Aw Pathian nang Lalber i ni,
Kan rilru min en thin;
Engkim kan ruat hi Nangmahin,
I hmu reng thin a ni.

Nangmah i muhil ngai lo ve,
Keimahni min veng thin;

Rilru tha tak min siam ang che,
Lalpa Isua vangin.

I thu thuin kan awm duh e,
I thu nunna a ni;
Chuvangin, min hre reng ang che,
Nangma m ite kan ni.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi leh ang u. Kan kohhranin malsawmna tam tak a dawn thin avangin leh midang tanpui ve thei tura Pathianin min ruat avangin a hnenah lawmthu i sawi ang u.
2. Myanmar a kan unaute buaina namenlo an tawk a, Pathian hnenah an buaina alo fel theih nan i dil ang u. Mizoram chhak lam tlang dunga kan unau raltlante i hre reng ila, Pathianin ringtute hmanga a dinhmun harsa tak atanga a khai chhuah zel nan i dil ang u.
3. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u. KAn ram covid case in ziaawm lam a pan theih nan Pathian i dil ang u.
4. NEICC member 52 (Kohhran 35 leh Pawl 17)-te tan. Kohhran leh Pathian ram tana an mawhphurhnate tha taka hlenchhuaka, kan inpumkhatna vawng nung zela rawng kan bawl ho zel theih nan i dil ang u.
5. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : Lal Isua rawn kal chhan.

Audio

Vawin October ni 17 Pathianni zing lawmawm takah hian, Kohhranhote Lalpa Isua Krista hmingin chibai ka buk a che u. Pathian Biak Inah a huhoin la inkhawm thei rihlo mah ila, Kohhran chhungkuaten Pathian pawlna duhawmtak kan la nei chhunzawm thei zel hi Pathian khawngaihna a ni e. STK Annual Plan-a adah ang khan Baptisma chan Ni atan a ruat kha a ni a, Baptisma chan buatsaih thei rih lo mah ila, tukin hun ka chang hi ka lawm hle a ni. Tukinah hian Lal Isua rawn kalchhan tih thupui hmangin Pathian thuchah kan ngaithla ho dawn a ni.

A hmasain naupang pual angin han thuhma ta ila:

Naupangte u, ramhnuaiah in kal tawh ngai em? In ram kalnaah te chuan sava nalh tak tak te hmuin an hramri mawi tak te in hre tawh thin em le? Tun hma chuan Mizoramah hian nungcha chi hrang hrangte hi an tam em em mai a, ramhnuai a kan kal leh daivah te hian sava chi hrang hrangte hmuh tur an tam a, an hramri mawi tak tak te hriat tur an awm thin a ni. Mahse, thang leh tharte tan a pawithei ang tih ngaihtuah lovin sava veh te an chinga, thangte an kam bawk thin a, sava tam tak tak te an awkin an perh thla a, an that rem ta duak a ni ber mai, tunah chuan hmuh tur pawh an awm ta mang lo, chuvangin tunah phei chuan kan rama nungchate thah a, sava vehte hi sawrkarin a phal tawh lo va, a chhan chu tuna kan rama sava la awm ang angte, kan that rem vek a nih chuan, thangthar zelten hmuh tur an nei ve dawn tawh lo a ni. Vawinah hian chung hunlai (sava veh chin lai) a, pafa sava veh chan chin tawite ka han sawi dawn a ni.

