Zoram hmangaihtu Lalpa,
A thlawnin Chanchin Tha min pe;
Hei leh chen hi kan tawmpui,
Lalpa, min ngaidam ang che
Kan tih tur Chanchin Tha puan darh,
A thlawna pe chhuak turin;
Khawvel zawng zawng hi,
Lalpa ram a nih hma chuan.
Dak ula, lote en r'u,
Seng turin an hmin zo ta e;
I favah kengin tunah,
Lalpa tan thawk chhuak nghal r'u.
Khawvel zawng zawng Lalpa tan,
Kan bei zel ang kan hneh hma chuan;
Mahni, tawngtai, thilpekin,
Lal ram thar kan din zel ang.
Har r'u, Zofate harh r'u,
Hnehna ropui kan chang thuai ang;
Kan Pathian hmingin puanzar,
Kan zar ngei ang khawvelah.
TAWNGTAI RUALNA
Tawngtaina a hriat turte
Vawiin thlenga Pathian malsawmna leh venhimna kan chan avangin lawmthu i sawi ang u. Chhandamna Chanchintha changtu kan nih avangin lawmthu a tharin i sawi ila, Chanchintha puan darhna kawnga kan tih tur tha tak leh thahnemngai taka kan thawh theih nan Pathian tanpuina i dil ang u.
A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
Kan veng VLTF te tan, Pathian venhimna leh awmpuina an chan theih nan.
Covid 19 avanga tuar te leh lusun zawng zawngte tan. Pathian thlamuanna an chan zel theih nan.
Kan khawtlanga khawhar chhungte tan.
Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
Kan thawhlawm, inkhawmna leh keimahni Pathian hnenah I hlan ang u.
2 Timothea 4:1-5
Pathian mit hmuh leh,mi nung leh mitthi ngaihtuahtu tur Krista Isua mit hmuhah chuan ,a inlarna leh a ram chhalin ,tha hnem ngai takin ka hriattir a che.Thu chu hril rawh ,a hunah te,a hun lohvah te pawh bei zel rawh,dawhthei taka zirtir chungin an thiamloh hriattir la,zilh la,fuih rawh.Zirtirna dik an ngaih peihloh hun a la thleng dawn si;an bengte a zat avangin ,anmahni duh zawng angin zirtirtute an hnenah an khawm zawk ang; an bengte chu thutak lamah an chhu ngawng ang a,thawn thu lam panin an peng tawh ang. Nang erawh chu engkimah fimkhur la, hreawm tuar la,chanchin tha hriltu lam hna thawk la,i rawngbawlna kha hlen rawh.
Ezekiela 3:18-21
Mi suaksual hnena ka thu, ‘I thi ngei tur a ni’,ka tih a,chu mi suaksual chu a nunna hum tura a sualna kawng kalsan tura vauna i neih lohva,vau khanna thu i hrilh bawk si lohva,chu mi suaksual chu a khawlohnaah a thih chuan, a thisen mawh chu i lakah ka phut ngei ang.Amaherawhchu, mi suaksual chu i vauva,a suahsualna a kalsan lohva, a sualna kawng a hawisan bawkloh chuan a khawlohnaah a thi ang a ,nang erawh chuan i nunna i chhanhim a ni zawk ang.Tin, mifel chuan a felna hawisan a,khawlohna a tih a,a hmaa tlukna a lo dah chuanin,a thi ang; vau khanna i neihloh avangin ama sualah a thi ang a,a thil fel tih tawhte chu hriat reng a ni lovang; a thisen mawh erawhchu i lakah ka phut ang.Nimahsela,mi fel chu sual lo tura i vau khana a sual loh chuan,vauna a pawisak avangin a nung ang; nang pawhin i nun i humhim ang.
Thufingte 24 :11-12 :
Thi tura hruaite chu chhanchhuak thuai la,thah mai turte chu chhan chhuak thuai rawh.“Ngaiteh hei chu ka hrelo” i tih mai chuan,Thinlung buktu chuan a ngaihtuah dawn lawm ni? I nunna vawngtu chuan a hre dawn lawm ni ? Mi tin an thiltih ang zelin a rul dawn lawm ni?
