SERKAWN TUALCHHUNG KOHHRAN

CHANCHIN THA MI TIN TAN

PATHIANNI ZING PROGRAMME

10:00 AM, 8th November, 2020

PROGRAMME:




Hla sak hona:Khb N0.561. : VAWIIN PATHIAN NI A LO THLENG(Thilpek lakkhawmna)

Audio

VAWIIN PATHIAN NI A LO THLENG

Vawiin Pathian ni a lo thleng,
Amah fak turin kan inkhawm;
Zinga thovin amah kan bia,
Hlim takin lawmna chang kan hria.

Kan sual fo hi thupha kan chawi,
Keinin thu sual kan awi fo thin;
A mi khawngaihzia ngaihtuahin,
Min zuah vangin mak kan ti thin.

Ni ruk chhungin hna kan thawk thei,
Chawlhni amah biak nan a ni.
Amahin thatin min vur zel,
Chutih vangin chawlhni a rel.

Ka thinlungin thu mai maite,
Van lam thu lo chu ngai suh se;
Pathian thianghlim, a ropui nen,
Ngaihtuah rawh se, a pawm tlak hle.

Isua anga thil tha tiin,
Amah anga thu sawi theih nan,
Thlarau thianghlim, Lalpa kan ngen,
Van chawlhnaa min hruai tur nen.

TAWNGTAI RUALNA

    Tawngtaina a Hriat Turte
  1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
  2. Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. Pathianin rem a tih chuan a huhova Amah Biakna hun kan neih leh thuai theih nan Pathian hnenah i dil ang u.
  3. Kan ramri buai chungchang Pathian hnenah thlen ila, Pathian duhdana kan hruaituten fing leh thiam taka ramri chungchanga hma an lak theih nan Pathian hnenah i dil ang u. Kan ram chin dik tak hi kan neih ngei theih nan Pathian i dil zel ang u.
  4. Tunah chuan Covid19 hian Mizoram min lo luh chilh ve tak tak ta a, thihpui leh ICU a enkawl ngai engemawzat kan lo awm ta a. A tuartu te leh an chhungte zawng zawng tan tawngtai sak ila. Tin, community spread hi a nasat zel lohna turin Pathian venhimna dil chhunzawm zel ila.
  5. Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
  6. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
  7. Kan member damlo te Hospital leh mahni in lama in enkawl te tan tawngtai sak ila.
  8. Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.


Sam 103: 1-3: Aw ka nunna, Lalpa chu fak la;
Ka kawchhûnga awm zawng zawngte u,
a hming thianghlim chu fak rawh u.
Aw ka nunna, Lalpa chu fak la,
A thiltih ṭhat zawng zawng chu theihnghilh suh.
Ani chuan i khawlohna zawng zawng a ngaidam ṭhîn a;
I natna zawng zawng a tidam ṭhîn a

Sam 150:1-6: Lalpa chu fak rawh u.
Pathian chu a hmun thianghlimah chuan fak ula;
A thiltihtheihna boruak zau takah khian amah chu fak rawh u.
2A thiltih ropui takte avângin amah chu fak ula;
A ropui nasatzia ang zelin amah chu fak rawh u.
3Tawtawrâwt riin amah chu fak ula;
Perhkhuang leh ṭingṭangin amah chu fak rawh u.
4Khuangtê leh lâmin amah chu fak ula;
Ṭingṭang chi hrang hrang leh phênglâwngin amah chu fak rawh u.
5Dârbenthek ri thûm miin amah chu fak ula;
Dârbenthek ri fiak miin amah chu fak rawh u.
6Engkim, thaw thei tawh phawt chuan Lalpa chu fak rawh se.
Lalpa chu fak rawh u.

Tirh 16:25-26: Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a; tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawl bunte chu a lo inphelh ta vek a.


