Hla sak hona:Khb N0. 539 . : Isua hnenah ka kal ang (Thilpek lakkhawmna)
Isua hnenah ka kal ang
Isua hnenah ka kal ang,
A engah, a engah;
Amahnen kan kal ang a,
Kan Pathian engah.
Ngaihdamna ka hmu ang a,
A engah, a engah;
Thiltihsuual ka sim ang a,
Kan Pathian engah.
A engah ka kal ang a,
A engah, a engah;
A engah ka kal ang a,
Kan Pathian engah.
Isua hna chu ka thawk ang,
A engah, a engah;
Chak leh huaina ka nei ang,
Kan Pathian engah.
Setana'n min ngam lo vang,
A engah, a engah;
Pathianin min tanpui ang,
Kan Pathian engah.
Thihna a lo thlen hunin,
A engah, a engah;
Ka hlau tawh tawp lo vang a,
Kan Pathian engah.
Pathian engah ka lut ang,
A engah, a engah;
Kumkhuain ka awm ang a,
Kan Pathian engah.
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
Kan chhungkua Pathian hnenah i hlan thar ila, A kaihhruaina a intuluta Amah nena lengdun thei turin Thlarauthianghlim tanpuina i dil ang u.
Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Khawhar chhungte leh kan member damlo te Hospital leh mahni in lama in enkawl te tan tawngtai sak ila.
Kan hma lawkah ringtute hunpui Krismas kan thleng dawn a. Kum dang angin kan hmang theilo maithei. Mahse Pathian hruaina kan chan a, he krismas ah hian Pathian awmpuina kohhran hoten kan chan theih nan kum dang zawng aia hlawk zawka kan hman theih nan i dil ang u.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
Mathaia 25 : 31-46
Hun tâwpa rorêlna
31“Tin, Mihring Fapa chu Vântirhkoh zawng zawng nên ropui taka a lo kal hunah chuan, a lalṭhutthlêng ropui takah a ṭhu ang a, 32a hmaah chuan hnam tin an inkhâwm ang a, berâm vêngtuin kêl zînga berâmte a hlîr angin anniho chu a hlîr ang a; 33berâmte chu a ding lamah a dah ang a, kêlte erawh chu a vei lamah.
34“Chumi hunah chuan Lalber chuan a ding lama mite hnênah, ‘Ka pa vohbîkte u, lo kal ula, khawvêl siam tirh ata in tâna ram buatsaih chu chang rawh u. 35Ka ril a ṭâmin nangnin ei tûr mi pe a; ka tui a hâlin in tûr mi pe a; mikhual ka nihin mi thleng a; saruaka ka awmin puan mi sintîr a; 36ka dam lohvin mi kan a; tân ina ka tânin mi tlawh a,’ a la ti ang.
37“Tichuan, mi felte chuan, ‘Lalpa, engtikah nge rilṭâma kan hmuh che-a chaw kan pêk che? Tuihâlin i awma tui kan pêk che? 38Engtikah nge mikhuala kan hmuh chia kan thlen che? Saruaka i awma puan kan sintîr che? 39Engtikah nge dam lovin emaw, tân inah emaw kan hmuh che-a kan tlawh che?’ tiin an la chhâng ang. 40Lalber chuan, ‘Thu dik ka hrilh a che u, hêng ka unau tê berte zînga pakhat chunga in tih chu, ka chunga ti in ni,’ tiin a la chhâng ang.
41“Chumi zawhah chuan, a vei lama mite hnênah pawh chuan, ‘ânchhe dawngte u, kumkhaw mei, Diabola leh a hote tâna buatsaihah chuan mi kalsan rawh u. 42Ka ril a ṭâmin nangnin ei tûr mi pe lo va, ka tui a hâlin in tûr mi pe lo va. 43Mikhual ka nihin mi thleng lo va; saruaka ka awmin puan mi sintîr lo va, ka dam loh lai leh tân ina ka tân laiin mi kan lo va,’ a la ti ang. 44Anni pawh chuan, ‘Lalpa, engtikah nge rilṭâmin emaw, tuihâlin emaw, mikhualin emaw, saruakin emaw, dam lovin emaw, tân inah emaw kan hmuh che-a rawng kan bâwlsak loh che?’ tiin an la chhâng ang. 45Ani chuan, ‘Thu dik ka hrilh a che u, hêng mi tê berte zînga pakhat chunga in ti lo chu ka chunga ti lo in ni,’ tiin a la chhâng ang.
46“Chûng mite chu chatuan hremnaah an kal ang a, mi felte erawh chu chatuan nunnaah an kal ang,” a ti a.
THUCHAH
THUPUI: “ISUAN RO A REL DAWN”
- Upa R. Lalhriatpuia
Audio
Tukin, Pathianni zingah hian kohhranhote kan Lal Isua hmingin chibai ka buk a che u.
Tunah hian Pathian Thu kan ngaithlaho leh lawk dawn a, kan thupui chu ‘Isuan Ro a Rel Dawn’ tih a ni.
Hei, kum khat tih theih dawn nunphung pangngai a khaihlak ta a, Kohhran kalphung pawh a dang ta hle rih mai. Kan khawvel hun hmawr lamah ka chuang ta mek a ni mai awm mang e,
Tun ang, hun harsa kan tawn mek lai hian, mihringte khawvela kan nun theih nana Pathian thil ruahman felzia leh thatzia te hi a lang fiah sauh ve thung a nih hi. Englaipawha kan mamawh ni eng, boruak, tui, thing leh maute hi mi zawng zawng tan a thlawnin kan hmu a. Mihringten thil hlu kan tih heng rangkachak leh lunghlute hi a tovin a vang hle na-a, a tel lo hian kan damchhung zawng hi harsatna tawk miah lovin kan awm thei a ni. Kan damkhawchhuah theih nana kan mamawh tak tak chin erawh hi chu Pathianin a thlawnin min pe vek a ni.
Hman deuh khan petrol van laiin taxi khalhtu pakhat hian ralkhata ruahsur a hmu a “ Aw, sawngte saw petrol han ni mai se ka va ti em” a ti a. Tak tak ni ta se, duhthu a sam sual ve ngawt ang. Ruah sur ang hian petrol hi han sur ve ta se, a manganthlak teh ang chu.
Heng thil hlu tak tak Pathianin a thlawna min pek te hi khawvela kan awm chhung atan a ni a. Chatuana nunna kan neih theih nan Pathianin a Fapa Isua Krista a thlawna min han pe phei hi chu a va hlu lehzual em! A hlutzia hi sawi theih pawh a ni lo e.
Pathianin a Fapa min pek chhan hi Amah Isua ngeiin khawvel tawp hunah ro a rel dawn a, chatuana danglam tawh lo tur thutlukna mitinte chunga a siam dawn vang a ni. Chu rorelna chu chatuan nunna emaw thihna emaw kan channa tur a nih avangin, Pathianin a ngaipawimawh em em a, mutmawh hnarmawhah a nei a, Nunna kan chan ngei theih nan A Fapa Krista chu min pe ta a ni. Isua khawvela a lo kal hmasak zawk kha eng dang vang ni lovin, khawvel tawp huna Rorelna-a thiam kan chan theih nan a ni.
Isua Rorelna hma-a ding tur hian kan inpeih tawh em? Kan damchhung ngeia kan inpeih a ngai a nia.
Covit19 hripui a rawn thlen hma kha chuan, Kohhran programme hrang hrangin min nawr kal a, ringtu tha tak, rawngbawlnaah pawh inhmang ve tak anga inngaih a awl khawp mai a, a lo ni mang
hauh si lo a nih hi. Kohhran programme-a tel ve avanga ngaihthat ve deuh ngawt te, thawhlawm thawh vanga lungawi khata lungawi deuh mai te hi a awl viau mai : Chatuan nunna kan chang tak zet em? Tih hi kan chian tul ber zawk chu a ni e.
“Kawng leh Thutak leh Nunna ka ni” titu Krista neitu chauhin chatuana nunna an nei a ni tih hi hre thar leh ang u khai. Isua enga kal thin, Krista chhun ena kal thinte chauhin Vanram hi an thleng dawn a ni. ‘I thu hi ka ke atan te hian khawnvar a ni a, ka kawng atan eng a ni’ tih a nih kha. A enga kal tur chuan a bula kan awma, kan kal a ngai a ni. Rawngbawlna kan han tih pawh hi a tak takah chuan Isua ruala kal hi a ni mai e. Isua rualin kal ila, pen bo leh petek a awm thei lo a ni.
Pathian thu chuan mahni ke chheh theuh uluk taka en turin min zirtir a, Kohhran hruaitute ke emaw, midang reng reng ke en lovin, ralkhat hla tak tak pawh en hek lovin, ‘Krista rualin ka kal em’ ti a mahni ke chheh veng tha hle turin min zirtir mai a ni, Chatuan nunna kawng kan zawh mek a ni si a, kan peng bo palh hlauh ang e.
Lal Hezekian “ Zawite tein ka kal dem dem tawh ang” a tih ang khan, Krista rualin, a chhun enah kan kal tur a ni ang.
Chatuan Nunna kan chan ngei theih nan zing, chhun leh zanah, englaipawhin Krista ruala kal I tum tlat ang u.
Pathianin mal min sawmsak theuh rawh se.
Hla sak hona:Khb No 399: Lalpa I rawngbawla min koh hi
Lalpa, i rawngbawla min koh hi
Lalpa, i rawngbawla min koh hi
Hriain, sual, chak lohna phuar vel hi;
Hlau leh khurin, beiseinain,
Tawmkai lo leh bawlhhlawh, puih ngai,
I chakna ring ka lo kal e.
Tu tan danga nung tawh lovin,
Ama rawng chauh bawlin;
Chatuan kulh che rual lo inhung chu,
Tuarna zara ka ta a ni;
Zam tur reng ka lo nih loh hi.
I ruala kal dan min zirtir la,
'I thu ni se,' ka dam chhung hlaa'n;
Kalvari hmangaih fim mawi leh
Khawngaih thutiamin min thuam la,
I rawngbawl fo theihna turin.
Ka kal zel ang, aman min awmpui,
Khawvel hnehna chu ka ta a ni;
Buaina chhum leh thlemna fawnten,
Min chim pawhin Chhantu ka nei,
A ta ka ni, Chatuan Lal ta.
Chatuan famkimna hmun thlen hunin,
A va ropui dawn Krista zarah;
Riangvai, chanhai, hnehtu lian chan,
Vohbik, chawimawina lallukhum
Changa kei ka ding ve tur chu.
