sawina a ni. “Ka pumin” tih aiah “ka zavai” tih ka hman duh kher chhan chu “ka pumin” tih chuan ka taksa pum a kawk bik deuh hian ka hria a; “ka zavai” ka tih erawh chuan ka taksa pum bakah chhungkaw member zawng zawng bakah ka pawisa te leh ka property neih zawng zawng a huam bik deuh hian ka hre bawk.

Chutichuan, tukinah hian Pathianin min hmangaih tih hria a, kohhran mi nihna kan neih hian “heta hi ka awm e” tiin Pathian hnena kan chhan hian “Krista leh kohhran tan ka zavai mai hian ka awm tak tak a ni” tiin Pathian kohna chu tih tak zetin kan chhang tihna a ni.

Tin, he “Declaration” hi (declaration kan ti zel tawh mai ang e), he declaration hi a risk a sang em em bawk a. Ka chungah eng pawh thleng dawn se la “Krista leh kohhran tan hian ka awm a ni” tih a kawk bawk a ni. Hei hi Mosia “hineni” tia Pathian kohna chhangtu chanchinah hian a chiang em em mai a. Chu chu Hebrai Lehkhathawn ziaktu hian mawi tak mai min sawi chhawn sak nghe nghe a, hetiangin, (Heb. 11: 24 – 27 i la chhiar hial teh ang)

KRISTA LEH KOHHRAN TAN THLARAUVA RAWNGBAWL (Marka 14: 38 Thalarau zawngin a peih a, tisa erawh chu a chak lo a ni) The spirit truly/indeed is ready, but the flesh is weak: A saptawng hian Greek Bible-a a lan dan a phawk leh zual deuh a. Kan rawngbawlna hi thlarau lam rawngbawlna a nih avangin tisa lam thilin awmzia teh chiam a ni lova. Chhuan tur pawh a awm hek lo. Tisa thilah tu emaw chu a khawsa thei deuh a ni mai thei, mihring hriatna lamah pawh a lo fing fal deuh pawh a ni mahna, mihring thlarau mamawh pe tak tak theitu chu thlarau veka rawngbawl hi a ni. Tisaa rawng kan bawl chuan kan kohhran activities leh serh leh sang reng reng hi a meaning-ah ni lovin, a form-ah kan kal ral ang a. Chumi awmzia chu serh leh sang, sakhaw thil serh, kohhran thil serh nihna tak tak thleng phak lo, tih danphung ringawta buai leh lungawi hian kan awm ang tih hi a hlauhawm thin a ni. Chu chu Nunna tak thleng phak lova rawngbawlna a ni.

Thlarau chu a inpeih at tak zet a, tisa erawh hi chu a chau mai thin. Tisa chu chak lo teh reng mai e, amah Paula ngeiin heti hian a sawi a ni, “Keini Pathian thlarau zara Pathian bia leh, Krista Isua chauh chhuang leh, tisa chunga rinna reng nghat lotute hi serh tan ho kan ni zawk e” a ti a ni (Philipi 3:3). Heta Paula ‘serhtan’ sawi pawh hi tih dan phung lam ni lovin thinlung lam Pathian tana indah hranna tak tak kha a ni. Kan Bible hian tisa hi chu a dah nep khop mai a, Paula phei chuan thlarau dona tiin a sawi hial a ni. Hebrew concept of basar (tisa) ah chuan tisa chu siam chawp, kum hlun lo, rin tlak loh, mihring leh thilsiam dang reng reng te hi an ni. Greek concept ah chuan tawih thei, ral thei, ramsa nungchang pu, lalna leh thuneihna thlahlel sawina a ni.

Chutiang tih danphung duhtui ringawt leh uluk ringawt te chang chawia rawngbawlna hi Lalpa tan a rimtui thin lo a ni.
Sam 20: 7-ah chuan “Thenkhatin tawlailirte an ring a, thenkhatin sakawrte an ring a. Keini erawh chuan Lalpa kan Pathian hming chu kan lam zawk ang” a ti a ni.
Sam 118: 8 – 9 “Mihring rin ai chuan Lalpaa rinna nghah hi a tha zawk a ni. Miliante rin ai chuan Lalpaa rinna nghah hi a tha zawk a ni” tih min hrilh bawk a.

Zechariah 4: 6-ah chuan, “Chakna ni lovin thiltihtheihna ni hek lovin ka thlarau zawkin le” tih kan hmu bawk.”

A tir atanga BCM leh a bik takin Serkawn Kohhran nih dan tur Sapupa leh Pu Buanga rilrua awm nia ka rin chu:
1. Evangelical Church
2. Missional Church (Ramthim vei kohhran)
3. Praying Church
4. Worshipping Church
5. Politically neutral
6. Socially conscious church

Pathian fakna hla:- KHB No. 507,- 'Aw, vân Thlarau thianghlim lo lêng ang che,'