Hla sak hona:Khb No 16: Aw Pathian nang Lalber i ni (Thilpek lakkhawmna)
Audio
Aw Pathian nang Lalber i ni
Aw Pathian nang Lalber i ni,
Kan rilru min en thin;
Engkim kan ruat hi Nangmahin,
I hmu reng thin a ni.
Nangmah i muhil ngai lo ve,
Keimahni min veng thin;
Rilru tha tak min siam ang che,
Lalpa Isua vangin.
I thu thuin kan awm duh e,
I thu nunna a ni;
Chuvangin, min hre reng ang che,
Nangma mite kan ni.
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila.
Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin lawmthu sawi ila. Pathian venhimna dil chhunzawm zel ang u.
Sawrkar, Kohhran leh tlawmngai pawl te tan tawngtai zel ila. Covid19 dona kawnga fing leh tha taka hma an lak thiam theihna turin i dil sak ang u.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Kan Kohhrana khawhar chhungte leh kan member damlo te Hospital leh mahni in lama in enkawl te tan tawngtai sak ila.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
28 Vân daifîm chu Pathianin pe che sela,
Lei hausaknate chu pe che rawh se.
Buh leh uain nei thûr thûr bawk ang che,
29 Hnam dangte chuan i rawng bâwl se,
Hnam tinrêngten chibai bûk che rawh se.
I unaute chungah lal la,
I nu fate chu i hmaah kûn rawh se.
Ânchhe lawhtu che chu ânchhia lawh a ni ang a,
Mal sâwmsaktu che chu duhsak an ni ve ang,” a ti a.
THUCHAH
THUPUI: MALSAWMNA
- Rev Lalremsiama Fanai
Audio
Tukina he hun hmangtu zawng zawngte kan Lalpa Isua Krista hmingin chibai ka buk a che u. Khawvel pum huapin harsatna kan tawh lai a ni tih kan hre theuhva. Hripui leng avangin kan nun dan phung kan thlak angai a, a huhova Pathian chibai buk thin khan mahni chhungkua theuhva Pathian chibai kan buk naah lungawi a ngai ta rih a. Chhung inkhawm kan ni bawk a ‘Chhungkuaa mal in sawm sakna’ chungchang thu tukin ah chuan kan zir ho dawn a ni.
Zawhna han inzawt ta ila, nu leh pa, pi leh pute u, in tu leh in fate kha an lu chunga kut nghatin mal in sawm sak ngai em? Naupang leh thalai te u, nangmahni enkawltute malsawm sakna kha in dil ngai em? Nge malsawmna hi Pastor te chauh sawi turah kan ngai? Bible ah hian mal in sawm sak thu hmun hrang hrangah kan hmu a, tun tum ah hian kan sawi vek hman lovang a, chhungkua hi kohhran te ber leh pawimawh em em si a nih avangin tukin ah hian he thu pawimawh tak hi kan zir ho dawn a ni.
Genesis kan chhiar chuan Israel hnam thlahtu bul Abrahama te, Isaaka te leh Jakoba te chuan an tu leh fate mumal takin mal an sawm sak thin a ni tih kan hmu a. Thuthlung hlui ah chuan pate hnen atanga malsawmna dawn chu chawimawina sang tak a nih laiin, malsawmna dawn loh erawh chu anchhe dawng tlukah an ngai a ni.
Chhungkaw puipa ten an tu leh fate mal an sawm na chuan fuihna thu sawite, an fate rochan tur semte, an hmalam hun tur puan lawk sakte a huam vek thin. Isaakan a fapa upa zawk Esauva aia a naupang zawk Jakoba mal a sawm khan lei malsawmna te dawnga, a unaupa chunga thuneihna te pawh a pe a nih kha. Chumai bakah malsawm saktu chu malsawmna dawng ve tur leh anchhe lawhtu chu anchhia dawng turin mal a sawmsak a ni (Gen. 27:29).
Jakoban a pa bumin a malsawmna dawn tur a dawn khalh tih Esauvan a hriat chhuah khan a lungni lovin pawi a ti em em a, a pa Isaaka hnenah “ Malsawmna min la zuahsak lawm ni? a ti lawm lawm a nih kha(Gen. 27:36). Mahse Isaaka chuan Esauva hnenah “Ngai teh, amah chu i lalah ka siam a, a unau zawng zawngte pawh a chhiahhlawh atan ka pe vek a; buh leh uainin ka chawm ta bawk a; ka fapa nang atan enge ka tihsak ang che le” a ti hmiah tawh mai si, Esauva tan chuan a beidawnthlak ngawt ang. Pa te emaw thlahtute hnen atanga malsawmna dawn loh chu pawi tak a ni.
Jakoban a fapa sawmlehpahnihte mal a sawmsak tum khan an hmalam hun a an awmdan tur leh an chanpual te a lo puan lawk sak vek a. Thlahtute malsawmna leh an awmdan tur lo puan lawk tawh thlen dikna chu kum 400 chuang a vei hnuah Jakoba fapa 12 thlahte kal zel ah hetiang hian kan hmu.
