Ka lawm em em e, kan Pa vana mi'n,
Bible-a a hmangaih min hrilh vangin;
A lehkhabua thil mak ka hmuh hi,
Lal Isua min hmangaihna hi a ni.

Lal Isuan min hmangaih ka lawm hle,
Min hmangaih hle, min hmangaih hle;
Lal Isuan min hmangaih ka lawm hle,
Kei pawh min hmangaih e.

Amah theihnghilhin ka vak bo na a,
Ka bonaah pawh kei min hmangaih a;
Aman m in hmangaih tih ka hriat veleh,
A hnenah ka kir leh ta a ni e.

Lal chu mawi taka ka hmuh hun chuanin,
Hla pakhat tal chu sa thei ilangin;
Chu chu ka chatuan hla ber a ni tur-
Lal Isua hmangaihna mak tak mai chu.

Min hmangaih hriain ka hmangaih ve a,
Hmangaih avangin kei min tlan ta a;
Hmnagaih vanga thinga thi a ni e,
Lalpa Isuan min va hmangaih em ve!

Ama ropuizia min zawt sela aw,
Eng ang takin sawi nasa ang i maw!
Ama Thlarau leh kei kan inrem a,
Lal Isua hmangaih min hriattir fo va.

Rilrua hriatin ka hah a dam hle,
Lal Isua rinin mal min sawmsak e;
Lal Isua hmangaih ka hril apiangin,
Setana'n ka thal a tlanchhiatsan thin.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi leh ang u. Kan kohhranin malsawmna tam tak a dawn thin avangin leh midang tanpui ve thei tura Pathianin min ruat avangin a hnenah lawmthu i sawi ang u.
2. Chhungtinin Pathian biakna nung leh tha mahni in lamah kan buatsaih theih nan Thlarau thianghlim awmpuina i dil ang u.
3. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u. Kan khawtlangah Covid case a tam chho ve ta hle a, Pathian tanpuina dil ila, alo ziaawm theih nan i ngen zel ang u.
4. Kohhran leh a hnuaia Fellowship hrang hrang Plan & Budget siam alo hun dawn hnai a, Pathianin kohhran min hruaia duh dan ngun taka Pathian rawn chunga pawl tinin kan hriatchhuah theih nan i dil ang u.
5. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : “Kristiante tuarna leh a lâwmman”

Audio

Tukin zingah Pathian leh Kohhran te kaltlang a Pathian thu puanna hun ṭha tak ka neih avangin ka lâwm hle mai. Kohhran memberte zawng zawng Pathian hmingin chibai ka bûk a che u. Covid-19 avang leh “lock down” avangin a ngaithlatute lam leh thuchah puangtuten harsatna kan nei ṭheuh va, kan kohhran mai pawh nilovin kan ram pumpui in kan tuar a ni, mahse Pathian remruatah kan pawm mai loh takah, kan chunga thleng a ni miau si a.

Tukin zinga kan thupui atan a ka thlan chu “Kristiante tuarna leh a lawmman” tih hi a ni a, Sam 119:75 “Aw Lalpa I rorelna te chu a fel tih leh, nangchuan rinawm takin a ni min tih hreawm ni tih ka hria,” tih kan hmu, a hei hi inghah nan hman ka duh ani.

Naupang pual:
`Thawnthu, thu tak si i lo sawi ang;
Serkawn KNP hi 23 April, 1943 khan a ding tawh a naupang kan la tam êm êm lova, kan missionary-te hma lakna leh phur puina in thalai thenkhatte nen an din a ni. Pathian thu te, hla tawi te, nungchang tha leh awm dan mawi, thu rawn te, zing leh tlai ah min zirtir thin. Kan ṭangkaipui em em ani. Naupang tam tak zingah pathum chanchin te ka sawi dawn :— Rohmingthanga, Pu Lena fapa te, Lalhmingthanga, Pu Lalmama fapa te, Sanghmingthanga, Pu Kêla fapa te, midang chu ka sawi tawh lo mai ang. Naupang thu awih leh KNP inkhawm ngai pawimawh êm êm an ni a, nu leh pa thu an awih bawk a, lehkha an zir taima em em bawk a, an thiam thei hle bawk a, an lo puitlin chuan Rova leh Hminga phei chu I.A.S. an pass ta a, India ram leh Mizo hnam pumpui tana mi ṭangkai an ni ta! Tun thlengin kum 85 mi ni in Kohhran tan pawh an la ṭangkai êm êm mai. Sânga pawh Northeast pumpui a thlawhtheihna khalh thiam, pilot a ni ta hial a ni. An chhuanawm êm êm a, chu chu Serkawn K.N.P. ṭhin te an ni a, an entawn tlak hle an tuna KNP ho pawhin entawnin chutiang nih chu i tum ve ang u.

Aw le, Pathian thu ah kan lut tawh anga, keini Kristiante hi tu te chiah nge kan nih, Pathian in eng ti turin nge min duh— amah ringtu rinawm ni turin, a tan a nung turin, amah zui turin, a hna thawk turin, a rawngbawl tur in, a ṭul chuan a tan a tuar ve turin, a malsawmna dawng turin, a lawmman ama hnena mi chang ve turin min duh ani. Chuvangin infiah ila, Kristian tak tak, piangthar kan ni em tih hi.

