THUPUI: ‘Mi dangte tana rawngbawl tura koh Ringtute’

Mihring rilrua langsar tak, kan bula mite nena kan inkara harsatna thlen fotu chu mahni hmasialna leh chapona hi a ni. Khawvela indona rapthlak tak tak leh mihringte chunga tuarna rapthlak tak tak kan hriat thinte hi mimal emaw chi bik emaw tana tuin emaw mahni hmasial taka hma a lakna atanga lo chhuak a ni fo thin. Khawvel indopui 2naah khan mihring maktaduai 70 atanga 85 vel an thi niin an sawi a. A bul tanna chu Hitlera leh a Nazi party ten German hnam bil leh an ram bik tana mahni hmasial taka hma an lak vang a ni. Mahni hmasialna chuan midang a ngai thei lova, midangin hamthatna an chan ve tur a itsik a, amahin hamthatna a chan dawn phawt chuan mi dang chuan a chhe ber pawh lo chang se pawi tihna a nei lo fo. He rilru hi mihringin a pianpui a ni a. Mi hrang hrangah a lan chhuah dan chu a inang lo. Rom hote phei chuan midangte hnuai chhiah thiam nihte hi an zir hial thin niin an sawi.

He mihring rilru chhe tak hi Lal Isua chuan min thlaksaka rilru thar min pek a, khawvel hi in-unauna leh inhmangaihna ramah min siam saka hmelma kara inremna siama, mihring rilruah midangte tana nung thei tur leh kan mihring puite tana malsawmna thlentu ni tura min buatsaih a, khawvel tha zawk min pe turin a lo kal a ni.

1. Zebedaia fapate rilru : Jakoba leh Johanate hi Zebedaia fapate an ni. An nu chu Salomi a ni a, Isua nu, Mari laizawn a ni awm e. Jakoba leh Johana hi zirtirte zingah pawh a thusa pawl an ni. Hmel danglamna tlangah pawh Lal Isua bula awm an ni. A zirtirna pawh an dawng nasa hle ang a. Lal Isua thiltih theihna pawh an hre ngei ang. Nimahsela an mihring rilru chuan Isua lak atang chuan an thiante aia chanvo ropui zawk chan an beisei a. Mahni hmasialna atanga mahni inchawimawi duhna rilru neiin an rawngbawlpuite aia ropui zawk leh chan tha zawk chan kha an ngen a ni.
Hei hi ringtute zingah pawh kan rilru put hmang a ni ve thei. Mi dangte ngaihtuah lek lova, mahni duh zawng leh thiam zawng chawi san bik viau duhnate a lo awm a. Mi dangte dinhmun kan ngaihtuah thleng thiam lo fo thin. Mi dangte chu kan duh anga kan hnuh kal turah kan ngai palh thei.

2. Lal Isuan a rawngbawl dan tur a puang : Mihring rilru chapona leh mahni hmasialna letling thawkin Lal Isua chuan mahni inpaihthla chunga mi dangte tana inpekna leh mi dangte tana nun dan tur a rawn zirtir a. “Mihring fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nan a nun pe turin a lo kal zawk a ni” tiin, a rawngbawl dan tur (principle) a rawn puang chhuak a. Pathian fapa a nihnate, engkim siamtu leh neitu a nihnate hmachhuan ni sela Lal Isua hian tuarna kawng a zawh a ngai lovang a, mi dangin a rawng an bawlsak zawk bawk tur a ni. Nimahsela khawvel awm phung pangngai chapona te, mahni hmasialna te khan mitdel mit a tivar lova, bengngawng te beng a tivar hek lova. Rethei, chanhai leh pachhiate tan beiseina thar kawhhmuh tur a nei chuang lo. Khawvel chuan kalphung thar a mamawh a, rilru thar leh zirtirna thar nen mihringte tana beiseina thar min rawn siamsak a tum a ni.
Lal Isuan rawngbawlna kawng thar min kawh hmuh chu khawvel kal phung letling chiah a ni. Khawvel finna leh zirtirna chuan lalna te leh thiltihtheihna te hi mahni inhaivurna leh intihropuina a tan a hmang a. Mi dangte tan tuarna leh hrehawmna thlen mahse pawi a ti thin lo. Jakoba te unau inhuamnaah chuan Lal Isuan “Ka no in tur chu in in thei em ni? Ka baptisma chan tur pawh in chang thei em ni?” a tih khan “Thei e” an ti mai. Mahni hmasialna atanga chhuak thahnemngaihna a ni a. Anmahni tan ropuina leh dinhmun tha an zawng a, an thian te ngei pawhin an ngaithei lo. Lal Isua inhuamna ve thung chu mi dangte tana inhlanna a ni a. A tul hunah a zirtirte ke a sil a. Engkim chunga thu neitu ni si kha ‘thi khawp hiala thu zawmin’ a inngaitlawm leh thei mai a ni.

