SERKAWN TUALCHHUNG KOHHRAN

CHANCHIN THA MI TIN TAN

PROGRAMME






PATHIANNI ZING INKHAWM PROGRAMME:

10:00 AM, 3rd OCTOBER 2021

PROGRAMME:




KOHHRAN MEMBERTE HNENA HRIATTIRNA : 3rd OCTOBER 2021

Tawngtaina : Chhungkua atanga hun changtu in hmang se.



Pathian fakna hla:- KHB 553- Aw Lalpa I malsawna hlu

(Kan sak chhung hian Pathian hnena kan thilpek lakkhawm ni se.)

Aw Lalpa, i malsawmna hlu,
Kan engkim chungah a lang;
I thu lo chuan kan nunna hlu,
Kan neih zawng nen a ral ang.
Kan fak a che,
I khawngaihna kan hmuh hian.

Nangma khawngaihna kut ata,
Nunna leh chakkhai tinreng;
Hlobet, pangpar nung tinrengin,
An dawng thin malsawmnate.
Fakna hlate,
I hnenah an hlan kum tluan.

Aw kan Lalpa, engkim Siamtu,
Nangma kut chhuak zawng zawng hian,
Mangan, lungngaiha min vengtu,
Fak tawk lo che mah ila,
Min ensan suh,
I duhzawng min zirtir rawh.

Hunte, nite an ral zel a,
Khawvel thil mawite an chuai;
Kan sualna zawng zawngte Lalpa,
I theihnain a tifai
Hun hmuh kan chak,
I chakna ring zel chung hian.



TAWNGTAI RUALNA

    Tawngtaina a hriat turte
  1. Vawiin thlenga Pathian malsawmna leh venhimna kan chan avangin lawmthu i sawi leh ang u. Kan kohhranin malsawmna tam tak a dawn thin avangin leh midang tanpui ve thei tura Pathianin min ruat avangin a hnenah lawmthu i sawi ang u.
  2. Myanmar a kan unaute buaina namenlo an tawk a, Pathian hnenah an buaina alo fel theih nan i dil ang u. Mizoram chhak lam tlang dunga kan unau raltlante i hre reng ila, Pathianin ringtute hmanga a dinhmun harsa tak atanga a khai chhuah zel nan i dil ang u.
  3. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u. KAn ram covid case in ziaawm lam a pan theih nan Pathian i dil ang u.
  4. Bial huap rorel fellowship leh kohhran pui Pathian hruaina in tluang taka neih zawh anih avangin lawmthu sawi ang u. Kan Bial hruaitu hrang hrangte tan i tawngtai ang u.
  5. Kan thawhlawm, inkhawmna leh keimahni Pathian hnenah I hlan ang u.

II Chronicles 16: 9


.
A lama rilru dik tak putute chunga a chakzia tilang tûrin khawvêl zawng zawngah Lalpa mit chu a lêng ruai ruai ṭhîn a ni. Atthlâk takin thil i ti a nih hi; tûn achinah chuan do i nei reng tawh ang,” a ti a.

Nehemia 8 : 10

Chutichuan, ani chuan an hnênah, “Kal ula, thil thau eiin thil thlum in ula, eng mah buatsaih nei lote tân chanpual thawn ang che u; vawiin hi kan Lalpa tâna ni thianghlim a nih hi. Lungngaiin awm suh u; Lalpa chunga lâwmna chu in chakna a ni si a,” a ti a

Sam 119: 71

I thuruatte ka zir theih nân
Tihhrehawma ka lo awm kha ka tân a ṭha a ni.





THUCHAH

Thupui : LALPA LAMA RILRU DIK

- Rbt K Zodinsanga

Audio



Kohhran hote a hmasa in LALPA Isua hmingin chibai ka buk a che u.

Vawiin Pathianni a Kohhran hote Amah chibai buk thei a min hruai thlengtu LALPA chu fakin awm rawh se. Thuchah sawina hun hlu tak min siamsak tu kan Kohhran hruaitute chungah ka lawm takzet a ni.

