CHANCHIN THA MI TIN TAN

-









Kohhran member zawng zawngte Kum thar min hruai thlengtu kan Pathian hmingin chibai ka buk a che u. Serkawnah hian kum engemaw lai atang khan Kumthar Pathianni hmasa ber hi Tualchhung Kohhran Chairman thar hun atan dah thin a ni a. Kei tehlul hi khawngaihna avangin, Serkawn Kohhranah hian chanvo pawimawh tak tak ka lo chang ve tawh a, kuminah hian ngaihtuahnaa la awm ngai lo, Kohhran Chairman dinhmun ka luah ve dawn chu a ni ta reng mai, Kohhranhoten min tawngtaipui thin tur leh a tul anga thurawnte min pe thin turin ka ngen che u a ni.

Kum 2020, kum hrehawm tak kan hmang liam a; kum 2021 kan chuangkai a. He kum pawh hi eng angin nge kan hman dawn, nikum aiin a hrehawm sauh dawn nge, kan ziaawm dawn kan hre lo. Hetiang dinhmuna kan din lai hian Kohhranhoten belh tur dik kan belh a, thlan tur dik kan thlan a pawimawh hle mai. He khawvelah hian Lal Isua ni lo, thildang kan thlan ava hun tawh lo em. He khawvel hi a chhe ta hle tih hi hai rual a ni ta lo, sual hian khawvel hi a luah hneh ta hle mai. Lal Isua ni lo, kawng danga hlimna zawngtute hian hlimna tak tak hi an hmu dawn lo. Kum bul kan tannaah hian Lal Isua lo hi kei chuan kawhhmuh tur dang ka hre lo; Lal Isua nen he kum hi hmang ila, Lal Isua nen bul I tan ang u, tiin ka sawm che u a ni.

Nikum, 2020 kha kan hre theuh mai, kan inkhawm thei lova, kan zin chhuak tha ngam lova, thenawm inah takngial pawh kan chuankai ngam loh chang a awm; Krismas-ah pawh Ruai kan theh mumal thei lova, Kum thar Mual Programme pawh kan hmang thei lova, Missionary Day pawh kan hmang mumal leh thei dawnin a lang lo. Heng hian kan hun hlutzia min hriatfiah tir se a ava tha dawn em. Kohhran Programme kan hman theih loh chiah hian Kohhran hlutzia hi a langfiah a. He kum tha lo hi Zirtirtu atan, kan hma lam hun atana min buatsaihtu atan I hmang thiam ang u.

Kan hman theih dan danin Krismas leh Kum thar kan hmang liam a, ngaihtuahnaa awm reng thin, Krismas hi thlirlet lawk ka duh a. Lal Isuan min Chhandam tura lei hrehawm a rawn rah tanna hun, kan tana alo pianna hun hi nasa takin kan lawm thin a; a ropui khawp mai. Kristiante hun ropui ber, Hunpui kan tih hial thin a ni; nasa taka lawm pawh a phu. Nimahsela, he kan Hunpui hi Sual kan tih nasat ber hun a ni hial zawk em aw…?; tul lutuk lova Sum kan sen vak vak hun a ni thin em ?; Nu leh Pa tam tak chuan Krismas hi an huphurh ngawih ngawih ta zawk anih hi. Kohhranin Programme tam tak kan siam a, a hlawk tak tak em… tih kan enlet (Review) leh mumal bawk si lo. Krismas leh Kum thar kan hman dan hi enfiah a tha hle thinin ka hria. A Kohhran pum ang leh a Chhungkua leh Mimal anga kan hman thin dan bihchian hun niin ka hria a; kumina kan hmang mumal thei lote hi Pathian remruat fel tak ani zawk mah em aw, tiin a ngaihtuah theih rum rum mai. Tawi tein ka han telh hram a ni.