3. Danglamna thlentu – Ringtute : Lal Isuan . “Mihring fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nan a nun pe turin a lo kal zawk a ni” a tih chuan ama nun ngei a eiral a. A zirtirte nun a eiral a. Ringtute nun a eiral zel a. Mi dangte tana an inpekna chuan mihringte tan beiseina thar a rawn thlen a. Pathian nena inrem tawh lo te Pathian nena inremna a thlen a. Nun kawng dik lo zawhtute tan kawng dik leh tha a kawhhmuh a. Beiseina nei tawh lo te tan khawvelah leh khawvel piah thleng pawhin beiseina tha leh beiseina thar a siamsak thin.
3.1 Chanchin tha hriltu Paula : Kristian te tiduhdahtu Saula chu Lal Isua a hmuh hnu chuan a nun a lo danglam ta a. Isua thatna te, hmangaihna te, a han hmuh chuan “Krista hmangaihna chuan min hneh khawp a, heti hian kan ngaihtuah; mi zawng zawng tan mi pakhat a thi a; chuvangin mi zawng zawng thi an lo ni; tichuan a nungte chu anmahni tana nung tawh lovin, an tana thi-a tholeha tan an nun tawh zawk nan, mi zawng zawng tan a thi a ni” a ti. (2 Kor 5:14-15, lehlin thar). Isua Krista hmangaihnain a hneh em avanga nun lo danglam ta chuan a kawng hlui chu kalsanin kawng thar a zawh a. Tihboral a tum Chanchin tha chu nun puiin mi dangte hnena chu Chanchin tha hlutna lantir turin a nun chu a lo hlan ta a ni.
3.2 Sal chhuahtu William Wilberforce : Mingo hovin an duh duha an man leh sumdawnna atana an hman thin midum sal ten zalenna an lo neiha, an mihring mihrinna leh zahawmna an lo neih ve theihna tura thawh hlawk tak chu William Wilberforce-a a ni. Mi lian chhungkua atanga lo piangin politician hlawhtling tak a ni a. A naupan laia an pastor chu sala sumdawng thin lo piangthar ta, John Newton-a a ni. Wilberforce-a chuan Pathian thu atangin mahni mihring puite rahbeh leh sala chhawr chu dik lovin a hria a. A hun laia ngaihsak hlawh phak lo salte chuan khaw eng an lo hmuh a, zalenna an chan ve theih nan a bei a. Sal hnuaihnung tak takte tana British Parliament-a a au thin chu atan chuan pulpit duhawm tak a ni. Amah leh a thurualpuite hmalakna avangin sal te tana zalenna dan chu siam a lo ni ta.

Tlangkawmna : Mi ropui tak takte chanchin kan sawi a, kan ngaithla bawk thin. Mi ropui kan nih ve loh avangin thil ropui ti ve thei lo vah kan inngai bawk thin. Nimahsela talent tehkhin thu-a kan hmuh chu mahni theih tawk, mahni neih tawk zela rinawm leh thahnemngaih thu a ni. Khawvela Chanchin tha a lo darh zau hle na turin kan thawh hlawk viau lo mai thei. Sal chhuahna turin thusawi leh hna thawh kan thiam ve kher lo mai thei. Nimahsela kan bula mi te, kan thenawm khawveng tan te thil mawl mang tak hmang pawhin engthawlna leh hlimna leh lawmna kan thlen thei a. Kan tawngkam chhuakah te hian ‘khawngaihin’, ‘ka lawm e’, ‘ka tihpalh a ni, pawi ka ti hle mai’ tih nachang te hi hria ila, kan nun hian mi dangte tan thawvenna leh lawmna tam tak a siam thei ang. Nu leh pa leh zirtirtute thu han awih mai hi naupangte tan chuan midangte tana malsawmna kan nih theihna leh mi dangte tana malsawmna thlentu kan nih theihna a ni. Tunlai hri leng karah mi tam tak rilru a thlaphan lai pawhin mi dangte ngaihsak nachang hria leh huamhap bik lo nih te hi a ringtu zia em em a ni. Nimahsela mahni hmasialna leh chant ha ber chang bik nih kan duh avangte leh kan chapona avangin hetiang hi kan ti phal lova, kan ti thei lo fo thin. Lal Isua zuitute tan hian Lal Isua ding lam emaw a vei lam emawa thut hi a thlakhlehawm hle ang a, a ropui hle bawk ang. Nimahsela Lal Isuan a zirtir te zirtir a tum chu an thutna hmun ropui leh ropui loh lam ni lovin mi dangte tana an tangkai theih dan tur kha ngaihtuah ber turin a duh zawk a. Mi dangte chawi kangtu, mi dang te hlimna leh lawmna thlentu, zalenna leh engthawlna thlentu ni turin a zirtirte chu a chah a ni. “A rulhna roluah tur chu Lalpa hnen ata in hmu dawn tih hriain, in tih apiang chu mihring tan anga ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi”. Kol 3:23-24

Lalpan a thu malsawm rawh se. Amen

Tawngtaina
Khawvel hrut chhuak ila (KHB No 259)

Khawvel hrut chhuak ila

Khawvel hrut chhuak ila, Lal Isua ang hi,
Thianghlim leh fel ka hmu lo va,
A nunna min pek avangin ka zui ang,
Hrehawm tuarin rethei mah ila.

A pawi lo, a pawi lo,
Chatuan nunna chang thei ilangin.

A Pain, engkim zawng chunga Roreltu
A siam kha, a zah thlak ang e;
Pa Pathian chawimawi zawng ka zah fo vang chu,
Min pui ang, vantlangin do mah se.

Aw Isu, Lalpa, I rawngbawl min pui la,
Kan ram timawi, tithianghlima'n,
I thi, i nung leh, nunna hnar ni tura'n,
Min lawm ang che, tute hnar pawhin.

Lalpa Tawngtaina