THUPUI: ‘Ngawi ula, Pathian ka ni tih hre rawh u’.
- Rev P.C. Liandula
1.
Thuhma:
Kohhran chhungkaw tinte Lalpa Isua hmingin chibai ka buk vek a che u. Vawiin hi kan kohhran programme pangngaiah chuan Crusade neih hun a ni a. Nimahsela, kan hun tawngin a zir loh avangin programme anga kalpui theih a ni lo va. Rev. Lianchhunga Khiangte thuchah sawi ngaithla tura kan inngaih laiin ka thuchah sawi in ngaihthla ta daih a nih hi. Pathian hnena ka tawngtaina chu, “He thuchah hmang hian kohhran mite min khawih ngei ang che,” tih hi a ni.
Biak Ina kan inkhawm theih loh chhung a rei ta viau a, thenkhat chuan Biak In ngeia inkhawm a, Pathian fak leh chawimawi kan chak hle tawhin ka ring. Mahse, “Lei hi i temple ni vek se,” tih hla sa thintu kan nih angin vawiin hian kan thinlung chhung ril ber atangin Pathian au ila, i pawl theuh ang u. Tichuan, Biak Ina kan inkhawm thin ang thova hlawk leh thlarau lam malsawmna dawngin hun kan hmang thei ngeiin ka ring a, ka beisei bawk.
Thupui sawi hawnna:
Kan thupui “Ngawi ula, Pathian ka ni tih hre rawh u,” tih hi lo sawi hawng dawn ta ila. He Sam ziaktu hian Pathian chu rintlak a nihzia te, inhumhima atana hmantlak a nihzia te leh nun innghahna atana hmantlak a nihzia min kawhhmuh phawt a. Chumi hnuah chuan Amah tilawmtu min tarlansak leh a, chungte chu Lui pakhat, Krista thisen lui chatuana kang ngai lo leh a pengte, Amah ringtu kohhran hote an ni. Chutianga Amah tilawmtu leh ringtute chu a awmpui tlat thin thu min kawhmuh bawk a. A thiltihtheihzia leh a thiltih dan kalphung pawh min hriattir bawk. Tichuan, thil dang zawng zawng aia chungnung leh danglam a nihna pawh min hrilh nghal a, chu tak chu kan thupui lak chhuahna lai hi a ni
Ngawi ula tih hi a saptawng lamah chuan ‘Be still’ tih a ni. Tawng tawh lo rawh u, tihna a ni satliah mai lo va, awmzia ril leh thuk tak a nei tih i hre phawt ila. Lal Isuan, thli leh tuifawn a hau tum pawh khan, “Ngawi ula, awm hle hle rawh u,” a ti a. An thawm a reh ta a ni satliah mai lo. In thiltih tha lote chu tawp tawh ula, in awm dan dik lote chu hawisan ula, bansan rawh u, in thil chin tha lote chu sim tawh rawh u, tihna te a ni ang. Khawvel leh a chhunga cheng hringfate hian Pathianin min siam chhan chu kan tluksan a, chibai buka chawimawi loh tur zawk lamah kan nun a inher nasa ta lutuk a, “Ngawi ula, min ti ta a nih hi. Khawvel hian a mamawh loh lamah ke penin amah intihropuina kawng zawhin a kal thui ta lutuk a, a tlu sawp mek a nih hi. Pathianin a hnena kir leh tur leh kan thil chin tha lote chu bansan turin min duh a ni.
Chuvangin vawiina kan hnena Pathian thuchah nung reng chu, “Ngawi ula, Pathian ka ni tih hre rawh u, Hnam tin zingah chawimawiin ka awm ang a, Leiah hian chawimawiin ka awm bawk ang,” tih hi a ni. In rimawi tha lote chu tireh tawh ula, in nun dan tha lo leh dik lo chu bansan tawh rawh u. In awm dan dik lo leh thil chin thin tha lo leh dik lo chu titawp tawh ula, simin ka lam lo hawi ula, Pathian ka nih hi hre rawh u, min ti a ni. Lockdown tantirh khan Home Crusade-te neiin hun kan hmang a, kan ram kristiante nun kha khawih chetin a awm a. Chutih laiin kan khawsak phung leh nih dan phung en hian danglamna hmuh tur a la awm lo. Vawiin hian Lalpa hnenah i kir ang u. Ani chu pathiante Pathian, lalte Lal, hotute Hotu chu a ni si a.
Pathian mamawhtu kan ni:
Mihring hian amah aia pawimawh zawk, amah siamtu Pathian a hriat chian a ngai hle a. Hun khirh tak kan tawh mek hian Pathian kan mamawhzia min hriattir a, Amah chu hriatna nunga kan hriat a tul a ni (cf. 2 Cor 5:16). Thlarau lam hriatna, hriatna ropui bika kan hriat a tul a ni. Tichuan, vawiina kan hun tawng mek karah hian Pathian a nihzia hriain, thlarau lam hriatna hmangin Pathian chu i ko ang u. A lam hawi ila, engnge a tih hi i en ang u. Ka ropuina leh rintlak ka nihzia hi hria ula, ka chet vel dan hi ngaihtuah ula, chawimawi tur leh chibai buk tur dik chu ka ni tih hre nawn leh rawh u, tiin hripui (Covid 19) hmang te, thlaler khau (khaukhuap) hmang te, thlipui leh lirnghing (lockdown chhungin vawi 6/7 vel a nghing ta) hmang tein kan khawvel hi chung lamin min au a nih hi. Isua Krista leh a hnathawhte leh kraws thu ngai nepa hmusittu, khawvel finna leh sanna, ropuina leh thiltihtheihna chhuang zawk a, Amah ngaihsakna nei lo leh eng atan maha ngai lote hnenah, “Ngawi ula,” tiin Pathian mamawhtu kan nihzia min hriattir leh ta mek a ni.