THUCHAH
Thupui : “TUN HI HUN LAWMAWM CHHANDAMNA NI” ( 2 Korinth 6:2)
- Upa C. Lalzarmawia
Audio
Thupui Sawihawnna : Vawiin July ni 4, 2021, BCM Hqtrs. ni pawimawh ‘Mission Sunday’ah hian Kohhran hote kan Lalpa Isua Krista hmingin chibai ka buk a che u.He ni pawimawh Special Sunday a kan hotute leh Pathian duhsakna changa hun ka han nei ve hi Pathian leh kan hotute chungah lawmthu ka sawi a ni. He ni pawimawh tak hi Mizoram Baptist Kohhran chuan Chanchin tha puan darh pawimawhzia inzirtirna hun atan a ruahman a ni a,chuvangin thupui leh Bible chhiar tur pawh thlan sa leh ruahman sa vek a ni bawk a,chu thupui awm sa atang chuan thuchah pawh kan sawi mai dawn a ni.Kan thupui tur chu ‘Tun hi hun lawmawm chhandamna ni’ 2 Korinth 6:2 thu hi a ni dawn a ni. Baptist Church of Mizoram hi a pian tirh atangin Chanchin tha hrilh hi a ngaih pawimawh ber a ni a, Inkhawmpui neih hmasak ber 1904-ah pawh khan kan chheh vel a hnam hrang hrangte zingah Pathian thuhril tur an intir tan nghal a nih kha. Hun a lokal zel a 1939-ah hlawh neiin Tirhkoh hmasa berte Kawha leh Siama thla khata Rs 12/- hlawhin rawih an han ni ta a.Kohhran mite thinlungah Ramthim veina a lo lian zel a, 12th.July 1962-ah chuan Ramthim Sub-Committee din a lo ni a,1967-ah phei chuan Zoram Baptist Mission din a lo ni ta hial a ni.Kum 1970 Assembly chuan July thla Pathianni hmasa ber hi Missionary Sunday tiin Chanchin tha hril pawimawhna thuchah uar taka sawina hun atan an hmanga, 2017 atangin Mission Sunday ti a thlakin BCM ni pawimawh(Special Sunday)ah puangin BCM Calendar-ah hial a lo dah ta a ni.
Kan hriat leh kan sawi fo tawh angin Covid 19 hripuiin nasa takin khawvel ram hrang hrang a run a, India rama State te tak te Mizoram pawh Kohhran thlengin min sawp nasa hle a nih hi.Kut hnathawh te, Office lam hna te, eizawnna hrang hrang hrang te leh Inkhawm leh Committee thlengin kan nei mumal thei ta lo a nih hi.Nimahsela, hetiang karah hian Kohhrante hi chu a dintu leh kan nihna hi chatuan mi, chatuan daih a nih avang hian Pathian rinchhan a kal zel tur kan ni a,chawl hman kan ni lova,Rinna a kal zel tur kan ni tih hi i hre tharleh phawt teh ang u.BCM pawhin kan thupui ‘Chanchin tha mitin tan’ kan tih leh kan Lal Isua thupek ropui Great Commission(Chan chin tha hrilh) hi thlah thlam thei kan ni lova,kan uar sauh sauh hi kan Ringtu mimal leh Kohhran ang pawh a kan chakna hnar a ni tih hriain theih tawp i chhuah thar zel teh ang u.
Kan thupui, ‘Tun hi hun lawmawm chhandamna ni’ han tih hian kawng tam taka sawizau tur chu a awm a, nimahsela hun reilote chhunga sawi zawh sen a nih dawn loh avangin a tawi thei ang turin point 3 a thenin Pathian thuchah kan ngaithla dawn a ni:-
1. Tun hi hun lawmawm chhandamna ni a ni :- Helai a ka rawn ngaih pawimawh leh ka rawn tarlan duh bik chu, ‘Tun’ tih lai thumal tak hi a ni. Kohhran leh mimal ang pawhin, kan nun phung leh rawngbawlnaah pawh hian hun kal tawh leh kan hun hman mekah pawh hian kan tun hun hmang tha lo, ngaih pawimawh loh avanga kan nih tur ang ni ta lo, kan thlen tur ang thleng zo ta lo kan va tam awm tak em ka ti thin a ni.
Entirna Pakhat han sawi ta ila, mi Pakhat chu 1983 kumah khan HSLC a zir a, a tana Pathianin HSLC zir leh a exam hun atana a ruatsak chu 1983 kum hi a ni.Nimahsela chu Pa chu a zir tha peih lova, kumtluanin a inthlahdah em em mai a, HSLC chu a han exam a 3rd.Division-ah passed in result chhe ang reng tak chu a dam chhungin a nei dawn ta a nih chu. He Pathianin HSLC zir leh Exam –na hun a ruatsak , a Tun hun kha ngai pawimawhin taima tak leh inthlahdah lovin lo zir ve ta ngat ngat se HSLC kha Ist. Division-ah a passed ve ngei ang,nimahsela atana ‘Tun hun’ 1983 chu a ral tawh, kohkir theih a ni tawhlo, kumkhua-in HSLC chu 3rd.Divisionah a passed tawh dawn a ni. Tunah chuan a kum a upa tawh, a tar tawh,a rilru a chak tawhlo,Thisen sang a nei tawh a, zirlai a danglam lutuk tawh atan khua a tlai zo tawh a ni.
Vawiinah pawh hian Kohhran angte, ringtu mimal angte pawh hian i inngaihtuah thar leh teh ang u,kan Pathian thu-in , ‘Tun hi hun lawmawm chhandamna ni’ a tih mawlh mawlh hunah hian kan lo inthlahdahin, kan lo awm mai mai palh ang tih hi a va hlauhawm em ka ti a ni.Vawiin a Kohhran leh ringtu mimal tin kan vanglai huna kan tan a chanchin tha hrilh nana hun lawmawm min pek chhunga kan tih tur kan tih lohva, chhe ang reng tak leh thlahdah taka he chanchin tha hril hna hi kan thawh chuan ,chatuan khua a var hunah pawh hian result chhe tak nen hian rorelna hmaah kan insawi fiah hun a thleng ang tih hi a hlauhawm hle in ka hria a ni.
BCM pawh hi kan pi leh pute leh hun hmasa lama kan hruaitute leh ringtu hmasate kha han chhut ta ila,an Tun hun kha an hmang tha riau lo maw ? Ramthim huan, Ram thim Ar, Ramthim dawrte an nei a, Tuibur zu te leh Artui hralhin Mission rawngbawlnaah sum an tuak a, Missionary –an khuaah lokal se an ngaisang a, thilpe lo chuan an Kohhran an chhuahsan tir ngailo a nih kha. ‘Zoram hmangaihtu Lalpa’ tih hla an han sa a, ramthim an vei lutukte kha an mittui a tla a, mittui nen ramthim lamah an fehchhuiak ta sup sup thin a nih kha.
Vawiin a Kohhran leh ringtu mimal tinte u, kan ‘Tun hun’hunah hian hun tlemte kan la neih lai hian Lal Isua thupek ropui Chanchin tha hril hna hi tih takzet a bei a, veina hun lawmawm leh hun tha a ni tih hi vawiinah hian Pathian hmingin ka hrilh duh che a ni. Tun hi chanchin tha hrilna atana hun lawmawm chhandamna ni chu a ni tih hria –in tunlai Kohhran leh ringtute hian kan ‘Tun hun’ hi inthlahdah lovin,theih tawpa tan lain Thilpek,Tawngtai leh mahni ngei kal chhuakin Chanchin tha hi i hril sauh sauh ang u.
2. Thupek ropui (Great Commission) :- Tunlai khawvel hi hunkhirh takah kan lut tan ta mek a,Tam,Indo, hri leh chhiatna hrang hrang a lo thleng ta zut zut mai,Pathian thu zirtirna him tawklo ten Kohhran a rawn tuam mek zel bawk nen. Kohhran leh ringtu mimal inhai vurna leh nihna sang in chuhin kan hmanhlelh nasa ta hle bawk.Hetiang karah hian Kohhran leh Mimal anga kan himna leh kan kal sual lohna tur thil pakhat kan ngaih pawimawh em em tur chu Lal Isua thupek Ropui(Great Commission) an tih “Khawvel zawng zawngah kal ula,thilsiam zawng zawng hnenah chanchin tha hi hril rawh u” Marka 16:15 thu hi a ni. He Lal Isua thupek ropui hi Ringtu mimal leh Kohhran hian ngaih pawimawh bera kan neih chhung chuan Ringtu mimal leh Kohhran hi kan kal sual ngai lovang tih hi ka sawi duh a ni.Chuti ni lova a aia ngaih pawimawh Kohhran leh ringtu mimal hausakna leh ham thatna,dam chhung khawsak ropuina leh nawmsakna kan dah pawimawh a kan tlan nasat zawk vaih chuan Mimal leh Kohhran a kal sual ang a, kan tluchhe thuai dawn a ni tih hi i hre tharleh ang u.
Sap ram ram ropui,Ram ni tla senglo a Lalram ropui lutuk kan tih khu eng vanga khu ti khawpa Kohhrante an tlakchhiat tak mai le? A chhan tam tak zingah chhanna pawimawh ber pakhat ni a ka rin chu Chanchin tha hril an hlam chhiah atang chiah khan a ni tiin an sawi thin hi kei pawh ka rin zawng tak a ni.William Carey a hun lai te,Sap Upa leh Pu.Buanga lokal lai te a hnu thleng pawh khan Sapram Kohhran Ropuizia te, British Sorkar ropuizia te, khawvel an awp dan te lehkhabu –ah leh Film lam thlenga kan zir a, kan hmuh kha enge a chhan? Lal Isua thupek ropui (Great Commission) kha an ngai pawimawh a, chanchin tha hril kha an thupui ber a ni tlat a lawm.!! Tunah chuan kan mithiamten an sawi fo chu an Kohhran a nung tawhlo,an Biak In an hralh tih te, tarho chauh an inkhawm tih te a lo ni ta,enge a chhan ? A chhanna tam tak zingah chuan Isua thupek ropui Chanchin tha hril hi an thupui ber a ni ta lova,Kohhranin an hlamchhiah ta tlat a ni.
Vawiinah hian Zoram Kohhrante hian, tun hi hun lawmawm chhandamna a ni tih hria a, Chanchin tha hril hi kan thupui ber leh kan ngaih pawimawh ber anih loh vaih chuan a mak a mak a rangin kan ram Kohhranho hi kan tluchhia anga, hnam ang pawh hian kan ral thuai ang tih hi a va hlauhawm tak em!
Tun hunah hian Biak In ropuite,Office ropui leh bungraw changkang te,lirthei chang kang leh tha pui pui te hi neiin khawvel mite hmasawnna milin nasa takin tlanin ropui hle mahila Chanchin tha hril hi kan hlamchhiah a,kan inthlahdah a nih vaih chuan Ram leh hnam angte,Kohhran leh mimal angte hian reilote-ah kan tluchhe ve thuai ang tih hi huai takin a sawi ngamin ka hria.
Tun Generation a, Kohhran leh Ringtute u, Tun hi chanchin tha hril nana hun lawmawm,chhandamna ni chu a ni e, inthlah dah thei kan nilo tih hi i hre tharleh ang u.
3. A thisen mawh chu i lakah ka phut ngei ang :-
Naupangte mai kan la ni a, Serkawn Biak In hlui, T-Shape a nih kha,Evan.Lalthlamuana’n Crusade a rawn nei a, ‘A lokal lehna’ sermon a sawinaah ni tain ka hria, ringtute mawh phurhna sanzia a sawi a tehkhin thu kha ka han sawi chhawng lawk teh ang. Lungchhengaw-ah khuan Sakeihuai mi sehhlum ngei ngei thin awm ta sela,Pa pakhat khan hre miah lovin kal tlang tum tlat sela,chutiang Sakeihuai mi sehhlum ching a awm tih nang chuan i hre sa reng mai si.Chu Pa hnenah chuan Lungchhengaw-ah Sakei a awm a,mi a sehlum thin a ni,kal suh i kal chuan i thi ngei ngei ang ti a vau khanna thu i hrilh a, a kal luih tlata sakeiin a lo sehlum a nih chuan, thiam i changin,inthiamlohna reng i nei lovang. Nimahsela, i ngawih tlat a,Sakei huai a awm, i thi ngei ang ti a vaukhanna hrilh lova i ngawih tlat a a zuk thih vaih chuan a thisen mawh chu i phur ngei ang a,i nunah inthiamlohna nasa tak i nei ngei ang.