Naupang Pual kan lo sawi hmasa ang a: Sap mipa naupang fel deuh reuh, James-a thil tih tha deuh mai chan chin, tawi te kan sawi lawk ang, Chhungkuaa naupangte khan lo ngaihthla ngun hle ula, midang tan pawh a pawimawh khawp mai. An chhungkua hi pali chauh an ni a, a nu leh pa, kum 30 pawh la tling lo ve ve leh, a pu, tar tak tawh nen, an awm a. James-a pu chu a tar deuh tawh avangin an chaw thleng keh thei, mawi tak leh Bowl-te chu a tih tlak keh nual tawh avangin, an chaw thleng tha chu hmang ve tawh lo mai se, an ti a, Chaw thleng Thinga siam, thlauh pawha keh thei lo an siam sak a, Bowl pawh an hman ang ni lo, keh thei lo chi an hman tir a. Tin, a chaw ei, a tawp deuh tawh avangin James-a nu chuan hmun hranah eina a siamsak a. Chawhmeh pawh a ei thiam tur deuh a siamsak a, an enhrang ta viau mai a…. a rei deuh hnu phei chuan a tar ber chuan ngaihsak a hlawh ta lo khawp mai. James-a chuan a pu chu a khawngaih hle thin a, a chawhmeh suah sa-te hi a pe thin. Tum khat chu, James-a chu ramhnuaiah kalin thing bung lian fu hi a rawn pu haw a; an kawtah chuan a ker khuar a; a thiam ang ang chuan chawthleng tur siam a tum a.A kut a ti kak palh ta a, a thi nasa ta mai a. A pain a rawn hmuh chuan, “James, kha thing kha eng atan nge I tih, enge I siam dawn,” a rawn ti a; ani chuan, “Ka pa, in upat ve huna in chaw thleng tur, tuna ka pu in hmantir ang saw lo siam lawk ve ka tum a, hei ka kut ka ti kak palh anih hi” tiin a chhang ta a. A pa chu a ngawi vang vang a, chutih lai chuan James-a nu chu a lo chhuak bawk a. A ma pa ngei an enkawl dan dik lohzia chu an inhre chhuak ta a ni. James-a pa chuan, hmangaih taka a pain alo enkawl seilen dan zawng zawng a ngaihtuah let a, tuna an enkawl dan dik lohzia leh hmangaih taka enkawl let ve tur a nihzia a inhrechhuak ta a.

Chuta tang chuan Chaw thleng mawi tak an lei sak a, chaw ei laiin an zingah an thuttir ta a, chawhmeh a ei duh zawng siamsak zel an tum ta a ni. Naupang James-a thiltih avangin a Nu leh Pa-ten an thil tih dik loh an hrechhuak a, thil tha an hmuchhuak ta a nih chu. Naupang hi fel deuh deuh an awm thin. He naupang pual atang hian Tar leh upate hi I hmangaih ang u, kan naupan tet atanga min enkawl seiliantute an ni si, tih I hre thar theuh ang u. Nu leh pa zah lo taka vin ching kan awm em, an thu zawh, chhang tha duh lo kan awm em, Tar Aa ti a, nuihzat kan ching em ? Nu leh Pate hi kan lei pathiante an ni asin….. I hmangaih ang u’

Chhungkaw pakhatah hian an fapa neih chhun chu Pawl 9 zirlai a ni a. Lehkha a thiam thei lo hle mai a; a zir thatchhe em em bawk a. A nu leh pa-te chuan an fapa chu an ngaihsak khawp a, a Fail an hlau em em a, zir taima turin an fuih thin a; mahse a zir taima chuang reng reng lova. Chutianga an buaipui reng chung chuan, kum tawp Exam a lo hun a, a Exam ve a; a chhungte chuan a pass pawh an beisei lo. Result chhuah ni chuan phur vak lovin a va kal ve a. A Progress Report chu a va la a; a senin a inrin bial thluah a; mahse a tawp Remark Column –ah chuan, Promoted by Grace tih hi a inziak tlat mai a. Fail inring sa anih avangin an hotute a zawtfiah ngat a; an Classmaster chuan, Khawngaihna avangin an pass tir che (Promoted by Grace) tiin alo hrilhfiah a. Lawm takin a haw a, a nu leh pa a hrilh a, anni pawh chuan an fapa an khawngaih dan chu mak an ti em em a,an hrethiam lo hial zawk a ni. Khawngaihna avanga Chhandamna kan chan pawh hi, a mak em em a; a changtu chuan a khawngaihtu Pathian an fak a, a tan an inpe let thin. Khawngaihna avanga pass phak miah lo an pass tir kha a mak viau nain khawngaihna avanga Chhandamna hi chu a tehkhin phak lo hle. Misual Fa kha Pathian Fa –ah min siam a, Hremhmun chang tur kha Vanram min chantir a; he dinhmun hi a inthlau lutuk. Hla phuahtu chuan, Khawngaihna mak, mawi leh duhawm… Sual riangvai chhandamna, a ti hial a ni.

Tukin, kum 2021 Pathianni hmasa berah hian, Khawngaihnaa Chhandam thu-ah hian I dinhmun a chiang em …? I.John.3:1 –ah chuan, “Ngai teh u, Pain min hmangaihna chu a va nasa em, Pathian faahte min vuah tak hi” tih kan hmu. Mihring sual fate kan nih reng laiin Khawngaihna avanga Pathianin a Fapa mal neih chhun, kan sual aiawh tura a rawn pe a; amah ringtuten Chhandamna kan lo chang ta mai hi, a va mak tehlul em. Khawngaihnaa Chhandam hi a changtu chuan mak a ti a, phu lo a inti a, a lehlamah a inhriat chian chuan lawmawm a ti em em si anih hi. Tunlai khawvel sualna nasa tak leh buaina tam tak karah hian Lal Isua ni lo-ah hlimna tak tak I hmu dawn lo, tih hi ka sawi duh a, Lal Isua hi hlimna tluantling a ni tih hi I hrechiang ang u.