Khawvelin Pathian a hransan:
Khawvel finna leh thiamna a sang zel a, khawvel hian kawng hrang hrangin hma a sawn bawk. A kalna lam lamah chuan Pathian a mamawh hlei nem tih tur khawpin ke a pen a, a ropuina leh thiltihtheina chuan Pathian ngaihsak lohna lamah a hruai zel a. A mamawh loh zawk thil tam tak a buaipui zel bawk a, Pathian theihnghilhin a hransan der a ni ti ila kan tisual awm lo ve. Ralthuam tha pui pui siam chhuakin a buaipui a, Neuclear weapon nen khawvel hi an hma-chhawn a. Nawmchenna chi hrang hrang lama a tlan puat puat a, Pathian awm ring lo an pung tual tual a. An zir thiamna chuan kawng dik lo zawk a zawhtir a, Isua Krista leh a hnathawh ngainepin, Kraws thu chu thil lawilo mai maiah ngaitu hnenah, “Ngawi ula, Pathian ka ni tih hre rawh u,” tiin amah hransantu leh engmah lova ngaitu hnenah kawng hrang hrangin Pathianin thu a sawi ta a ni.
Hulk Hogan (a hming tak chu Terry Gene Bollea a ni) wrestler hmingthang tak, actor ropui tak, entrepreneur leh musician ni bawk chuan Corona virus hi chibai buk tur dik tak Pathian chibai buk lova, chibai buk loh tur zawk kan buk (worshiping false idols) nasat lutuk avanga Pathian hremna angin a sawi hial a nih kha.
“Thla thum emaw lekah Egypt hremna ang mai kha lo thlengin Pathian aia chibai kan buk thin zawng zawngte chu min lak kiansak ta. Infiam mite chibai buk in duh a, infiamna hmun (stadiums)-te ka khar a, Rimawi tum thiam (musicians)-te chibai buk in duh a, rimawi tumna hmun (Civic Centres)-te pawh ka khar a. Lemchang thiam (Actors)-te chibai buk in duh a, lemchanna hmun (theaters) pawh ka khar a. Pawisa chibai in buk a, mahse ei bar zawnna (economy) ka khar a, stock market pawh a tlachhia a. Biak inah kalin chibai min buk duh lo va, Biak ina in kal theih lohna ka siamsak bawk che u a ni,” tiin, “Ka hming pu ka mite chuan inngaitlawma an tawngtai a, min zawn a, an awm dan sualte an hawisan chuan, van atangin ka lo ngaithla ang a, an sualte ka ngaidam ang a, an ram chu ka tidam le hang,” (II Chro 7:14) tih thu hi la chhuakin Pathian lam kan hawi a tulzia a sawi hial a nih kha. Pathian lam i hawi ang u le.
Ngawi ula, Pathian ka ni tih hre rawh u:
Kum 2001-a Terrorist-hoten World Trade Centre an tihchhiat tum khan, mipui thabar leh mangangte hnenah Rev. Derrick Harkin-a chuan, “Kan awmna khawvel leh In ropui tak takte a nghin hian kan Pathian hi a hlawhchham (failed) ve ngai lo va. Chungte chu a thleng tawh thin a, a thleng zel ang. Ni hi a en loh pawhin a awm tih ka ring a. Mahni chauhva ka awmin Pathian chu ka ring a, a hmangaihna pawh ka ring. Harsatna leh buaina hnuaia kan awm a, a ngawih vung vung pawhin Pathian chu kan hnenah a awm reng a, hmuh theih loh Pathian Nung chu a ni,” a ti a ni.
Hun khirh tak kan tawh lai hian kan tana Pathian thu chu, “Ngawi ula, Pathian ka ni tih hre rawh u. Hnam tin zingah chawimawiin ka awm ang a, Leiah hian chawimawiin ka awm bawk ang,” tih hi a ni tlat mai. Kan rawngbawlna leh hnathawhna kawng hrang hrang hi thlir ila. Pathian fak leh chawimawi nia kan inhriat lai leh Lal rawngbawl nia kan inhriat lai hian keimahni inchawimawi leh infak tel ve zel nun te, Pathianin min chawimawi vena lam nghak hman miah lova keimahni inchawimawi zel nunte hi ngaihtuah tel ta ila. “Ngawi ula, Pathian ka ni tih hre rawh u. Hnam tin zingah chawimawiin ka awm ang a, Leiah hian chawimawiin ka awm bawk ang,” titu hian eng angin nge min ngaih ang le. “Ngawi ula, Pathian ka ni tih hre rawh u.”
Lalpa’n a thu kan zavaia tan malsawm rawh se. Amen.
Hla sak hona: KHB No 508: Hring nun kan zin kawngah hian.
Hring nun kan zin kawngah hian
Hringnun kan zinkawngah hian,
Kan ngai che thlarau thianghlim
Min kai la, chung van Kanan thlen thlengin,
Dam tein min hruai zel rawh.
Thuro iang zaidam nunnem,
Kan thinlung rawn luah khat la;
Nun ze mawi, Lal Krista nun mawi tak kha,
Ni tin min zirtir ang che.
Thlarau thianghlim thlamuantu,
Zirtirtu ngilnei ber chu;
Thianghlimna, sual hnehna nun min petu,
Van thlen thlengin min hruai rawh.
Aw, van thli, lo leng ang che,
Sual chhumpui zing chhem kiang la;
Kohhranhote min tiharh thar lehin,
Sual doral kanngam ngei ang.
MALSAWMNA:
