Kraws-ah chuan thisen hlu a awm,
Kraws thianghlim chu ka hmu;
Thisen chu Isuan min hriattir,
Ka tan hmana luang kha.
Aw, thisen ropui ber chu,
Isuan a tuarna chu,
Kraws chungah thisen hlu a luang,
Rinnain ka lo hmu.
Kraws chu, aw, kraws rit tak mai chu,
Isuan ka tan a pu,
Lungngai taka a tuarna kha,
Kalvari-an a nghat.
A zang em kraws hlu tak mai chu?
Kraws chu ka han thlir a;
Ka phur kang ve thei dawn emaw
Ka bei ang kraun awm chu.
Lallukhum ropui ber mai chu,
Hnehtu Lallukhum chu,
Vanah Isua ka hmuh hunin,
Kei pawh ka khum ve ang.
Ka mittui a tla tawh lo vang,
Hmangaih reh lohnaah;
Khawvel ata min hruai chhuak la,
Lawmna hmun min thlen la.
TAWNGTAI RUALNA
Tawngtaina a Hriat Turte
Pathian malsawmna leh venhimna kan chan avangin lawmthu i sawi ang u. Amah nitina kan hnaih tial tial theih nan i dil ang u.
Pathian Biak inkhawm a huhova kan neih theih thuai theih nan leh chhungkaw tinin chhungkaw maicham kan vawn nun zui zel theih nan i dil ang u.
Kan Biak in sak mek, Building Committe, work supervisor leh thawktu zawng zawngte tan.
Kan khawtlanga khawhar chhungte tan Pathian thlamuanna leh awmpuina i dil ang u.
Kan kohhran member khumbet a na leh natna khirhkhan veite tan.
Thuchah kan ngaihthlak tur hmangin malsawmna dil ila, kan thawhlawmte Pathian hnenah i hlan ang u.
Pathian thu chhiar
Sam 73:28
‘Kei atan erawh zawng Pathian hnaih hi a tha a ni; Lalpa Pathian chu ka inhumhimnaah ka hmanga, i hnathawh zawng zawng thu chu ka hrilh theih nan’.
THUCHAH
Thupui : PATHIAN HNAIH A AWM
- Rbt R. Lalhmangaihsanga
Audio
Tukina kan thupui atana ka han thlan chhuah chu ‘Pathian hnaih a awm’ tih a ni a.
Ringtute hian Pathian kan hnaih em? tih hi keimahni theuh kan inzawh a pawimawh hle a ni. Ringtute, Pathian hnaiha awm that zia chungchang kan sawi dawn chuan Pathian hnaih loh pawizia kan hriat hmasak a tul a ni. Sam 73 na kan chhiar chuan Ringtute hian Pathian lam thlir lo hian thil kawng hrang hrang kan thlir thin a ni tih a lang chiang hle. Asapha hian a mihringpui te a han thlir a, an nundan leh an awmdan te chuan a nun a ti chauva, a tlu lek lek thin a ni tih a sawi. Mi suaksualte vanneihzia a hmu a, mi uangthuang te a awt a, an thih laiin tuarna reng an nei lo va, Midangte angin tih hrehawm leh sawisak an ni lo va, an nunrawng a, an thinlung duhthusam aia tha mah in an nung thei niin a hria a ni. Hetiang hian khawvelah chuan nung mahse an tawpna tur te a han ngaihtuah chuan an awhawm lo hle a ni. He khawvelah hian ringtu inti Pathian hnaiha awm tam lo ho te avang hian kan rinna pawh hian a chauh phah ve thei thin a lo ni. Chuvangin ringtu kan nih chuan Pathian bulah kan hun tam tak kan hmang thin tur a ni. Chuti lova keimahni duh dan leh kan nuam tih zawng ringawta hun kan hman chuan midang te ti tlu tu, midangte tihnungtawlhtu kan ni thei a ni. He khawvelah hian ringlo mite hi dinhmun sang zawk chang anga an lan chang a awm thin, harsatna leh lungngaihnate chawp leh chilhin an chungah a thleng mai bik lova, hausakna, sum leh pai, a neia te an ni leh lawi si, chung avangte chuan awhawm taka lan chang an nei thin. Mahse ngun takin han zirchiang ila, hetianga dik lo taka hausa te hi belh chian an dawl lem lo a ni. An tawpna tur chu hremhmun a ni si a. Kan chhungril nun tak tak en thin tu Pathian hian kan chungah ro a la rel dawn a ni tih hi kan hriatreng a tul a ni.
