Dam chhungin i thawk thuai ang u,
Sual leh buaina karah hian;
Nakinah Lal Isua zarah,
Kraun ropui kan chang tawh ang a.
Aw, lei lallukhumte chuan,
Chatuan ram an thleng lo vang;
Pialrala nunna lallukhum chu,
Aw, tholeh faten an khum tawh ang.
Hmanah Eden huan thianghlimah,
Evi leh Adama chu,
Suihlung lai an lo mawl zo ta,
Sualnain a lo tihrang ta.
thawkrimte leh phurritte chuan,
Lui ralah an dah tawh ang;
Nakinah Kanan ram mawiah,
Lungduh nen kan leng tawh ang a.
Kan nghak reng che Imanuel,
Lunggaihna thlalerah hian;
Chhum zinga i lo au lehin,
Kan lungngaihna a bo tawh ang.
Pathian thu chhiar
Eph 1:3-7
Eph 1:3-7
Kan Lalpa Isua Krista Pa leh Pathian chu i fak ang u. Ani chuan Krista zârah vân hmunahte khian thlarau lam malsâwmna tinrêngin mal min sâwm a.
Thianghlim leh sawisêlbova a hmaa kan awm theih nân leilung pian hma khân hmangaihnain Kristaah min thlang tawh a. Ama duhzâwng leh a tum dân ang taka Isua Krista zâra a fa ni tûrin min lo ruat lâwk tawh bawk a. 6Duh taka zâra a khawngaihna thil thlâwnpêk ropui tak min pêk avângin i fak ang u.
Krista thisena tlan kan ni, kan bawhchhiatnate ngaihdamna chu. A khawngaihna chu a va thûk êm!
Gen 12:1-3
“Nang Malsawmna Ni Ang Che” tih he ni pual thupui atan hian thlan a ni. Pathian thu i lo ngaithla ang u. “Tin, Lalpa’n Abrama hnenah, “I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh. Tichuan, chi ropui takah ka siam ang chia, mal pawh ka sawm ang chia, i hming ka tiropui bawk ang; tin, nang malsawmna ni ang che. Tin, malsawmsaktu apiang che chu mal ka sawm ang a, anchhe lawhtu che chu anchhia ka lawh ang; nangmahah chuan leia hnam tin an la thawhveng ang,” a ti a
Khawvela Baptist hote Pathian ram tan tha taka kan thawhho zel theih nan.
Mizoramah Covid 19 vei an tlem zel avangin lawmthu sawi ila. Covid 19 hi a
tlem deuh deuh theih nan.
Kohhranten inkhawmna hun tha kan neih thuai theih nan. Kan ram ringtu
nun hi a inthahdah zel loh nan Thlarau Thianghlim hnathawh dil ila.
Thuchah kan ngaihthlak tur hmangin malsawmna dil ila, kan thawhlawmte
Pathian hnenah i hlan ang u.
THUCHAH
Thupui “NANG MALSAWMNA NI ANG CHE” (Gen 12:1-3)
- Rev PC. LIANDULA
Audio
Thuhmahruai:
Vawiin hi Khawvel pum puia Baptist Inzawm khawmna BWA (Baptist World Alliance) Day a ni. Kum 1905 July thlaah London khawpuia din a ni a, Headquarters atan Falls Church, Virginia, United States-ami a ni thung. Tunah hian ram 126 atangin Kohhran hlawm (Convention/Union) 230 chuang awmin kohhran (tualchhung) 1,77,000 leh Communicant member member 47,500,324 (maktaduai 47 chuang) awmkhawmna a ni. Kum 1978 atang khan BCM pawh member kan ni. Tuna hruaitute chu: President- Thomas Mackey (2020-). General Secretary- Elijah M. Brown. First Vice President- Karl Johnson. Treasurer- Carolyn Fossen, Vice President 13 lai an awm bawk. Coronavirus avangin 2020 khan World Congress thulh a ni a, kuminah hian a hmun ngai Rio de Janeiro, Brazil-ah July thla hian neih tum a ni. BWA hian rawngbawlna peng tam tak neiin, Relief lamah te, Development lamah te, ram leh ram inkara remna palai hnate thawkin mi dangte tan malsawmna a lo ni tawh thin a.
