SERKAWN TUALCHHUNG KOHHRAN

CHANCHIN THA MI TIN TAN

PROGRAMME






PATHIANNI ZING INKHAWM PROGRAMME:

10:00 AM, 7th NOVEMBER 2021

PROGRAMME:




KOHHRAN MEMBERTE HNENA HRIATTIRNA : 7 NOVEMBER 2021

Pathian fakna hla:- KHB No. 507,- 'Aw, vân Thlarau thianghlim lo lêng ang che,'

1 Aw, vân Thlarau thianghlim lo lêng ang che,
Min awmpuia v ênghim thintu kha;
Khawngaihna aw haider thin mah ila,
Sual tuipuia kan pil min phal suh la.

Vâkvai leh kal bo tate,
Hnehna puang chhuak thei lo hliam tuar m êkte,
Hruai kîin kan tidam zo si lo,
Tlaini l ên a har ngei e, i tel lo chuan.

2. Vân hmangaihna pâr tlâna l êng hnu pawh,
Sual vânga rûm châng ni tawn châng hian,
Auvin i lam hi kan lo hawi zêl dâwn,
Kan lam hawiin chakna thar min siam rawh.,

3. Kohhrante hi thawkrim thin mah ila,
Nangman i duhzawng min zirtir rawh;
Kawng dik emaw kan tih dik lo si hi,
Rinna mitin min hmuh fiahtir ang che.

4. Aw, Nang chatuan Lalpa, i tel lo chuan,
He leia ro sum leh engkim hian,
Rolpuina leh awmzia rêng a nei lo,
Kan chakna leh lâwmna i lo ni e.



TAWNGTAI RUALNA

    Tawngtaina a hriat turte
  1. Vawiin thlenga Pathian malsawmna leh venhimna kan chan avangin lawmthu i sawi leh ang u. Kan kohhranin malsawmna tam tak a dawn thin avangin leh midang tanpui ve thei tura Pathianin min ruat avangin a hnenah lawmthu i sawi zel ila, midangte tana malsawmna ni ve thei turin Pathian hnenah i inhlan thar ang u.
  2. Chhungtinin Pathian biakna nung leh tha mahni in lamah kan buatsaih theih nan Thlarau thianghlim awmpuina i dil ang u.
  3. Kohhran member tinte Pathian thu zir leh hman dik kawnga hma kan sawn zel theih nan Pathian tanpuina i dil ang u.
  4. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u. Kan khawtlangah Covid case a tam chho ve ta hle a, Pathian tanpuina dil ila, alo ziaawm theih nan i ngen zel ang u.
  5. Kohhran leh a hnuaia Fellowship hrang hrang Plan & Budget siam alo hun dawn hnai a, Pathianin kohhran min hruaia duh dan ngun taka Pathian rawn chunga pawl tinin kan hriatchhuah theih nan i dil ang u.
  6. Kan thawhlawm, inkhawmna leh keimahni Pathian hnenah I hlan ang u.

Thufingte 24: 11-12
Thi tûra hruaite chu chhan chhuak la,
Thah mai tûrte chu chhan chhuak thuai rawh.
“Ngai teh, hei chu ka hre lo,” i tih mai chuan,
Thinlung bûktu chuan a ngaihtuah dâwn lâwm ni?
I nunna vawngtu chuan a hre dâwn lâwm ni?
Mi tin an thiltih ang zêlin a rûl dâwn lawm ni?
Luka 19 :10
Boralte zawnga chhandam tûrin Mihring Fapa hi a lo kal a ni rêng a ni,”

.
Chuvangin, a hun têah chuan a chawimawi theihna tur che uin Pathian kut chak tak hnuaiah chuan intihnuai ula, anin a ngaihsak ṭhin che u avangin in manganna zawng zawng ama chungah nghat vek rawh u.






THUCHAH

Thupui : “Mi Bote Krista Hnêna Hruai”

- Upa Lalrinmawia

Audio



Kohhranhote kan Lalpa Isua Krista hmingin chibai ka bûk a che u. Vawiin hi ‘Khawvêl Sunday School Ni’ a ni a. Thupui atân “Mi bote Krista hnêna hruai” tih thlan sa a ni a. Bible chhiar tûr te, thu chhiar chhuah tûrte dah sa a ni bawk; Chumi zûlzui chuan tukinah hian hun kan hmang dâwn a ni. Pathian Thu Thianghlim i lo ngaithla ang u.

