SERKAWN TUALCHHUNG KOHHRAN

CHANCHIN THA MI TIN TAN

PATHIANNI ZING PROGRAMME

10:00 AM, 25th October, 2020

PROGRAMME:




Hla sak hona:KHB No 344. “Thinlung ngui fuih tur an awm a”.(Thilpek lakkhawmna)

Thinlung ngui fuih tur an awm a,

Thinlung ngui fuih tur an awm a,
Ni a lo kiam sawt em e;
Thlarau boral mek an awm a,
Ni a lo kiam sawt em e.
Kan tum ber kan pan laiin,
Lo hlim nawn fo ilangin;
Kan theihtawp i chhuah mawlh
Ni a lo kiam sawt em e.

A lo kiam, a lo kiam,
Khawvel ni a lo kiam;
Aw, thil tha kan tih theih chu,
Ni a kiam, i thawk ang u.

Mi dem hman a ni ta lo ve,
Ni a lo kiam sawt em e;
I hmel ni angin lo eng se,
Ni a lo kiam sawt em e.
Khawvel hi rumin a khat,
Lungngaih leh tah a innghat;
I unau tlu kai tho la,
Ni a lo kiam sawt em e.

TAWNGTAI RUALNA

    Tawngtaina a Hriat Turte
  1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
  2. Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. A huhova Pathian Biakna hun kan neih leh thuai theih nan Pathian hnenah i dil ang u.
  3. Kan ramri buai chungchang Pathian hnenah thlen ila, Pathian duhdana kan hruaituten fing leh thiam taka ramri chungchanga hma an lak theih nan Pathian hnenah i dil ang u. Kan ram chin dik tak hi kan neih ngei theih nan Pathian i dil ang u,
  4. Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin Pathian hnenah thinlung takin lawmthu sawi ila. Hun lo kal turah nasa taka kan fimkhur a ngaih dawn avangin Pathian venhimna dil chhunzawm zel ang u.
  5. Covid19 veitu zawng zawngte, taksa, rilru leh thlarau damna dil sak ila. Anmahni enkawl tute tawngtai sak ila. Covid19 kaihhnawih harsatna tuartu zawng zawngte tawngtai sak ila.
  6. Sawrkar, Kohhran leh tlawmngai pawl te tan tawngtai zel ila. Covid19 dona kawnga fing leh tha taka hma an lak thiam theihna turin i dil sak ang u.
  7. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
  8. Kan member damlo te Hospital leh mahni in lama in enkawl te tan tawngtai sak ila.
  9. Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.


II Lalte 6: 8-12 8-Suria lal chuan Israel lal a rûn dâwn a, khawi khawia chân rûk nge ṭha ang tih a hote nên an sawi tlâng a. 9-Pathian mi Elisa chuan Israel lal hnênah, “Hêngah te hian kal suh, Suria lal hovin an châng ru dâwn che a ni,” tiin a hrilh zêl a. 10-Israel lal chuan Pathian miin a sawi hmuna awmte chu a hrilh a, an inrâlring hman zêl a ni; chutiang chuan vawi tam tak an ti a. 11-Suria lal chu a mangang ta a, a hote chu a ko va, “Israel lal lamṭang ru kan zîngah tu hi nge min hrilh teh u,” a ti a. 12-A hotu zînga pakhat chuan, “Kan zîngah chutiang pakhat mah kan awm lo, aw lalber, Israel zînga zâwlnei Elisan i pindan chhûngrila i thu sawi chen khân Israel lal a hrilh ṭhîn alâwm,” a ti a.

Sam 106:23 A mi thlan Mosia chuan,
A thinur tireh tûrin
An kâra bân pharin ngensak lo se chu
Tihboral vek a tum tâk kha.


THUCHAH

THUPUI: “HMELMA TANA HNAWKSAK”

- Rev Lalremsiama Ralte

Audio

Vawiin hi Covid 19 hripui vanga Pathianni zing inkhawm theih loh vawi 32 na a ni ta a. Vawiina Pathian thuchah kan ngaihthlak tur chu, ‘Hmelma tana hnawksak’ tih a ni dawn a. Thenawm khawveng leh khawtlang tana mi hnawksak an awm a; ram leh hnam, khawtlang tana mi hnawksak , chhiatna leh mualphona thlentu an awm bawk a. Pawl leh Sorkar tana mi hnawksak riau an awm bawk thin. Vawiinah hian nang leh kei hi tu tana hnawksak nge kan nih ve tih mahni theuh indap chhuah kan tum dawn a ni.

Kohhran Upa pakhat chuan, ‘Kei ka awm chhung chuan kan Kohhranah buai a chhuak ngai lovang,’ a ti a. Pathian vanga Kohhran, ka ta, titlattu, Thlarau lam Pa ang hiala mite rin leh zah kai, boruak hrisello awm ni a a hriat chuan ban phar tura huaisen leh taima taka che chhuak nghal zel mai thin mi a nih avangin, he Upa hi Kohhrana buai chawh chhuah tuma beitu tan chuan mi hnawksak ber a tling a ni.

Suria lalin Israel hote beih a tum thin a. Vawi engemawzat hlawhchhama a mangan hnuah, a mite zingah rinawm lo, a ruka hmelma lama tang an awm ni hialah a ngai tawh a. Amaherawhchu, Israel ramah Pathian mi, zawlnei Elisa a awm a; ani chuan a thuruk zawng zawng chu a awmhmun atanga lo hria-in Israel lal hnenah a hrilh chhawng zel thin tih a hre chhuak ta a ni. Israelte hmelma Suria lal tan Elisa chu mi hnawksak tak a ni.