Kristian Awmzia:
Bible pumpui ah Kristian ti fak a thu dah hi a tam lo hle mai, hmun thum ah chauh kan hmu a ni. Pakhatna ah chuan, Tirh 11:26 ah Surya rama Antiokei khuaah zirtirte chu “Kristian” ti a vuah an ni. Pahnihna ah chuan, Tirh 26:28 ah Lal Agrippan Paula hnenah “Reilote chauh thlem a Kristian a mi siam I tum a nih hi,” a ti. Pathumna ah chuan, I Petera 4:6 “Kristian a nih avangin tuar sela, zak suh se, chumi chuan Pathian chawmawi zawk rawh se.” Tichuan, Kristian tih a “Tiani” (Latin) chu ‘sipai’ tihna a ni a, “Kristo” (latin), hriak thih tihna a ni. Old Grik chuan “mi huaisen” tihna niin, zuitu rinawm, thi ngam, “nung ngam”, Krista tan a tuar ngam, pasal tha tihna a ni, I ni ve dawn em? “Kristian” tih a koh a nih hma in Mi thianghlim (vawi 60), Zirtirte (vawi 30), Ringtute (vawi 80), Unaute (200) an lo ti thin. Mizovin,”Pathian thu awih” kan tih thin ang khan.

Chuvangin Kristian in ti zingah hian a tak leh a lem tam tak kan awm thei a, Bible zirmi WS Darhama chuan Kristian chithum, “Nominal Christian” a hming chauhva Kristian, pian leh murna atang a Kristian rama seilian, chhungkua tanga chhawm chhoh, Sorkar ah pawh inziak lut — piangthar lo, tawngtai ngai lo, Bible chhiar peihlo, Khawvel thil ringawt a in hmang ral, mi veina pawh neilo, chapo zet, Kristian tha leh ringtu rinawmte lo nuihzatbur thin an awm a, a pawi takzet a ni. Chutiang mi Kristian chu i ni ve em? Tin, a pahnihna chu “Professing Kristian” an awm leh a, Kristian naupang angin an seilian ve a, Baptisma an chang a, hlazir naah leh zai pawl ah an tel ve a, an tawngtai ve fova, chanpual pek pawh an hlen ve thei zel a mahse Thlarau Thianghlim awmzia an hre lova, Pathian ah lungawina leh hlimna tak tak an nei lova, buhsi ang, mi ruak, kawrawng, hman tlak loh, mi vervek an ni, “Ka hrelo che u kal bo rawh u,” la tih tur ang chi tam tak an awm bawk – in enfiah ve teh le. “Possessing Christian” Heng hi Kristian tak tak, piangthar, Krista neitu, tisa ah rinna an nghat lo va, chatuan nun changa, sual sima, Krista a tlu lut, Isua zuitu rinawm, thlarau bo veitu diktak a ṭul apianga tuar leh thih pawh huam, hreawm tin reng tuar in huam – Neitu Kristian, Krista tan a palai rinawm an ni;
chutiang chu a ni Kristian tak tak, malsawmna leh lawman la pek tur chu. Chutiang mi Kristian chu i ni em in en chiang ve rawh. Watchman Nee chuan Kristian rinawm hman tlak tak tak chu mi taima, rinna a mi nghet, midangte hmangaihtu, mi thusawi ngun taka ngaithlatu, tawng insûmkar mi, hruai kawi zung zung theihloh, mahin taksa veng leh enkawl thiam, engkim taur huam leh tuar tura inpeih, sum leh pai a rinawm, a tawp thlenga thu dik ṭan tlat a nih a ngai a ni a ti. Chuvangin Kristian tak tak kan zir ta a, nang chutiang mi chu niin i in hria em?

Aw le, tunah chuan Kristian tak tak chanchin kan lo zir chiang ta a, Pathianin thuthlung hlui ah te, thutthlung thar ah te, tin tunlai hun thleng a Kristiante hi nasa takin a hmang thei tih Bible ah kan hmu thluah mai. A zawng a za chuan kan chhut vek hman lo anga, tun hunlai thleng pawhin pastor, upa leh missionary te pawh nasa takin a hmang a, lawmna karah tuarna, chânna, hreawm tam tak paltlang na kara a hruai dan tlem a zawng lo chhut leh ila, a tawpah a rawngbawltute hi malsawmna leh lâwmna ah a khai chhuah leh thu te pawh kan hmu thei ang.

