THUTAKA MIN HRUAITU THLARAU THIANGHLIM

Thuhma: Kohhran mipui zawng zawngte kan Lalpa Isua Krista hmingin chibai ka buk a che u. Vawiin hi Thlarau Thianghlim thlen ni (Pentekost Ni) a ni a. BCM Ni Pawimawh Bu-ah pawh dah a niin, thupui atan ‘Thutaka Min Hruaitu Thlarau Thianghlim’ tih dahsa a ni a, kan thupui innghahna tur chu Johana 16:13 a ni. Kan thuchah sawi turte tawngtaina nena min lo ngaihthlaksak turin kan inngen hmasa a ni e.

Thutak chu engnge ni?: Saptawnga ‘Truth’ tih hi Mizotawngah chuan Thudik emaw Thutak tiin kan sawi thin a. Mizo Bible-ah hian ‘Thutak’ tih hi hman a ni tlangpui a ni. Chu Thutak chu engnge a nih a, engtin nge kan hmuh theih ang? Keini Kristiante tan chuan chhanna awlsam tak a awm – “Keimah hi kawng leh thutak leh nunna ka ni” (Johana 14:6) titu Isua kha he zawhna chhanna chu a ni. Engtin nge Isua (mihring) chu Thutak a nih theih? tiin kan rilruin kan zawt maithei.

A tawi zawngin sawi ta ila - Thutak chu Pathian rorelna leh remruatna fel tak, chatuan pawha danglam thei tawh lo hi a ni. Isua pawh thutak a nihna chhan ber chu Pathian atanga chhuak, mihring ten chatuan nunna kan neih theihna atana Pathian remruat tihpuitlinna a nih vang a ni. Tirhkoh Paula pawhin Ephesi 1:13-ah “Amahah chuan nangni pawh thutak thu (in chhandamna Chanchin Tha chu) in ngaihthlak a, rin pawh in rin hnuin, amahah chuan Thlarau Thianghlim tiam chuan chhinchhiahin in awm kha” a lo ti ve bawk a.

Lal Isua khan, amah Thutak chu a nihna tak min rawn hriattir a tum a ni. Pilata’n lal a nih leh nih loh a zawh khan Isua chuan, “Ni e, lal ka ni asin. Thutak hriattir hi ka pian chhan leh khawvela ka rawn kal chhan a ni…” (Johana 18:37) tiin a chhang a. A hma lawkah khan a ram chu he khawvela mi a nih loh thu leh, ni sela chuan he khawvel lalte ang bawkin a sipai ten an venhim tur thu a sawi a nih kha. Khawvel lalte tihdan anga tharum hmanga ram lak a tum lova, mihringte tana Pathian chatuan thil tum – kan chhandamna chanchintha (Thutak) - min hriattir a, chumi dana kan nun theih nana min rawn zirtir tura lo kal a ni tih a sawi a ni.

Thutaka min hruaitu Thlarau Thianghlim: Isua kha Pathian Fapa ni mahse mihringa lo chang a ni a. A thu sawite kha Thutak a nih anga tifamkim tur chuan Pathiana Minung Pathumte kha an rawn chet kim a ngai ta a. Chuvangin, Lal Isua chuan Johana 14:26-ah “Thlamuantu, Thlarau Thianghlim, Pain ka hminga a rawn tirh tur khan, chu mi ngei chuan engkim a zirtir ang che u a, in hnena ka sawi zawng zawng a hriat chhuahtir ang che u” tiin a zirtirte kha a lo hrilh lawk tawh a nih kha. Chu Thlarau ngei chu a thu zawma awm tlatte hnenah Pentekost ni khan a pe ta tih kan hria a ni (Tirhkohte 2:1-4).

Kan thupui innghahna Johana 16:13 kan en chuan Thlarau Thianghlim chu ‘Thlarau dik tak’ (Spirit of truth) a ni tih kan hmu a. A lo chhuahna chu Thutak a nih avangin Thutak thlarau a ni a, a hna ber tur pawh Thutaka min hruai luh a, chumi kawngah chuan min hruai zel a tum a ni. Ama phuahchawp thu mai a sawi dawn lova, Thutak bulpui Pathianin sawi tura a tih ang zel chauh a sawi ang a; thil lo la thleng turte pawh a hriattir dawn a ni tih kan hmu a ni.

Helai changah bawk hian Thlarau Thianghlimin min hruai luhna tur chu ‘thutak zawng zawngah’ tih a nih avangin a zau hle mai a. Vawikhata sawi vek sen a ni lovang a, chuvangin kawng thum chauh tawi te tein lo ngaihtuahho ta ila:

1. Chhandamnaah: Pathianin mihringte suala tlu chhe tawh hnu a fapa Isua hmanga min chhandam leh dan thu hi mihringin amahin a hre ngawt thei lova, hriattirtu a awm a ngai a ni. Pentekost ni-a Thlarau Thianghlim hnathawh hmasa ber chu thawm nasa tak nen Isua lo hre tawhtute chu rawn luahkhatin, tawng dangtein an lo tawng ta a. Chu thawm chuan mipui tam tak hip khawmin, Petera kal tlangin Thlarau Thianghlim chuan Thutak Isua nihna dik tak a puang chhuak ta a. Ngaithlatu mipuiteah Thlarau Thianghlim bawk chuan hna thawkin an thinlunga chhun ang niin an sual simin ringtu an lo ni ve ta a ni tih kan hmu a ni (Tirhkohte 2:1-41).
Kohhranah Thlarau Thianghlima harhna a lo thlen hian chhandamna la chang lote leh chau ten kan thawm riva an lo hria a, hip khawmin an awm thin. Chutiang mite chu thutaka hruai luh hi Thlarau Thianghlim thil tum ber chu a ni a, a pawl tharna changte hi Pentekost nia mite ang khan a hmanruaah kan tang thin em tih erawh kan inchhut fo a tul thin.
Tirhkohte 8:26-38 –ah chuan Philipa leh Ethiopia mi tilreh inkawmna chungchang kan hmu a. Ethiopia mi tilreh chuan tawlailira chuang chungin Zawlnei Isaia’n Isua chanchin a lo ziak tawh chu a chhiar a, a awmzia a hre lo hle mai a. Chutih lai chuan Thlarau Thianghlimin Philipa chu tirin chung Pathian thute chu an inhrilh fiah ta a, mi tilreh chu a lo piangthar ta a ni tih kan hmu bawk.
Tin, Thlarau chuan Lalpa lam hawi tura min sawm reng bakah min pui turin a inpeih reng a ni. II Kor. 3:16 –a kan hmuh “Nimahsela, an thinlung chu Lalpa lama a hawi tik apiangin khuhna chu lak bo a ni tawh ang” tia a sawi angin kan khawvel nunah kan beidawn a, kan thinlunga Lalpa lam kan hawi chiah hian Thlarau Thianghlim chuan kan chhandamna thu, benga kan lo hriat fo tawhte chu kan thinlungah min rawn hrilh fiah thin a. Mihring hriatnaa kan hriat ang ngawt kha ni tawh lovin, thua sawi fiah thiam theih si loh hian chiang tak siin min rawn hrilh fiah thin a, chhandama kan awm ve theih nan Lalpa hnena tlu lut lo thei lovin min siam thin a ni.

2. Pathian thu hriat thiamnaah: Pathian thu hi sual kan beih let vena tura kan ralthuam Thlarau ngunhnam (Ephesi 6:17) a ni a. Khawvel thilah pawh kan ralthuam hman tur dinhmun dik tak kan hriat chian a pawimawh angin thlarau lama kan ralthuam hi kan hriat chian a ngai a ni. Chuvangin Pathian thu hi a tam thei ang ber kan rilruah kan khawl khawm a pawimawh hle. Keini kristian rama piang, kristian chhungkuaa seiliante hi chuan Pathian thu hi kan chhiarin kan vawng teuh tawh a ni. Amaherawhchu, Pathian thute hi Pathian thawk khuma pek ni mahse mihring hriatna atang ringawt hi chuan a fiah zo reng reng lo mai a. “Tinungtu chu thlarau a ni” (Johana 6:63) tih a nih avangin kan hriatsate hi thlarauva tihnun a nih loh chuan Pathian thu hre tam leh hre zau satliah kan ni ang a, Thlarau Thianghlimin a tihnun si loh chuan thlarau sualin a hmang tangkai mai ang tih hlauhawm tak a ni. Chuvangin kan rilrua kan khawl khawmsate hman tlaka tinung tur chuan Thlarau Thianghlimin min chenchilh a tul thin.
Tin, Pathian thu hi Pathian rilru kan hriatna leh kan tawmpui theihna tur a ni bawk a. Isaia 55:8 –ah chuan “Ka ngaihtuahnate hi i ngaihtuahnate a ni si lo va, i awm dante chu ka awm dan a ni hek lo, Lalpan a ti” tiin Pathian thil thlir dan leh mihring thlir dan (point of view) inan lohzia puan chhuahin a awm a. “Pathian thute chu Pathian Thlarau vek lo chuan tuman an hre lo”(I Kor. 2:11b) tih a nih angin Pathian thil thlir dan hre thiama tawmpui ve tur chuan a thu kan hriata thlarauvin min hrilh fiah a ngai a ni.

3. Isua annaah: Lal Isua nun hi ringtute chuan kan entawn tur a nih avangin sawi tur tam tak a awm thei ang. Gal. 5:22-23 –a Thlarau rah pakua – Hmangaihna, Hlimna, Remna, Dawhtheihna, Ngilneihna, Thatna, Rinawmna, Thuhnuairawlhna, Insumtheihna – te ringawt pawh hi ngaihtuahho tham tak a ni. Amaherawhchu, Isua nuna langsar em em chu a inngaihtlawmna hi a ni awm e. Pathian Fapa, lei leh vana lal ber, a hmangaihte avanga a lal thutthleng pawh thlahlel hlei thei lova a thilsiama rawn chang a, min chhandam tura Pa remruat anga thihna azawnga rapthlak ber Kraws-a thihna a rawn hlen chhuah theihna rilru ngei kha a ni Paula pawhin nei ve tura min chah lawm lawm kha (Phil. 2:5-8). Chu nun tlawm chu Thutak zia a ni tlat a ni. Mihring mihrinnaah chuan inngaihtlawm hi thil har tak a ni awm e. Mahni aia thiltithei zawkte hmaah chuan kan inngaitlawm thei mai a. Mahni zawlpui leh hniam zawka kan ngaihte hmaah erawh tlawm har kan ti thin. Lal Isua erawh chu a thil siamte hmaah tlawm takin a rawn awm a ni. Chu nun chu Thlarau Thianghlim chuan min neihtir a tum a ni. Chu inngaihtlawmna nun chu Lal Isua khan engtia lo nei nge a nih kan tih chuan a Pa, Pathian, a hriat chian em vang a ni. Pathian hi hre chiang ve ni ila chuan a hmaah kan tlawm lo thei lovang. Tin, Pathian hmaa tlawmte hi chu mihring hmaah pawh an chapo thei lo. Chu nun tlawm tak nei thei tur chuan Thlarau Thianghlim hruai theiha kan awm a tul a ni.

Tlangkawmna: Awle, vawiinah hian Thutak hriatna nung chu ka nei ve tawh takzet em? tih inzawt theuh ila. Job-a angin “Benga hriatna mai zawngin ka hre tawh chia, mahse tunah zawng ka hmu ta che; chuvang tak chuan ka inten a, vut leh vaivuta thuin ka sim ta e” (Joba 42:5-6) ti thei tur khawpa chiangin kan thinlungah Lalpa Thlarauvin min tiharh ve tawh em? Thutak ka hriatna chuan Isua anna nunah min hruai lut tak tak em? tihte hi inzawt theuh ila. ‘Nun ze mawi, Lal Krista nun mawi tak kha ni tin min zirtir ang che’ tiin Thlarau Thianghlim hi i sawm thin ang u.
Hmasawn kan ngaihna zawn theuhah hma kan sawn theihna turin Pathian Thlarau Thianghlimin kohhranhote min chenchilh theuh rawh se. Amen.

Hla sak hona: Khb No :508 Hringnun kan zinkawngah hian