Nikhat chu pa pakhat hi a fapa naupangte kum 10 mi lek hi sava vehin daiah a hruai a, Rahtlan/Khuangthli rah sava in an lo tlana, an lo chiar noh noh mai a, sava chu an lo tam hle mai, hmuhnawm an tiin an pafa chuan an thlir reng mai a, mahse le... sava veh tura kal an ni miau avangin, a pa chuan a han perh ta a, sava an ralkhel a, an thlawhdarh hmain atam thei angber berh thlak tumin a perh ta pawp pawp mai a, a perh thla ta nual mai a ni. A pa chuan, afapa hnenah chuan, “Lo zu char la, ka lo perh thlak belh zel dawn nia” a ti a. A fapa chuan phur takin sava tlate chu char tumin a zu kal a, thing hnuaiah chuan a tei kual a tei kual a, a pa hnenah chuan, “Apa, sava tlate kha ka hmu miah lo, an tla leh lo a ni ang” a ti a. A pa in “Khalaiah khan a ni hlei nem, thlang deuhah khan kal ta che” a ti a, naupang chuan, “A awihin a hnim si a, ka kal ngam lo a lawm” a lo ti a. Sava tlakna lai pawh ni lo, a kal ngamna chin zawlah chuan sava chu zawngin a lo kual a lo kual ve a ni. Naupangte u, chu mipa naupang sava char tur, a tlakna nilova sava han zawn han zawn mai chu hmuh a har duhawm ti rawh u... Sava zu chhar tur chuan kei ni chuan a tlakna hmunah ngei khan, kal harsain hnim deuh mahse kal a ngai a ni tih kan hrethiam vek mai ti rawh u, a tlakna hmunah lo chuan sava char tur a awm lo a ni.

Chutiang bawk chu a ni, nang leh kei suala pilbo mek min chhandama, min chhanchhuak turin Lal Isua hi Pa Pathianin a rawn tir a, kan bona hmunah, kan awmna hmun ngeiah hian Lal Isua hian min rawn kal chilh a ni. Pathian Fapa tan chuan nasa taka inngaihtlawmna atang lo chuan mihring fate zingah, sualah insiama lo kal chu a harsa hle ang. Mahse, min hmangaih em avangin Lal Isua hian hreawm pawh pawi ti lovin, thih thleng a, Pa thu zawmin, nang leh kei sual lak atanga min chhandam a, min chhanchhuak turin a lo kal a ni tih hi kan thupui hian puanchhuah atum chu a ni. Pilatan Isua kha, “Chu lal i ni elo?” ti a, a zawhna chu “Ni e, lal ka ni asin, Thutak hriattir hi kapian chhan leh khawvela ka rawn kal chhan a ni” tiin “Tupawh thutak a mi apiangin ka thu an pawm thin” (John 18:37) a ti hmiah mai a ni.

Thutak(Truth) chu eng nge ni? Pilata pawh khan Isua kha a zawt ngei mai. Thuthlung Hluia Heb.„emeth,emunah’ tih hi „nghehna emaw „Tlo‟ emaw tihna a ni a, Thusawi leh ataka tih inlaichinna sawina tawngkam a ni.(Deut 13:14; Thuf 12:17). Bible hmun thenkhatah „Thudik/thutak‟ tih hi ram awptu leh roreltuin dik tak a ro an rel sawi nana hman a ni bawk. (Ex 18:21; Thuf 20:28). A tam berah chuan mihringte Pathian laka rinawmna leh mihringte laka Pathian rinawmna sawi nana hman a ni. (2 Lal 20:3; Gen 32:10). Thuthlung Tharah: Gk tawng ‘eletheia’ chu thil, a lan dan ang mai ni lo „a tak‟ sawina a ni a, A anpui awm lo thil a nih dan chiah hi a ni.

Thuthlung Thar hian Thudik tih hi hman dan bik deuh chi hnih a nei a:

1. Paula lehkhathawnhoah hian, mihring chhia leh tha hriatnaa Pathian inhriattirna (Rom 1:18, 25); Kristaa Pathian inpuanna (2 Kor 4:2; Gal5:7) te hi Thutak an ni a. Thutak chu Chanchin Tha nen sawi zawm a ni bawk. (Eph 1:13cf 2:5,14)

2. Johana hian Pathian nihna takzia sawi nan „Thutak‟ a hmang a, Isua chu Pa angchhunga mi (Jn 1:18), thutak, tisa a lo chang (Jn 1:14) a ni a, Hei vang hian Isua chu Thutak a ni. (Jn 14:6). A zirtirte chu amah Isua, thutakah awm reng turin a ti a (Jn 8:31) Chu thutak chu Kristiante/ amah zuitu, a zittirte innghahna laipui chu a ni a, Lal Isuan “Thutak hriattir hi ka pian chhan leh khawvela ka lo kal chhan a ni”(Jn 18:37) a lo ti a ni.