NAUPANG PUAL : Naupang pualin bul I han tan teh ang aw. Vawiin ah chuan Bible–a kan hmuh mipa naupang chanchin tawite kan sawi teh ang. Vawikhat chu Lal Isua khan Galili Dil kam ah rawngbawlna a nei a, mipui tamtak an lokal khawm a, a zirtir a, damlo te a tidam a. Mipui tamtakin a thusawi an ngaithla a ni. Khua a lo tlai chuan mipuite chu an ril a lo tam ta a. Lal Isua chuan a zirtirte hnenah mipuite chu eitur pe turin a ti a. Mahse a zirtirte chuan chhang leina tur Duli zahnih chauh an neih thu an hrilh a. Mipui lah chu an tam em em mai si a, an mangang hle mai a. Nakinah chuan zirtirte zinga mi Andria chu a lokal a, Isua hnenah chuan Chhangper panga leh Sangha pahnih nei MIPA NAUPANG pakhat a awm thu a rawn hrilh ta a. Mipa naupang chuan zirtirte kutah a eitur neihchhun chu a pe a, Zirtirte chuan Lal Isua hnenah an rawn keng a. Isua’n mal a sawm a, chhang leh Sangha tamtak ah a tipung ta a. Mipui zawng zawngte chu an sem a, an vaiin puar takin an ei ta a, an eibang nawi pawh tamtak an rut khawm ta a ni. Kha mipa naupang kha a nu leh pa ten a riltam huna a eitur TIFFIN atana an paitir a ni ngei ang a. A eitur pai chu amah chauha ei mai lovin Lal Isua hnenah a pe a, mi tamtak eitur neilo riltam ten eitur an lo neih ve phah ta a ni. He mipa naupang ang hian naupangte pawh khan in thil neihte midang nei ve lo leh mamawhte tan in pek thin chuan Pathianin mal a sawm anga, a dawngtu te an lawm em em anga nangmahni pawh in lawm dawn a ni. Mi thilphal te hi Pathianin malsawmna tamtak a pe thin a ni.

Nikum (2020) kumtir atangin hripuiin khawvel a tuam a, vawiin thlengin kan la tuar nasa em em mai a. Kan ramah ngeipawh mi tamtak in an vei a, thihpui pawh mi zathum chuang kan lo awm ta reng mai. Hripui a lo len mek laiin Mizoram chhunga kan la tawn ngai zen zen loh Lir nasa takin a lo nghing a, nikum chhung ringawt pawhin vawi za chuang lai mai lirnghing kan hria anih kha. Mi tamtak zanah mahni inah pawh riak ngamlo in pawnah te an mu a, in leh lo tamtak a tichhia a, hlau leh thlabarin kan awm kha kan la hre reng ang. Chutih lai chuan ramri inchuh avangin kan thenawm State te nen kan buai a, Tharum thawhna a thleng a, thisen a luang hial anih kha. Kan mamawh lakna kawngpui pawimawh te min pin sak a, harsatna tamtak kan tawh phah hial a nih kha.

Kum 2021 kan chuang kai tan chauh a, khawchhak lam kan thenawm Myanmar ram a lo buai a, tualchhung indona a lo awm a. Myanmar rama kan unaute tamtakin sahimna zawngin min rawn pan ruih ruih mai bawk a. Hripui, Lirnghing leh ramri buai te avanga kan dinhmun a chhiat em em lai leh Mizoram chhunga chengte pawh in puih tawn kan ngaih a, kan in buaipui ve reng laiin ei leh in tur neilo leh hak lai nen chauh a lo tlanchhia sahimna zawng kan unauten min rawn pan mek bawk si a. Kil hrang hrangah harsatna lianpui pui in min hual vel mup mai a nih hi. State pachhe ber leh tuamhlawm ngai ber mai kan nih nak laiin harsatna chi hrang hrang indawt zutin kan tawk mek a. Kan innghahna ber leh an mahni tanpui tura kan beisei India sawrkar lah chu a ngawi tlat mai bawk si a. Kan unaute ramchhunga nghei maithei dinhmuna dingte leh Raltlante kan tuamhlawm a lo ngai a, kan neihchhun ang angte thehchhuah a lo ngai ta a nih hi. Thim thuah li in min tuam ani ber mai.