Jakoba chuan a fapa Juda hnenah, “Juda nang zawng i unauten an fak ang che: i kut chu i dote nghawng ah i nghat ang a, i pa fapa te chu i hmaah an kun ang” a ti a (Gen. 49:8). Juda thlah atanga lal lo chhuah tur thu leh hnam tinin ama thu an awih tur thu te in mal a sawmsak bawk a. Chu malsawmna ang tak chuan Juda thlah atangin Lal Davida chuan Jerusalem ah ro a rawn rel ta a, an thlah kal zel atangin khawvel chhandamtu Isua Krista a lo piang ta bawk a (Mt.1:3).
Jakoban Isakara mal a sawm naah, “Isakara hi sabengtung chak tak, Beram huang kara bawk a ni: Chawlh chu thain a hria a, Ram chu nuamin a hre bawk a” tiin hmun tha tak a la chan tur thu a lo sawi lawk a. Jakoban a lo sawi lawk ang ngei hian Isakara thlah te chu ram leilung hausa leh thil thar chhuah tamna hmun Galilee leh Jezreel phai ruam te chu an chanpual atan pek an lo ni ta.
Unau 12 zinga naupang ber Benjamina chungchang chu hetiang hian a pa Jakoba chuan a lo sawi lawk a. “Benjamina hi chinghne koham a ni. Zingah chuan a sa seh chu a ei ang a, Tlai lamah chuan a rallak chu a sem ang” tiin (Gen 49:27). An pa Jakoba malsawmna ang tak hian Israel te chanchina sipai huaisen leh hotute chu Benjamina thlahte zing ami deuh vek an ni. (1Chron. 8:40 etc).
Kan han tarlan tak te atang hian Pathian malsawmna in dilsak hian awmzia a neiin a hlawk em em a ni tih kan hre thei ang. Hei tak hi a ni tukina ka rilru a awm chu. Chhungkaw memberte hi kan in tawngtai sak thin, chumi piah lamah chuan mal in sawm sak thin ila a va hlawk leh zual dawn em kan ti a ni. Kan chhungkua hi Pathian nena kan inzawmna a ngheh lehzual theihna turte, A malsawmna kan dawn belh zelna turte, kan ram a lo dam a, sualna chi hrang hrang lo pung zel te kan hmachhawn theihna tur te, khawvel hian kan Pathian hi malsawmna neitu Pathian a nihzia an lo hriat belh zelna tur te hian awmze nei lehzual zawka chhungkuaa pathian chibai kan buk hi a va tul em! Kan tu leh fate hian nu leh pa, pi leh pute hnen atang hian malsawmsakna thu te hi hre tam rawh se. Hla siamtu in ‘tlemte a tawk, penkhat pawh ni mahse’ a lo tih ang khan hawh u kan chhungkua hian hemi kawngah hian penkhat talin hmasawn i tum ang u hmiang.
Pathian thu hi thu nung, thu thiltithei, khandaih hriam tawn eng ang ai pawha hriam a nih avangin (Heb. 4:12) Pathian thu hmanga mal kan in sawm sak thin chuan kan chhungkua leh kan thlah lo la awm zel tur ah hian Pathian hnathawh hi a lang zel ang. Bible ah hian mal kan insawm theihna tur thu hmun tam takah a awm, chung zinga pakhat chuan kan thuchah kan ti tawp ang nge: “Mangan ni chuan Lalpan chhang che rawh se; Jakoba Pathian hming chuan hmun sangah hlang che rawh se; Hmun thianghlim atang chuan tanpuina tirhsak che sela, Zion atang chuan tichak che rawh se; I thilhlan zawng zawng chu hre reng sela, I halral thil hlan chu lawm rawh se; I thinlung duhzawng chu pe phal che sela; I remruat zawng zawng chu hlawhtlintir che rawh se” (Sam 20:1-4).
Lalpan malsawm theuh che u rawh se.
Hla sak hona:Khb No 433: KLo cheng ve la, kan run chhungan
Audio
Lo cheng ve la, kan run chhungan
Lo cheng ve la, kan run chhungan,
Hmangaihtu Lal Pathian;
Chhungkaw puipa ber lo ni la,
Keini i hmangaih fa.
Tu in pawh Nang i chenna chu,
Rapin, chhawlbuk ni se,
Hlimna leh remna a tel ve,
Van malsawmna hlu nen.
Nang nghilh lovin zing chhun zana,
Auva sawm thintute,
Rilru leh theihna zawng hlantu,
Chu ngei chu i chhungte.
Chhungkaw lungrual, Kristian chhungkua
Kan nih theih nan Lalpa,
Lo cheng ang che Krista, Nang ngei,
Kan in, kan thinlungan.
