SERKAWN TUALCHHUNG KOHHRAN

CHANCHIN THA MI TIN TAN

PATHIANNI ZING PROGRAMME

10:00 AM, 6th December, 2020

PROGRAMME:




Hla sak hona:Khb N0. 400 . : Hneh theih loh nun ka nei(Thilpek lakkhawmna)

Hneh theih loh nun ka nei

Hneh theih loh nun ka nei,
Lal Isua min pek kha;
Hmangaihna nun thianghlim,
Hneh zel tur nunna chu.

Isua tan rinawmah ka inpe,
Amah ringin, amah ringin;
Ka hmangaihna ka rawn hlan e,
I tan tifamkim rawh.

Hneh theih loh nun ka nei,
Khawvelin do mah se,
Chapo leh heknate,
Hneh zel tur nunna chu.

Hneh theih loh nun ka nei,
Rinhlelhna thlipuiin,
Ni tin min nuai mah se,
Lallukhum ka chang ang.

Haleluia! Fak r'u,
Hnehtu Lal ropui chu;
Chatuan ral hma loh chuan,
Hnehtu a ni zel ang.

TAWNGTAI RUALNA

    Tawngtaina a Hriat Turte
  1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
  2. Kan chhungkua Pathian hnenah i hlan thar ila, A kaihhruaina a intuluta Amah nena lengdun thei turin Thlarauthianghlim tanpuina i dil ang u.
  3. Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
  4. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
  5. Khawhar chhungte leh kan member damlo te Hospital leh mahni in lama in enkawl te tan tawngtai sak ila.
  6. Kan hma lawkah ringtute hunpui Krismas kan thleng dawn a. Kum dang angin kan hmang theilo maithei. Mahse Pathian hruaina kan chan a, he krismas ah hian Pathian awmpuina kohhran hoten kan chan theih nan kum dang zawng aia hlawk zawka kan hman theih nan i dil ang u.
  7. Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.


Tirhkohte 4 : 13
Petera leh Johana huaizia chu an hmuhin, lehkha thiam lo leh mi mâwl mai an nih an hriatin, mak an ti hle a; Isua hnêna awm ṭhîn an ni tih an hre ta a.



Matthaia 5 : 14-16
“Khawvêl êng in ni e. Tlângchhîpa khaw awm chu thuhrûk theih a ni lo. Miin an khâwnvâr chhit chu khovin an khuh ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn. Chutiang bawkin in êng chu mi hmuhin êng rawh se; chutichuan, in thil ṭha tihte an hmu ang a, in Pa vâna mi an chawimawi thei ang.




THUCHAH

THUPUI: “‘Isua hnenah an awm tawh tih an hre ta a.’”

- Rev Lalremsiama Ralte

Audio

THUHMAHRUAI
Kohhran hote Krista Isua hmingin chibai ka buk vek a che u. Khawvel pumpui leh kan ram ngei pawh boruak thalovin min tuam mek a. Kohhran leh Sorkarte pawh kan nih tur ang ni thei lo leh kan tih tur ti thei lovin hun rei tak kan awm ta. Vawiinah hian kan boruak tawn mekin ka thinlunga a hrin chhuah thuchah sawi ka duh avangin, thupui atan leh kan ngaihtuah ho atan, Tirhkoh Petera leh Johana ten hmelma leh dodaltute hmaah huaisen taka Isua Krista tana rawng an bawl laia an kamchhuak, an hmel leh khawsazia an hmuh leh an hriat avanga lehlama tangte an hneh dan mak tak, Biblein a record na tawngkam – ‘Isua hnenah an awm tawh tih an hre ta a’ tih thu hi ka han thlang chhuak a ni.

RINGTU NUN DANGLAM LEH THILTITHEI
Kohhran pakhata thu ka sawi tumin, pulpit chunga thuziak intar chu ka hmu a, ‘Isua kiangah engkim a danglam thin’ tih a ni. Vawiin thlenga ka theihnghilh theih ngai loh thu a ni ta nghe nghe. Petera leh Johana te hi anmahnia awm leh thawhpuitu Thlarau Thianghlim zara nun danglam leh thiltihtheihnaa thuamin an awm a; chu ngei chuan amah khengbettute hmaah Isua Krista a rawn chawimawi ta a ni. Isua kianga awm nun danglam neitute an nih avangin miin chu chu an hmuh hmaih thei lova. Vawiinah hian chu nun chu heng tirhkoh pahnihte atanga zir chhuah i han tum dawn teh ang.