Harsatna min lak kiansak tur leh min tanpui turin Pathian kan au a, kan tawngtai a. Mahse hri te hian min kiansan mai bawk si lo va. Pathian nung ringtu , Kristiante kan tawngtai a kan beisei ang ngawtin a thleng mai bawk silo. Kan chhehvel a hnamdang te leh ringlotu te zawk zingah chuan hri a kiang mek a, nunphung pangngai a an kal leh mup mup tawh laiin keini chu kan la buai em em mai bik hi a chhan kan in zawt fo thin in ka ring. Mawhpuh tur te kan zawnga, a changin Sawrkar kan dem thul, keimahni mipui leh mipuite kan in dem lek lek a. Chutih laiin Pathian hremna kan tawk mek lo ti pawl te pawh kan awm a nih hi. Tawngtai te pawh a sawt tawhlo a nih hi ti pawh kan awm hial tawh a nih hi. Kan phun nuai nuai a, mi tamtak chu hlauin kan phi ruai ruai tawh mai a ni. Heng kan awmdan hrang hrangte hi Pathian thil tum leh a laka kan rilru put dan tur dik a ni angem le?
Roreltute bung ruk a kan chhiar chuan, Israel fate Midian hovin an awm beh lai leh an tih retheih em em na lak ata Pathianin Gideona hmanga a chhanchhuah dawn lai khan, Vantirhkoh in Gideona a hnena thu a sawi khan Gideona chuan Lalpa Vantirhkoh hnenah, Aw kapu, LALPA kan hnena a awmsi chuan engtizia nge hetianga kan chunga a thlen si ? tiin a zawt hial a nih kha. Keini pawh LALPA kan hnenah a awm kan tih reng laiin harsatna hian min delh reng hi enge a chhan tih zawhna hi kan zawt ve fo thin in ka ring. Heng harsatna kan tawrh mek hi Pathian hian min hmu reng a, Kan tawngtaina te pawh hian A hnen a thleng reng a ni tih hi I ring tlat ang u. Mahse heng harsatna hi min la lak kiansak mai rihlohna chhan engemaw tak hi a nei anga a zirtur kan nei a nih hi ka ring tlat a ni.

II Chronicles 16:9 a kan chhiar tak ang khan a lama rilru diktak kan put theihna turin LALPA hian kan lakah beisei a nei a ni ngei ang. LALPA kan Pathian chak zia leh thil tihtheih zia ti lang tur hian keini ringtute hian eng rilru nge kan put anga enge kan tih turn i ang le?
NEHEMIA 8:10 ( Lehlin thar) Haw ula ruia theh rawh u, in uain leh chaw chu nei ve lo te eipui ang che u, vawiin hi LALPA ni serh a ni, ngui suh u, LALPA a in lawmna chu in chakna a ni si tih kan hmu a ni. Hei ngei hi a ni harsatna in min tuam laia a lama kan rilru put dantur diktak chu ni. LALPA chunga lawm tlat chunga kan tihtur chu tisa lama pachhia leh eitur neilo kan chhehvela awmte ngaihsaka tuamhlawm te leh Thlarau lama tuihal leh riltam mangang tamtak te tana ruai buatsaih hi a lo ni.

Gideona LALPA in a koh khan, a pa thil neih Baala maicham tichima Asera kit phawt tur leh LALPA tana Maicham din turin a ti a ni. Pathianin tihtur a tih te a tih zawh hnuah chuan Midian ho kut ata Israel fate kha a chhanchhuak ta a ni. Keini pawh heng harsatna ata chhanchhuah a kan awm theihna tur leh sual awpbehna lak atanga hnehna kan chan theihna turin LALPA Pathian aia kan ngaipawimawh thin leh kan nun tibuaitu, A lam kan hawina tur min hliahtu hi kan tihral hmasak phawt a, LALPA tana Maicham kan din hmasak leh phawt hi a va tul tak em. Tun hun hi khawvel thilte a kan in hai vurna hun ni pawhin a lang lo. Pathian lam kan hawi hun a ni takzet mai. Ram hruaitu te pawhin Pathian aia hlauh zawk leh ngaihpawimawh dang neih hun a nilo, Pathian lam hawi a rorelna dik kalpui hun a ni. Keini pawh kan nitin hnathawhna leh hun hmanna ah hian Pathian aia hlauh leh tihlawm loh hlauh zawk, dikna pawh tan ngamlo khawpa kan nun hun a ni ta lo.