Pathian hnaiha awm that zia tilang turin Pathian hnaih a awm lo mi pahnih chungchang han sawi hmasa ila. A hmasa zawkah chuan Jona chungchang hi tlem han chhui lawk ila. ‘Jona chu Lalpa hma ata tlanbo turin Tarsis-ah a tho ta a’ (Jona 1:3) ah kan hmu a ni. Pathian hnaih duh lova tlan bosan tute hian hniam lam an pan thin. Jona’n Pathian tlan bosan a tum avang hian amah mai ni lovin midang tam takin an tawrh phah a nih kha, Tarsis pan tur lawnga a chuan naah thlipui na takin a nuai a, lawng a bungrua zawng zawng an paih chhuah vek bakah Jona ngei pawh paihchhuahin a awm anih kha. Pathian hlata awm tum tute chunga thilthleng hi kan chhut ngun a ngai hle a ni. Ringtu, Pathianin a koh, a kohna hmuna awm duh lo te avangin harsatna a tawh theih a ni. Chuvangin keini pawh Jona nun atang hian kan inenfiah a tul hle a ni. Pathianin kan kova tih tur min pek kan tih duhloh emaw kan tihthat peih loh avang hian midang engzatinnge tuar ang, hetiang hi thil thleng thei anih avangin Pathian rawngbawl tura kan inpe ta sa sa, theih tawp a a rawng bawl hi kan tih tur a ni.
A dawt lehah chuan Fapa tlan bo thu (Luka 15:11-32) kan chhiar chuan kan hmu.. Ka rilruah a awm tlat avangin han sawi tel hram ka duh a ni. Kan thupui nen hian a inhmeh em ka hre lo, mahse ka rilruah heti zawng hian a awm tlat avangin ka rawn telh hram a ni. A fapa naupang zawkin a rochan ai a pa hnenah a dil a, khawlam hla taka a kal thu leh chutah chuan nuam lutukin a awm a, a sum zawng zawng chu a khawhral vek thu kan hmu. Helaia ka rilrua lo lian ta em em chu a fapa naupang zawk hian mahni thua sum leh pai, hausakna han chen a chak avangin a pa hnen atangin a ro chanai a dil chhuak a, chu chu hmang thiam leh si lovin a tlakchhiat phah ta a ni, tiin a tawi zawngin sawi mai ang. Fapa naupang zawk hian a pa hlata awm turin khaw lam hla taka a kal a ni tih kan hmu. A pa hlata a awm khan ama duh danin nuam lutukin a awm a. Chu chuan atan tlakchhiatna a thlen ta a ni. Kan Pa, kan Pathian hlata awm kan duhna hian kan tan, kan ringtu nun atan chhiatna a thlen thei a ni tih i hre thar leh ang u.
Pathian hnaiha kan awmna min dal thin tu chu sual hi a ni tih kan hriatreng a ngai a ni. Engatinge kan rawngbawlpuite, kan thiante kan hmuh tlin theih thin loh, keimahniah chapona sual hi a lo awm hma khawp mai, dik leh tha, fel niin kan inhre thin a, chuta tang chuan midang kan han teh a, Pathian tehna atang ni lovin, keimahni mit atangin an awmdan leh an thil tih te kan han ngaihtuah a, kan hmutling thei thin lo a ni. Pathian tehna atanga kan teha kan thlir chuan chung kan hmuhtlin loh a te bawk kha an tling leh thin a ni. Pathian khawngaihna avanga a rawngbawl hna thawk ve mai thin hian midang te awmdan tur leh thawh ve dan tur relsaktu emaw lo intih mai te pawh hi a awl fo thin a ni. Pathian mit atanga midangte kan thlir thin loh chuan tumah kan hmutling thei ngai lovang. Midangte tlinna hmu thei tur chuan Pathian hnaiha kan awm reng a ngai a ni.