THUCHAH

THUPUI: “PATHIAN FAKNA”

- Rbt B Singpari

Audio

Kohhran hote Lal Isua hmingin chibai ka buk a che u. Tukinah hian Pathian leh a Kohhran hote leh, kan hruaitute duhsakna avangin thuchah sawi thei a ka awm hi ka lawm em em a ni. Hun harsa covid 19 hripui avangin Biak Inah kan la inkhawm thei lova, mahse chhungtinte mahni in atanga Pathian chibai bukna hun tha kan la nei thei hi Pathian malsawmna kan chan a ni a, Pathian hnenah lawmthu awm rawh se.

Naupang Pual: A hmasa-in Naupang pual lo sawi ila.
Tlangval zaithiam tak lar em em mai Pathian fakna hla sa a rawngbawl thin hi vanduai thlak tak maiin a lei a cancer tlat mai a. Vawi tam tak Doctor hnenah a in entir hnu ah chuan zai a ngai a. A Lei chu tan a ngai ta tlat mai.
Doctor chuan,“I lei hi rin aiin a chhe tawh hle a, tan mai loh chuan i nunna atan a hlauhawm thei a, Chuvangin i zai thei tawh dawn lo a ni” a ti a.
Tlangval chuan pawi tihhmel takin Doctor chu a en a, “Doctor, ka zai leh ang, he leiah hian zai thei tawh lo mah ila, Vanram-ah Ka Pathian Lalthutthleng hmaa ka din hunah ka la zai leh ang” a ti a. Doctor hnenah chuan a lei an zai hmaa vawikhat tal Pathian faka zai leh a dil nghe nghe a ni. Tichuan inzaina roomah chuan Doctor leh nurse te chuan an din hual thap a, thinlung leh tih tak zetin he hla hi a sa a ni.

Immanuela thi zaman, Thisen lui a luang chhuak, Chu thisen lui misualte tan, Sual tlenfaina a ni.

Thil dang aiin i hla mawi ber He khawvel thlan hmunah Nangmah fakin ka zai zel ang Nangin min chhandam a.

Kum rei lote hnuah chuan chu tlangval fel tak chu a dam zo ta lova. A pa vana mi hnenah chawl turin leh mi thianghlim dangte nena a sak chak em em chatuan Lalber fakna hla sa turin a tel ve ta a ni. Vana kan tih tur he leiah hian tihtheih tlemte chauh kan nei a chu chu Pathian faka zai leh lam hi a ni awm e.

Tukin a kan thupui tur chu ‘Pathian fakna’ tih a ni.

TV ah te, chanchin bu ah te thil chi hrang hrang sumdawngtuten an fakna kan ngai thla thin a,Thenkhat chu fak mawi chawp ngai, an nihna aia tha zawka an fak kan hre thin. Tukin a kan thusawi tur erawh hi chu fak tur dik tak Pathian fakna a ni. Kan fak avanga mawi leh nalh a ni lova, kan fakna chhan dik tak zawk erawh chu fak tlak, chawimawi tlak Pathian a nih vang zawka fak tur kan ni. Fak leh chawimawi tur dik tak chu kan Pathian chauh hi a ni.

Pathian hi engvanga fak tur nge kan nih?:
Mihringte hian Pathian fakna tur chhan tam tak kan nei a, chung zinga thil then khat lo sawi ila:

1.Siamtu a nih avangin kan fak ang: Gen bung 1 ah chuan Pathian chu thil siamtu a ni a, a thilsiam chi hrang hrangte kan hmu a, Lei leh van, chhun leh zan, Boruak zau takte, Khawmual leh tui, thlai leh hnim, Ni leh thla leh Arsi, tuichhunga cheng zawng zawngte, Van boruak a cheng nunna neite, Khawmuala awm ransa zawng zawngte siamtu a ni a, Keini mihringte pawh hi a ma siam kan ni. Thil zawng zawng siamtu a nih avangin Chawimawi leh fak tlak Pathian a ni a. A thilsiam zawng zawngte hi min enkawla, hlauhna hmunah pawh min vengin min thlamuan thin a, min thlahthlam ngailo. Kan Pathian hi Engkim siamtu a nih avangin a siam mihringte hian a hnena lawmthu sawi chunga fak hi kan tih tur a ni.

