SERKAWN TUALCHHUNG KOHHRAN

PROGRAMME

PATHIANNI ZING INKHAWM PROGRAMME:

10:00 AM, 30th MAY 2021

PROGRAMME:

KOHHRAN MEMBERTE HNENA HRIATTIRNA : 30th MAY 2021

Inkhawm Hruaitu: Tawngtaina

TAWNGTAI RUALNA

Tawngtaina a Hriat Turte
1. Vawiin thlenga Pathian malsawmna leh venhimna kan chan avangin lawmthu i sawi ang u.
3. Covid 19 thawh hnihna lo thleng mek lak atanga kan him theih nan leh mipui ten a do let kawnga kan mawhphurhna kan hriat theih nan.
4. Covid 19 avanga enkawl lai mek, a bikin kan kohhran memberte leh kan missionary leh thawktu te tan.
5. Covid 19 avanga thi chhungte tan te, a bik takin kan kohhran rawngbawltu pawimawh tak tak kalsan tak chhungte tan.
6. Lockdown kan hmachhawn leh dawn a, fimkhur tak leh thuawih taka kan awm thiam theih nan.
7. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : LALPA LEH GIDEONA NGUNHNAM

Audio Not available:

Gideona Lalpa’n a koh dan hi amak ang reng hle. “Nang mi chak huaisen, Lalpa chu I hnenah a awm”, (Roreltute 6;12) a tia, an ram pumpui chu Midian ho in an awp bet a,Midian ho hiankum 7 lai isreal ho hi an awp bet a , an rethei em em a, Midian ho an hlauh a vangin Gideona pawh hian Grep sawrna khurah Midian ho hmuh loh turin fimkhur takin buha lo vuak lai tak ani a. “Nang mi chak huaisen,Lalpa chu I hnenah a awm”, ti in a rawn ko ani hetih lai hian isreal ten lal an la nei lova,Mi chak leh anmahni hruai thei tur deuh chu Roreltu tiin hruaitu an invuah mai ani.

Gideona hi a pa chu Joasa a ni a, Ophra khua a cheng an ni’Gideona hi roreltu pa5 na ani a,Ramthar luah an ni bawka, an vela hnamdang nen a indo reng an ni a, Baal maicham a tihchhiat vek avang in Jerubaala tih hming an pe a, chu chu Baal dotu (Anti_baal) tihna a ni.

Kohna a hmuh dan; ‘ Nang mi chak huaisen, Lalpa chu ihnenah a awm’ (6’12) Mosia ang khan Pathian kohna hi hria a, Vawi3 lai a hnial a. (1) Lalpan kan sualna avangin min thlauhthla a, Midian ho kutah min pe tawh a lawm” beiseina nei tawh lo ang main a chhang a ni.Lalpa chuan kal mai rawh ka tir che alawm”a tia. Chhuan lam pahnihna chu Manasea thlah te zingah hnam rethei ber kan ni a. Ka pa fate zingah a te ber ka ni bawk a, engtin nge ni ang? a ti leh a, Lalpa chuan “I hnenah ka awm dawn a lawm” tia a thlamuan hnuah pawh Gideona chuan “ Nangmah ngeiin min tir a ni tih chhinchhiahna min pek loh chuan ka kal loving a ti leh a(6:17). Tichuan Pathian remruat in maicham a siam ta a, a maicham siam chu Lalpa’n a rawn chhang ngei a. A hmingah “Jehova Shalom” a vuah ta a. A awmzia chu “Lalpa chu Remna a ni” tihna a ni. Chu maicham atang a Lalpa’n a rawn pawlna atang chuan Lalpa’n a tir ngei a ni tih a pawm ta a. Amah leh a kotu chu an in rem ta a ni. Harsatna karah pawh a kotu chu a ringhlel tawh dawn lo tih a chanchin kal zelah kan hmu thei ta ani.

He mi hmuna kan awm lai hian keini pawh kan in ngaihtuah thar fo a pawimawh hle. Lal Isua’n a fa ni turin, a rawngbawl turin min ko, a hnungzui turin min ko, kan beidawng a , a changin kan in ringhlel leh a, kan nun a chau thin a, kan tawngtai lahin a reh vung vung si a, kan phurna a lo tlahniam hlek hlek a, khawvel lamah kan kir leh fo thin. Tawngtaina nen Lalpa hi kan auh tak tak hi chaun kan nunah harhna, chakna thar alo thleng leh nge nge thin a ni.

GIDEONA’N KOHNA KAWNG A ZAWH TA:
Mahni inchhungah bul tan a ngai in a hria a, Midian hovin an lo awp beh tawh vangin mite’n Pathian maicham leh Asera thingphunte an lo nei thluah hman tawh a ni. Gideona chuan Pathian kohna a zawh dawn avangin a pa sakhua biakna thingphun leh Asera phunte chu a kit ta vek a, thingte chu a hal ral te vek mai a. A pa milem maicham a kit sak ai ah chuan Pathian tan maicham a siam ta zawk a. A thil tih dan mite’n an han hriat chuan a pa Joasa hnenah “I fapa Gideona chu rawn hruai chhuak rawh a thi ngei ngei tur a ni” tiin an rawn vau ta a, Gideona pa chuan a chhang a,”Tu pawh Baal Pathian tan tu chu tih hlum tur a ni ang, Pathian a nih chuan amah leh amah intan ang hmiang”, a ti then a, chutia a pa in a tan tak avang chuan mite chuan Gideona chu Baala’n amah chu khing rawh se ti in an kalsan ta a, Jerubaala ti in hming lem an pe ta a ni.

Gideona hian anmahni inchhung a chingfel hmasa a, kristian chhungkua a din hmasa hi a entawn tlak hle ani. Ama pa ngei pawh a hmin hmasa a. Milem maicham a tihchhiat avang hian anmahni awptu midiante pawhin tih hlum an tum ngei dawn tih a hre sa reng, Hmelma chak dan en lovin a kotu chakna a thlir tlat a, a kotu chakna a hriatchian em avangin zam hauh lovin Lalpa a zui dawn a ni. Keini ho chuan min kotu chakna en lovin hmelma chak zia chauh kan hre lar thin ani.Kan ding nghet zo lo fo thin. Krista hnenah khenbeh in kana wm tawha, a thihna leh thawhlehna tawm puitur kan nia, Lalpa chakna kan hman thiam angai ani.

Mosian Kadesh atanga Kanan ram en thlatu turte mi 12 a tirh khan hnam 12 atangin pakhat theuh tlangval chak tha, thahrui nei piantha tak tlangval lian thelhthawlh kha an ni a, Kanan ram an va fang kual ta kha a ni a, Hmelma kha an va hmu lian lutuk a,” ekhai, kan ngam chi an nilo, an ni lakah chuan keini chu khau(locus) ang lek kan ni” an ti a, kal lama tlangval tha tak kha hawlam ah chuan khau ang lek in an in hmu ta a ni, Min kotu chakzia en lovin hmelma lam kan ensan lutuk hian kan che thei thin lo a ni, Joshua leh kaleba te chauh hian”Pathian rin chhanin kan hneh thei ang,”an tia a, Anni pahnih chiah kanan ram an lut ta reng a nih kha, an hmuh a in ang reng hneh theih loh tura hmutu leh hneh thei tura hmutu chu an hmuh dan a in ang lo mai ani, an hmuh chu a in ang reng, Kan rilru, kan thlarau a va pawimawh ngai em!

“Khawvel tawp thleng pawhin in hnenah ka awm zel ang” titu khan min awmpui zel thin ani, a daw ve ngai lo, kan hnenah natna khumah, lungngaihna ah, buaina leh harsatna chi hrang hrang karah pawh kan bulah a awm reng, min tanpui vat thin, “ mangan laia tanpui vartu hnai reng”, ani e.(Sam 46:1) “Hlau suh” titu khan min thlamuan theih loh zan a neih kan hre ngai lo.

GIDEONA’N INDO A HMACHHAWN TA:
Khatia Gideona’n milim maicham a tih chhiat hnu khan a thil tih avang khan Midian ho te leh Amalek ho te leh thlaler ram a mite chu Gideon a bei turin an rawn pung khawm a Gealead hnuai more hnuaiah an rawn inkulh hmuk ta mai a. Gideona chuan ral dona tawtawrawt ahan ham a, a lam a tang turte chu an lo kal khawm a, En_harod hmunah an in kulh ve ta a. An inbeih dan tur hi kawng thumin lo sawi dawn teh ang.

