Alfred Ackley-a chu Methodist Pastor a ni a, California USA-a awm a ni a, mi bote Kristahnena hruai hnaah a tui hle thin. Chutianga hun a hman lai chuan a thu chah ngaithla tute zingah Juda tlangval pakhat hi a awm ve a, chu mi chuan Isua hi a ring tlat lo mai a. “Engvangin nge Juda tlangval pakhat thi tawh chu Pathianah ka neih ang? a ti tlat mai a, Pastor Alfred-a chuan hrilfiah a tum ngial pawhin chu tlangval chuan a awih thei hauh lo mai a. A tuk chu Isua thawh lehna Ni (Easter Sunday) a nih avangin zanah chuan a sermon tur a buatsaih chunzawm a. Chu tlangval thusawi chuan a rilru a tina in a luah khat nasa hle a ni.
A tuk zing(Easter Sunday) ah chuan a radio a han tinung a, a rinloh tak maiin thusawitu pakhat hian “Isua a thawh leh thawh leh loh hian min tibuai ve lo, leiah lo tawih ral mai mai pawh nise, ka tan chuan pawina a awmlo, a thuchah hi a pawimawh ber chu a ni e” tiin a rawn sawi a, Chu thu chuan Pastor Ackley a rilru a ti hrehawmin tina zual tak zet a ni. Zingin khawmah chuan thuchah ropui tak a sawiin chumi zan chuan Isua thawhleh thu chuan a rilru a luah ta tlut tlut a, A kawlawm (pen) a la a, chawp leh chilha Pathian pawlna chang nghalin a rilru a thu lo lang zut zut chu tihian hlain a phuah chhuak ta a ni.
Chhandamtu nung rawng ka bawl, kan zingah a awm a,
Miten engpawh sawi mah se, a nung tih ka hria a;
A zahngaihan ka hmu a,a muanna aw ka hria,
Amah ka ngaih ber lain a hnai reng thin.
A nung, a nung,Krista Isua a nung
Kan leng dun thin, kan inkawm thin
Nunkawng zim takah hian.
A nung, a nung, chhandamna pe turin.
Engtin nge ka hriat min zawt maw?
A nung ka thinglungah,
Tiin a lo phuah chhuak ta a ni. (He hla hi tuna kan Kohhranin kan hman lai. KHB.No.292-na ah hian dah a ni) Pastor Alfred-a chuan Isua tho leh chu nitinin a nunah a takin a chang thina a, chu chu phat tir emaw sawi bawrhban tum eng ang mahse a thinlungah a nung tlat a ni. Hetiang chiah hian Krista thawhlehna tawmpuitute chuan an nunah Krista chu an hrechiang a, an thil hriatah chuan an tang ral raih thin a ni.
Isua Krista thawhlehna hian A zirtirte leh a hnung zuitute tan beiseina nung a siam sak a ni. Lal Isua an zuia kha khatia mulapho taka a khenbeha a awm tak avang khan an beidawngin a lungngai tak zet a ni. A tho leh tih an hriat khan beiseina thar a pe a, chakna a thuam tharin an lo awm ta a ni.(Matthaia 28:8) Keini pawh vawiinah hian beiseina nung neiin leiah rawng kan bawl mek a, he lei chatuan tling lo hi, kan chhuahsan hunah Krista tho leh chu kan la tawk dawn a ni tih hre chungin beiseina nung nen kan hun kan hmang mek a nih hi. (Chutianga Krista beisei tlat tute Lalpa’n min tichakin min thlamuan zel rawh se)
Lal Isua thawhhna hi thihna avangin a lo awm a, chutichuan thihna chu thawhlehna hmahruai a ni tih kan hre thei awm e. Kross a mualpho taka khenbeh kha pumpelh ni ta se, Krista chu ropui taka kaihthawh a ni kher lo vang. Hei hian a entir chu keini pawh hi tholeh nuna kan nun dawn chuan kan mihring hi a thih a ngai a, kan tisa duhdan kan tih hlum ngam hian Krista chu keimahniah nungin a lo inlar thin a ni. Hei hi tirhkoh Pawla chuan tihian a sawi a “Tisa dana in awm chuan in thi ngei tur a ni. Amaherawhchu taksa thiltihte Thlarauva in tih hlum thin chuan in nung ang” tiin. (Rom 8:13)
Isua thawhlehni hi kan tihdan phung pangngaia urhsun taka kan hman zel(celebrate) hi a tha. He ni pawimawh takah hian zawhna pawimawh tak chu, tho leh nun tawmpui tur chuan ka mihring hlui hi a thih a ngai a, tlansan tur awm apiang kan tlansan ngam a ngai a ni. Krista thohlehna hla te hlim taka sain, a thawhlehna chungchangte tui takin sawi thin mah ila, kan nuna Pathian duhloh zawng kan seng luh reng a, kan sim chuan si loh chuan Krista chu keimahniah tho leh a inlarin hmuh theihin a awm ngai dawn lo a ni.
