SERKAWN TUALCHHUNG KOHHRAN

PROGRAMME

PATHIANNI ZING INKHAWM PROGRAMME:

10:00 AM, 27th JUNE 2021

PROGRAMME:

KOHHRAN MEMBERTE HNENA HRIATTIRNA : 27th JUNE 2021

Inkhawm Hruaitu: Tawngtaina

Pathian fakna hla:- KHB 254 :“MIN HRUAINAAH CHUAN KA KAL ANG ”

1. Min hruainaah chuan ka kal ang,
Amah chu ka rin avangin;
Kalva ri-ah chuan a thi a,
Ka tan a thi tih ka hria a.

Chhun zanin Isuan min hruai ang.
Kawng tluanin aman min hruai ang;
Ka tan thian rinawm ber a ni.
Kalvari ka hriat reng vangin.

2. Aw, a thupekah ka lawm a,
A kut chaka min kaih ka chak;
Min duhsakna ka tan a thlum,
Kalvari thisena bual chu.

3. Ringhlel leh hlau lovin ka kal,
Hlim takin Chhandamtu kiangah;
Kalvari-a ka thian Isua,
Engtik emaw ka la hmu ang.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi ila, midangte tana malsawmna kan nih ve ngei theih nan Pathian hnenah i inhlan ang u.
2. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
3. Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
4. Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
5. Kan veng VLTF te tan, Pathian venhimna leh awmpuina an chan theih nan.
6. Covid 19 avanga thi chhungte tan te, a bik takin kan kohhran rawngbawltu pawimawh tak tak kalsan tak chhungte tan.
7. Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
8. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : BETHEL (PATHIAN IN)

Audio

GREETINGS : Kohhranhote kan Lalpa Isua Krista hmingin chibai ka buk che u a, tukin zingah hian Pathian thuchah sawina hun tha tak mai ka hmang thei tur hi ka lawm hle a, hripui leng avangin Biak In te khar nimahsela, media kaltlanga Pathian thu a kan inpawlho thei tur hi a lawmawm ka ti takzet a ni. A hmasa in Naupang Pual thawnthu kan sawi dawn a ni.

NAUPANG PUAL : Nikhat chu naupang pahnih hi rangkachak khur neitu hnenah an kal a. Chu pa hausa tak rangkachak tam tak neitu hnenah chuan, “Ka pu, i rangkachak laih chhuahna khurah hian inhlawhna min siamsak ve rawh” tiin an ngen a ni.
Chu pa chuan naktukah lokal leh phawt rawh u tiin a haw tir leh ta a. A tuka an va kal leh chuan Rangkachak laih chhuahna neitu chuan sava pahnih hi a lo keng va mai a, sava pakhat ve ve pek pah chuan “ hna ka pek hma che uin, heng sava te hi tuma hmuh lohna hmun ni a in hriatah va tihlum rawh u” a ti a.Mak an ti hle mai a, tichuan, an kal chhuak ta a. Pakhat chuan ngaw dur chhahpui mai, thim mup mai hi ava thleng a, a mit a lenkual vel a, tuma thawm leh hmel hmuh tur a awm loh avangin sava chu a tihlum ta a. Hlawhtling inti takin a kir leh thuai a, report a va pe a.
Pakhat ve thung kha chu a kal kual a kal kual a, hmun biru deuh lai ni a a hriatah chuan sava chu tihhlum tumin an han inbuatsaih a. A rilru ah, “Ekhai, Pathianin min hmu reng tak a lawm mawle” tiin a thiltih tum chu thulhin, hlawhchham inti takin a kir ve leh ta a. Rangkachak khur neitu hnenah chuan, “Ka pu, khawilai hmun mah hi Pathian awmlohna hmun a awm si lova, chuvang chuan min hmutu Pathian a awm avangin sava chu ka tihlum ta lo a ni” a ti a. Tichuan chu rangkachak khur neitupa chuan, “chu chu alawm ka hriat duh a, kha thil kha ka tih tir che u ni. He hmuna inhlawhfa tur hian mi rinawm, Pathian tih mi leh a neituten kan vil hman loh pawha rinawm taka hnathawk thei tur kan duh a ni. He hmuna thawk tura kan duh zawng tak i ni. I thianpa erawh hi chu he hmuna thawk tur chuan a tling zo tlat dawn lo a ni.” a ti a. Tichuan khawi hmunah pawh Pathian a awm a ni tih hretu chuan hna \ha tak a thawk thei ta a ni.