(1) AN TAM LUTUK.(Roreltute 7:2-3) Tin Lalpa chuan Gideona hnenah, “ I hnena awm te kha Midianho te an kuta ka pek nan zawng an tam lutuk, chutilo zawng Isreal ho ten “Keimahni kut ngeia in chhandam kan nia lawm” tiin min uankhum dah a nge, chu vangin tupawh hlau leh khur apiang chu kir leh sela, Gilead tlang ata hi haw leh rawh se, Tiin puang rawhse ati a, Ti chuan mipui te chu singhnih leh sanghnih (22000)an kir leha, Singkhat chauh an awmta a, Keini pawh hi mihring lama chhuan tur kan neih that viau hi chuan huaisen tak anga lan pawh a awl thin, paihthen kan nih fe hnuah chauh kan nunah Lalpa hmun a chang fo thin a nih hi. Pa pakhat chuan thlarauah a khat zia a sawi a, Tunlai chu no thum bela noruk chum ang ka ni,” Ka muk tan mai” a tia, harsatna eng emaw a tawka, a chau chhe leh hle mai a, kan tuarfei angai hle mai, Lalpa chakna chauh ringtur kan nih zia hi alang chiang emem thin ani:

(2) AN LA TAM LUTUK FO. (7:4) Gilead tlang atangin hlau leh khur a piang te chu 22000 an kir leh taa, 1000 chauh a awm taa, an tlem tawh nak a lain Lalpa chuan Gideona hnenah chuan ,” an la tam lutuk fo,” a rawn ti leh ta. Gideona hnenah chuan mite kha luiah hruai thla la, ui ang a tui a liah a liak apiang chu dah hrang la, kuta tui dawt apiang pawh dah hrang ang che. Ui anga tui a liah a liak apiang te hi i hruai ang a, heng ho hmang hian midian ho hi ka pe dawn che ani ati a, ui anga a liah a liak chu mi 300 chauh an nia, mi300 chauh nen hmelhma chhiarsen loh nen an bei dawn maw? An va tlem emem ve, Midian ho sanghawngsei lah tuipui kam tiau vai vut anga tam an ni sia, mi 300 nen chauh an bei dawn ta anih chu. Gilead tlang atangin mi 22000 a kir tir leh a, 10000 an la awma,mi 300 chauh a thlang a,700 an kir leh a, hmelma chhiarsen loh bei tur chuan ati mak reng reng tih tur ani.
Tunah chuan Gideona hian mihring lamah in nghahna tur a nei ta lo, mihring lamah chuan a tlafai vek tawh.Jacoba pawh khan Pathian hnenah “ka thlah tawh dawn lo che,” atih theihna chhan kha Pathianin a chakna lai ber a khawih pelh sak kha a ni:chakna lai khawih pelh sak loh chuan chhuan tur a nei a, a chak a,hnehna a chang zo lo fo thin a ni. He hnehna thuruk hi sawi in Tirhkoh Paula chuan,”ka chak loh apiang in a ni ka chak thin ni”,a lo ti thei ta a ni. (ll Korinth 12:010) Keini ve hi zawng kan chak lutuk a, kan hneh thei lo zawk a nih hi.
An hmelmate lah chu an tam em em a,Midian hote leh Amalek hote leh khawchhak fate ho zawng zawng chu ruamah chuan khau ang mai tam tak an awm hmur mai a, an Sanghawnsei te chu chhiar sen rual loh, an tam lam chu tuifinriat kama tiau vaivut zat zet a tam an ni a,(Roreltu 7:12) Gideona leh a hote chuan Lalpa chak zia chauh chu an rin chhan tur a ni a, mi 300 tan chuan chutiang hmelma tam lutuk han bei tur chuan tum chhin chi reng reng a ni lo. Mihring hisap tan chuan thil athlak tak ani zawk a ni.