PETERA NUN ATANGIN
Isua zirtir sawm leh pahnihte zinga thawm na ber leh an ringleader Peteran an man zana Isua a phatsan thu hian sawi a hlawh hle a; Phatsantu Petera tih hming hial te pawh kan puttir deuh thin awm e. Mahse kum 3 chhung zet tuk zana inzui chawt reng na na na chu, he zanah hian Isua Krista zia leh hlimthla chu Petera nunah pho chhuaha awmin, a mualphona phenah hian thil duhawm tak tak, zirtir dangte nuna lang chhuak ve zo lo, sawi pawh kan sawi tam lem loh thuhruk phawrh chhuah tur a awm a ni.

1) Itsiktu leh hawtu hmelma ten Lal Isua an hruai lai khan Petera tih loh midang zawng zawngin amah an thlahthlama, an tlanbosan vek a.( Mk.14:50 ) Puithiam lalber in hual chhung kawtlai thlenga zui ngam awmchhun chu Petera hi a ni. Lal Isua, hmelma kara mal leh khawhar taka awm tur chu lainatin, a tan tih theih dang nei tawh lo mahse, lehhawia a hmuh phak tura hnaiah zankhuain a Lalpa chu a tawiawm tlat a, a thlahfal theilo a nih kha. Chu ngei chu Isua hnena awm tawh thin nun leh amah zawm tlat nun dik tak lo lang chhuak chu a ni

2) Chu hmunah ngei chuan chhunglam leh pawn lam lang theia Isua nun zawm tlattu a nihzia chiang lehzualin a lo lang ta a. Mei alh eng atang ringawt pawhin, a hmel leh inthuamna atangin miten Isua kianga awm thin ngei a ni tih an hai thei ta lo a ni. Petera hian thup tum sa teh mahse a inthup senglo a ni ber mai. Nitina kan chenpuite leh min lo hmu thintu ten an man chhuah loh theih loh tur Isua kianga awm tawh nun hi keimahni-ah hian hmuh theihin a awm ve em le.

3) Hei ai pawha la ropui zawk mah chu, a tawng atangin Isua kianga awm thin a ni tih a bula awm ten an hre thei hi a ni (Mt.26:73). Mi tam tak hi chu Krista ringtu leh Thlarau Thianghlim pawlna chang tawh ngei an ni tih mi ten an hriat theihna tura mahni leh mahni an inpho chhuah viau pawha, mi ten, ‘ Ka awih theilo, a sawi leh tih duhzawngte atang reng hian ka ring chuang lo’ an la tih hramte kan ni fo mai. Petera erawh hi chuan a pha a, a tang na hle na-in, ‘I ni chiang, i tawngah a hriat alawm, i sawi zawngin i nihna a lang’ an ti tlat mai a ni. Engti kawng mahin Petera hian Isua kianga awm tawh a ni tih hi a thup zo ngang lo a ni.

JOHANA NUN ATANGIN
Thuhriltu ten Pathian nihna leh a mize hrang hrangte, a hnathawh leh a thiltih ropuite an sawi thin. Chutih lain tute emaw chuan, ‘Pathian hmangaihna thu leh hmangaih Pathian a nihna lam hi kan sawi uar leh lutuk a. Pathian thikthuchhia, sual hua leh phuba la thin a nihziate hi sawi tam ve tur a ni’ an ti thin. A dika, an sawi sual hauh lo mai. Mahse a tir atangin ka nun hneha, ka thinlung hmintu ber chu Pathian hmangaihna thu hi a la ni reng. Chu chu ka tan hian sawi a nuam a, sawi zawh theih loh leh misualte tana thawnthu ngaihnawm bang theilo chu a ni zel dawn. Khawi hmunah emaw hun tlemte neiin, thuchah tawi leh ka duh ber sawina hun min pe se, sual hua leh ngaitheilo Pathian a nihna aia ka sawi zel zawk tur chu Pathian hmangaihna thu hi a ni thin ang.