Thufingte 24: 11-12 : Thi tûra hruaite chu chhan chhuak la,
Thah mai tûrte chu chhan chhuak thuai rawh.
“Ngai teh, hei chu ka hre lo,” i tih mai chuan,
Thinlung bûktu chuan a ngaihtuah dâwn lâwm ni?
I nunna vawngtu chuan a hre dâwn lâwm ni?
Mi tin an thiltih ang zêlin a rûl dâwn lawm ni?

Luka 19 :10 : Boralte zawnga chhandam tûrin Mihring Fapa hi a lo kal a ni rêng a ni,”

Thu chhiar chhuah tûr :

Baptist Church of Mizoram, Christian Education Department thil tum 4 zinga point hmasa ber hi kumin Khawvêl Sunday School Ni-ah hian thupuiah hman a ni a. Hei hi kan Kohhran thiltum lian ber pawh a ni.
“Mi bote Krista hnêna hruai” tih hi kan Sunday School thil tum pakhatna a ni a. Beginner pâwl atanga Baptisma an zir chhûngin tihhlawhtlin ngei ni thei se kan ti a ni. Zirtirtu atân pawh thlaraubo vei mi inruat thin ni se, kan zirlai naupangte chu Baptisma pâwl thleng an zir tawh chuan Krista hnêna hruai ngei an nih kan beisei tlat a ni.

Vawiin thlenga Kohhran mi tam takte Zû leh Drugs ngawlvei kan tih thin te, sualna dang corruption leh hmeichhiat mipat thua pawisak nei lo taka kan awmna chhante hi, naupang kan nih laia Krista hnêna hruai thlen kan nih loh vâng ni berin a lang. Thi tûra Setanan a hruai bo mêkte hi Krista hnêna hruai thlen an nih ngei theih nân Kohhran pawhin tawngtaina nên tan kan lâk a pawimawh êm êm a ni.

Khawvêl huap pawha mi hlawhtling leh mi lâr tak tak, Oswald J.Smith te, Billy Graham te, John Wesley leh mi dang tam takte pawh naupan laia piang thar an ni. Sunday School din chhuaktu Robert Raikes leh zirtirtu hmasa Pi King-i te pawhin Factory leh Industry-a hlawh tlêm tê tê pea naupang chhawr thinte chu Pathianniah sâwm khâwmin, Krista chanchin tha an zirtir thin a. Naupang tam tak Krista ke bulah an hruai thleng ta rêng a. He rawngbâwlna hi Mizoram Baptist Kohhran Sunday School pawhin a din tirh atanga vawiin thlengin a la chhunzawm ta zêl a ni.

Lal Isuan, “Boralte zawnga chhandam tûrin Mihring Fapa hi a lo kal a ni rêng a ni,” a tih hi kan Kohhranah a lo hlawhtlin zêl theih nân theih tâwp i chhuah theuh ang u.

Naupang pual:
Thawnthu sawi tûr hi ka hre lo thei khawp mai a. Chuvângin keima thil tawn ngei pakhat ka’n sawi leh mai teh ang.

February 9-12, 1984-a Rabha Baptist Union Silver Jubilee hmanpui tûrin Bazar Bial Zaipâwlte chu Debitola-ah kan hotuten min tîr a. Hâwn lam chuan Shillong lamah Bus-in kan hâwng ta a. Shillong-ah Baptist House-ah riah a, a tukah All India Radio-ah hla record a, Mizorama lo hawn chu kan tum dan a ni.
Thim hlimah Shillong kan thleng a. Laimu (Laitumkhrah) traffic point kawng thuam laiah chuan kan chhuk ta a. Baptist House chu kan Biak in atanga Damdawi in ang vêla hla saw a ni mai thei e. Kan insingsik vêl chhûngin thian thenkhat bengvârin chûng laia mite chu Baptist House awmna an lo zâwt hlawm a. Putar pakhat fel deuh mai hi kan tawng fuh ta a, chu chuan kawng chin hria intiin min hruai ta a. Mahni Bedding kan pu a, mahni bag kan ak theuh bawk a. New Colony lamah, Women College awmna lamah khuan min hruai ta a. A tawi zâwngin sawi ila, kan kal... kan kal ta mai a. Kei, Baptist House lo hre tawh awmchhun, a thlente pawh lo thleng tawh ni mah ila kei aia ‘confi’ deuh mai khân min hruai a, “a ni tawh êm êm lo,” ti mah ila sâwt tawh hek lo, a tâwp a tâwpah chuan ‘Polo Ground’ an ti a ni âwm e, chumi bula CBCNEI (Council of Baptist Churches in North East India) khualbûk chu kan thleng ta hlawl mai a. Naga nu fel tak hi a lo awm a, “In duh chuan in riak thei ang, âr ka talh ang a, ei tûr ka siamsak ang che u,” a lo ti a. Mahse kan tumna a nih loh avângin thut pawh thu muang lo chuan kan lêt leh a. Zân rei tak hnuah chuan kan Baptist House tak tak chu kan thleng leh ta a. Kawng chin hre lovin min hruai avângin Shillong thlasik khaw vawt hnuaiah thlansa phûlkaiin a tâwp a tâwpah kan thleng thei âwrh a nih chu. Sawi chhâwn leh pawh zahthlâk, hrehawm si, hahthlâk si, kan thin hi a rim tûn vek mai a, kawngbo chu pawi tak a ni.