2.A ropui em avangin kan fak ang: Sam 96:4 ah chuan“Lalpa chu a ropuia nasa taka fak tur a ni” tih kan hmu, Pathian ropuizia hi mihring hian a sawi chhuak thiam lova, a hre fiah phak zo lo. Van boruak zau takte, van dum pawl ruihte khi han thlir ila, Pathian kut chhuak ropuizia a lo lang thin. Van chungsanga ni leh thla, Arsi pe tuar maite, Planet tam tak mahni kawng theuh zawha an kalte, chhum mawi leh nalh tak tak, Khawmual hring nuam em em maite leh tlangsang tak tak han hmuhte khian Pathian ropuizia hi a chiang zual thin. “Vante Khian Pathian ropui zia chu a hriattir a, boruak zau tak khian a kutchhuak chu a lantir thin a”.(Sam 19:1) Thiltithei ropui leh thilmak ti thin Pathian a ni.
Tunlai Khawvel finna leh thiamna sang em em mai awmhmun atang theuhva khawvel thilthleng engkim kan han hre zung zung theite hi Mihringte kal tlanga Pathian ropui zia inpuan chhuahna a va ni chiang em. Kan Pathian ropui zia hi engkim hria, engkim chunga thuneitu, hun leh hmun pawhin a tihdanglam ve theih loh dik taka roreltu a ni. Chutiang taka Pathian ropui kan neih avangin a hnenah lawmthu i sawi ang u.

3.PathianThianghlim anih avangin kan fak ang: Pathian nihna ropui tak chu Pathian Thianghlim anih-na hi a ni. PathianThianghlimna hmaah chuan sual leh bawhhlawhna hian hmuna changlova. Amah ah chuan engkim in hawng leh lang tlang vek a nih avangin A hmaah chuan kan tlin lohnate kan fel lohna te kan sualna zawng zawngte chiang takin alanga engmah thup theih a ni lo. Chutiang Pathian chu nimahse misual-ten a lam kan hawi a, sima a hnen kan pan chuan min lo ngaidamin min tithianghlim thin a, kan sualna zawng zawng a fapa Isua Krista thisena min tlenfai saktu a nih avangin a hming thianghlim hi fak mawlh mawh tur kan ni zawk a ni. “Nangni in thianghlim tur a ni, Kei ka thianghlim si a’.(1 Pet 1:16) Pathian chuan a siam mihringte hi ama tana in vawng thianghlima, a duh zawng a nunga, a hman theih tur leh Amah nena leng dun turin min duh a ni.

4.Chhandamtu a nih avangin kan fak ang: Pathian kan fakna tur chhan dang leh-ah chuan min chhandamtu a nih avangin kan fak ang. Pathian hian taksa chhandamna min pe a ni mai lova, kan Thlarau min chhandam a, a va lawmawm em! Kan taksa leh Thlarau chhandamna Isua Krista-ah min pek avangin Lalpa chu fakin awm rawh se. Mi sual bo hnu van khua leh tui min chantir a, kan khawlohna zawng zawng min ngaidama nun thar min pe a ni.

5.Thil tha tin reng min tihsak avangin kan fak ang: Pathian-in thiltha min tihsak hi a tam em em a, chhiarsen a nilo. Sam ziaktu chuan “Aw ka nunna, Lalpa chu fak la, a thiltih that zawng zawng chu theihnghilh suh” a tia. Lal Davida chuan “Aw Lalpa that zia hi tem chhin ve teh reng u” a ti bawk a ni. Lalpa thatna hre chiangtu leh temchhin tam apiangte hian Lalpa hnenah bang lovin lawmthu an sawi thin.Lalpa hian Khawvel ah nu pumchhung atangin min pianchhuah tir a, kan nitin mamawh ei leh in, silh leh fen, chenna tur in, chhungkua, thenrual-te min pe a, ei leh in theiin min siam a, thil tui leh tui lo hre theiin min siam a, ava lawm awm em! Kan thlarau mamawh khawvela kan awm chhung atan leh Chatuan daih nunna min pe a, chu chauh ni lovin Kohhran min pe a, rawngbawl theihna hun min la siam sak a, atana thilpe theiin min siam a, Amah chibai bukna hun thate min la hawnsak a, A va lawmawm em! kan tana a thatna zawng zawng avangin Lalpa hi i fak zel ang u.

