THUPUI: ‘Li thuk lam pan Kohhran’

1. Thuhma:
Baptist Kohhran hi ‘Mission Kohhran’ tih hming putu kan ni a. Khawvela Chanchin Tha puan darh zel hi kan thupui leh kan buaipui lian ber a ni. A pian tirh phat atangin Mizoram Baptist Kohhran hian hre lote hnena Chanchin Tha hrilh hi a buaipui nghal a, vawin thlengin chu hna chu a la chhunzawm zel a ni. Kum 1949 atangin kum tin July Pathianni hmasa ber hi Mission puala hman thin a ni a. Thawhlawm pawh Tuikuk-Takam zinga rawngbawlna atan a hmang thin. Kum 1975 atangin ‘Missionary Sunday’ tih hming pu-a hman chhoh zel a ni a. Kum 2016 Assembly chuan kan hman dan leh a hming hi inmil zawk turin ‘Mission Sunday’ tiin a thlak leh ta a ni.

Vawina kan thupui ‘Lithuk lam pa Kohhran’ tih kan nei hi tunlai kan hun tawng mek nen pawh hian a in hmeh hle in ka hria. A chhan chu Kohhran hoten programme kan neih thin zawng zawng a tawp a hun khirh tak dinhmuna kan awm mek lai hian lithuk lam pan kan mamawhzia a tilang chiang hlein ka hria a ni. Peterate hian sangha man hi an eizawnna ber a ni a, Genesaret dilah te, Tiberia leh galilee dilahte sangha manin len an deng thin. Hemi tumah pawh hian Genesaret dilah zan khuaa len dengin, zingah vartianah an zingah Lalisua lo kalin an hlawhchhamna leh beidawnna hmunah ngei lo kalin a rawn nangching a ni, Petera tan phei chuan sangha man tur chuan beiseina pakhatmah a nei tawh loving, zankhuain an deng a an hlawhchham kha a ni a, sangha awm duhna lai zawng zawng pawh hre hneh em em thin tu kha a ni a. Nimahsela, Lal Isuan lithuk lama len deng tur a a han tih khan ama lamah chuan beiseina pakhatmah nei tawh lo mahse, thu petu avang chauhin len chu a han deng leh ta a, sangha tam tak lawng pahnih pil lek lekin an chhung khat ta anih kha. Hemi tum hian Petera hi lawma hlim viau awm tak, mahse a lawm mang tlat lo. Lendeng tura thu petu hmaah chuan engmahlo anihzia a inhmu chiang kher mai, Isua khup kiangah a bawkkhupa ‘Lalpa mi kalsan rawh, misual ka nih hi’ ti khawpin ama nun a inhmu chiang ta a, chu veleh Lal Isuan ‘Hlau suh tunah zawng mihring I man tawh ang’ a ti a ni. Sangha man thin tu kha mihring mantuah siamin a awm tan ta a ni.

Li thuk awmzia :
Ka rilrua a lo lan dan chuan BCM thurin kan neih atang hian tehna ka lo nei ve a, chu chu -
1. Pathiam alo zauva
2. A lo ngheh a
3. A lo lan fiah deuh deuh nan kan ti a, chumi tinzawn chuan rawng kan bawl mek a ni.

1. A lo zauva – kan tih hi hi Chanchin Tha puandarhna (Mission rawngbawlna) midangte hnena Chanchin Tha hrilhna hi a ni a. Theihtawp chhuahin missionary te kan tir a, hmanraw hrang hrang hmangin kan bei a ni, thlarau bo pawh kan man na rawh e. Kan Chanchin Tha len den dan erawh kan inenfiah chian hi a ngai ta hlein ka hria. Kan tinzawn (focus) tur ber thlaraubo te an nih lai hian , khawvel lam thil Danchhung khawsak ngaihtuahna lamah te hian len hi kan deng tam ta deuh em? Chutiang chu kan dinhmun hi lo ni tak tak ta se – sum leh pai, in leh lo tha te pawhin min chhanchhuah theih miah loh thil – Covid-19, indo, lirnghing ten min han nanchin chiah hian, kan len thlakna hi li thuk lam a ni ve ngei ngei dawn lawm ni? Petera zankhuaa len denga a hlawhchham hnu khan, thu petu ropui Lal Isua thu ngeia len a han den leh meuh chuan lawng pahnih pil lek lek khawpin an man ta anih kha, chu mai chu a ni lo, mihring mantu qualification thar a nei ta a ni. Tichuan Peteran amah ngei amah ngei lena in man telin, engkim kalsanin Lal Isua a zui ta a ni. Hei hi lithuk model pawimawh tak ni in ka hria.

