-







Thuhmahruai:

Kohhran member zawng zawngte Kumtir atanga kum tawp min hruai thlengtu kan Lalpa Isua Krista hmingin chibai ka buk a che u. Kumin chhunga ni hnuhnung ber zana hun hmang tura Pathian leh kohhran hruaitute duhsakna ka chang hi ka lawm takzet a ni.

Ka tlin lohna leh fel lohna haidera khawngaihna rawngbawl hna min petu leh min hruaitu kan Pathian chungah ka va lawm em. Ka rawngbawlpuite leh kohhran hoten ka tlin lohna leh fel lohna kawng hrang hrang min hriatpuia, min tawngtaisak thin avangin lawmthu ka sawi a. Kohhran hmalakna kawng hrang hranga min finchhuah a, thurawn tha tak tak min pe thin tu, ka nghawngkawlbahpuite chungah thinlung takin lawmthu ka sawi hmasa a ni.

Kan hriat theuh angin kumin 2020 hi hripui (Covid 19) in khawvel pumpui min fan chhuak vek a, keini ram kilkhawr tak pawh min tibuai hle a nih hi. Mithiamte chuan, tun tum ang renga khawvelin a buaipui hripui hi a la awm ngailo an ti hial a nih hi. He hripui leng hian kohhran pawh min nghawng buai hle mai. Kan tualchhung kohhran pawhin kumin chhunga tihhlawhtlin tura kan hmachhawp te pawh a tam zawk chu kan ti hlawhtling thei ta lova. Kumin chhung hian kan kohhran hmalakna pui ber (main project) chu ‘Biak In thar sak’ a ni a. Kohhran ten kan ngai pawimawhin kan phur em em a. Thahnem ngai takin thawhlawm kan thawhin, hnatlang te pawh kan thawk bawk a, a va lawmawm em. Amaherawhchu hripui avangin kan ruahman ang kan thleng pha ta lova. Mihring hian ruahmanna chu lo nei bawk mahila a hlawhtlinna chu Pathian thu a ni tih a va chiang em.

He hripui hi tharum hmanga do chiam theih ni si lo, min tihbuai takzet tu ni si a ni a. A chimawm takzet a ni. Kohhran hoten a huhova Pathian chibai kan bukna, kan inkhawm leh kohhran hnuaia pawl hrang hrang te inkhawm leh fellowship pawh 19th March 2020 atanga vawiin thlengin thla 9 chhung zet chu kan nei thei ta lo a nih hi. Biak In leh a vela rawngbawla hun tam tak hmang thin kha, he hripui hmang hian chhungkuaah khalhkhawmin kan awm a. Mimal nun inbihchianna hun tha, Chhungkaw maicham awmze nei din tura Pathianin hun thawl tha tak min siam sak ah ngai ila a tha awm e. Hetiang hi kan dinhmun nimahse, Pathian hruaina avangin hun khirh leh harsa tak karah pawh kohhran hoten kan tihtur leh mawhphurhna te kan hlen ve theih zel te a awm. A va lawmawm em!

Awle, zanina kan Pathianthu innghahna tur chu, “He Pathian hi kumkhaw tlaitluana kan Pathian a ni dawn si a; Thih thleng pawha min hruaitu a ni ang”. (Sam 48:14). tih atang hian Pathian thu kan ngaihtuah ho dawn a ni.

1. Hunbi, Pathian ruat: Engkim tan hun ruat a awm thu hi Pathian thu in min zirtir dan a ni a. Genesis ah chuan Pathianin lei leh van leh a chhunga chengte a siam thu kan hmu a. Hunbi chhiar nan Ni leh Arsite a siam bawk a. Chung thilsiam te chu a siamtu Pathianin tawp chin neia a siam vek an ni. Pathian thilsiam zinga thlur bing kan chak deuh chu Ama anpui ngeia a siam mihringte chungchang thu hi a ni. Kumin chhunga ni hnuhnung ber, zan tawp ber Pathianin min hruai thlenga. A hnenah lawmthu i sawi ang u. Chutih lai mek chuan nikum lama tun ang hun kan hmanpui, kan kohhran member duhawm tak tak mi 11 laiin ropuina ramah min hawsan a. A pawi kan tiin kan ui em em a, an kalsan an chhungte Pathian in awmpuiin thlamuan tlat sela.Chuta chiang ta em em mai chu kan lungduh kaltate nena kan hun lo hman tawhte kha ngaiin thlahlel hle mah ila mihring tumah hun liam tawh hnu kokir thei kan awm lo tih hi a ni.

Kumin chhunga kan thil tih zawng zawng, a tha emaw a chhia emaw pawh hunin a liampui zel a ni. Kan thil tih tam tak te hi chu Pathian hnen thleng lo tura kan duh ngawih ngawih a awm ngei ang. Hunin a her liampui zel si. Chuvangin Pathian thuin, “in nun hi fimkhur pui hle teh u” (Jer. 17:21) a tih angin, fimkhur taka kan nun a va pawimawh em. Lal Hezekia damlo Pathianin a tihdam hnuah, “ka damchhung kum zawng zawng ah chuan zawi tein ka kal dem dem tawh ang” (Is.38:15) a tih ang khan Pathian hre reng chunga kal a va pawimawh em. ‘A tun hun hmang tha chuan a hun hman lehzel turah inchhirna tur a nei tlem nge nge thin’.

Pathian hunbi ruat chhunga awm vek kan ni a, mi thenkhat chu vanduaina avanga hma taka khawvel chhuahsan an awm a, mi thenkhat erawhchu mahni tan a pawi dawn a ni tih hre reng chungin mahni nuam tihdan zawng zawnga hun hmanga, boral phah ta an awm bawk. Kan damchhung nite hi thawnthu angin kan titawp thin. Thawnthu ngaihnawm chu a chhah leh chhah loh atanga teh a ni lemlo, a chhung thu kha a pawimawh a ni. Mitinin mahni thawnthu kan ziak theuh. Eng thawnthu nge ka ziah ve le, a chhiartu ten ngaihnawm an ti a ngem? Kan hunbi Pathian min ruatsak hi amah Pathian nen i hmang zel teh ang u.

2. Hruaitu Pathian: Kum bul atanga kum tawp min hruai thlengtu chu Israela thlahte an sal tanna Aigupta ram atanga hruai chhuaktu Pathian tho kha a ni a. Horeb tlanga Pathianin Mosia a biak tum khan a tlanchhiat san Aigupta rama let leha Israela thlahte chu an sal tanna atanga zu hruai chhuak turin a tir a nih kha. Hemi tuma Pathian in Mosia hnena ‘AWMA’ ka ni (Ex. 3:14) a tih hi a pawimawh hle mai. Pathian hming ‘AWMA’ chu mihring tawnga sawifiah hleitheih loh, mihring finna hmanga chhuichhuah phak rual loh khawpa awmze ril a ni a. A awmzia berah chuan, hun kal tawha awma, hun kan hman meka awma, hun lo la awm tura awma. Eng hun ah pawh awm tihna a ni ang chu. Thupuan ah chuan “kei Alpha leh Omega, awm meka leh awm tawha leh lo la awm tura, a hmasa ber leh hnuhnung ber, a bul leh a tawp chu ka ni” (Thup. 1:8; 22:13) a ti bawk a.

Pathian, a hming ‘Awma’ chuan Israel fate chu an saltanna Aigupta ram atangin a hruai chhuak a. A thiltihtheihzia entir nan tuipui luang a chawlhtira, tui awm lohna hmunah tui a pe a, van Mana leh Vahmim te in a chawm a. An hmelma te do puiin, an mithmuhah thil mak leh ropui tak tak te tiin, ramtiam Kanaan ramah chuan a hruailut a. Chu Pathian tho chu zanin thlenga min hruaitu hi a ni. Khawvel tukverha kan dah chuan kan chenna hi khawvel tar lam tawhah kan cheng mek a ni tih kan hre theuh awm e. Pathian thuin a lo hrilhlawk- Ram hrang leh ram hrang an indo vanga, hnam hrang leh hnam hrang an indo ang, hri te a leng ang a, lir nasa takin a nghing a nghing anga, tam te a tla ang’ tih chu a thleng dik mek zel a nih hi. Hun harsa leh hun khirh tak tak pawh tawk mahila kan Pathian ah rinna i nghat tlat ang u. Kan Pathian chu a thutiamah chuan a rinawm a, a danglam ve ngailo. Kan tlakchham huna min tanpuitu, kan thlaphan mangan laia min thlamuantu, thihna leh lungngaih hrehawm ber lai pawha min hnemtu ‘Awma’ chu a ni. He Pathian hi kumkhaw tlaitluana kan Pathian a ni dawn si a; Thih thleng pawha min hruaitu a ni ang. (Sam 48:14).

Kumin chhung zawnga min hruaitu kan Pathian chu fakin awm se la. Kum lo thar tur 2021 hi kumin aia kum tha zawk lo ni mawlh rawh se. He kumthar lo thleng tur hi beiseina nen i hmuak ang u. Lalpan kan zavai atan mal min sawmsak theuh rawh se.

Hla : KHB No. 508 - Hring nun kan zin kawngah hian.

Audio

Hringnun kan zinkawngah hian,
Kan ngai che thlarau thianghlim
Min kai la, chung van Kanan thlen thlengin,
Dam tein min hruai zel rawh.

Thuro iang zaidam nunnem,
Kan thinlung rawn luah khat la;
Nun ze mawi, Lal Krista nun mawi tak kha,
Ni tin min zirtir ang che.

Thlarau thianghlim thlamuantu,
Zirtirtu ngilnei ber chu;
Thianghlimna, sual hnehna nun min petu,
Van thlen thlengin min hruai rawh.

Aw, van thli, lo leng ang che,
Sual chhumpui zing chhem kiang la;
Kohhranhote min tiharh thar lehin,
Sual doral kanngam ngei ang.