Vânrama kal hi duh vek mah ila a kawng dik taka kan kal loh chuan kan duh lohna zâwk hremhmunah kan thleng dâwn a, kîr leh theih a ni tawh lo vang. Hripui avângin Sunday School kan kai tha thei rih lo va; Pathian zârah kan kal leh theih hunah chuan Vânram panna tûr kawng chin hria, min kawhhmuh theitu Sunday School zirtîrtuten min zirtir tûrah ngai ila, kawng min kawhhmuh chu ngun taka ngaithlain pawm tlat ila, Vânramah hlim takin kan la awm dâwn a ni.

NTute nge mi bo chu?:

Tûkinah hian “Mi bote Krista hnêna hruai,” tih thu kan sawi dâwn a. Tute nge mi bote chu tih hi kan hriat phawt a tûl a ni. Awm lohna tûra awm, kal lohna tûra kal, thlen tumna lama kal lova a ni lo lama kal tlatte hi mi bo an ni a. Mi bote chuan kawng kawhhmuhtu leh hruaitu an mamawh thin. Pathian Thu chuan, “Kan za hian berâm angin kan vâk bo va, mahni kawng kawngah kan pêng theuh a,” tiin Isaia 53:6-ah chuan mi bo kan nih thu min hrilh a. Pathian hnên kan thlen leh theihna tûrin Lal Isua chuan, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo,” tiin Johana 14:6-ah chuan mi bote tâna hruaitu awmchhun, pan tûr dik leh kalna tûr awmchhun chu Amah chauh chu a nih thu min hrilh leh bawk. Lal Isua hnêna kan kîr leh theihna tûr te, mi dangte hruai kîr lehtu kan nih theihna tûrtein kawng-kal mumal nei taka Pathian Thu zirna Sunday School hi kan ngaih pawimawh a tûl takzet a ni.

Sunday School thiltum:

Mizoram Baptist Kohhran Sunday School hian thil tum pawimawh tak tak 4 a nei a. Hêngte hi a thuphunga târ chhuah mai mai a ni lo va, a hlawhtlin ngei theih nân kaihhruaina mumal tak pawh a nei vek a ni. ‘Mi bote Krista hnêna hruai’ tih hi Beginners pâwl atanga Baptisma pâwl an zir chhûnga zirtuteah hlawhtlintîr ngei hi a tum a ni. ‘Mihring dik tak ni tûra buatsaih’ hna hi Intermediate kum 3 emaw an zir chhûnga chu chi nung chu tuh ngheh tlata, mihring dik taka an puitlin chhoh theihna tûra buatsaih hi a tum a ni. Nula leh tlangvâl Senior ‘A’ zirlaite chu Kohhran mi dik tak ni tûra buatsaih hi Sunday School chuan a tum a ni leh a. Senior ‘B’-a zirtu nula tlangvâlte leh nu leh pa, kum lamah pawh puitling zâwkte chu Pathian thu dik taka pawmtîr leh hman thiamtîr hi Sunday School chuan a tum a ni.

Hêng Sunday School thiltum 4-te hi a mal tê tê pawha pawimawh tak a nih theuh rualin, a inkawp tlâng vek a, mi pakhatah hian hêngte hi a hlawhtlin hian mi bote Krista hnêna hruaina kawngah pawh kan hlawhtling tih theih a ni ang. Department bil deuh kan han târlante hi pa-pêk emaw, bûr bun ngawt emaw theih erawh chu a ni lo. Miin Senior B-ah pawh zir mêk mah sela, Thlarau lama mi bo, Krista hnêna hruai thlen ngai a la ni thei tho va, mihring dik tak ni tûra la chhawm fê ngai a nih theih tho bawk. Chutiang zêlin Junior emaw Baptisma pâwlah emaw an awm lai atangin Kohhran mi dik tak ni tûra zirtir a tûl tho va, Pathian thu dik taka an pawma, an hman thiam a pawimawh êm êm tho a ni. Chuvângin hêng Sunday School thiltumte hi a vai hian Beginners atanga Senior ‘B’ thlengin ngaih pawimawha, hemi tinzâwn râna Sunday School hi kan kalpui a pawimawh a; chutih rualin Sunday School hi “Ka pass tawh, ka zir chhuak tawh,” tih awm thei lo, kan dam phawt chuan kan bânsan miah loh tûr a ni tih kan hriat reng a tûl a ni.

