Kan duhzawng hla thlan ni se. (Thilpek lakkhawmna)
TAWNGTAI RUALNA
Tawngtaina a Hriat Turte
Pathianin vawiin thlenga hun tha min pe a, kan nunna min zuah a, Amah be thei leh chawimawi theia remchanna min la siam sak avangin lawmthu i sawi ang u. Kan hma lawkah kan thlakhleh em em a huhova inkawm te pawh kan thei thuai dawn niin a lang a, lawmthu i sawi ila, Pathian hruaina leh venhimna i dil zel ang u.
Vawiin Phar Pual Pathianni ah hian pharte leh a enkawltute tan Pathian awmpuina i dil sak ang u.
Covid-19 hrileng laka Pathian venhimna mak tak mai kan chan avangin lawmthu i sawi leh ila, Covid vei enkawl mekte, enkawl tute tan i dil chhunzawm zel ang u.
Covid-19 hrileng laka Pathian venhimna mak tak mai kan chan avangin lawmthu i sawi leh ila, Covid vei enkawl mekte, enkawl tute tan i dil chhunzawm zel ang u.
Hun rei tak kan Biak in sak kan chawlh hnuin kan lo chhunzawm leh thei dawn a, Pathian hnenah lawmthu i sawi ila, mawhphurtute leh hnathawktute pawh i tawngtai sak ang u.
Kan hun tawnin ziaawm lam a pan zel a, inkhawm dan turte pawh sorkar lamin a rawn ruahman tan a. Kan kohhran hruaituten Pathian rawn chunga kan kohhran tana tha ber tur an rawn chhawp chhuah theih nan i tawngtaisak ang u.
Chhungkua in kan ngaihpawimawh dang thawh belh ila, kan thawhlawmte Pathian hnenah hlanna i nei bawk ang u.
Marka 1:40 - 42
A hnênah phâr a lo kal a, a hmaa ṭhingṭhiin tihdam a ngên chiam a, “I duh chuan mi tithianghlim thei e,” a ti a. 41Ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a. A phâr chu a lo dam ta nghâl a, a lo thianghlim ta a.
THUCHAH
Thupui “I duh chuan mi tithianghlim thei e”
- Rev Dr Lalzarliana
Audio
Bible chang:
Hla thlan:
Thuhma: Mihring tupawh mai hi mahni dinhmun inhre ranin midang kan dawr thin tlangpui a. Kan tawngka chhuak atangin kan dinhmun engemaw chen chu a hriat theih awm e. Tin, kan va dawr te dinhmun pawh a hriattheih riai ruai bawk. Vawiin phar pual Pathianni thupui ‘I duh chuan mi tithianghlim thei e’ tih pawh hian a dawrtu dinhmun leh a dawr a dinhmun a ngaihruat theih tak a lo awm a. Chu thu chu vawiinah hian kan ngaihtuah ho dawn a ni.
Mite ngaihsak leh khawngaih hlawh lova, ‘an chan chu daipawn a ni tur a ni’ ti a an dinhmun tha lo tak lak ata Lal Isua rilru pu a kum sawm pakhat zet hma lo la ve tawh thin kha rawngbawlna dangah kum hnih thum dawn chu kan lo teihawi ve leh ta a. A sur a sa hnuaia mite hnena thahnemngai taka bei a, lo au chhuak ve thin na fam chu, Programme committee pawhin an pual a hun hman turah duhsakna min hlan ve leh hlauh thin hi ka lawm hle a ni.
Phar dinhmun tawite:
Anchhedawng khawvel a mihring natna, a tlak tlak vanduai hri, natna hrik avanga mihring taksa eichhe thin phar natna hian mihring a a hnuhma hi a chhe em em mai a. Damdawi lam thiam te sawi dan chuan he natna hrik hian a tum ber chu ‘mihring taksaa hriatna thazam/thahrui (nerve) tihchhiat hi a ni e’ an ti a. Chuvang chuan a natna lanchhuahna reng rengah na (pain) an hre lova, hriatna an hloh ta thin a. An kut leh kehmawr a pan lo awm pawh na ti lovin an teihawi pui a, chu chuan pan nasa tak siam belhin a kut leh ke te tan a lo ngai ta thin a ni. Hmel hmai nasatakin a tichhia a, kut leh ke kawm te a siam bawk.
