SERKAWN TUALCHHUNG KOHHRAN

PROGRAMME

PATHIANNI ZING INKHAWM PROGRAMME:

10:00 AM, 29th AUGUST 2021

PROGRAMME:

KOHHRAN MEMBERTE HNENA HRIATTIRNA : 29th AUGUST 2021

Tawngtaina : Chhungkua atanga hun changtu in hmang se.

Pathian fakna hla:-KHB 261, ‘Isua neih ka duh zawk’

Isua neih ka duh zawk, ro h lu ber aiin,
A ta nih ka duh, lei sum zawng neih aiin;
Isua neih ka duh zawk, ram leh in aiin,
A kut thirkhen mi hruaina ka thlang zawk e.

Ram zau taka lal bera thut ai chua,
Sual thunun ka nih si chuan;
Isua neih ka duh zawk, thil dang zawng aiin,
Khawvel zawng ai pawhin.

Isua neih ka duh zawk, chawimawina aiin,
Rinawma amah tan tlat fo ka duh zawk;
Isua neih ka duh zawk, hming thanna aiin,
A hming thianghlim tak chu chawi ka nuam zawk e.

Lilipar mawi ber aiin a mawi zawk e,
Khawizu thlum ber ai pawhin a thlum zawk si;
Ka thla riltam tan chaw tha ber a lo ni,
Lal Isua ka duh ber, min hruaitu atan.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi ang u. Pathian nung leh egkimtithei, min chhandamtu kan nei hi a tharin lawmthu i sawi ang u.
2. Kan kohhrana member damlo, in lam leh damdawiin a enkawl laite, BCCC leh CCC a awm te, quarantine mek lai te tan i tawngtaisak ang u.
3. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
4. Sorkar chuan Lockdown te tlemin a thlah dul a, chutih laiin hri inkaichhawn hlauhawm dan hi a ngai reng a, mitin kan fimkhur thiam a sorkarin awm dan tur a tih (Covid Appropriate Behavior-CAB ) kan zawm hram hram theih nan Pathian tanpuina i dil ang u. Kan khawtlangah Covid19 a darh chho ve mek a, hei hi dan chah anih thuai theih nan Pathian kan dil anga, chhungkaw tinte pawhin thuawih turin i inhlan thar ang u.
5. Serkawn VLTF memberte, a bik takin Contact Tracing Team te i tawngtaipui ang u.
6. Kan Biak In sak lai mek tan, thawktu leh enkawltute tan i tawngtaisak ang u.
7. Kan kohhranah khawhar chhungte kan nei a, an tan Pathian thlamuanna leh awmpuina thahnemngai takin i dil sak ang u.
8. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : ‘‘Chawlhna Isua Krista’’ .

Audio

Kohhran hote kan Lalpa Isua Krista hmingin chibai ka buk a che u. Hun khirh leh harsa takah awm mek mahila, Pathian min hmangaihna leh kan chhunga a rinawmna kawng hrang hrangah kan hmu a, kan chungah leh mite chunga Pathian hmangaihna lo langchhuak hmuh tur leh hriat tur tam tak awm hian min tihlimin, min tilawm theuhvin ka ring a, tun hunah pawh Amah chibai buk theia min siam hi a lawmawm em em a, Pathian hnenah lawmthu I sawi ang u. Hei kei pawhin, A duhsakna leh khawngaihna kan kohhran hruaitute kaltlangin ka lo chang ve leh ta a, A thute in zinga puang chhuak thei tura ka awm hi ka lawm hle a, Pathian hnenah lawmthu ka sawi a, kan hruaitute chungah pawh ka lawm em pem a ni.

Tukinah hian Pathian thatna leh min hmangaihnate kan rilru in ngaihtuah thar leh ila, chu Pathian hmangaihna chu ka hmu thiam ve em ? Eng dinhmunah chiah nge kan awm, mahni inbihchiang leh theuh ila, tiin ka sawm hmasa che u a ni. Kan thupui atan chuan ‘Chawlhna Isua Krista,’tih ka han thlang chhuak a ni.

Naupang Pual : Khualzin pakhat hi thingtlang khaw pakhatah hian a zin a, tlai lamah thlenga a, zan chu a riak ta a.A tukah chuan zingah a tho a, chu khua chu a fang kual a, zing chaw ei hun vel ah chuan, a thlenin lam pan chuan a kir leh ta a. A haw kawngah chuan School pakhat hi a kal pel a, a hnu deuh ah chuan naupang pakhat hian, school naupang dang pakhat lian ve deuh tawh mai, rawn paw phei par par hi a hmu a, mak a ti hle mai a.Tichuan alo nghak a, a bul an rawn thlen chuan, ‘Mama, engatinge I thianpa chu I puak a ? tiin alo zawt a, ani chuan ‘a ke hi a zeng a, ke in a kal thei lova,’ tiin awlsam te hian a chhang a. Mikhualpa chuan, ‘ti hian nitin I paw thin em ni ?’ an ti leh a naupangte chuan, ‘Aw’…tiin a chhang leh mai a. Kal mai an tum lai chuan chu mikhual pa chuan, ‘chuti chu I va hah thin dawn ve aw…I tan chuan phurrit tak anih hi mawle’ an ti zuia…chutia an tih takah chuan naupangte chuan rang deuh mai hian, ‘Ka pu ni love, ka unaupa ania, hetia school ka kalpui thei hi ka lawm zawk’a ti ta reuh a…han ngaihtuaha chhunzawm ta ila, chu mipa naupang tan chuan, anihna takah chuan, nitina a unaupa zeng, school thlenga puak ziah chu a ritin a hahpui thin ngei ang ti rawh u….mahse rit ti leh hrehawm ti miahlova a awm theihna chhan chu enge ni ta ang le ? A unaupa ania, a hmangaih vang ani. Keini naupangte pawh hian, Isua Krista ringtu naupangte kan nih avanga, Pathianthu zawm a, Nu leh pate thu awih tak a kan awm thin hi, ringtu ni ve lo naupangte tan chuan a hrehawm hmelin, ninawm awm taka a lan chang a awm thin ngei ang. Mahse kan hmangaih Isua thu zawm zel hi a hlimawmin a nuam a, kan inchhir ngai reng reng lo a ni ti rawh u. Chuvangin, keini naupangte hian Pathianthu awih zel turin kan rilru I tinghet sauh sauh ang u, tiin kan insawm thar leh a ni.

Tunah chuan kan zavaia a pual lamah kan kai tawh ang. He khawvel ah hian lungngaihna leh mangangnna kawng hrang hrangin min tlakbuak thin. Tun a kan dinhmunah phei chuan he hripui avanga kan rumna a nasa hle mai ti rawh u. Mahse, kan hriat reng atana pawimawh ka tih chu, he hripui hi leng kherlo mahsela, lungngaihna leh manganna tur, min ti hrehawm leh min ti thlaphang tur hi he khawvel ah hian a thleng tho tho ang tih hi kan hriat a pawimawh hle in ka hria a ni. Thenkhat chuan Covid-19 hi leng lo se la chuan….ti a,nun nuam zawk leh hlim zawka awm in beisei pawh kan awm mai thei…mahsela kan Bible atanga kan en chuan, he covid avang ringawt a mangang hi kan ni lo, he hri hi awm lo mahse buaina leh manganna hi chu a awm dawn tho tihte hi kan hriatchian a pawimawh riauvin ka hria ani. In sawithaih nan ka sawi lova, manganna leh harsatna hi thil thleng ngei ngei thin, he khawvel ah hian lo thleng tawh leh lo la thleng tur ani tih hi kan hriatchian ka duh a ni. Chanchintha Luka ziakah,21:26 ah phei chuan, ‘Thlabar avang leh khawvela thil lo thlenga tur chu ngaihtuah avangin mite an thidang ang;’ tiin Isua Krista ngeiin min hrilh a ni.