Vawiin Mission Sunday-ah pawh hian Kohhran leh Ringtu mimal tinte hian mawhphurhna sang tak kan nei a ni tih hi ka han sawi duh a ni.Kan Bible Chhiar tak Ezekiela 3:18-21 thu a mi chang 18-na thu chauh kha ka han tarlang teh ang.“Mi suaksual hnena ka thu,i thi ngei tur a ni,ka tih a, chu mi suaksual chu a nunna hum tura a sualna kawng kalsan tura vauna i neih lova,vau khanna thu i hrilh bawk si lova,chu mi suaksual chu a khawlohnaah a thih chuan a thisen mawh chu i lakah ka phut ngei ang” a tih hi kan chhut ngai em le? Kan thenawm khawvengah te,Home Mission leh Ram pawn leh foreign thlengin he Chanchin tha hril hi kan mawh phurhna a ni tih kan hriat thar a va tul tak em! Tun hun a Kohhran leh Ringtute hian kan Lal Isua thupek ropui(Great Commission) hi kan hlamchhiah a nih vaih chuan Chatuan khua a var hunah Lal thutphah var ropui hmaah an thisen mawh hi kan phur ang a,kan zak lutuk hi
kan kimki hle mai ang tih a va hlauhawm em!! Thufingte 24:11-12-ah chuan “Thi tura hruaite chu chhanchhuak la,thah mai turte chu chhanchhuak thuai rawh. Ngaiteh ,hei chu ka hrelo i tih mai chuan,Thinlung buktu chuan a ngaihtuah dawn lawm ni?” Kan hmelmapa in thi tur leh thah tura a bum mekte hi hrelo leh veina nei reng reng lova ‘ngaiteh hei chu ka hrelo’ ti a kan kal pel mai a nih chuan an thisen mawh hi kan phur mai ang tih a va hlauhawm em.!
2 Timothea 4:1-5 kan chhiar takah khan Tirhkoh Paula chuan Rinnaa a fa Timothea hnenah chuan, ‘thu chu hril rawh,a hunah te a hunlo-ah te pawh bei zel rawh….chanchin tha hriltu lam hna thawk la, i rawngbawlna kha hlen rawh’ tiin tha hnem ngai takin a fuih a nih kha.Hawh u,tunlai Kohhranhote,ringtu mimal tinte hian khawvel hun harsa leh Covid 19 hripui leng karah hian Lalpan min kohna zawn atang hian a hunah te,a hun lohvah te pawh, he hun lawmawm chhandamna ni reilote kan la neihah hian Chanchin tha hrilin kan rawngbawlna hi i hlen theuh teh ang u tiin kan insawm in kan infuih thar leh a ni e.
‘Tun hi hun lawmawm chhandamna ni a ni.’
A thu kan sawite kan zavai atan Lalpan mal min sawm sak theuh rawh se.! Amen!
Pathian fakna hla:- KHB No. 359 ‘Pen ru,Pen ru,Kristaa nun thar nei te u’
Pen r'u, pen r'u, Kristsaa nun thar neite u,
Chhim leh hmar, chhak leh thlanga thilsiam tinreng hnenah,
He ram Chanchin tha hi hril kimin a awm hma loh chuan,
Chawl lovin i thawk zel ang, Lalpa thupek zawmin.
Pen r'u, pen r'u, pen rawh u,
Chhim leh hmar, chhak leh thlanga thilsiam tinreng hnenah,
He ram Chanchin tha hi hril kimin a awm hma loh chuan,
Thupui berah i neih ang, Chanchin tha puan darh hi.
Thi mai tura an hruaite chu chhan chhuak thuai r'u,
Ngai teh, ; hei chu ka hre lo,' i ti mai a nih chuan,
Thinlung buktu hmaah engkim hi a lang vek a ni;
Mi tin thiltih ang zela rulh leh ngei tur a ni.
Mi sualte chu, an sualna zawng hawisan tur leh
An nunna a nun theih nan i hrilh lo a nih chuan,
An khawlohnaah chuan an boral a nih mawi zawngin,
An thisen mawh chu i hnenah phut leh a ni ang.
Vawiin hi chanchin lawmawm thlenna ni a ni,
Keini hi kan ngawih renga khawvar kan nghah mai chuan,
Hremna kan tawk mai ang, Lal chhungte i hrilh thuai ang u,
A thlawna kan hmuh hi a thlawn a pe tur kan ni.