Hetiang hi an nih avangin mi te ten, thinhrik leh hnawl an lo nih phah a. Kan Bibleah ngei pawh ‘bawlhlawh’ tih te ‘an chan chu daipawn a ni’ tihte a lo ni ta a. Natna tuar ni ve tho, rilru hrehawm taka awm mek piah lama mi ten, thinhrik leh hnawl han nih hian an dinhmun chauh zia leh khawngaihthlak zia hi a hril a. Chumi dinhmun atang chuan he phar hian Isua a dawr a ni.
Isuan chanhai leh riangvaite a endawng lo: Kan Pathianthu chang thlan chhuah hma lam kha kan chhiar chuan, Lal Isua rawngbawlna, tihdamna, ropui tak chu Galili ram dung leh vangah a kal mup mup a. Ramhuai man a tidam a, mi tam tak, nate a tidam bawk a, chu thawm chu he phar hian a lo hre ve ni ngei tur a ni. Heta ‘I duh chuan’ tih tawngkam hian Lal Isua chu tidam theitu, phar pawh tithianghlim thei a nih zia he phar hian a hria a ni tih a tilang chiang hle mai a. Nimahsela, Isua thinlung erawh a hre pha lo hle mai, mihring ang mai a, i duh chuan han tih lek fang hian a lak atanga khawngaihna leh hmangaihna awm a la hmu pha lo hle a ni.
Tichuan, he phar awmna khaw pakhat hi Lal Isua chuan a lo thleng ve ta hlauh mai a. mipui tam tak zingah he phar a lo kal chhuak ve ngawt hi a huai kan ti dawn nge, a mawl kan ti dawn? A chhan chu Juda danah chuan phar chu mi kiangah awm lo tur, daipawna awm tur an ni a. Mi zinga an awm pawhin ‘ka bawlhhlawh e, ka bawlhlawh e’ tiin an au tur a ni si a. Chuvang chuan he phar hian Lal Isua tidamtu tih a hria a, a hlauhawm dan tur ngaihtuah lek lovin, a rilruah Juda dan pawisa lo chu lungin an denghlum thin tihte pawh a ngaihtuah chek ang, mahse, ‘thih leh thih, dam leh dam’ tiin a pan ve ta rawi ningei tur a ni. Isua hmaah chuan a thingthi a, “Lalpa i duh chuan mi tithianghlim thei e” tiin a ngen ta a nih kha.
Ka duh e lo thianghlim tawh ang che: Isua, Juda chhungkua atanga seilian, Juda dan chiang taka hria a, pawisa tu tan khan engtia lo hmachhawn tur nge ni ang tih chu hriatthiam a har ve khawp ang. “E nang phar kha, engtizia a Juda dan pawisa lova, mi zinga i lo in zeh ve. Lunga an denhlum hma che hian inthiar fihlim rawh” ti ta sela, a vela Juda upa ho awm te chu a ti lawm khawp ang le. “Juda dan ava pawisa em” tiin an fak ngei ang. Nimahsela lei leh van lalber, khawvel hmangaih vanga a nunna hial hlan tura lo kal thinlung chu chuti lam chu a ni awzawng lo mai.
Isuan, chu phar chu a han hmuh chuan a khawngaih ta em em a, tih kan hmu a nih kha. “I duh chuan” tih tawngkam ngei mai chu chhang letin “ Ka duh e” ti a a chhanna kha a va mawi em. Hetia, ka duh e a tihhma hian Isua ngei pawh hian Juda dan phar a khawngaih leh hmangaihna hian a pawisak tir thei tlat lo. Juda dana phar chu hnaih loh tur a nih chuan a deh pawh deh miah loh tur tihna a nih laiin ‘A ban a, a dek a’, tih kan hmu a ni. Ani asin, leih leh van lalber hian i damna leh ka damna atan pawh hian ropuina leh lalna te athlhlel hlei thei lova, hrehawm tinreng tuarin bawi anga a insiam a nih kha. Phar pawh hian chu chanvo ropui tak chu a chan tur a nih avangin practicalin Lal Isua hian a bak sawi leh tur awm miah lovin “Ka duh e, lo thianghlim tawh ang che” a ti ta a nih kha.
“Chawp leh chilhin a phar chu a lo reh ta nghal a” A va ropui em, Lalpa chu fakin awm rawh se. He phar han lawm tur zia leh a hun tawn zawng zawng a theihnghilh theih tawh loh tur a han tawna a hlim tur zia hi.
Vawiina phar te hi: Covid-19 hri kan hmachhawn a, inkaichhawn hlauhna avangin kan ralkhel a, kan buai em em a. Phar ang maiin dahhran an lo ngai ta. Hei hian phar dinhmun engemaw chen chu entirna min siamsak hian ka hria a. Nimahsela, phar ang em chuan vantlang endawng leh thinhrik (Social stigma) an tawng ve lova, khawngaih, tawngtaipui, ngaihsak etc an hlawh nasa a. Sawrkar, khawtlang leh chhungkuain an inngaihsak/ngaihtuah rawn a. Pathian zarah (thi te chu awm ve bawk mahse) a tlangpuiin na an tuar lutuk lova, rilru lam erawhin a tuar ve deuh ngei ang. Pathianthu, ngaihsak leh ei leh intur thain umzui an ni a. Phar chan bawlhhlawh leh tenawm tih chu an ni chuan an hlawh ve lem lo. Damin a enkawlna atangin tam tak an chhuak a, covid, covid, tih chu an tawk tawh hran lo. Phar erawh chu an dam tawh hnu pawhin phar phar tih an la nit ho mai.
Khawvelah hian phar an la tam em em a, India ram hi khawvela phar tamberna ram a la ni zui. Chhungte duh loh, vantlang duh loh, sikul pawh kal phal loh an la ni reng tho mai. Ei tur leh intur tha hmu lovin, chhungkaw tam tak chuan an la hnawtchhuak bawk. Damdawiinah awmin, enkawl dam pawh ni se, an chhuah hnuah pawh phar an nih a la reh tak tak thei lova. Dama an haw tawh hnu pawhin ina luh an la phal lo fo a ni. Hmangaihtu leh lainattu an mamawh em em a, ei leh intur petu an mamawh bawk a. Chuvang chuan Mizoramah pawh The Leprosy Mission rawngbawlna kan lo kalpui ve phah a nih hi.
Tunah hian, TLM Mizoram chuan, Phar Colony India ram chhim tawpah enkawl mekin phar ho awmkhawm, enkawl ngai takte zingah Lal Isua hmangaihna thu hrilin an taksa, rilru leh thlarau damna atan hma a la thar ta kha a ni a. He rawngbawlna bul tan tu atan keipawh Lalpan min ruat ve kha a ni a, thinlungah hian a reh tak tak thei tawh lo ve. Chuvang chuan khawngaihna thilpek hlanin, tawngtaisak bawk ila Lal Isuan “Ka duh e” a tih ngei mai hi kan tihhlawhtlinpui ngei theih nan India rama phar tam tak ten “Lal Isua hmangaihtute u, in duh chuan min tithianghlim thei e” tiin min au a ni. Lal Isua duh chu i duh pui ve mai dawn lawm ni.
Lalpan a thu malsawm rawh se.
Kristian Hla bu No 260 “Engvanginnge mipui te chu”
Engvangin nge mipuite chu,
Hmanhmawh takin an lo kal khawm,
Kawtthlerah leh daiahte pawh,
Chhiar sen loh nunauten an zui;
An thawm mitdelte hriat khawpin? ]
Nazareth Isua a kal a ni. ]2
Ram tin, khawtin, hmun tina mi,
Lo pungin an lo kal khawm thin;
An zingah damlo, mitdelte,
Kebai kal thei lo tam tak pawh;
Eng vangin nge an lo tel ve? ]
Nazaret Isua a kal a ni. ]2
Mitthite an lo nung leh ta,
Pharte tihthianghlimin an awm;
Khawpalte an lo dam leh ta,
Ramhuaizawlten ngai an awh leh;
Thlipui leh tuifawn pawh a bang, ]
Nazaret Isua a kal a ni. ]2
Inpeih lote inpeih a hun,
Sual tihchah pawh a hun ta a,
Kan tan khua a lo tlai hma hian,
Hnung lam paiha hma lam umin;
Tawngtai leh pianthar a hun ta. ]
Nazaret Isua a kal lai hian.]2
Mipui an thuhmun fo thei lo,
Dam leh dam lote an awm thin;
Tlai luatte hian pawina a nei;
Tling thleh apiang pawi tih a zual
'A tlai lu ta.' an la ti ang, ]
Nazaret Isua a kal liam ta. ]2