Nu leh Pa te pawhin chhungkua aia ngaihpawimawh leh vei zawk kan nei a nih chuan Pathian chenna leh a Lal ber theihna tura kan In kan sak that hun a ni. Hun harsa leh khirhtak kan tawn lai a, rawngbawlna leh Kohhran pawh a kal hleihtheih loh lai hian Sual leh a tirhkohte hian chawlh an la ve der silo. Kan chawlh thup lai hian sual hian kan chhungkua a lo luhchilh mek em tih hi kan in enfiah a kan thupui bera kan neiha tan lak a va ngai tehlul em !.

Thuhriltu pakhatin,” Jona kha Pathian tirhna lama kal ta lovin Tarsis lamah lawngin a kal a, lawngah tui takin a lo muhil a, Lawnga a chuanpui te an nunna derthawng tak leh thih hlauhawmah an din phah a ni, Jona anga rawngbawltu muhil harh hun a ni” tiin a sawi a, a dik hle mai. Keimah ang bawka rawngbawlna fawng vuantu, hruaitu muthhlu mek kan awm ve anih chuan intihharh hun a ni . Kan velah Thlarau nun chau leh tuihal, mangang leh hlauhna in a tuam mek an tam em mai.

Mimal, Chhungkua leh Kohhran ten harsatna tawk mek te tana kan luanchhuahna hi I chhunzawm zel ang u, hei hian thu nasa takin a sawi mek a ni. Tunhnai lawkah khan Lunglei khawpui daifema kawngpui siama hnathawk hnamdang ringlotu tamtak Kristianah inpe in Kan BCM Pastorin Baptistma a chantir tih kan hria a, a va han lawmawm tak em, Ringlote pawhin he harsatna kan tawh mek lai hian kan nunah hmuh an nei ani ngei ang. Tisa lama eitur kan pek hi a sawt em em a, Thlarau lama tuihal leh mangangte tana kan thawh phei chuan a sawt lehzual a ni. Hei ngei hi a ni LALPA lama kan rilru put dan tur leh kan tihtur diktak chu ni. Heng hi kan tih zel chuan LALPA hian a chak zia leh thiltihtheih zia hi min hmuhtir zel dawn a ni. Hripuite leh harsatna kan hmachhawn mek laia ringtute kan awmdan hian kan vela ringlote leh nun tuihal leh piangtharlote hmuhah Kan Pathian biak hi tunge a nih tih hi a lan fiah tir anga an hnenah thu nasa takin a sawi dawn a ni. Ringtute kan beidawng leh mangang thawm hi a rin viau a a lansarh zawk erawh chuan Setana a hlawk hle ang. Harsatna karah hian ringtute beidawng hmel hi Setana lansarh tir duhber leh a thil tum a ni. Chuvangin LALPA lamah in tichak ila, Harsa viau mahse lawm tlat ila, bang lovin tawngtai ila chu ngei chu Pathian duhzawng a ni. Pathian au tlat ang u, kan dilna hi min chhang ngei ngei ang.

Sam 119:71 a kan hmuh angin, Lal Davida’n , “ I thu ruat te ka zir theih nan tih hrehawma ka lo awm kha ka tan a tha a ni” a tih angin He harsatna kan ramin a tawh lai mek hian Pathian in min zirtir a tum te kan hriat fiah theih nan in tichak ang u. Kan ram leh hnam, Kohhran leh chhungkua hian A lama rilru diktak kan put theihna tur leh kan dam lehna turin LALPA tan maicham dinthar lehin, tawngtai nasa zual sauh ang u.
A thu kan sawite LALPAN mal min sawmsak theuh rawh se.

LALPA TAWNGTAINA.