Mi bote Krista hnêna hruai an nih theih nân hian thil tûl leh pawimawh sawi tûr tam tak a awm thei ang. Vawiin hi Sunday School Ni a nih angin Sunday School hmanga Mi bote Krista hnêna hruai an nih theihna tûr kawng 2 chauh sawi ila:

1. Zirtirtu atân Thlarau bo vei mi: Headquarters atanga thuchah kan chhiar chhuah tâkah khân, “Zirtirtu atân pawh thlaraubo vei mi inruat thin ni se, kan zirlai naupangte chu Baptisma pâwl thleng an zir tawh chuan Krista hnêna hruai ngei an nih kan beisei tlat a ni,” tih kha a pawimawh hle. Chanvo insem zai nâna zirtirtua inruat te emaw, ‘Sunday school zirtirtu ni se ama mimal nun pawh a vawng deuh mahna’ tih vânga ruat ni âwm tak te, a thianteho pawh an ni deuh vek si a, tih vâng te emaw, chutiangin thlirna hrang hrang atanga Sunday School zirtirtua ruat hi kan awm thei khawp ang. A pawimawh ber, thlaraubo vei mi tih hi i ngai pawimawh êm êm teh ang u; a bîk takin Baptisma Department hnuai lamah ngat chuan Zirtirtu qualification pawimawh ber a nih a ngai a ni. He laiah hian a fuh chuan kan kohhran hmêl, kan kohhran mamawh leh kan kohhran hmalâknate hi a danglam dâwrh thei ang tih hi a rinawm êm êm a ni.

2. Inbuatsaihna tha nêna Zirlaite hmachhawn: “Kum 1930 hma lamah kha chuan Sunday School hi Evangelism Centre tak takah hmangin mi bote Krista hnêna hruaina hmanraw tha tak a ni thin” tiin ‘Sunday School Thian’ lehkhabuah Rev. PC Liandûla chuan a sawi a. Robert Raikes-a te, Pi King-i te chuan Thlarau bo Krista hnêna hruaina hmanrua atân Sunday School hi an hmang tangkai hle a ni tihte kan ngaithla zo chauh a. Keini chhanah hei hi a dik ve theihna tûr chuan zirtirtute inbuatsaihna hi a that a ngai hle. Engtin nge Isua ke bulah ka hruai thlen theih ang? Engtin nge Lal Isua hi zui tlâk a nihzia ka târlan ang? Engtin nge mihring tha zâwk ka buatsaih theih ang a, Kohhran mi dik tak, Pathian Thu dik taka pawma dik taka hmang thin mi ni tûrin ka buatsaih ang tihte hi tihtak zeta tawngtaina nên, Thlarau Thianghlim tanpuina dîl chungin inbuatsaihin zirtir thei ila Sunday School hmang hian mi bote Krista hnênah hruai hâwnin an awm ngei ang tih hi a rinawm êm êm a ni.

Mi bote Krista hnêna hruai an nih zêl theih nân thuchah kan ngaihthlâk tâkte Lalpan mal sâwm rawh se. Amen.

Pathian fakna hla:- KHB No. 565- 'Pathian Lehkha ka ring e'

Pathian Lehkha ka ring e,
Isua thutak a hril e;
Vân kalna kawng ber a ni e,
Vânah kan lâwn thei e.

Aw Baibul, Aw Baibul,
Ka ngai, ka thlahlel êm e;
Aw Baibul, Aw Baibul,
Pathian Lehkhabu hi.

2. Pathian rilru thûk awmzia,
Kan sual leh mihring chêtzia;
Kan damna pawh a hrilh fiah a,
Thu hlu ber a ni e.

3. Isua Baibul a tha e,
Pathian thilpêk a ni e;
Thiha thawhlehna a hril e,
Nunna thu a ni e.


4. Zâna khâwnvâr êng angin,
I thuin rilru a ên;
Ro tha aiin a hlu êm e,
Thinlungah ka vawng ang.


LALPA TAWNGTAINA.