Pathian hnaiha awm thin te nun tlem a zawng lo chhui leh lawk ila, Pathian hnaih a awm thin han tih hian Pathian nena nun inzawm nei te, Pathian nena lengdun thin te, Pathian tih tlattu te nun hi a va mawi thin em. Josepha chuan Pathian a tih a, a thiltih reng reng hi Pathian hmaa ti a ni tih a in hrechiang hle a ni. Potiphara nupuiin mutpuia a sawm khan ‘Engtinnge he sual lian tak hi tiin Pathian chungah thil ka tihsual theih ang’ (Genesis 39:9) a ti anih kha. Chutichuan mualpho tak anga langin chu hmun chu tlanchhuahsan mahse Amah tihtute chu Pathian hian englai mahin a kal bosan ngai lo a ni. A hunchhung rei deuh mahse dinhmun tha zawk leh sang zawkah a dah thin a ni tih Josepha nun atang hian a lang chiang hle a ni. Pathian hnaiha awm thinte nunah hian zir tur tam tak a awm thin a ni. Josepha rilru ang pu mi ringtu hi Zoram hian a mamawh em em a ni. Kan Zoram hi han thlir ila, hlemhletna a tam zia kan hmu, ringtu inti vek si, kan nundan leh kan chetzia a Pathian hmel hmuh tur awm si lo, heng avang hian kan ramah sualna a pung nasa em em a ni. Ruihhlo hrang hrangin min run mek anih hi. Engtinnge keini ringtu te hian heng te hi kan hmachhawn tak ang le. Kan thil tih reng reng hi Pathian hmaa ti kan ni tih kan inhriat loh chuan kawng dik kan zawh thei ngai dawn lo a ni. Kohhranah kan theih ang tawkin rawng kan bawl kan ti a, kan inchhungkhur buai kalsanin kan thawk thin, kan nitin eizawnna leh kan hnathawhnaah kan nunah ringtu nun hmuh tur a awm si loh chuan kan in enchian a ngai hle a ni. Heng kan thil tih hrang hrang te hi keimahni nuam tih zawng leh kan chak zawng anih vang mai mai te hian kan lo ti palh ang tih a hlauhawm hle a ni. Kan nitin nun, kan hun hman leh kan thiltih zawng zawng hi Pathian mithmuh a ti kan ni tih kan inhriat reng a ngai a ni. Pathian nena leng dun thin, Pathian hnaiha awm te nunah chuan zirtur leh nun hmuhnawm tak kan hmu thin a ni.
Chhandamna min petu Pathian hi kan hnaih reng tur a ni. Chatuan nunna nei tawh lo ten kan neih leh theihna tur a tana a fapa mal neih chhun min petu anih avangin Pathian hi kan hnaih tur a ni. Chatuan boralna a kal tur Pathianin a khawngaihna avangin min chhandama hei ringawt pawh hi amah kan hnaih chhan a tan chuan a tawk viau a ni, he leia malsawmna kawng hrang hrang min vur thin ngaihtuah miah lo pawh hian kan thih hnua kan kalna tur nuam tak min buatsaih sak avang hian, chu hmun nuam tak a kan kal ve ngei theihna turin Pathian hi kan hnaih a ngai a ni.
Kan Bible chang tarlan Sam 73:28 ah khan ‘Kei atan erawh zawng Pathian hnaih hi a tha a ni’ tih kan hmu a, keini ringtute tan hian Pathian hnaih hi a tha ber a ni. Pathian hnaiha awm te chu an nunah hmuh tur leh ei tur a awm thin a ni. Pathian hnaih lotute chu an boral dawn a ni tih kan hmu. Chuvangin chatuan nunnaa kan luh theihna turin Pathian hi i hnaih ang u.