Engatinge „Thutak hriattir hi ka pian chhan leh khawvela ka rawn kal chhan a ni‟ Isuan a tih kher le?

Setana‟n mihringte suala a hnuhluhna hmanrua kha Dawt leh inbumna an nih vang a ni. Pathianin huana thei rahte eitura a pek zia leh huan lai taka thing awmraherawhchu„Ineituranilo, tawhpawhintawkturanilo, chutilochuan in thi ang‟ ti a zawhna hmeichhiain a chhanna chu, Setanan, “Thi teh suh e: in ei ni apang chuan in mit a lo var ang a, a chhia leh tha hriain Pathian ang in lo ni dawn tih Pathianin a hre reng a ni chu” tiin dawt thuin bumna thu a rawn sawi ta a ni.

Dawt Thu (Leasing) chu Mizo Bible Dictionary chuan Thutak ni lo, Diabola hnathawh, Diabola tanga chhuak niin a sawi (Jn 8:44; Tirh 5:3; Thup 12:9). Thuthlung Tharah hian Dawt hi a bul chu sual a ni. Isuan chu Thutak, Krista neitu, Kristian nihna chu thil siamthar nihna niin „Thutak felnaa inthuam‟(Eph 4:24)tiin min tarlan sak a. Kolossa 3:9 ah chuan, “Dawt inhrilh tawn suh u; mihring hlui chu a thiltihte chawpin inhlip tawh” tiin dawt inhrilh tawn loh tur thupek kan hmu a, Isua hi Krista a ni tih phattu pawh dawt sawi niin Johana chuan angai a ni(I Jn 2:22). Chu Dawt bumna avanga mihringte sual a hnuhluh a lo nih a, sual bawiha tang tlat, an mahni a in chhandam thei lo leh sual lak atanga talchhuak thei tawh lova boral mai tur chu, Pathianin a Fapa Isua Krista chu rawn tirin, Thutak chuan Mihringte suala hnuk luttu Dawt bumna chu rawn lehthalin arawn hneh tir ta a ni. Chu Dawt bumna chu Thutaka hneh a lo nih theihna turin Lal Isuan, “Thutak hriatir hi ka pian chhan leh khawvela ka rawn kal chhan a ni” tiin a rawn puangchhuak ta a ni.

Lal Isuan khawvela a rawn kal chhan leh apian chhan a sawi hian a Mission chu chiang takin a rawn tarlang a. Dawt, bumna avanga sual bawiha tang mek chhanchhuah te, Nunna nei lo ten nunna thar amah atanga an lo chan theihna turin ama nunna ngei hlan hi a ni. Tirhkoh Paula pawhin I Kor. 15:20-22 ah hian „Mihring avanga thihna lo awmin, Adama-ah chuan mi zawng zawng an thi thin ang hian Adama hnuhnung zawk, Krista-ah chuan mi zawng zawng tihnunin an awm bawk ang‟ tih a lo sawi nghe nghe a ni.

Lal Isua rawn kal chhan hian thil pawimawh tak tak rawn thlen a nei a, kan sawi vek seng lo ang a, kawnghnih chauh han han tarlang ila:

1. A ram a rawn dinthar leh hi (Lal Isua rawn kal chhanin arawn ken tel a ni):

Tirhkohte 17:24 ah chuan Pathian, khawvel leh a chhunga thil awm zawng zawng siamtu chu lei leh van lal a nih thu a sawi a, chu khawvel leh a chhunga thil awm zawng zawng te chu Dawt, bumna hmangin sual bawihah a lo tang a, Bumtu, Diabola, Dawtpa ni bawka chu khawvel lal-ah a lo in siam a ni. Johana 12:31 ah chuan, „Tunah he khawvel hi ngaihtuah lai a ni; tunah he khawvel lal hi paih chhuah a ni ang” a lo tih a hi. Thupuan 11:15 kan en chuan, „Tin, vantirhkoh pasarihna chuan a han ham a, tichuan, “Khawvel ram chu kan Lalpa leh a Krista ram a lo ni leh ta, a ni chuan chatuanin ro a rel ang” tiin vanah chuan aw ring takte a lo chhuak ta nghal a‟. “Kan tan naupang a lo piang a, fapa pekin kan awm ta a: rorelna chu a kokiah a chuang a nga, a hmingah chuan Maka, Remruattua, Pathian chaka, Chatuan Pa, Remna Lal an ti dawn si a. A ram a zau zel ang a, a ramah remnain tawpintai a nei lo ang” (Isaia 9:6, 7) ti a Isaian a lo sawi kha. Marthi nunah pawh hian lo thleng tawh a ni ngei ang. Isuan, “Nung apiangin mi ring chu kumkhuain an thi lovang; chu thu chu i ring em? ti a a zawhna chu “Ring e, Lalpa, Krista, Pathian Fapa, khawvela lo kal tura chu i ni tih ka ring e” tiin a lo chhang thei ta a ni. Ni e, kan Lalpa hian a thilsiam khawvel leh a chhunga awm, sual bawiha lo tang ta mai hi chhan chhuak a, lalet leh a, a lalram rawn din thar leh hi a mission (Lal Isua rawn kal chhan) pawimawh tak a ni. I thinlungah leh ka thinlungah pawh hian lalna hmun rawn chan hi kan Lalpa duh dan a ni a, Kan thinlung te hi a hnenah hlan ila, a lalna i puang thar leh ang u.

2. Chhandamna hnathawh hi (Lal Isua rawn kal chhanin arawn ken tel a ni):
Setana hian a tum ber chu, Pathian do va, a rilru tihnat leh tih hreawm nan a thilsiamte tihkhawloh a, a hmangaih hringfate chunga kut thlak hi niin a lang a, khawvel leh Pathian thil siam dangte leh mihringte hi chu a hmanrua atan min hmang chauh mai a ni. Bumtu, Diabola dawt hmanga mihringte rilru leh thinlung tikhawlo va, an rilru putzia leh sukthlek a tih danglam sak khan, amah chu an thinlungah lalah insiamin sual bawihah an lo tang ta, an mahni duh thu a chhuak leh thei rual an ni ta lo. Chhanchhuaktu, chhandamtu an mamawh a ni. Chu hna chu thawka, chhanchhuak tur chuan Pathian Fapa chauh lo chu tlingzo reng an awm si lo (Thup 5:1-5). Pathianin min hmangaihna avangin a Fapa malneih chhun chu kan tan a pek a lo ngai ta a ni. Chanchin Tha Luka 2:10,11 ah chuan Vantirhkohte‟n rawn puangin, “... Chanchin Tha lawmawm em em ka rawn thlen a che u a ni. Vawiah hian in tan Davida khuaah Chhandamtu apiang ta, Lal Krista chu” a rawn ti ta a nih hi, a va ropui em... Keini hringfate sual bawiha tang, sualin a duh duha a hrual leh awhbeh tlat, keimahni a tal chhuak thei tawh lo. Chatuan boralna a, sualin ahnuhluh mai tur hi Pathianin min chhanchhuak turin a Fapa Lal Isua rawn tir a, Ani chuan kan tan a nunna hlanin min chhanchhuak ta a ni.

Chu Lal Isua, sual ata min chhanchhuaktu chu, lawm taka lo pawma, a thu ang zel a, nung tawh tura kan thinlunga LAL atan pawm a, a hnena kan inpek (surrender) a, kan inhlannaah hian keimahniah chhandamna chu famkimin a lo awm dawn a ni.

A tawpna leh tlangkawm nan Lal Isua khan khawvelah a tih tur leh a lo kal chhan zawng zawng kha ti zovin, a thihna leh thawhlehna thiltihtheihna in chhandamna a rawn thlen a, nunna thar min pe a ni. Pa Pathian hnenah min lo let san ta rih a (I Tim 3 16), nakinah a hnena awm turin min la rawn hruai leh dawn a ni (John 14:3).
Lalpan kan za atan mal min sawm rawh se. Amen.

LALPA TAWNGTAINA.