. Tukinah hian, I nihna hrechiang rawh…. Pathian Fa nihna-ah hian I chiang tawk em, tih leh, chu Pathian Fa nihna hlutna chu a tawi thei ang berin ngaithla ila ka ti ani. Kan khawvel hun hi heti hi a ni a; kan hma lamah engnge lo thleng dawn kan hre lo. Khawngaihna chu a pun leh zual nan, Sualin kan awm reng dawn em ni…? Tih ang deuh khan, suala awm reng hi a va hun tawh lo em… I nihna, I dinhmun hrechiang rawh…. Eng dinhmunah nge I din…? Sualah ila awm reng dawn nge, Mak taka Chhandamtu che hi I pan dawn ? Dinhmun tih chian hun a ni ta…… tih hi he Kumthar Pathianni hmasa bera I hnena ka sawi duh chu a ni. Kan khawvel hun hi a va tha ta lo em… Covid-19 lar chhoh tirha Europe ram Italy, Spain tih vela an thih vak vak lai khan, Italy rama mi hausa em em mai, Billionaire pakhat chu, a nupui leh fate an thi zo vek a, an chhungkuaah amah chauh a dam ta si a; hrehawm a ti lutuk a, Ka chhungte an thih vek hnua keimah chauhva dam hian awmzia a nei lo, tiin mi hausa em em chu a inchhawng, chhawng 7-na atangin a zuang thla a, a thi chiang khawp mai, an ti. He kan khawvel hi a him ta lova, buai hlirin kan khat ta. Indo thu kan hre nasa ta em em a, lirnghing lah keini Mizoram ngeiah pawh kan hre nasa ta em em bawk. Hripui leng hi, kan Pi/Pute chuan, Tamin a zui chawk an lo ti thin bawk. Kan hmalam hun hi eng ang nge ni zel dawn kan hre tawh lo. Krismas leh Kumthar pawh ti mai hian kan hmang ta; hun tha kan la neih lai hian Lal Isua, mak taka Khawngaihnaa min Chhandamtu hi I pan ang u, tiin kan insawm a ni.

Kan thu pahnihna atan chuan – Pathian Fa nihna hlutzia leh ropuizia hi I ngaihtuah thar ang u. Misual, Pathian nena in mihran tawh, Amah nena inpawl thei tawh lo kha, Amah nena inpawl leh theiin, kan mamawh hun apianga kan auh theihin a rawn inti hniam a, “Ka pa…..” tiin kan au leh thei mai hi ava ropui em. Kan mangan lai leh harsatna kan tawh lai pawha Engkimtithei Pathian awmpuina kan chang thinte hi a va ropuiin a va hlu em. “Tuite in dai kai lai Pawhin in hnenah ka awm si a…..” (Isaia 43) titu Pathian kan nei hi ava nuam em. Tahna ruam kan zawh laia Thlamuantu Pathian kan nei tlatte hi a va ropui em. Van kan thlen hma, Tun maiah pawh hian a hlutna tam tak kan tel a ni lo’m ni….? Misualin chhandamna kan chan leh hian a hlutzia leh ropuizia hi I chhut thar teh ang u.

Chutiang anih lai chuan….Pathian Fa, thisena a lei tawh, a serh hran tawhte hi, a ta kan nih ang hian kan nung zo si lo em, tih hi ngaihtuah tel a ngai tlat mai. Rom lehkhathawn-ah chuan, bung 12:2-ah, He khawvel dan ang hian awm suh ula, Pathian duhzawng, a tha leh lawmtlak leh that famkim chu……. tih kan hmu. He khawvel mite duhzawng leh tih thin ti ve tho, an duhzawng it ve tlat, Pathian Fa inti tho si kan ni em…? Chutiang I nih chuan Pathian Fa nihnaah I chiang chiah lo a ni thei. A ni chuan thim thuneihna laka min chhanchhuakin, a Fapa hmangaih taka ramah chuan min kaitir ta a….. tih kan hmu a. A dinhmun hi a in ang lo lutuk a, Thim thuneihna hnuaia awm leh Pathian Fapa rama awm hi, thil in ang lo lutuk, Dinhmun insawn dawrh a ni. Pathian Fa nihna dinhmun, tih danglam, he khawvel dan anga awm lo a ni, tih I hre chiang ang u.