Awle vawiinah hian, he naupang pual thawnthu atang hian Naupang te leh puitling te pawhin Pathian chu khawi hmunah pawh a awm a, thil tha lo kan tih lai te pawh hian min hmu vek a, thil tha kan tih lai te pawh hi a lo hmu vek a, a lo chhinchhiah zel a ni tih kan hriat a pawimawh hle mai. Pathian chu khawi hmunah pawh a awm avangin khawi hmun atang pawhin kan be pawp thei a, kan mutna ah te, kan infiam lai te, lehkha kan zirlai te pawhin kan biak phakah a awm reng a ni tih i hre thar leh ang u. Biak In ah kawrmawi te hain inkhawm theih rih loh mah ila, keimahni in atang theuh pawh hian Pathian chu kan be thei a ni.

BIBLE CHHIAR : Genesis 28: 16-17 Tin, Jakoba chu a muhil a han harh a, “He hmunah hian LALPA chu a awm ngei mai, ka lo hre si lova,’ a ti a. Tichuan, a hlau va, “He hmun hi a va hlauhawm em! Hei hi hmun dang anih loh hi, Pathian in a lo nih hi le, hei hi van kawngka a lo nih hi!” a ti a.

THUHMAHRUAI : Vawiina Pathian thu kan zirho atana ka han chhawpchhuah duh thupui chu “Bethel” tih a ni dawn a. Jakoba nuna Bethel a pawimawhna kan zir ang a, Pathian In, Pathian biakna hmun hi enge a nih chiah a, kan khawvel hun tawn mekah hian khawi hmunah nge Kohhranhote hian Pathian chibai kan buk ang tih te zirho kan tum dawn a ni.

1. BETHEL: Bethel tih hi Bible-a kan hmuh angin hmun hming a ni a, hebrai \awnga Beth El a\anga lak niin house of God, Pathian In tihna a ni a.

Vawiina kan Pathian thu innghahna Genesis 28-ah hian Bethel chungchang kan hmu a, Jakoba a u Esauva hlauvin a tlanchhia a, chu a tlan chhiatna kawngah chuan he Bethel hi kan hmu a ni. Beer-seba atangin a chhuak a, Haran khaw lam a pan a. Tichuan, khawilai hmun emaw a han thleng hlauh va, ni a tlak tawh avangin chutah chuan a riak ta a. Chutah chuan mumang a nei ta a… a mumangah chuan Pathianin a bia a, “Kei hi LALPA, i pu Abrahama leh Isaaka Pathian chu ka ni; i mutna lei kha nang leh i thlahte ka la pe ang che u…, I hnenah ka awm a, i kalna apiangah ka veng zel ang chia, he ramah hian hruai kir leh ang che…,” a ti a. Tichuan Jakoba chu a muhil a han harh a, a lung lukham chu lungphum atana phun a, a chhipah chuan sahriak a leih a. Tichuan chu hmun hmingah chuan Bethel a vuah ta a ni.

