SERKAWN TUALCHHUNG KOHHRAN

PROGRAMME

PATHIANNI ZING INKHAWM PROGRAMME:

10:00 AM, 6th JUNE 2021

PROGRAMME:

KOHHRAN MEMBERTE HNENA HRIATTIRNA : 6th JUNE 2021

Inkhawm Hruaitu: Tawngtaina

KHB No. 560 “Chawlhni Lalpa, kunin ngai la

Chawlhni Lalpa, kunin ngai la,
I inah kan leng, i niah;
Kan biak tlawm hi lo lawm ang che,
Kraws zarah rimtuiin chho se.

He lai chawlhni i pek mah hi,
A t hlen hun hian kan lawm hle si;
I mite tan erawh hi chuan,
Chawlhni ropui i ruat, vanan.

Chutah kan fak ri aw zingah,
Rum a tel tawh lo'ng, engtik mah;
Chawlhni kar dang a leng tawh lo'ng,
Chatuanin Chawlhni a ni fo.

Biak in bik pawh a awm chuang lo,
Chu chu Pathian leh Beramno;
Pathian ropuiin a eng si,
Khawnvar pawh Beramno a ni.

Chawlhni Lalpa, hei kan duh e-
Lei hi i Tempul ni vek se;
Ni naran reng hi i biak ni,
Kan thawh ri hla chang se kan ti.

Audio

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi ang u.
2. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
3. Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
4. Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
5. Covid 19 avanga thi chhungte tan te, a bik takin kan kohhran rawngbawltu pawimawh tak tak kalsan tak chhungte tan.
6. Lockdown kan hmachhawn leh dawn a, fimkhur tak leh thuawih taka kan awm thiam theih nan.
7. Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
8. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : I pianna ramah haw leh rawh

Audio

Kohhran member zawng zawngte kan Lalpa Isua Krista hmingin chibai ka buk a che u. Vawinah chuan “I pianna ramah haw leh rawh” tih thupui hmangin Pathian thu kan ngaihtuah ho dawn a. Keimahni theuhah Pathianin he thupui hmanga thu a sawi theihna turin rilru tawngtaina nen kan ngaithlain, kan chhiar dawn nia.

Naupang Pual: Elija leh Zarephath hmeithai

Hmanlai hian Israel rama Zarephath khuaah hmeithai rethei tak leh a fapa hi an awm a. A fapa neih chhun a ni a, a duat hle mai a. Mahse, vanduaithlak takin hun rei tak ruah sur lovin khua a kheng a, an ramah chuan tam a tla ta a. Chumite nufa pawh chuan ei tur an neih chhunte chu an ei zo tep tawh a. Tuk khat chu chhangphut vei khat leh sahriak tlemte chauh an nei ta a. Naupang nu chu an ei tur neih chhun siamna atan thing fawm turin a chhuak a. Chutia thing a fawm lai chuan pa pakhat hi a rawn kal a. Chu pa chuan hmeithai hnenah chuan tui in tur a dil a, tui in tur lak sak tura in lama a kal tur chu ei tur chhang rawn keng nghal tur chuan a chah leh ta mai a. Hmeithai chu lungngai takin a ding a, chhangphut vei khat lek leh sahriak tlemte chauh an neih tawh thu te, chumi siamna tura thing fawm a nih thute leh an ei zawh huna a fapa nen thih mai an hmabak tawh turte a hrilh a. Chu pa chuan an chhangphut neih chhun chu siam sak a, rawn ken sak turin a ti leh zel a. Mahse, lei chunga ruah a rawn sur hma loh chuan an chhangphut bel leh sahriak um chu a ruak dawn lo tih a tiam ta thung a. Hmeithai chuan chu pa chu zawlnei ropui tak Elija ani tih hre lovin, a thil sawi chu a thleng dik dawn nge, dawn lo tih hre lo mahse phal takin an ei tur neih chhun chu siam sakin a pe ta a.

Tichuan, Elija sawi ang ngei chuan an chhangphut bel leh hriak umte chu ruak lovin, a khat zel ta a ni. Riltama thi mai tur hmeithai leh a fapa chu an thilphalna leh khawngaihna an neihna chu an tan malsawmna niin, an dam khawchhuah phah ta a ni. Tun laiin khawvel leh Mizoram ngei pawhin hun harsa tak kan tawk a. Mi tam tak hna thawk thei lovin an awm a, ei turte an tlachham a. Naupang tam tak chu an nu leh paten an thih san a. Hetih lai hian Pathian khawngaihna changa nung dama la awmte leh ei leh in tur la neite hian midang tan kan neihte ui lova harsa zawkte tanpui tur kan ni tih hi hre thar leh ila. Mizoram chhunga naupang thenkhatte pawhin an duhzawng leina tura pawisa an khawlte chu tanpui ngaite tan an pe chhuak a ni. Kan Kohhrana naupangte pawh midangte tana kan luang chhuak tawh thin angin midangte tan luang chhuak zel ila, keimahni ngei tan pawh malsawmna a lo ni dawn a ni.