Tichuan, “Nang Malsawmna Ni Ang Che” tih he ni pual thupui atan hian thlan a ni. Pathian thu i lo ngaithla ang u. “Tin, Lalpa’n Abrama hnenah, “I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh. Tichuan, chi ropui takah ka siam ang chia, mal pawh ka sawm ang chia, i hming ka tiropui bawk ang; tin, nang malsawmna ni ang che. Tin, malsawmsaktu apiang che chu mal ka sawm ang a, anchhe lawhtu che chu anchhia ka lawh ang; nangmahah chuan leia hnam tin an la thawhveng ang,” a ti a (Gen 12:1-3)
Thupui sawi hawnna:
He thu hi Abrama hnena Pathian thusawi a ni a, Mizoram kristianten kan sawi uar em em a ni. Malsawmna hi engnge ni ber le? A tlangpuia kan hriat thiam dan chu - Lo neitu buh leh bal a that a, a lo hlawk viau te, Sumdawng a inhralh that theih viau te, Zirlaiin a zirlaiah a tihthat viau te, hriselna tha, duh zawng zawng thawk theia kan awm te hian malsawmna kan dawng kan ti tlangpui thin. Tin, In leh lo tha tak din thei chu malsawmna a dawng kan ti bawk.
Malsawmna tih hi Hebrai thumal Barak (Baw-rahk) tih atanga lo kal a ni a, Genesis 1:22 thuah khan Pathianin a thilsiamte mal a sawm thu kan hmu hmasa ber a. Pathian tha tih zawng leh remtih zawngin malsawmna dik tak chu dawn a ni. Malsawmna Bible-in min hrilh hi Pathian duhsakna leh remtihna te, venhimna te tiin sawi a ni tlangpui (cf. Mal 3:10). Thuthlung thar lamah hian Chanchin tha avanga thlarau lam hamthatna leh material lam hawiin a sawi ve ve (cf. 2 Kor 9:5; Eph 1:3; Heb 6:7). Mahse, malsawmna ka dawng kan tih thenkhat hi chu Pathian duh loh zawng leh tha a tih loh zawng, a remtih loh zawnga kan lak luh leh neihte hi niin a lang si a ni.
Abrahama nun atanga malsawmna ni tura zir tur:
Pathian malsawmna dawng a, mi dang tana malsawmna ni turin engnge pawimawh tih lam hi kan ngaihtuah lutuk lovin ka hria. Abrahama chuan Pathian malsawmna chang a, mite tana malsawmna ni turin Pathian thu chu a dah pawimawh ber a, a kawi a ngilin a zawm a, a ring ngam bawk a, a taka chang turin a chet chhuahpui nghal bawk. Mi dangte tana malsawmna ni turin Pathian thuawih te, Pathian rin ngam te, a taka che chhuak thei tura inpek ngamna te a pawimawh tihna a ni.
Abrahama chu malsawmna ni tura koh a nih lai khan Haran khua atangin a chhuak a, kum 75 mi a ni. Tichuan, Sekem-ah te, Bethel-ah te, Ai khuaah te puan in zarin Lalpan malsawmna ni tura a tiam ram Kanaan a thleng a. Mahse malsawmna ni tura koh a nihna ramah chuan ral do tur tam tak a nei a, tin, tam nasa tak a lo tla a, Aigupta rama pem a lo tul leh ta a. Aigupta ramah chuan a nupui Sari pawh chu Pharoa’n nupuiah a lo neihsak leh bawk si.
Aigupta atanga kir leh hnuah Bethel leh Ai khaw inkara an awm laiin Lalpan a be leh a. Engnge min pek ang? Fa nei lovin ka awm hlen dawn a, ka ro khawmtu tur chu Damaska khuaa mi Eliazara hi a ni si, a ti a. Lalpa chuan, kha mi kha i ro luahtu tur a ni lo, i rila rah ngeiin i ro chu a la luah ang, a la ti ta fan fan a ni. Abrahama chu kum 100 lai a ni ta. A nupui Sari pawh chu kum 90 lai a ni tawh bawk. An tan hian malsawmna kawl a eng dawn na nge tih mai turin a beidawnthlak awm e. Keini ni ve ta ila, beidawngin kan kir leh ang a, kan nun chu a chhe hle ang tih a rinawm.
Pathian malsawmna chang a, mi dangte tana malsawmna nih theihna kawng hi tuarna leh hreawmna tam takin a bawm a. Mahse chu kawng chu rangkachak laichhuahna lamlian anga hlu ni si a ni thung. Abrahama nun atang hian malsawmna hi hamthatna, vanneihna, nihlawhna leh hmuingilna a ni ngawt lo tih a lang a. Chungte chuan min tinain min tihrehawm fo zawk thin. Mahse mihringin malsawmna ka dawng kan tih thinte hi an lo ni lawi si.
Abrahama’n malsawmna ni tura a ngaih pawimawh ber chu Pathian thu a ni. Chhuak la, tih order a hmuh tawh chinah chuan a nu leh pa, u leh nau leh laichinte a ngaihtuah tawh lo. Pathian thu a hriat chu tihlawhtling turin a che chhuak nghal mai a ni. Pathian thu kan hriat, kan chet chhuahpui leh si lohna hian malsawmna dawng tur leh mi dangte tana malsawmna ni tura Lalpa’n min kohna hi kan tithlawn mai thin a lo ni.
Tuarna phena malsawmna:
Pathian duh zawnga tuarna hi rinna leh kristian nun zir chhuahna duhawm ber leh tha ber a ni a. Pathian kan rinna tehna hi thiltihtheihnaah ni lovin tuar theihnaah a ni zawk. Davida hlaa mi dangte tana malsawmna leh thlamuanawm tak takte chu tuarnain a sawr chhuahte an ni. Unaute u, “Tuna i thil tawn mek, na taka nektu che pawh kha mi dangte tana malsawmna ni tura Pathian kuta hmanrua, chatuan atana chher thatna tur che leh mi dangte tana malsawmna hnar a ni thei,” tih theihnghilh suh. Pathian lam dana malsawmna ni si, mihring tana tuarna leh thil tha lo anga lang, na taka lo thleng a awm thei. Chutiang chu a lo thlenin anchhia a ni kher lo.
Bible-a mi ropui ber berte hi mi dangte tana malsawmna an nih theih nan Pathianin a tikehsawm thin asin. Pathian laka an zawr hnep hnuah malsawmna vurin an awm a, mi dangte tan malsawmna an ni thin. Jakoba pawh a chakna thapui tihchhiat a nih a, na taka khawih a nih hnuah malsawmin a awm. Keini erawh chuan tuarna chhe te a lo awm a, kan peih lohsan mai a, harsatna a lo thlenin kan zuai leh mai a, tahna leh lungngaihna a lo thlenin kir leh duhna kan nei mai thin. Pathian hian a mite malsawmna vur zel hi a ui lo tih (cf.Zak 8:13) kan hria. Mahse chu malsawmna chu chang turin a thu kan awih a, kan ngaih pawimawh leh kan pawisak a ngai. Hei hi malsawmna kan dawn a, “Nang malsawmna ni ang che,” tih thupui tihhlawhtlinna tura Pathian thutiam pawh a ni e.
Nang malsawmna ni ang che:
Malsawmna ni tur pawhin malsawmna dawn kan tum dan thinlung hi kan dah dik a ngai. Dik lo taka sum lakluh duhna te, mi dang chanvo neihsak mai hnial lohna te, thuneihna dik lo taka hman duhnate kan nei em? Chung chu malsawmna dawng tur leh mite tana malsawmna ni tura daltu lian tak a ni. Abrahama chuan Pathian thu a dah lal ber a, a fapa mal neih chhun Isaaka hlan tura a tih pawhin a hlan mai a. Pathian thu angin a chhet chhuahpui leh mai a ni. Malsawmna chu chutah chuan a inphum a, mi dangte tana malsawmna ni tura a pawimawh lai tak a ni tih chu a hria. Keini pawhin chu chu kan hriat reng a tul a. Pathian ring tlat chunga mi dangte tana inphalna thinlung neiin “Nang malsawmna ni ang che” tih hi kan thinlungah lo nung reng rawh se. A tawp berah chuan ngaithlatu zawng zawngte mi dangte tana malsawmna ni theuh turin Lalpan malsawm che u rawh se. Nang malsawmna ni ang che.
Lalpan a thu malsawm rawh se.
: KHB No 506. “A mak mang e, Van Lalber chuan”.
A mak mang e, van Lalber chuan,
Inngaitlawma hringmi a chan lai khan,
Nuamsa thei khan hrehawm tinreng chu tuarin,
Ranthleng leh kraws maw a lo thlan le!
Hmangaih luat vanga inngaitlawmin,
Hrehawm leh thihna a rawn thlang ta;
Hmangaih ten malsawmna an chan theih nan,
Hmangaihtu'n a tuar a tul si thin.
A hniakhnunga kan zui ve nan,
Entawn tur amahin a hnutchhiah kha;
Mi dang tana malsawmna lo ni turin,
Keiini pawh kan tuar a tul ngei ang.
Hmangaihna famkim a lang thin,
Engkim huama tuarna hmunah hianin;
Lal Isua i hmangaihzia lanna turin,
Engtia nasa nge i lo tuar ve?