A pu Labana hnena a tlanchhiatna hmun ah leh a pianna ram a thlen leh thlengin he Bethel Pathian nen hian an inbe chhunzawm ta zel a ni.
2. JAKOBA NUNA BETHEL PAWIMAWHNA:

Jakoba nunah hian Bethel hian pawimawhna tam tak a nei a, a pawimawh zual han tarlang ila:

i. Pathian a hmuhna hmun a ni: Jakoba kha a dinhmun a chhe ve hle mai a, a u chan ai chan khalh a, thilsual lian tak a ti a ni tih inhre chunga, a u Esauva hlauva tlanchhe ve mai kha a ni a. A sa himna tur zawngin a tlanchhia a ni, nimahsela chu hmunah ngei chuan Pathian a lo hmu ta hlauh a ni.

ii. Malsawmna a dawnna a ni: He Bethel hmunah hian Pathianin Jakoba a bia a, Abrahama hnena Pathianin a lo tiam tawh chu Jakoba hnenah hian chu malsawmna chu a dawngtu leh a rochuntu tur a ni tih a hriatna hmun a ni. He Bethel hmunah hian Pathian malsawmna a dawng a ni.

iii. Pathian hnena thilpek pek duhna thinlung a put tanna a ni: Jakoba kha Pathianin malsawmna tam tak pek a tiam a, Pathian hnen atanga malsawmna a dawn atang chuan sawma pakhat pe turin a intiam a ni.

iv. Amah bakah a chhungte zawng zawngin Pathian hnen a hruai thlenna hmanrua a ni: Jakoba hian amah bakah a chhungte, a hnena awm zawng zawng te nen chuan Bethelah Pathian hmaah an kun a, Lalpa tan maicham an siam a ni.

v. A nih tur bak a thlen theih phahna a ni: Jakoba kha mihring naran ve mai, a hming awmzia pawh “bumtu-a” ni ve mai kha, Bethel-a Pathian nen an inbiak tak fo hnuah chuan Pathianin mal a sawm a, a hming pawh Israela tiin a thlak sak a, chi ropui tak thlahtu ah a siam ta a ni. Kha Bethel Pathian khan a chungah thil ropui tak a tih sak a, a nihna thin ai sang daihah a chuantir ta a ni.

Jakoba bakah a thlah kal zel ten Pathian biakna hmun atan an hmang chhunzawm zel a. Hmanlai Israel fate nunah khan awmze thuk tak a nei a, Pathian an biakna hmun leh thuthlung bawm an dahna hmun a ni thin.

3. PATHIAN BIAKNA HMUN :

Pathian hian amah chibai bukna tur hmun bik hi amite tan a lo buatsaih sak tawh thin a. A hun thlen dan mil zelin Pathian kan biakna hmun pawh a danglam chho ve zel a - Bethel hmun chu hun engemaw chen Israel fate tan Pathian biak na hmun atana hman a nih hnuah a lo tawp ta a. Lal Solomona hunlai khan Jerusalem ah Temple Pathian biakna hmun tundin a lo ni leh a, chu Temple chuan Israel mipuite nunah awmze thuk tak a nei a, sakhaw hmun a nih piah lamah a hnam ang zawnga hmun pawimawh a tling a ni. Pathian thu an hriatna hmun leh sual thupha chawia an inthawina hmun a ni. Vawiin ni ah chuan Pathian chibai kan bukna hmun leh Pathian thu-a kan in awm tleina hmun chu Biak In a lo ni ta a.

4. BIAK IN PAWIMAWHNA:

Zoram Kristiante tan phei hi chuan Pathian Biak In hian kan nunah awmze thuk tak a chang a. Jakoba nuna Bethel a pawimawh ang chiah khan sual lak ata kan himna, Pathian chhandamna leh a malsawmna kan channa hmun a ni. Pathian Kohhranhote zinga kan telve avang hian kan nih tur ai sang daihah kan awm a. Pathianin a mite laka a phut Pathian ram thilpek te, mission rawngbawl hna te a Kohhran kaltlangin kan hlenchhuak thin a , a ropui takzet a ni. Pathian Biak In hi Pathian nena kan inkar chinfel nan leh Pathian laka kan duty hlenchhuahna hmun pawimawh tak atan kan hmang a ni.