Engtin nge Pathian kan fak ang?

1)Kan nunin: Nuna Lalpa fakna chu Pathian tiha nun pumpui Pathian tana hlan hi a ni kan ti thei ang. Biak in chhungah Pathian fak leh chawimawi a har lo mai thei, mahse pawnlam mi hmuh phak lova kan awm laite, kan eizawnna hmunahte, sumdawnna hmunahte kan lehkha zirna hmunahte Pathian fak leh chawimawi hi ringtute nun dan tur pawimawh tak a ni. Khawi hmunah pawh awm ila, eng hna pawh thawk ila Pathian kan chawimawiin kan fak thei. Mari chuan “Ka nunin Lalpa a chawimawi e” a ti a, kan nuna Pathian kan chawimawi theihna turin fimkhur takin nung ila, Pathian chawimawi tu nge kan niha Pathian sawichhetu tih i in enfiah fo ang u.

2)Khuangte leh lam in, Music chi hrang hrang hmangin: - Rimawi chi hrang hrangte hi Thuthlunghlui hun atangin Pathian Fak leh chawimawi nan an lo hmang thin a, lamin Lalpa an fak a, Lalpa chunga an lawmna lantir nan Lalpa hmaah an lo lam thin. Lalpa bawm Davida khua a luh lai khan Davida chu a lawm avangin Lalpa hmaah a lam tih Bible in min hrilh. Pathianin Israel te Tuipuisen a hruai kai khan an lawm em em a, Zawlnei Miriami ten khuangte leh lamin Pathian an fak a.“Israelte fakna ah Lalpa a cheng thin” angin Keini pawhin Lalpa kan fak hian kan hnenah Lalpa a lo cheng a, hla thute hian nasa takin kan thinlungah thu a sawi a, Lalpa nena inpawlna tak tak a lo awm a, kan hnenah Lalpa a in puang thin.

Tuten nge Pathian fak ang: Sam 148 Lalpa faktu turte Bible(Sam) in a sawi hi tlem lo tarlang ila: 1.Vana awm hote: Vantirkoh zawng zawng leh a sipai zawng zawngte, Ni leh thla, Arsi zawng zawngte, Vansangte leh Van chunga tui te Lalpa fak turin a sawm a ni.

2.Leia awmte: Dragon leh tui thuk zawng zawng te, Mei leh rialte, vur sur leh chhumte, thlipuite tlanglian leh tlangte te, thing rah duh leh Sidar thing zawng zawngte Lalpa fak turin a sawm a bawk a ni.

3.Khawmuala awmte: Ramsa leh ran zawng zawngte, Rannungte leh chungleng savate, Leia lalte leh, mitin rengte, Miliante leh leia roreltute, nula leh tlangval, Putar leh Naupangte thlengin Lalpa fak turin a sawm a ni. He khawvel leh a chhunga awm zawng zawng leh van chungsang taka awm, Pathian thil siam zawng zawngte hi Amah fak turin a sawm vek a ni.

4.Engkim thaw thei tawh phawt: Sam ziaktu hi a duh thawh hle mai, engkim thaw thei tawh phawt chuan Lalpa chu fak rawh se- a ti tawp mai a ni. Chutih a nih chuan He khawvela nunna nei zawng zawng ate ber atanga a lian ber thleng in, kan thiam emaw thiam lo emaw pawh ni se, kan theihna sang bera Lalpa fak leh chawimawi hi kan tih tur a lo ni.

Lal Davida chuan “Aw ka nunna, Lalpa chu fak la, Ka kawchhunga awm zawng zawngte u, a hming thianghlim chu fak rawh u” a ti a, kan taksa peng hrang hrangte pawh Pathian fak turin an awl thei biklo a ni. Pathian in nunna min pek hlu tak kei mahni a a awm chhung hian Lalpa hi Fak mai tur kan ni. “Thlan hian a fak thei lo che a, thihna hian a chawimawi thei hek lo che”(Isaia 38:18). Thlan piah lamah tumahin Pathian an fak thei tawh dawn lova, kan dam lai ngei hian Lalpa hi i fak zel phawt mai ang u.

