THUCHAH:

NUN CHHIAR TLAK

Israel(Juda lal ram) tawp dawn hnaiha Pathian zawlneite (Jeremia, Habakuka, Ezekiela) an hahin an thawkrim tlang hle a, Israelte Chhiatna leh tuarna lo thleng turte Zawlnei derte,lalte, mipuite dodalna karah Pathian thuchah an puang a, an nunah practical-a lantirin an mahni ngeiin an tuar bawk a, a rapthlak zaw letling hle a ni.

Habakuka 1:1-2:20 kan chhiar chuan Pathian nena an inbiakna, Pathian hnena a vuina thu leh Pathianin a chhanna kan hmu a. Juda mipuite, lal te leh roreltute awmdan leh khawsak dan chu mihringte awmdan tur ni theiin a hre lova: Inhauhna, innghirnghona, inrawkna, inpawngneknate, pawisawilo thisen chhuah leh nunna laksaknate a tam em em a. Dan thu lahin kori a tu si lo. Misualten mitha te an rapbet a, ram rorelna a mumal lova, khawtlangnun a kehchhia a ni. Hetiang a nih reng lai hian Israel history lam thlir chuan an ram chu tlu sawprawp mai thei dinhmunah dingin Babulon lal chuan run tumin a in kau renga, Juda lal Jehoiakima pawhin Babulonin a run loh nan chhiah tam tak pein a tlawn reng a ni (II Lalte 24:1ff). Heng thil thalo chi hrang hrangte hi Habakuka hian a ngaimawh em em a, Pathian hnenah a au chhuahpui ta a ni.

Habakuka hnena Pathian thu lo thleng leh ta chu (Zawlneite thuziakah hian,”hei hi thuchah chu a ni/ Lalpa chuan/Pathianin heti hian a ti” tih tawngkam hi thuchah sawi thuhmahruaia hman a ni thin; an thuchah sawi chu Pathian Thupuan (oracle) emaw inlarna tiin emaw sawi a ni thin) ‘Inlarna chu ziak la, a chhiartuin tlan paha a chhiar theih khawpa chiangin lungphek chungah ziak rawh’ (Hab.2:2) tiin. Israelten hun harsa tak an tawng lai chuan, ‘Mifel chu rinnain a nung ang’ (Hab. 2:4b) tiin Lalpa chuan amite chu amah ring tlat turin a fuih a ni.

Covid 19-in Khawvel min tibuai a, mi Nuai 30(32, 32,016) chuangin he hripui hi veiin, nuai 2 (2, 28,504)chuang-in nunna kan chan mek bawk. He hripui tirem tur hian khawvelin a bei mek a, keini Mizo te pawhin kan ram veng him turin theih tawp kan chhuah a, Pathian kan kar bawk a, eng tikah emaw chuan he hri hian min la kian san ngei ang.

Hetia Covid 19-in kan rilru leh ngaihtuahna tam zawk min luah khah lai hian kan ram hrivei/min chawkbuaitu chi hrang hrang: Corruption, Ruihhlo chi hrang hrang, HIV Aids, Hepatitis, Cancer leh natna chi dangte hian min kian san ta duak a ni chuang lo va, damdawiin leh mahni inchhungah heng natna tuar, hreawm leh harsa taka lo inenkawl hram hram mi tam tak kan awm mek bawk a ni tih theihnghilh lo ila. Kan ram damna tur leh himna tur chuan Thuneitute thu awiha, tawngtai a nasa leh zuala Pathian kar hi a tul hle a ni.

Kan kawngpuisirah te hian signboard a thu in ziak, zin veivakten kal/tlan paha an chhiar tur atan a kan duhte a in tar fer fur mai a, tlan paha chhiar theih tur atan chuan chiang tak leh fiah taka inziak a nih loh chuan chhiar a har dawn a ni. II Kor. 2:2-4 ah chuan, ‘Nangni hi kan lehkha, kan thinlunga ziak, mi zawng zawng hriat leh chhiar chu in ni e: Krista lehkha, Keimahni min ziaktir, lehkhatuia ziak ni lo, Pathian nung Thlarauva ziak zawk, lung pheka ziak ni lo, tisa thinlung pheka ziak zawk chu in ni tih chiang tak lantir a ni si a. Pathian lamah chutiang rinna chu Krista zarah kan nei a ni.’ tiin Tirhkoh Paula chuan min hrilh ve leh thung a ni.