Khawvelna leh tisa thil chi hrang hrang kan paih a kan malmak ngam zel erawh chuan Krista chu hmuh theihin kan nunah a tho leh anga, Tholeh nun chu mawi takin a lo par chhuak zel dawn a ni.
Krista Tholeha kha Zirtirte leh midang engmaw zat te khan an hmu a, an lawm em em a ni tih Bilble-ah hian kan hmu. Nimahsela, kha ringawt kha a tawk lo a ni tih pawh Pathian thu kan chhiar hian kan hmu thei a ni. An mihringa hriatna khan thui tak a kal tir dawn lo a ni tih Lal Isua’n a hria a, “Jerusalem khua chhuahsan suh u, Pa thil tiam ka sawi in hriat kha lo nghak rawh u” tiin a hrilh a ni. (Tirhkohte 1:4) Isua tho leh hi thiltitheia a lanchhuah dawn chuan Thlarau Thianghlinin min nemngheh sak kan mamawh a, he hriattirna tel lova, mihringa kan hriatna ringawt hi chuan thui min kaltir tak tak thei lova, chuvangin Thlarau Thianghlim zara Kriata a tho leh a ni tih kan nitin nuna nemngheh a a awm hi a pawimawh tak zet a ni.
Thlarau thianghlim tanpuina azara mihring thinlunga Krista chu a thawhleh tak zet chuan hetiang hian a lang chhuak thin.
ISUA CHU:-
Vawiin Isua thawhlehna Ni ah hian kan thinlungah Krista chu a thawhleh theih nan, khawvel thil zawng zawngte paih vek ila, beiseina nen a hmel kan hmuh hun chu thlir tlat ang u. Kritsa tho leh hi kan nunah khawvelna hrang hrang hmanga up lehin a awm theih avangin chutiang thil chi hrang hrang te chu paih bova atana mi thianghlim leh pangpar mawi tak kan ni theih nan Tholeh Krista chu kan zingah hian nungin a awm reng e. Amah chu hmun kian ila, kan thinluna Lal berah I sawm thar leh ang u.
Hla: KHB.No. 292
Lalpa Tawngtaina
NOTE
Chhung tinte kan prog rawn siam mila a hun taka a prog kan lo hman theih chuan a lawmawm hle ang. A ang diak diak kan theilo a nih pawhin mahni chhungkaw tlin leh remchan dan ang zel kha a tha e. Dar a hun pangngai ah Dar 10:00 AM tan thei turin vuak a ni ang.
Tin, Senior B leh pawl dang, zirlaibu mahnia kawlte chuan SS kan kal theih loh laia kan zirturte kha mahni in lamah chhiar ṭheuh tura in ngen bawk e.
Chhungkaw Inkhawm tha taka in neih theih kan duhsak a che u.
Fak rawh u Isua Fak rawh u (4)
A tho leh ta (2)
Ro a rel, kumkhua tawh ang
A tho leh ta (2)
Hawh u i fak ang u
Kan tana tho leh Lal Isua
Easter 2020 - Serkawn Tualchhung Kohhran