Isua Krista hian he khawvela kan hrehawmzia leh, manganna leh buaina kan chungah alo la thleng zel dawn tih hi a hre chiang em em a ni. Kan duhthawh deuh teh ang…a hria chauh pawh a ni lo, mihring lo niin, heng tuarna leh hrehawmna zawng zawngte hi a rawn tuar chhuak vek a, a tawpah thihna rapthlak, kraws a thihna chu a tuar a ni… Amah ngei in a takin a rawn tawng vek a ni. Hetah hian a tawp mai lova, heng hrehawmna leh manganna ina a hual vel leh a bawm tlat, phurrrit phur kan nihzia a hmuh avang hian, Mat.11:28-30 ah chuan, “Nangni phurrit phur zawng zawngte u ka hnenah lokal ula, keiman ka chawlh tir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan,in thlarau tan chawlhna in hmu ang. Ka nghawngkawl chu a nuam a,ka phur pawh a zang a ni.” tiin min sawm ta hlauh a ni…ava lawmawm em 1 ti rawh u. He Krista sawmna duhawm chhangtute, keini ringtute hi chuan, he hrehawmna leh manganna karah pawh hian chawlhna, hahdamna kan neih phah ta ani. Miten lawmna reng reng an hmuhlohna hmun, buaina leh manganna, lungngaihna hmun ni a an ngaih ah pawh, lawmna leh lungawina thuruk min neih tir tlat si thin anih hi ti rawh u…

‘Tahna ruam chu an zawh in tuihna awmnate a siam thin…’ tia Sam ziaktu in a sawi ang khan, kan tahna leh rumna hian Krista hmel duhawm leh hahchawlhna chu min hmuh tir leh tlat si thin a ni ti rawh u….Natna khumah te, a… kan hmangaihte ruang chungah hial pawh Amah min fak tir thei tlat thin….hrethiam ve lo tan chuan mak tak ani….awihawm loh ani hial a ni. Isua Krista rin hi nakina kan lawmna tur, kan thih hnu a kan la hlimna tur, chatuana kan lawmna tur tiin kan sawi thin, a dik ngei mai. Mahse, he khawvela kan la awm chhung la la pawh hian, Krista a nun thuhruk neitute nun hi chu a hahdamin, a thlamuanawm thin a ni. Tukinah hian keini ringtu inti te hian, he Krista a chawl nun hi kan nei ve tak tak em ? Mahni theuh I han inbih chiang teh ang u. Ringtu ni si, hah em em, buai leh mangang thei em em kan ni em ? miin thu engemaw an sawi a, hlau a phili leh mai thin kan ni em ? Setana hi a fing vervek em em mai a, Isua Kristan hahdam leh thlamuang taka awm tura min duh em em laiin, ani chuan kan buai theihna tur kawng hrang hrang hi a dap reng a ni tih hi I hria ang u.

Ringtu inti siin thlapang leh mangang takin I awm em ? Isua Krista chuan, Johana 16:33 ah “Khawvelah hian hrehawmin in awm thin, nimahsela thlamuang takin awm rawh u, keiin khawvel ka ngam ta” a ti asin. A ngam tawhsa khawvel a cheng kan nih hi I lo theihnghilh palh em ?
I chhunga thil thleng hriatthiam loh leh I duhloh zawng tak a awm em ? Rom 8:28 ah chuan, ‘Tin, Pathian hmangaihtu, ama ruat anga a kohvate tan chuan, an thatna turin engkimin a thawhsak hlawm thin tih kan hria;’ tiin tirhkoh Paula chuan alo sawisa leh diam tawh asin.
Kan Pathian hi engkimtithei leh engkim chhunga roreltu a ni a.Thil chhia leh tha lo a kan ngaih pawh hi, a duh phawt chuan thiltha leh hlu-ah a chantir thei a, kan thatna tura engkim a thawk thintu a ni tih hi I hre reng ang u.

Setana hian min tihbuai dan hi a thiam khawp a, sawi sen pawh a ni lo in ka hria. A chang leh inrinhlelhna min min neih tir a, chhandam ni dawn ta lo ang hial te in min inhriattir a, hlauthawng leh mangang takte in kan awm thin…Kan tih theih ni miahlo Chhandamna chu mahni a thawhchhuah tir min tum thul a….tichuan theih tawpin kan han tum thin, Pathian lungawina chu sawiloh, mahni lungawina khawp pawh kan thawk chhuak thei thin si lo anih hi ti rawh u….Kan Pathianthu in Ephesi 2:8 a ‘Rinna avanga khawngaihna a chhandam in ni,nangmahni thawhchhuah a ni lova,Pathian thilpek a ni…’ tia chiang taka min hrilh kha min hai tir leh tlat thin…Krista a chawl te chuan chutiang a ni lo tih an hria, Krista hnenah an intulut a, Amah nen nun inzawmin an awm a, anmahni a Krista(thlarau thianghlim) awm avang zawk khan Pathianthu awih a, a thu zawm duhna an lo nei a, A duh zawng tiin, a rawng an bawl thin alo zawk si.

Hemi letling chiaha thiltih a chhandamna thawhchhuah tumte hian kan lo awm palh ang tih ava hlauhawm em ! Chungtiang nun neite tan hahchawlhna a awm lo. Ringtu tha tak ni a inngai, Chawlhna Isua Krista a chawl thei lo, hah em em reng te hi a awm thei ang em aw ? tihte ka rilruah chuan zawhna alo lut a ni. Thiltih avanga chhandamna hi chan a ni lova, Chhandam an nih avanga thilti zawk thin an ni. An thiltih chu chhandamna changtu, Krista a nun chawl tawh an ni tih langtu mai a ni zawk a ni.

Awle, he Krista zara nun hahchawlhna changtu nih hi chu ava nuam em ti rawh u. Kan lungawina leh thlamuanna hi tawngka a sawifiah mai theih pawh ani lo...a chang chuan kan inchhuanpui lo chauh a ni ti rawh u. He nun hi a hahdamin, a nawm em avang hian chu chawlhna a chawl ve tur chuan mi zawng zawng hi kan duhsak takzet thin a ni.

Unau duh takte u, he chawlhna Krista ah hian I nun chu a chawl em ? alo chawl ve tawh a, sual avangin ilo zamin,I lo mangang leh viau tawh em ? Nge I la chawl ve ngailo ? a enga pawh chu ni ila, tun hunah hian Hmangaihtu Isua Krista chuan, ‘ka hnenah lokal la, keiman ka chawlh tir ang che’…tiin min sawm ani. Sual leh fello bik riau ah I inngai em ? a dik na chen pawh ang. Mahse kan sual avang alawm Krista chu kan aiawh a tuar… Amah chu pan la, a sawm miau che avangin, alo lawm ngei ngei ang che a, alo hahchawlh tir dawn che a ni. Awle tunah chuan he Hla hmang hian kan thusawi hi in chhunzawm teh ang,

‘Ka Thinlungah a nung’
Phuahtu: Lalnunpuia Hrahsel 1. Vante khian i ropui zia an lan tir,
Leilung leh tuifinriat i ta an ni;
Khawvel finna hian hnial thin mahse,
Ka rinna chu a nghing ve chhin ngai lo.

Ch. Pathian fakin ka zai, ka zai zel ang,
Ka rin a chuan a thisen hlu min pe;
Ka Lal a ni, ka nun hruaitu leh vengtu,
A nung ka hria, ka thinlungah a nung.

2. Ka Pathian aia ropui an awm lo,
Ka Pathian aia thiltithei an awm lo;
Lei leh vana Lal awmchhun a ni,
Engkim siama, engkim neitu a ni.

Ch. Amah fakin ka zai, ka zai zel ang,
Ka rin a chuan a thisen hlu min pe;
Ka Lal a ni, ka nun hruaitu leh vengtu,
A nung ka hria, ka thinlungah a nung.

3. Ka inchhuang thin Pathian fa ka nih hi,
Aman engkimah min hria tih ka hria;
Ka nunna, ka kawng hruaitu ropui,
Ka nun laimu, ka innghahna a ni.

4. Ka rinna hi nangmahah chauh a awm,
Ka duhzawng zawng zawng neitu i ni a;
Ka hrechiang, ka hmu, ka tem bawk thin,
Khawvel mamawh engkim chhanna a ni.

Krista a kan nihna leh kan dinhmun dik tak min hriatchian tirtu atan, Lalpan a thu kan sawi leh a fak hla kan ngaihthlakte, mal min sawmsak rawh se. AMEN. Tanna/ Thilpek lakkhawm hla : KHB 261, ‘Isua neih ka duh zawk’

Pathian fakna hla:- - Thisen thiltihtheihna