A chunga kan tarlan ang khian, Khawvelin dinhmun harsa taka adin lai leh hun thim tak atawng lai mek hian Kristiante, ringtute hian dinhmun pawimawh tak kan nei ani tih hi kan in hriat thar leh hi thil pawimawh tak a va ni em... Ringtute hi Pathian Lehkha, Khawvel mite chhiar, Lehkhatuia ziak ni lo, Pathian nung Thlarauvah, tisa thinlung pheka ziak chu kan miau mai si a. An tana chhiar nuam tak, kawng dik leh tha, Pathian hnen hruaithleng thei, nun chhiar tur neih hi ringtuten kan mawh phurhnaah i ngai thar leh teh ang u. Krista lehkha mitinte chhiar kan nih si chuan kan nun kawng zetin reng hi Krista Chanchin Tha nena inmawiin lanchhuah tir ila a va duhawm dawn em. Chu mai a la ni lo ringtute hi Thuthlung Thar rawngbawltuah Pathianin min thlintir a, lehkha thu mai Rawngbawltute ni lovin a thlarau rawngbawltuah te a ni zawk (II Kor. 3:6) min ti a ni. Krista Rawngbawltute nunah hian engnge lo lang chhuak thin le... Nun chhiar tlak leh chhiar awl, fiah leh chiang kan nei em? Kan nunah engnge an chhiar chhuah thin le...Mawi kawngkhar bulah khan Petera te thian dun khawsa zia lo thlir reng tute chuan Pathian hnenah an awm tawh tih an hria. (Tirh. 4:13) tih kan hmu a ni. Kristian kan inti, Kristian hming kan pu, miten kan nunah enge chhiartur an hmuh? Fiah takin Lal Isua an hmu thei em? Mahni theuh inenfiah ila, inzir chiang teh ang u. Chuti anihloh zawngin Isuan, “Phiilip, hei leh chen hi in hnenah ka awm a, chuti pawhin mi hre lo maw?”(John 14: 9) a tih ang mai kha kan lo ni thei, chumi piah lamah miten Isua an hmuh theihna tur daltu leh hliahtu pawh kan lo ni thei bawk. (An chhinchhiah bik che, i chetzia an thlir; i sawi apiang an ngaithla... tih Hla kha a dik viau a ni) Chuvangin, kan nun leh thiltihah Lal Isua an hmuh theih nan i lan chhuah tir ang u.

Kan nunah Engtin nge kan lan chhuah tir ang?
Kan nuna Lal Isua lang chhuah miten an hmuh theihna sawi tur tam tak awm mahse point hnih chauh hi kan sawi hman turah ngai ila.

1. Kan thu sawiah: “Thinlunga khat liam chu ka-in a sawi chhuak thin(Mtt.12:34) Lal Isuan a tih angin kan thusawi thin te chu kan rilrua khatliam a ni a, chu chuan kan taksa leh nun dan chu a chhe zawng emaw atha zawngin emaw kaihruai thin a ni. Sam ziaktu chuan “Ka lei hi lehkha ziak thiam tak pen a ni” (Sam. 45:1) a ti thlawt mai. A tawngsual ngai lo va, a mawi bawk ni tur a ni. Jakoba chuan,” Kan zain thil tam tak kan tisual fo thin.
A thusawia tisual ngai lo mi chu, mi puitling a ni a, a taksa pum pawh veng thei mi a ni” (jab.3:2) a ti a, Paula pawh a puitlin leh tlinloh an tehna chu a thusawi dik leh dik lohah a ni. Kan thusawi hi miten an ngai thla a, an chhiar a, an sawi chhawng bawk thin.Kan rawngbawlpuite leh Upa te, Pastor leh Headquarters hruaitute thleng pawhin, Kohhran rawngbawlna chan chin kan sawi duh dan leh hmuh dante hian eng ang mi nge kan nih a tilang chiang thin. Chuvangin, Thinlung robawm a ta thil tha kan sawi fo tur a ni a, kan thusawi duhzawng atang hian miten kan nun an chhiar thin a ni.