Mosia chuan, Number 11:15 ah “Mipuite hi ka tan an rit lutuk a, ka phur zo lo, min ti hlum daih law law rawh,”tiin mangang taka he rawngbawltu ropui hi beidawngin an au chhuak a ni. Ani hi thuthlung hlui huna hruaitu ropui, Kristian hmantlak a ni— Aigupta ram a Israel fate nuai 6 chuang zet hruai chhuak tura Pathian kohna chhang tu a ni. A harsatna te— Kanaan ram panna kum 40 zet kha a rei lutuk a ni; Israel zingah administration a harsa lutuk, an chaw ei leh in tur a hautak bawk si. An in ngeihlo êm êm bawk, inthlahpawlh an nih vangin an phun chiar êm êm a, Israel upate an khirh lutuk a, aiawh 70 thlan ten an mawhphurna an hlen thei si lo. Sinai tlanga Mosia Pathianin a koh hlânin bawngno lem an lo be bawk nen. Mosia tan a rit lutuk a, a mangang chu a au chhuak ta, “Mipuite hi ka tan an rit lutuk a ka phur zo lo, min ti hlum daih law law mai rawh,” tiin. Mahse Pathianin a hmangaih a a ti hlum lova, a mawhphurhna a chhuhsak lova, hruaitu ropui theihnghilh phalloh a ni ta zel ani. Harsatna tawk lo rawngbawltu an awm lo!

Jona 4:3 “Lalpa ka nunna min laksak turin ka ngen a che,” a ti. Ninevi ah mipui te him nan Pathian in tlangau turin a tir, harsatna leh chhuanlam tam tak a siam a, a tawpah Pathian tirh chhan chu tiin a tlangau va,”Ni 40 chhunga Ninevi khawpui a chhe vek dawn,”a ti a, “Sim rawh u” pawh a ti lo. Mahse an lo sim a, a te ber atanga lal ber thleng in vut leh vaivut a thu in an sim ta a. Jona thin ur a, a titauva, “Thih phah khawp hial a ka thin rim zia hi ka ti dik a ni,” a ti fan a, Kan thil tihdik lovahte, ka tisa lutuka keimahni kan in dem tur a ni. Pathian mawhchhiat tur a nilo, Diabola kan dodal tur ani, Jona ang kan awm fo thin, mahse Pathianin Jona chu a tawpah a chawimawi leh ani.

Eliza: I Lalte 19:4 ah “a tawk tawh e, Aw Lalpa, tunah hian ka nunna hi la mai teh, ka pute aiin ka tha chuang bik si lova,” a ti. Eliza hi zawlnei ropui ber te zinga mi a ni, hmun sang tak a dah a ni a, kûtni vangthla ah pawh a ṭhutna bik dahsak a ni ṭhin. Karmel tlângah Baala puithiam te hnehtu, mi 400 lai thattu ani a, mi nghet leh huaisen a ni. An sawi dan chuan Eliza hian Martin Luther anga huaisenna , Latimera anga tawngkam thiam, John Calvina anga in pe thûk, John Knox-a anga tawngtai nasa leh taima hi Eliza ah hian a awm vek a ni an ti. Baala puithiam 400 zet a tihhlum thu kan hria a, chumi hnu chuan Zezebel-in thah tumin a ûm ta, hmeichhe hlauvin a tlan chhe chiam a, Beerseba ah juniper thing hnuai ah a biru a, Pathian hnenah thih a dil a ni. Mahse Pathian rilru a ni lova, a puithiam te hum leh chhanhim chu Pathian duhdan niin— chhangper, chaw, tuithawl; a pe a, Lalpan inlarna thar a entir a— Thlî te, lirnghing te, mei te, aw dam diai te in a pawl a,”Haw leh rawh,” a ti ani. Pathian in a chhanhim a, Surya lal hriak thih turin, Israel lal hriak thih turin, Elisan a thlak dan tur hmu turin, ṭhian thar a pe a, missionary thar a lo ni leh ta, ropui takin lawmman ropui atan vanah lak chhoh in a lo awm ta ani. Pathianin thi lovin malsawmna leh chawimawina, lawmman a lo pe leh ta ani.

Kan sawi tawh ang khan Kristian te hi Pathian in nasa takina rawngbawl turin a hmang, harsatna an tawh pawhin in hnenah ka awm zêl dawn a ti a ni. Paula chungchangah harsatna chhiarsen loh a pal tlang a, thi lo a ruangin vawi tam tak a chhuak a, Petera pawhin, “Hrehawm tam tak tuarin Pathian ramah kan lut tur a ni reng ani,” tiin lungawi takin an awm thin. Kei zawng eng ang pawhin awm ila lungawi zel ka ching tawh si a a ti. “Aw Lalpa i rorelna te chu a fel tih leh, nang chuan rinawm takin ani min tih hreawm thin ni,” tih hi Kristiante tan vawn tlat tur a ni. Thuthlung thar hunah tirhkoh leh Pathian mi hman te pawh hian he thu hi an nunah an hmu chiang êm êm a, kan missionary te leh nangmah ngei pawh hian a takin chan i tum anga, Lalpa chuan tuarna atangin malsawmna leh lawmman kan tan a khek, Kristian tak tak te chuan harsatna leh rûmna karah ramri buai te, virus te, refugee leh tuarna hrang hrang karah zâm lovin hma i sawn zel ang u. Kan tuarna hian malsawmna leh lâwmna a thlen zel dawn si a.
Lalpan malsawm rawh se.

Pathian fakna hla:- KHB No. 344 - 'Thinlung ngui fuih tur an awm a, '