Pathian Fakna ah thiltih theihna a awm;

a)Zanlaiah Paula leh Sila te Philipi tan-in a an tan khan an tawngtaia, hla sa a, Pathian an fak a, tichuan thawk leh khatah lir nasa in a lo nghing a, tan in lungphum lamte chu a nghinga, kawngkhar zawng zawng a in hawn vek a, mitin kawlbun a in phel a, a tawpah tang vengtu leh a chhungten Baptisma an chang a, Pathian an ring a, an chhungin an hlim ta em em a ni. (Tirh 16:25-34). Pathian fakna ah thiltih theihna, danglamna a lo thleng thin.

b)Lal Saula ramhuaiin a tihbuai khan David’an tingtang a la a, a tumsak a, Ramhuai chuan Saula chu a chhuahsan thin. (1 Sam 16:23). Pathian fakna hmunah ramhuaite pawhin hmun an chang lova, an tlan chhe zawk thin a ni.

D.L Moody ‘an America State pakhat a Crusade a neih naah ‘Krista rawn pan la bo rei duh lovin’ tiin mipui an zai thup thup a, Pathian rawngbawltu tiduhdah thin leh Bible pawh halral tawh tlangval pakhat-in an hlasak a hriat chuan a thinlung a hneh em em a, In khawmnaah lutin a tlar hnung berah a thu a “A hmangaihna aw nem chuan a ko che” tih lai takah chuan Pathian hnenah inchhira in lamletin a pian thar ta a ni. Pathian fakna hian nun danglamna a thlen thin a ni.

India rama Missionary EP Scotta chu Pathian thu hrila a zin kualnaah hnam mawl tak mi thah hmang rual, fei keng a tawk a, tih ngaihna a hre lova, a Violen a phawr a “Lal Isua hming i fak ang u” tih hla hi a tum a, mak tak maiin an fei chu an la thla a, an hnenah Pathian hmangaihna thu rin loh takin a sawi theih phah a ni a ani. Music chi hrang hrang leh rimawia Pathian fakna hmunah mite nun a danglam theih zia a lang chiang hle.

Pathian nena nun inzawmna-ah Pathian fakna tak tak a awm thin a, faktu thinlungah chuan Pathianin hmun a chang a, chuta tang chuan Pathian chunga lawmna tak tak a lo thleng thin. Thlarau nun tih chaka kan awm theihna pawimawh tak chu ‘Lalpaa lawmna leh Amah fakna’ hi a ni fo.

Fak tur dik tak kan Pathian hi fak ila, kan aw, kan kut leh ke, kan taksa hlan in, kan sum leh pai, kan hun a rawngbawl nan ui lova pe zelin, Lalpa faka kan chawimawi tak tak theih nan kan nun pumpui hi Amah tan i hlan thar theuh ang u.

Lalpan a thu kan sawite malsawm rawh se.



Hla sak hona: KhB No 71: “AW ROPUI BER HALELUIA !”

Aw, ropui ber, Haleluia!
Kan fak a che, Immanuel;
Chawimawina leh lalna zawn g zawng,
Chatuanin i ta a lo ni.

Haleluia! Haleluia ! Amen,
Haleluia! Haleluia ! Amen.

Khawvel hring mi hnam ze tinreng,
Angel var nen lung kan rual e;
I tlanna thisen azarah,
Salem thar tualah kan leng za.

Aw, a thukin a va sang em,
I finna leh i hmangaihna;
Thlarau khawvela rimawite
Leh van tawngten an puang seng lo.

Aw, min hrilh rawh thukna ropui,
Ranthleng leh thing anchhe dawng leh
Vana lallukhum a inzawm,
Lei Eden leh Salem thar nen.



Lalpa Tawngtaina