5. BIAK IN KHAR NI MAHSE, KHAWI HMUNAH PAWH PATHIAN KAN BE THEI:
Chu Pathian kan biakna hmun pawimawh tak chu tun dinhmunah chuan hripui leng avangin khar a tul a, kan rawngbawl dan thin tam tak a nghawng a, tih theihloh kan ngah em em a ni. Hetih lai tak hun hi chawlh hahdam hun emaw kan ti ang tih a hlauhawm hle mai. Biak In khar a nih atanga Pathian be theilo zawm ve ta mai ringtu kan ni em?

Biak In khar anih avanga Pathian be theilo ni dawn ta i la, Pathian hian amah chibai kan bukna kawng ti ping tur hian eng thil mah a thlen tir a rinawm loh a ni. Chuvang chuan kan Biak In te khar ni rih mah se, keimahni thinlung hi Pathian lama kan hawn phawt chuan Pathian chibai kan buk thei a ni.

Pathian biakna hmun atan Jakoba chuan a lung lukham a la a, lungphun atan a phun a, a chhipah chuan sahriak a leih a. Chu Bethel chu a thlahte thlengin Pathian chibai bukna hmun a ni a. Tin, Lalpa hriakthik Solomona khan Pathian biak nan Temple a sa a ni tih kan hre bawk a ni. Keini ve thung chu, Hriakthik Lal Isua, Messia, Chatuan Lungpui chu keimahni ah phuna awmin kan Lu nghah chhan chu amah chu a ni a, a thihna leh thawhlehna zarah chuan Pathian In / Pathian chenna (Bethel – house of God) chu keimahni hi kan lo ni ta a ni. Lal Isuan tlanna hna a thawh hma chuan Pathian be turin puithiamte kaltlanga chet a ngai thin, nimahsela vawiin ni ah hian keini ringtute hi kan vannei hle a, keimahni theuh hi Pathian biakna hmun, Pathian in kan lo ni ta, ava ropui em!

I Korinth 3 : 16-ah chuan Pathian in in nih leh Pathian Thlarau nangmahniah a awm reng tih in hre lovem ni? tiin min hrilh a. Ringtute kan intihchak tawnna hmun leh Pathian rawng kan bawlna hmun Pathian Biak In khar ni rih mah se, Pathian chenna hmun leh Pathian kan biakna hmun dik tak chu keimahni thinlung ah zawk hian a nih avangin vawiini ah hian Kohhranhote hian thinlung leh tihtakzeta Pathian chibai kan buk ava tul em!

Hripuiin kan Biak In te min kharsak rih mahse, tuma khar sak theih loh, tuma dan chah theih loh kan thinlung hi Pathian tan i hawng tlat ang u. Vawiin ni ah hian Pathian Kohhrante hi Lock down avang te, Biak In khar avangte hian kan ringtu nun hi chawlh tir mai lo ila, Pathian tan inserh hranna hun atan te, Thlarau lam chaw eina hun atan te, Thinlung leh tihtakzeta Lalpa pawl nan kan hman a pawimawh hle mai.

Hun zalen kan neih lai chuan tih tur in min hmuak a, kan buai em em thin a. Lalpa pawlna hun pawh nei tha thei mang lovin rawngbawlna ah kan in hmangral thin. Kan tisa hna ah nileng buaina tur kan nei thin. Vawiin ni ah erawh chuan Lalpan hun tha min pe ah ngai ila, kan mimal nun Pathian nena inlaichinna tha siam nan kan hman a pawimawh a ni.