2. Kan nun leh thiltihah: Chhunglam rilru hi pawnlam nun zia-ah a lang chhuak thin. Pathian Fapa paitu Mari pawhin, “Ka nun hian Lalpa a chawimawi e, Ka thlarau pawh mi chhandamtu Pathian chungah a lawm em em a” (Lk. 2:46, 47) a ti. Thinlunga Isua paitute hian an thup bo thei ngai lo. Isua chenna thinlung atang chuan Krista Chanchin Tha nena inhmeh nunmawi a par chhuak thin a ni. (Phil. 1:27). (Ka mi hriat chiante, Kohhran a inhmang tak te chan chin kan zep lawk teh ang. Pakhat chu Police SP, a ni a, a hoten, “A ni hi chuan vanram a kai ang” ti a, a chan chin an sawi laiin, pakhat chu office lama a thawhpuiten,” Engkim hria-i kan ti mai, a bulah tumah kan awm tha peih lo” an ti ve leh tlat thung mai) Kan nitin nun leh thiltih, kan hnathawhna, eizawnna leh sumdawnnaah hian mi ten kan nun min chhiarin eng ang mizia nge kan nih min chika, min thlir ru reng thin a ni. Kan office leh hnathawhnaah kan hotuten rin tlakah min ngai em? Chutiang bawkin Tangka hian kan nunah thil a tithei hle mai. Kan sum neih leh vawn/enkawl danah kan thawhpuite, kan rawngbawlpuite hian rintlakah min ngai em? Mi depde/duham-ah miin min ngai em? Kan Ration Card neih dante, Ni 100 inhlawhna, Gas, Electic, Tui bill buaipui dan thleng hian kan in enfiah hi thil tul tak a ni.
Jorhat kan awm lai khan kan thianpa Pauva, Chin Pastor khan, “Engang mi hmuhin nge min hmuh” tiin min zawt leh zauh thin! A inkawm ber kan ni si a, amah hrechianga, thudik sawi turah min ngai a ni mahna. Lal Isuan a zirtirte hnenah, “In hnena thu ka sawi hi keima phuahchawpin ka sawi lo; Pa keimahah a awm reng a, a thil a ti zawk thin a ni. Kei Paa ka awm leh Pa keimahah a awm tih mi ring rawh u; a nih loh leh thiltih avang tal hian mi ring rawh u” (Joh 14:10-11) a tih hi kan thinlungin i vawng nung reng ang u.
Israel faten Pathian an hawisana, hremna an tawrh leh an sal tan dawn thleng khan Pathian zahngaihna chuan a kian san lova, Mitinin an awmdan sual kalsanin athu an awih theih nan huntha a siam sak thin (Jer. 26:3) ti hian in ti tawp teh ang - Covid 19 avanga All India, Lockdown chu vawin Dt 03.05.2020(Sunday) hi atawpni a lo ni a, Home quarantine leh Lockdown kan hman lai hun hi hreawm viau mahse, thenkhat tan chuan kan inchhunga Pathian malsawmna lo luanglut leh, a hmangaihna nasat zia kan hriat tharna hun tha tak a lo ni hlauh si. He lockdown hian kan eizawnna leh economic thilah min brake deuh pawh a ni mai thei, mahse a lehlam zawnga thlir chuan malsawm dawnna kawng, a ni theiin malsawmnaah kan chantir thei bawk. Hetiangin tlem a zawng lo sawi ta ila:
1. Biak in khara inkhawm theih lohna hian Pathian min ngaih tira, chhungkaw maicham din thar lehna chhungkua tam tak in kan chang.
2. Pathian pawla tawngtaina min neih tam tir, Khawvel min thlir tir bawk. (Tualchhung Kohhran, mahni lawina Kohhran (Denomination) leh Zoram chhung bak thlir ngai lem lo khan, Covid 19 avang hian khawvel min thlir tir a, an tan tawngtai theiin kan han awm te hi a va han hlu em.
3. Mipuite thinlungah inhmangaihna/inngaihsak tawnna thar min neih tirleh.
4. Intodelh pawimawh zia min hriat chhuah tirin, ke min pentir ngei dawn ni pawhin a lang.
5. Mipuite thinlungah ram hmangaihna thar min tuh sak mek ni in a lang bawk.
6. Kan ram hruaitute hian ram hmangaihna leh mipui thatna leh him duhna tak tak atangin min kaihruai ni ta sela, kan ram hian hma kan va sawn dawn em.

Hetiang tur hian Kohhran hote pawhin tan la thar sauh sauh ila,midangte tana nun zemawi, nun chhiar tlak, nun chhuahpui thei turin leh, kan ram leh hnam dinchhuah leh nan Pathian karin i dil sauh sauh ang u... Lalpan Kohhran hote thlamuanin mal minsawm rawh se. AMEN.

Tawpna Hla : KHB No 586 “Kan ram Krista kan pe”.

LALPA TAWNGTAINA