LALPA CHAKNA RINCHHANIN HMELMA AN HMACHHAWN TA.
Gideona leh a hote mi 300 chauh chuan an hmelma te tam zia leh an chakna en lovin Lalpa chak zia en tlatin ke an pen dawn ta a, mi 300 chu hmunthumah a la thensawm leh chhawng a, mi 100 zelin groujp thumah a then a, ralthuam atan tawtawrawt leh bel ruak leh meichher a pe a, an ralthuam a hlauhawm loh kher mai. Zan laiah chuan an hmelmate inkulhna ruam chu an pan ta a, hmelmate buk chu an va thleng a, Gideona’n a hunah takah chuan “ Lalpa leh Gideona ngunhnam” ti in ring takin an au rual ta a. Tichaun tawtawrawt chu an ham a, an kut lehlamin meichher an keng a, bel ruak chu an vaw keh bawk a, chu veleh chuan an hmelmate chu an tlan chhe ta hum hum mai a, beih let zai an rel thei ta reng reng lova, an tlanchhiatna lamah an mahni leh an mahni an in that ta chiam mai a, Gideona leh a hote chuan Pathian hnehsak lai chu an thlir ta reng maia, an beih hah ngai lovin hmelma chhiar sen loh chu an tlawm ta duai duai mai a ni.

Rome sipai huaisen General Juliaus Caesar-a leh a hote’n British thliarkar an run dawn khan English Chanelah lawng in an kal mup mup mai a,thliarkar an kai fel tak ve leh chuan an hotupa chuan an lawng zawng zawng chu hal chhe vek turin thu a pe ta a. A chhan chu hneh dawn lova an in hriat hnuah sipai thenkhat chu lawng a an haw leh mai a hlau a ni. Haw lehna remchang an nei tawh lo tih an hriat a, thih ngam a han beih chuan hnehna chu an chang ta ngei a ni. Keini ve hi chu Isua hnung kan zuinaah haw lehna remchang kan zawng in, kan dap reng thin a ni. Tisa lamah innghahna tur reng reng a awm tawh lova Lalpa chauh rinchhana hmelma an bei a, hnehna mak tak an chang ta,”Lalpa leh Gideona ngunhnam”, chu an chakna a ni a, hahdam takin an thlir a, an mahni leh an mahni an in bei ta chiam mai a ni.

HNEHNA THURUK CHU:
Sipai khawhar tak 300 chauhte chuan hmelma chhiar sen loh an tam lam pawh tui finriat kam tiau vaivut zat a tam chu an hmachhawn ta a, an ralthuam lah a nep em em a, tawtawrawt leh meichher, belruak chu mai chu a va ropui lo em! Meichher an chhi a, tawtawrawt an ham a, bel ruak chu an vaw keh bawk a,”Lalpa leh Gideona ngunhnam”, tiin ring takin an au ta a, an tan chuan tuar chi a ni lo, an tlan chhe ta buan buan a, an mahni leh an mahni an in bei a, an in that teuh mai a, Gideona leh a hote lo do let tur reng reng an awm lo. Awlsam takin hnehna an chang ta. Indona chu Lalpa indona a ni a, hnehna chu Lalpa ta a ni tih an hre chiang em em a. Lal Isua’n a kros pu a amah zui tur a min sawm hian kan put tur a rit poh leh min thawhsak nasa dawn tih I hria ang u. Kan tuar dawn a ih pawhin tuarna phenah malsawmna in min lo hmuak zel dawn. Kan thi anih pawhin Nunna min dah khamsak tawh a lawm. Tih tak takah chuan Van a mihuai kal hmasate pawh khan he lei a an awm chhung khan hawnna remchang an hmu fo thin a, mahse chu chu an hal chhe zel a, tuarna an paltlang a, thihna an ngai nep a, thawh lehna tha leh zual an chan duh avangin tuarna ata chhanchhuah an duh lo hial zawk a nih kha.(Hebrai 11:35) A dik takin mi 300 chauhin hmelma chhiarsen loh a hmachhawn hi chu a atthlak deuh a ni. “An la tam lutuk fo” titu chuan engkim a ti thei a ni tih a hre chiang em a ni. Keini pawh hmelma bei tur a kan inbuatsaihnaah hian Lalpa’n “an latam lutuk fo” min ti thin. Keimahni ral vek hnuah tisa lam innghahna kan neih miah loh hmunah Lalpa a che fo thin a ni. “Aw Lalpa hmangaih ropui chu a hausak ren rual loh sang tam tak a pe tawh, kei pawh malsawmna chu min pe”, kan ti thin a nih hi.

AMEN.

No.164 - Hming dang zawng zawng aiin a mawi ber Lal Isua.