2. A lo ngheh a – Hemi in a tinzawn ni a ka hriat chu ‘Kohhran mahnia tisa leh thlarauva intodelh dinhmun a ding sawina ni in ka ngai. BCM Kohhrante pawh hi kan lan dan chuan mahnia in todelh dinhmuna ding kan ni thuau vekin a lang. Facilities kan nei tha a, thilpekah kan target kan tlin thei a a bak pawh kan in todelhna point sawi tur tam tak a awm ang. Nimahsela hripui avanga chawlhni vawi 15 vel zet inkhawm thei lova Biak In kan han khar meuh chuan kan nun a nguai rawih rawih mai chu anih hi. Mahse inthlahdah thei kan ni lo deuh deuh, Lalpa Pathian hian kan ram hi Chanchin Tha in min zawng chhuak a, Chanchin Tha kawltu ah min ruat nghal avangin kan beih sauh sauh a tul zawk a ni.
Johana 17:18 ah chuan “Nangin khawvela kei mi tir ang khan keipawhin an ni chu khawvelah ka tirh hi” Chhandamna chanchin tha hi a thlawna pek kan ni ang bawk hian, a thlawna pe chhuak ve tur a mawhphurhna hi kan kovah a nghat nghal a ni. Isaia 61:1-3 kan en chuan Isaian “Riangvaite hnena chanchin tha hril tura Lalpan hriak mi thih avangin Lalpa Pathian thlarau chu ka hnenah a awm, ani chuan thinlung lungchhiate tuam turte, salte hnenah chhuahna thu leh mitangte hnena tannin hawnna thu sawi turte Lalpa lungawi kum thu leh kan Pathian phuba lak ni sawi turte in mi tir a ni” a ti. Huphurh mah ila Lalpan kan hnena awm a tiam avangin hun khirh takte chuan min nang mahsela, kan Lalpa thupek hi ala ngaireng a, chuvangin lithuk lam hi kan pan deuh deuh a tul a ni.
Tirhkohte 20:23-24 kan en chuan Paula Jerusalema rawngbawla a kal dawn khan, ‘Thlarau Thianghlimin phuarna leh hreawmnain a hmuak a che tia khaw tinah hriatira a awm lai pawh khan ama nun pawh thlahlel chang lovin khawngaihna chanchin tha a buaipui a ni. Kan Kohhran chhungah ngei pawh hian chanchin tha thlamuanna mamawhtu kan va la tam dawn em- hun tha kan la neih chhung hian a li thuk lam pan a kan beih thuai thuai hi a va han tul em!

3. A lo lanfiah : Pathian ram alo lan fiah deuh deuh na tur hian khawi laiah nge lo lang hmasa se kan duh – kan address theih hmasa ber leh kan duhthusamah chuan Pathian ram hi nangmah leh I chhungkuaah khan lo lang hmasaber rawh se. Peteran Lal Isua thiltihtheihzia a hmuh chian khan ama nun a inhmu hmasa ber a, ‘Lalpa mi kalsan rawh, misual ka nih hi’ a ti a ni. Chu chuan engkim kalsanin Lal Isua a zui theih phah a ni. Engkim kalsana Lal Isua zuitute hian harsatna karah pawh Pathian ram an ti langfiah thin.
Hman deuh khan Mission field a kan thawhna hmun thenkhatte fangkualin ka zin chhuaka, kan missionaryte khawsakna a hmun ngeia ka han hmuh leh chuan ka thinlungah thu a sawi nasa khawp mai! Kan missionaryte hian khawvel thil ropui takt e hi an beisei phalo Lalpa hmaa an inpekna tibahlah theite paih thla zelin rawng an bawl mek a ni. An thatlai hunte Lalpa tan an hlan a, an hmangral ve mek a ni. Nl.Zoramthangite, Nl.C.Lalremsiamite, Pi Thianghlimite kal hmasaah an tang ta, mite ngaihah ropuiin langlo mahse Lalpa ngaihah an va hlu dawn em! An fate tana zirna school tha pawh beisei phalote an ni a, khawvel ropuinain inthuam phalo mahse van ropuinaa an inthuam hunah chuan kan la awh ngawih ngawih turte an ni asin. Tangkhang hruai haw zingah pawh an tel ve thiang lova, an Lalpa thupek zawmin hun khirh tak karah pawh Lalpa zemah an rawn seng khawm mek zel a ni. Beidawn a thiang ve lo, harsa mahse kan Lalpa, thupek min petuin a thu ala sut si lova.
Tunah chuan hun hnuhnung ‘warning bell’ a rawn ri tan ta. Hripui, lirnghing, indo etc te chuan min rawn rum thaih tan ta mek a ni. Kan Lalpa alo kal dawn hnai ta – Missionaryte u, kan puanvente sawichhing ila, li thuk lam panin kan lente thahnemngai takin I han deng leh ang u hmiang. Pathian thu hi a thleng dik chho zel a, hun tha hi engchen nge kan la neih dawn kan hre lo – mamawhtu an la tam si a, khawvelah hian hun khirh leh harsate pawh kan tawk chho zel dawn ni te pawhin a lang a, chutiang kara lengin awm mahila tirhkoh Paulate, Petera angin hun harsain min chim mek lai pawh hian kohhranho te hian li thuk lam pana rawng kan bawl zel theih nan I inbuatsaih thar sauh sauh zel ang u.
Lalpan malsawm rawh se.

Hla sak hona: KHB 345: Lalpa, khawvel mi thim zingah,

Hring nun kan zin kawngah hian

Lalpa, khawvel mi thim zingah,
I enna ropyui thlen la;
an tlantu duh taka zarah,
Chhandamna kim an hmuh nan.

Aw Lalpa, enna rawn pe la,
Tuipui ral ram hlaah te;
I hmangaihna leh zahngaihna,
A thlawna pek i tiam kha.

Zan thim lungngaihthlak tak ata,
thlarau bote chu chhan la;
An hunte leh an nite chu,
A ral mek, hmanhmawh ang che.

I thutiam ropui leh thianghlim,
'Gospel chanchin hril ula;
tin, in hnenah ka awm zel ang,
' tia i tiam kha hrilh la.

Aw, kal zel la, Gospel hnehna,
tuipui leh ram tin chungah;
Lo eng zel se, thimna zawng zawng,
Hmanhmawh se, a tlai ang e.

Lalpa Tawngtaina