Thuchah:
Genesis bung 28 atang bung 31-a kan hmuh angin Jakoba chu Suria mi a pu Labana hnenah kum engemawzat a awm a. Pathian malsawmna dawngin nupui pahnih leh fa engemawzat a nei a. Khang lai huna hausakna an tehna ran rual tam tak a nei bawk a. Mahse, chutia hausa taka a awm lai chuan Pathianin “a pianna rama haw leh turin” a rawn ti ta tlat a ni. Malsawmna tam tak dawngin nuamsa hle mahse, chung a hausakna leh khawvel thilte chuan malsawmtu Pathian hmel hliahin, buaina neuh neuh a lo nei ta a ni. Tin, Pathian thutiam amah kaltlanga hlen chhuah a lo nih theihna turin mi ram atang ni lovin, bul a tanna Kanan ram ngeia kir leh turin Pathianin a duh a ni mai thei bawk.

Tunlai kan hun tawn covid19 hripui leng mek hi a rapthlak hle mai a. 2nd wave phei chu kan tuar nasain BCM pawhin kan mi chhuanvawr ber berte kan chan a, rilru a na vawng vawng anih hi. Chutih lai chuan khawvel thil chhia te, thil hmuhsitawm te leh thil awmlo te nen lama hmang theitu Pathian chuan he hripui hmang hian ringtute min zirtir tur engemaw a nei a ni ang tih ngaihtuahna a lo awm a. Mihringte ropui kan intiin, thiamna leh thiltih theihna a lo sang ta hle a. Mahse, ropui ve ta viaua kan inngaih lai hian engmah kan nih loh zia a lang chiang hle. Natna hrik hmuh tham loh chuan ram ropui berte titlawmin, a damdawi tak tak tun thlengin hmuh chhuah a la ni lova. Invenna tha ber pawh thil tlawm leh nep ber anga ngaih: kut silte, mask hman leh inhlata awmte an la ni zel a. Natna laka invenna hmanlai ber leh bul thut (basic) mimal invawn thianghlimna (personal hygiene) ah kir leh a lo tul ta a ni.

A bul tanna (basic) hi thil pawimawh tak a ni. Lehkha zirnaah te, infiamna leh rimawi khawvelah te hlawhtling tak tak tur chuan a basic man fiah a, bul tanna dik leh tha neih a tul thin. A lera thuai chu a tlo lova, hman tlak tak tak a ni ngai lo. Thlarau nunah pawh hian bul tanna emaw pianna dik a pawimawh a, chumi kan bul tanna leh pianna chu kan theihnghilh lova, ringtu nun leh rawngbawlnaah kan bul tanna dik kha a tawp thlenga min kaihruaitu a nih a pawimawh. Tichuan, Covid 19 hmang hian Pathianin kan thlarau nuna kan bul tanna(basic) a kir leh turin engte nge min zirtir tih tlem lo tarlang ila:

1. Mimal nunah:A hmasa berah chuan mimal hian Krista neitu kan ni em tih hi a ni. Krista nei si lo hian thui tak rawng a bawl ve theih a. Kohhran, Fellowship organization, zaipawl leh para church-ah te thahnemngai taka inhmang si hian Krista kan neih loh chuan kan rawngbawlnate a thlawn mai niin, “ka hre ngai lova che” tih tur zinga mi kan lo ni palh ang e. Covid19 avanga heng kan inhmanna hrang hranga kan inhman theih loh lai hian mahni inngaihtuah ila, Lal Isua nei si lova rawng kan lo bawl ve anih chuan kan thinlung Lal atan sawmin a hnenah i inhlan ang u. Tin, Lal Isua neitu leh ringtute pawh hian he hun hi inenlet nan hmang ila. A huhovin ringtu tha tak angin mihring ngaih chuan kan lang mai thei. Mahse, Pathian nena fianriala inpawlna leh inlaichinna nung nei si lo leh chhungril nuna inthlahdah tak hian kan lo kal thui fu mai thei. Social media ah te pawh thil ho mai mai thui tak tak chhiar peih si, Pathian thu post chhiar peih lo, ringtu leh rawngbawltu te pawh kan lo ni mai thei. Pathian chuan Ama anpuiin, Amah nena leng dun thin turin mihring a siam a(Gen1:26,3:9). Pathian min siam chhan anga nung lova chhungril nuna khawro tak kan nih chuan tun hunah hian kan piannaa kir lehin Pathian nena nun inzawmna nei leh turin ringtute leh rawngbawltute inhlan thar ila a va lawmawm dawn em. Tin, Pathian chuan amah chibai buktu te chu thlarau leh tih takzeta chibai buk turin a duh a(Johana 4:24), chutiang tho chuan a rawngbawl naah pawh. A huhova Pathian chibai kan buknaah te, zaipawl anga fakna hla kan saknaahte, Biakina kan lam chhuahnaah te, tawngtai inkhawm kan kalnaah te, Pathian ram thila kan committee naah te hian Thlarau leh tih tak zet, thinlung thianghlim pua heng rawngbawlna te hi kan hlen chhuah thin a pawimawh. Kan inkhawm leh theih hunah chuan kan pianthar tirha kan rilru ang; Pathian hmangaihna tak tak nena amah chibai buk a, a fakna hlate sa thei turin kan thinlung tun hunah hian i hlan thar ang u.

2. Chhungkaw nunah: Kristian chhungkua tha tak tak awm mahse, Mizo society ah hian chhungkaw nun ngaih pawimawh tawk lohna hi thil langsar tak pakhat a ni awm e. Chaw ei ho hlei thei lo, chhungkuaa tawngtai hona nei mumal thei lo kan awm nualin a rinawm. Chutih laiin chung chhungkaw member te tho chu khawtlangah leh Kohhranah te, a fel ber leh thahnemngai ber angin kan lang leh lawi a. A bulthut kal kan a, a lera thuai ang tho kha a ni. Kan fate kal kana rawngbawlna hrang hranga inhman zawh te hi a fel lova, thalaite pawh inchhungkhur lam ngaihtuah lek lova kan chhuak nasa lutuk hi Mizo thalaite hri vei tha lo tak a ni. Kohhran leh khawtlanga inhmang thei lovin Covid19 hian min siam ta a, he hunah hian chhungkuaa chawhlui kilho tawh ngai lote, tawngtai ho thei lote, chhungkuaa titi hona hun hmang tha thei lote hian chhungkuain kan pianna Lal Isua ke bulah kir leh ila. Nupa inkarah te, nu leh pa leh fate inkarah te, unau inkarah te inkungkaihna tha min neih thar tir leh sela. Tichuan, he hripui a lo reh hunah pawh chu chu chhawm nun zel tum ila, a va lawm awm dawn em. Chhungkaw tha kan neih phawt chuan khawtlang, Kohhran leh ram nun a lo tha dawn a ni. In leh lo tha te, hna tha te, lirthei te leh incheina zawng zawngte aia pawimawh hmasa zawk chu Lal Isua lalna chhungkua kan din thar leh hi a ni.