A tir atanga sual bul tantu kan hmelma Setana hi Pathian chhungkua tihchhiat vek tuma englai pawha hmanhlel a ni a. Mihring leh mihring, ram leh ram kara indo leh buai chawh chhuah chu a tum ber a ni. Ringtu ten kan hril thin hi remna chanchin tha a ni a. Chu chanchin tha putu Kohhran hote chu a hmelma lian berte kan ni. Chuvangin leia Kohhran hote tih tur leh hnapui ber chu tihthuanawp tuma remchang dapin min vel reng a. Kristian ram kan nih angin kan rama Isua Krista rorelna lalthutthleng pawh luahlan tumin kil tin atangin min bei reng a ni. Amaherawhchu Zoram hian a hmelma Setana nen an inkara ding tlat Kohhran mi thahnemngai tam tak a neih avangin, a duh angin a che thei lova, chung lam venhimna leh malsawmna chu vawiin thlengin a la vawng reng zawk a ni.

Covid 19 hripui vanga mi nuai tam tak an thih tawh laia thihpui la awm velo India rama state awmchhun kan la ni tlatte, mithiamte chhut dana lirnghing na tak (Mega quake) 7.2-9.0 Richter Scale a na in englai pawha a sawi thut theih reng subduction zone chunga awm, Nepal Assam, Bangladesh,etc ten an tuar vek tawh laia, Mizoram chiah a la him tlat rihte hi, an karah Pathian mite an la inzeh tlat vang a nih loh chuan chhan dang chhui chhuah tur a awm lo. Lirnghing (Minor quake) 5.4 Richter scale leh a hnuai lamin tun hnaia min han sawi zauh zauh pawha kan phili nasat zia kan hria a. Kum 2015 a Nepal ram lirnghing kha Magnitude 7.8 a na a ni a. Kan ram leilung derthawn dan leh ngheh lohzia enin magnitude 6.0 leh a aia na hlek pawhin min han sawi ve ta se, keini chuan kan chhiatpui nasa hle ang.


Vawiina kan ram issue lian tak ni mek, ramri fello leh buai hian eng angin nge min la nghawng zel dawn sawi theih a ni lova. Tin World Bank chuan Covid 19 hripui nghawng vanga 2021 ah khawvela mirethei Maktaduai 150 laia a pun hluai tur thu a puang a. Eng kawng maha intodelhna neilo, ni hnih khat lek Silchar kawngpui a pin pawha nghei leh tlachham nghal mai thin kan ram dinhmun tur pawh hi ngaihtuahawm tak a ni.

Amaherawhchu heng hi inrumthaihna lam hawia sawi ka ni lova. Hengte leh kan sawi sen loh thil thalo tinreng te hmanga tihchhiat tuma min beitu hmaa ding tlat tur leh, huaisen taka lo hmachhawn tur mi kan ram hian a la mamawh zel dawn a ni. Chutiang mite chu tute nge kan tih chuan, ‘chakna leh thiltihtheihna ni lovin, ka Thlarau zawkin le’ titu Pathian rinchhana mahni chauh pawha tang ngam, Jakoba anga Pathian buan thin leh, a mite humhim tura anmahni leh Pathian inkara tlazep tlat ngam Mosia ang mihring te kha an ni. Chutiang mite ngei chu an ni, hun thim leh harsa lai ber pawha hmelma Setana tana mi hnawksakte chu. Israel mipuite, an Pathian (Jehova) ring zo lovin a lakah an hel a. Pathian thinurna alhchhuakin vawilehkhata tihhlum vek mai a tum lai khan, mipuite leh Pathian inkarah Mosia a din tlat avangin an chunga thil thalo tih a tum chu a thulh ta a. Kan ramin sual vanga ser leh hliam nasa tak a chauhpui mek lai hian tiboraltu tana mi hnawksak ni tur leh, a tum thulh tir tura Thlarauva bei let ve turin kei leh nang hi an karah kan ding ngam ve angem le. Pathian ram tana thahnemngai leh hratkhawkheng ten ram chhung leh pawnah Setana kulhpui su thiata ram an zauh zel lai hian, kan ram tluchhe mek leh boral tur tungdinga chhan tur leh tichhetu hmaa lo tang ngam tur mi Lalpan tunah hian a zawng mek a ni. Tichuan kan khawtlang leh Kristian chhungkaw lungphum sawichim tuma beitu thahrui chhata, a hna tithuanawp turin, te ber atanga lian ber thlenga kan lek chhuah tur, hmelmapa suttlang zawh loh ralthuam thaber Tawngtaina hmang hian a tana mi hnawksak nih ve i tum theuh ang u.



Hla sak hona:Khb No 349: “Thian tha Isua rawngbawl turin”

Thian tha Isua rawngbawl turin,
Tu nge awm?(2)
Krista thawh leh thu hril turin,
Tu nge awm?(2)
A khawngaihna puang darh turin _
Chawlhna hmun nuam Isua a ni _
Mi lian, mi te, hnam tin zingah,
Tu nge awm?(2)

A ngaihdamna thu hril turin,
Tu nge awm?(2)
Mi sual ngaihdam thu hril turin,
Tu nge awm?(2)
A zahngaihna tuifinriat ang,
Mi ngo, mi hang, mi tin hnenah,
Chhak kil, thlang kila hril turin,
Tu nge awm?(2)

Pasaltha, Isua tan turin,
Tu nge awm?(2)
A râl do ang dopui turin,
Tu nge awm?(2)
Pathian duhzawng a nih phawt chuan,
Ram thim, ram ro, thlalerah pawh,
A hming ropui puang darh turin,
Kei ka awm (2)



Lalpa Tawngtaina