Kan ramah hian a huhova Lalpa biak hi nuam kan tih zawng tak a ni a, kan kalphung a nihna chen pawh a awm a, a nuam em em a ni. Lalpa faka zai a, lam ho dup dup te kha ava thlakhlelhawm tak em! Chutih mek lai chuan Pathian nena inneih tawnna tak tak thleng tur chuan midang te awm loh lai pawhin nungin kan inbiak a pawimawh a, kan mimal nun hian Lalpa hi a tawnhriat a ngai a ni. A huhova nuam ti em em, maltlat nun hmang thiam lo hi kan tam em em a ni. Nupa inhmangaih tak tak te pawh hi, thiante kaltlangin inngaihzawnna bul an tan a, chhungkua inberawnin, mi tam tak pungkawm te hriatpuiin inneihna buatsaih a ni thin. Amaherawhchu nupa nunah hian mi zawng zawng hraitpui lova hlenchhuah ngai ava han tam em!! Nupa kara inhmangaihna leh inlaichinna tha tak nei tur chuan midang tel ve a rem lohna chin a tam em em a, nupain a nuam ah pawh a hrehawm ah pawh ti a induh taka lendunna atangin inlaichinna tha a lo chhuak thin a ni. Pathian nena kan mimal nun inkar pawh hi a huho piah lamah fianriala kan lendun thinna atangin inlaichinna thuk zawk a lo piang chhuak thin.

Inkhawma Biak In kawng kan zawh theih loh lai tak hian Pathian chibai buk dan dik tak chu kan char chhuak thei a. Pathian ram zauna leh Kohhran thanlen na tur thuruk hi he kan inkharkhip lai tak hian pindan chhungrila Lalpa kan pawlna atangin kan zirchhuak thei tlat a ni. Chuvangin he kan hun tawn mek hi Pathianin hun tha min pekah ngai ila, kan mimal nun leh chhungkua a Lalpa auh ei nan/ Lalpa chettir nan i hmang ang u. Hun tha te pawh a rawn herchhuah leh ngei anga a, chu hunah chuan Pathian Kohhrante hian a hma ai pawha hma kan sawn phah zawt theihna tur hian tun hunah hian tan kan lak a pawimawh takzet a ni.

Isuan Samari hmeichhia hnenah, “Hmeichhia ka thu awih rawh, he tlangah kher lo pawh, Jerusalem khuaah kherlo pawh Pathian chibai in buk hun a thleng dawn ta…, Pathian chibai buktu tak takten thlarau leh tihtak zetin Pa chibai an buk ang, Pain chutiang mi chu a chibai buktu turin a zawng a ni” a tih ang khan vawiin ni ah hian kan Pathian hian tih tak zeta amah chibai buk tu atan min sawm a, Biak In khar a ni emaw an lo hawng leh a nih pawhin kan thinlung tak taka Pathian chibai kan buk hi Pathianin a duh a ni.

Eng ang dinhmunah pawh ding mah ila, Pathian chuan keimahni ah chen a duh a. Kan thinlung hi a in atan hman a duh a, vawiin ni ah hian harsatna namen lovin a nuai mek pawh kan ni thei a, Sual vanga hliam tuarin kan rum mek pawh a ni thei a, natna khirh tak in a tlak buak leh beidawng taka hun hmang mek pawh kan ni maithei. Hrileng avang hian kan hma hun pawh sawi lawk hleithei lovin kan awm mek a ni ti rawh u…?

Eng ang mi pawh ni ila, khawi hmunah pawh awm ila – harsatna ruama kan awm mek lai pawhin Pathian chu kan hnenah a awm a. Keimahni ah hian chen a duh a, kan thinlungah hmun chan a duh a ni. Jakoba chuan, “He hmunah hian LALPA chu a awm ngei mai, Hei hi hmun dang anih loh hi, Pathian in a lo nih hi le” ti a a lo sawi ang khan kan awmna hmun apiangah Lalpa tan maicham kan buatsaih a, amah pawlna nung nei a, keimahni ah Bethel dina a awm theih nan kan thinglung te Lalpa chenna atan I buatsaih thar theuh ang u.

Lalpan kan za atan mal min sawm sak theuh rawh se.

Pathian fakna hla:- KHB 368 :“Ka awm angin la lo kal ang ”