Tirhkoh Johana nun thupui ber chu Pathian hmangaihna hi a ni a. Hmangaihna hi Pathian mize duhawm tam tak zinga pakhat ni mai lovin Pathian mize bulpui ber leh ropui ber a ni. Johana hian, Pathian chuan hmangaihna a nei, ti lovin ‘Pathian chu hmangaihna a ni’ tiin a sawi zawk a ni. Chutiang taka hmangaihna Pathian hrechiangtu leh belchiangtu nunah chuan hmangaihna chu nghet taka nemkaia awmin, Hmangaih Johana tih a hlawh phah ta hial a. Isua kianga awm tawhte chuan amah chu an hmangaih tlat a; chu hmangaihna chu an nunah mawi taka lo par chhuakin, mi tan malsawmna rah duhawm tak an chhuah sak ta thin a ni. Kan hming bula Upa, Rbt, Rev, Dr, leh thil dangte dah thei tura mipui thlan kan nihna leh kan sual chhuah ve kan title leh designation te hi a hlu a, a ropui viau lain, a nun ngeiin a chhawm chhuah Johana hming bula khawvelin Hmangaih title an belh sakna dinhmun hi a sang em em a ni.

TUNGE A NI MIN TIH
Tarsis pan tur Lawng, tuifawn leh thlipuiin a nuai a, an mangan em em lai khan, lawng chhungrila muhil Pathian Zawlnei, a kawng lo zawh mek Jona chuan zawhna 5 a dawng a. Chungte chu a mal te te a luhchilh sen a ni dawn lova, kan sawi zau hman lovang. Tuifawn leh thli na tak lo thawk chu tu vang nge, a hnathawh, a khua leh ram, eng mi leh hnam nge a nih mi ten hriat an duh ta a ni. A thlarau lam dinhmunah Jona hi tunlai angah chuan piangthar da leh, chhawr theih lohva tawlhbo leh ta mek ang vel hi a ni awm e. Lawnga a chuanpuite leh a kiang ami ten tunge a nih hria reng reng an awm lo. Isuan a zirtirte hnena, ‘Mi ten tunge a ni min tih’ ti a a zawhna hi keini a hnung zuitu te pawh hian mahni kan in zawh nawn fona tur a ni.

TUN HUN ATAN A PAWIMAWH
Chan chin ngaihnawm lo leh boruak thalo tak takin kan ram a sawi vel a. Mangan thlak taka hripuiin min bawh beh lai hian Zoram ringtute hian kan vela ringlo mite aia danglamna hi kan nei reng em ? Heng hi tu tih nge, eng vanga lo thleng nge, engtia lo hmachhawn tur nge tih hriat tuma khawvel leh a mithiam te an vir buai a, a ngaihna an hriat theih si loh lai hian keini ringtute chuan a chhanna kan nei a ni lawm ni ? Eng anga awmin nge, engtin nge tun hun hi kan hmachhawn chhoh zel ang ? Nitina kan chenpuite leh ral atanga min thlirtu ten, ‘I thuam leh inbel atangte, i hawiher leh chezia atangte, i tawng dan leh sawi duh zawng atang reng hian, Isua hnena awm tawh i ni tih kan hrechiang che alawm’ min tih theihna tur leh, kan chhehvel ami ten, ‘An hnenah Pathian a awm ani’ min tih theihna tura tlangchhipa khaw awm thuhruk theih loh kan nihna hrerengin, tun hi chiang leh fiah zawka enchhuah tuma tan kan lakna hun tur chu a ni e.



Hla sak hona:Khb No 526: Zan alo thleng mek e, muang lovin bei r'u

Zan alo thleng mek e, muang lovin bei r'u

Zan alo thleng mek e, muang lovin bei r'u,
Zam lovin sual ral chu do zel r'u'
Dak la han thlir vel teh, lanu val rualte,
Sualna turin fam a chantir e.

Hnehna puang chhuak rawh u, Lal Isua hmachhuanin,
Boral mekte chhanchhuak thuai rawh u;
Kan hneh ngei dawn a ni, sual thiltihtheihna chu,
Kan hneh ang hnehtu Pathian vangin.

Thlir la kan Zoram hi aw, a pawi ngei e,
Kil tinah sual ral a hrang zual e.
Harh a hun tawh em e, Lal sipai rualte,
Hnehna hla nen ram i la ang u.

He khawvel thim zinga eng atan min tir,
Hlau lovin sual thim i tawn ang u;
Kan Pathian hrin chuan khawvel a ngam zel si,
Rinnain hnehna chu kan chang dawn.



Lalpa Tawngtaina