Kan thu tawpna atan chuan, Pathian Fate chan tur hi a va ropui em…tih hi a ni. Lal Isua neitute, Pathian Fa nihna changtute chan tur, kan innghahna chu he khawvel piah lama kan tana Kuta sak loh In, Chatuana awm tur neitu kan ni hi a ni. II Kor.5:1-a, Kan awmna leia In a tih hi, House Building hi ni lovin, kan taksa a sawina a ni; chu chu tih chhiat lo ni mah se, lo boral mah se, Vanah In kuta sak loh, chatuana awm tur kan nei, a ti a ni. Phil.1:21-ah chuan, Kei atan zawng nun hi Krista a ni si a, thih pawh hlawkna a ni, Tirhkoh Paulan a ti bawk. He khawvel, lungngaihna leh tahna ramah hian kan awm a, hrehawm tam takin min bawm a. Kristian nun chu indo nun a ni, te kan ti a; khawvelah hian rethei reng rengtein thenkhat chu kan awm a. He khawvel hi kan ram anih loh avangin hrehawm tam tak hual velna karah kan awm anih hi. Nimahsela he khawvel hrehawm tlansan tur ringawt ni lovin, Thisena min leitu, a Faa min pomtu hmangaihna rama Sual awm tawh lohna hmun hi Ringtute chan tur, kan in nghet chu a ni, a va ropui em.Rinawm taka a rawngbawl thinte hian kan ram kan thleng ve tawh dawn a, tahchuan ropuina kan chang ve tawh dawn a ni. Krista avanga hrehawm tuartu te, Sual laka inthiar fihlim tlatte hian, kan In Nghet chu kan luah ve tawh ang a, Sual avanga lungngai thin khan chawlhna hmun kan thleng tawh dawn a ni. He khawvela Krista avanga hmuhsitna tuar thin te, hleprukna laka inthiar fihlim tlat te, Sual kawng hrang hrang laka Krista avanga insum tlat thinte chuan Lalpa avanga an lawmman chu an hmu tawh dawn a ni. Tirhkoh Paula hian, “Kei atan zawng nun hi Krista a ni si a, thih pawh hlawkna a ni” a tih hian, he khawvelah hian ka dam anih rau rau chuan Krista tan ka thawk ang a, ka lo thi anih erawh chuan a nuam zawk em em dawn a, ka nih dan tur ka ni famkim tawh dawn a ni, a ti a ni , A dawt leh kan chhiar phei chuan, Kal chhuaha Krista hnena awm chakna ka neih avangin, chu chu ka tan a tha zawk em em a ni, a ti hial a ni. He kum thar Pathianni hmasa berah hian ….. Pathian Fa nihna dinhmunah I dinhmun tichiang la, Pathian Fa nihnaah ilo chiang tawh anih chuan, Fa awm dan tur ang takin rinawm takin Lal Isua zui rawh. Tichuan he khawvel piahah, lui ral mawi kan thlen hunah chuan, kan Pathian hnenah hlimna tawp lo chu kan chang tawh dawn a ni. “Kan awmna leia In hi thiat mah sela, Vanah In, kuta sak loh, chatuana awm tur, Pathian hnen ata In nghet chu kan nei tih kan hre si a. “Amen, lo kal ta che, Lalpa Isu, ti thei theuh ila, a va lawmawm dawn em.

Van ram kan thlen hun chuanin, Chu ni ropui chu kan lawm em em ang; Lal Isua kan hmuhin, Hnehtu chu fakin kan zai ang. Lalpan a thu thianghlim malsawm rawh se. Amen.

… Lalpa tawngtainain tawngtai rual ila.

KHB NO :495 -HLA NO. 495 (Isua hmangaihna leh thatna)

Isua hmangaihna leh thatna
Leh zahngaihna i fak ang;
Vanram in eng leh malsawmna,
Ka tan a han buatsaih ang.

Vanram kan thlen hun chuanin,
Chu ni ropui chu kan lawm em em ang;
Lal Isua kan hmuhin,
Hnehtu chu fakin kan zai ang.

Vanram panin kan kal laiin,
Chhumte a lo zing thin ang;
Mahse, kan kal pelh hun chuanin,

Thim leh thawpik a kiang ang.

Rinawm leh fel taka awmin,
Ni tin rawng i bawl tlat ang;
A ropuina chang ve turin,
Dam chhung hian i bei zel ang.


Kan hmaa lawmman um zelin,
A mawina kan thlir thuai ang,
Lung man tam kawngkaa lutin,


Rangkachak tual kan leng ang.

Lalpa Tawngtaina