3. Kohhran nunah: Mizoram Kohhran hrang hrangte leh headquarters angte pawhin Pathian malsawmna ropui tak kan dawng a, hna pawh kan thawk nasa, a lawmawm hle mai. Amaherawhchu, Jakoba a lo hausa ta viau a, malsawmna a dawn nasat lai taka Pathianin a pianna rama haw leh tura a tih ang khan malsawmna tam tak dawngtu Kohhrante hi kan pianna-a kir lehna tur chhan a awm thei ang. Tualchhung Kohhran leh headquarters te pawh Pathian malsawmna dawngin tunhma ngaihtuah kha chuan kan dinhmun a lo tha ta viau a. Sawrkar leh khawtlang pawhin Kohhran chu an zahin Kohhran thu chu ngaih pawimawh a ni zel a. Hetih lai hian malsawmtu Pathian aiin a malsawmna kan dawnah te hian kan rilru kan lo pe nasain, kan lo inham buai palh ang tih a hlauhawm hle. Covid19 avangin kan Biakin te khar a lo ngai a, Kohhran Office hna leh ramthima rawng kan bawlnate pawh a hma angin a kal thei ta rih lova. He hunah hian kan dinhmun leh kan rawngbawl dante inen let ila. Rev. H. Hrangena(L) thusawi ka la hriat reng chu BCM Rahsiveng Biakina a sawi a ni a; “Lal Isua hi tunah lo kal ta se kan Biakin ropui leh ropui loh chungchang te hi a ngaih pawimawh leh min fakna tur nih ka ring lo. Kan Kohhran hian kan member zinga thlarau bo te kan vei em? chanchintha hril kan ngai pawimawh em? Missionary engzatnge kan tirh chhuah a, chung hmang chuan thlarau bo engzatnge Pathian hnena kan hruai? tih lam hi a hriat duh leh Kohhran nung kan nih leh nih loh a tehna tur a nih ka ring” a ti a. A dik hlein ka hria, kohhrante hian Lal Isua ngaih pawimawh lam aiin keimahni ropuina leh intih phuisuina lam hi sum kan sen tam zawkna leh kan rilru luah khat tu zawk a lo ni palh ang e. Tualchhung Kohhran, Headquarters Office leh kan Institution hrang hrangah te hian kan Kohhrana te berte hi an tlangnelin, an zalen em. CMC, Vellore khu a changtlungin Asia rama private Medical College tha ber a ni a. Chutih laiin Hospital luhna Main entrance chu simple tein, mi tupawh an tlangnel theihna turin hman laia an siam tawh kha an la ring reng a. A luhna bulah chuan khulai hnam ho chin thin mombati te an lo chhi thliah a. Han luh chiah hian reception hmun simple tak a lo awm a, chuta tanga hmuh leh luh mai theih turin Chapel a lo awm nghal a, Chapel pawh chu mitin tlangnel theih turin ropui lo tak a ni a, side hrang hrang atanga luh theih niin englai pawh hian inkhawm emaw tawngtai emaw hi an awm reng a. A langa ropui bur lovin chhungril lam hriat chian poh leh CMC Vellore hi a changtlunzia a hriat tulh tulh a ni. <

Kan Kohhran member harsa ve tak tak te pawhin Pathian hmangaihna avangin an neih chhun te te Kohhranah an rawn chhung lut thin a. Heng kan unaute a te ber thlenga tlangnel taka an rawn tlukluh theihna tura kan rilru lo hawn bakah kan hmunhmate pawh kan buatsaih thiam a tul a ni. Roman Catholic Kohhran kehna chhan pawh kha an lo hausa ta lutuk a, Kohhran hruaitute an lalin, mi hnuaihnung zawkte aw nei thei lova rahbeh an ni a, sum lamah tlanin chhandamna hial lei theiha an siamte kha a ni. Chuvangin, Kohhranin malsawmna kan dawnte pawh hi fimkhur taka kan hman a, keimahni lam intihlenna tur ni lovin Pathian ram zauna leh mite tan malsawmna tur a ni tih Kohhrana mawhphurhna changtute hian kan hriat zel a pawimawh hle a ni. Tin, tunlaia Kohhran hrang hrang rawngbawlnaah hian kan pawl emaw Kohhran emaw hamthatna tur anih vanga thil mawi vak lo leh dik tawk lo pawisak loh palh awm thei lakah pawh kan fimkhur a, Lal Isua duhdan a ni ang em? tih ngaihtuah chunga hma kan lak thin a pawimawh fo ang.
Thupuan 2:1-5 naa Ephesi Kohhranho hnena Lal Isua thuchah kha kan tan a la pawimawh reng: Kan thiltihte, kan thawhrimzia te, misual kan ngaihtheih lohzia te chungchangah min fak mai thei. Chutih rualin Hmangaihna hmasa ber bansan lovin, sim tur kan neih chuan simin, tluksan kan neih chuan tungding leh ila. Lal Isua ngaih pawimawhte ngai pawimawh a, a tir a kan hmangaihna vawng nung a, kan thil tha tih thin te kha ti leh turin Kohhrante hian rilru kan siam thar leh a pawimawh a ni.

Awle, mimal, chhungkua leh Kohhran te hian keimahni dinhmun theuh ngaihtuah let (evaluate) ila. Kan pianna Lal Isua Krista hnenah kir leh ila, in siam that kan ngaihna laite insiam tha ila. Ringtu nun kawng kan zawhna leh rawngbawlnaah te he hun tha lo anga kan ngaih hi thlarau lam malsawmna kan dawnna hun atan i hmang theuh ang u. Pathianin kan thu ngaihthlak/chhiar te mal min sawm sak theuh rawh se.

KHB 261 “Isua neih ka duh zawk, ro hlu ber aiin”