-







Kamkeuna:

Kohhran chhung tinte Krismas chibai ka bûk a che u. Chhungkua damtlang taka Krismas in hman ka beisei a, Kum thar lo inher chhuak mai tur nen hlim taka hmang turin duhsakna ka hlân a che u. Kan Kohhran hruaituten Krismas zan sermon hun min han pe hi ka lawm hle a, insit tak chunga ka han inbuatsaih vena hi Lalpan kan thinlungah mal min sawm mawlh teh se tiin ka tawngtai ve ngawt mai a ni. Covid 19 hripui lêngin kan khawsak leh nunphung, Kohhran Pathian biakna leh practice thlengin min sawi danglam mah se, kan LALPA THU erawh a danglam ve chuang lo ve.

Tukin sermon –ah khan Lal Isua lo pian thu ngaihnawm takin kan ngaithla a, a lawmawm ka ti hle mai. Pathian hian a hmangaih hringfate sual bawiha tâng min tlanchhuak tura a Fapa mal neihchhun min pêkna dan leh kalkawng hi a thuiin a bumboh ve hle mai a. Mahse heng zawng zawngte hian Pathian Thu hlutna a tidanglam chuang lo va, Min tlan tura kan tana Nausen Lal Isua lo piang hlutzia tizualtu an lo ni zawk si. Zaninah hian nang leh kei min tlan tura nausen Lal Krista lo piang danglam bikna i’n lo ngaihtuah ho teh ang.

1. Zawlneite hrilhlâwk ang ngeiin a lo piang: Lal Isua hi a lo pian hma kum 700 hma lamah khan zawlnei Isaia chuan a lo hmu lawk daih tawh a, “...Chuvangin Lalpa ngei chuan chhinchhiahna a pe ang che u; ngai teh u, nula thianghlim pakhat a rai ang a, Fapa a hring ang a, a hmingah Immanuela a sa ang” (Is 7:14). “Kan tan naupang a lo piang a, fapa pekin kan awm ta a; rorelna chu a kokiah a chuang ang a: a hmingah chuan Maka, Remruattua, Pathian chaka, Chatuan Pa, Remna Lal an ti dawn si a,” (Is. 9:6) tiin a lo sawi tawh a. Mika, Zawlnei te zinga mi pawhin, “Nimahsela nang Bethlehem Ephratha, Juda rama sâng tam tak zinga telah tê hlê mah la, nangma lak atang hian Israelho roreltu tur chu ka tan a lo chhuak ang a; a lo chhuahna chu hmasâng ata chatuan atangin a ni ang” (Mika 5:2) a lo ti bawk a. A hnu Kum 100 daihah khan Zawlnei Jeremia chuan, “Ngai teh u, Davida tan zâr fel ka chhuahsak hun tur chu a lo thleng dawn, tih hi Lalpa thu chhuak a ni; ani chu lalah a thu ang a, fing takin a ti ang a, ram pumah dikna leh felna a hlen ang. A hun chhungin Juda chu chhandam a ni ang a, Israel chu him takin a awm ang. Tin, hei hi a hming an la vuah tur chu a ni, ‘Lalpa chu kan felna a ni’ tih hi” (Jer. 23:5-6; 33:14- 16) tiin an lo puang lâwk daih tawh bawk a, zawlneiten an lo hrilhlawk ang ngei hian a lo piang ta a ni.

2. Vantirhkohte leh Vana mipui ten an rawn thlah: Lal Krista lo piang ta chu Beram vengtute hnenah Vantirhkohten Lalpa ropuina nen lo kalin an rawn puang a, “Hlau suh ulang, ngai rawh u, mi tin ta tur Chanchin tha lawmawm em em ka rawn thlen che u a ni. Vawinah hian in tan Davida khuaah Chhandamtu a piang ta, Lal Krista chu...” tiin a chhinchhiahna nen lam a hrilh thlap a ni. (Lk. 2:10-11). Chu chang la ni lovin, thawklehkhatah vantirhkoh hnenah chuan vana miho mipui an lo awm ta chiam a, Pathian an fak a. “Chungnung berah Pathian ropui takin awm rawh se, Lei chunga a lawm em em mihringte hnenah rem thu lêng rawh se.” (Lk.2:13-14) tiin an rawn thlah hial a ni. A va ropui em!... Khawvela mihring piang hetiang reng hi an la awm ngai lo a ni.

3. Hmun tlâwm ber a rawn thlang: Bible zir mite chhût danin Thuthlung Hluia Zawlnei Malakia hun tâwp atanga, Baptistu Johana lo lan leh hma zawng hi Silent Period (400yrs) an ti a, zawlnei leh Thupuan awm lovin khawvel chu ama kal kalin a kal mawp mawp mai a, Lal Isua rawn pian dawn hnaihah phei chuan Rom Sawrkar chak leh thil tithei tak a rawn ding chhuak ta nghe nghe a ni. Israel fate pawhin an Messiah lo kal tur chu an nghak tlawk tlawk mai a ni awm e. Israelten an Messiah beisei hun lai a, an nulate lo inbuatsaihna, ‘Ngai teh u, nula thianghlim pakhat a rai ang a, Fapa a hring ang a, a hmingah Immanuela a sa ang” (Is 7:14) zawlnei Isaia’n a lo sawi hi, anmahni chunga lo thlenga, ‘An Lal Messiah pianna tlâk ni tura inserh thianghlimna hi an nulaten an lo nunpui reng a ni’ an ti. Kan tunlai nulate hian thianghlimna kawngah entawnah nei ta sela, HIV Aids+ ah pawh hian kan zia phah viau mai thei a ni.
Lei leh van Lalber, khawvel leh a chhunga awm zawng zawng neitu, a thilsiam, lei mihringte zinga lo kal hian a pianna hmanrua rawn thlante hi an tlâwm lutuk a, beisei taka lo thlir rengtute tan pawh lo hmuh thiam hi a va harsa dawn em. Khawvel thlirna nen a danglam lua a ni. Israelte pawhin an nghah Messiah tun thlengin an hai hial zawng a nih hi. Mi fingte pawhin Lal chu lal Inah piang tura ngaihna an neih avangin, an hruaitu arsi pawh an lo en tawh lo... Vantirhkohte chuan nausen lo piang chhinchhiahna chu, “Nausen puana tuam, ran chaw pêkna thlenga mu in hmu ang” (Lk. 2:12) a ti mai chauh si... Aw, min hrilh rawh thûkna ropui,
Ranthlêng leh thing ânchhedawng leh Vana lallukhum a inzawm,
Lei Eden leh Salem thar nen. (KHB No 71)
RL Kamlala (1902-1965) khan a lo ti thlâwt rêng a.

Mihring mihrinna hianin,
A ngaihtuah chhuak zo lo va che,
Ka chhandamtu, I thurûk hi.
A thûkin a va sâng em,
Khawvel fin zawng aiin!
Pathian hmangaihna thu hi,
Van leh Khawvelan a khat e.(KHB No 36)
Tiin Pu Chawngkhupa hian a lo puang chhuak hial bawk a ni.

4. Chibai bûktu danglam bikte:He khawvela mihring piangte zingah Krista lo piang hi a danglam bikna em em chu nau piang lâwmtu leh a chibai bûktute hi an ni.

1) Berampute: Mirethei leh hna hnuaihnung ber mai thawktute, eng anga thlasik khawvawh lai pawha an Beramte veng a, riah chilhtute kiang vel thawklehkhata Lalpa ropuinain a chhun ên tâk phût mai avanga hlau leh thlabâr, manganga awm beram vengtute hnenah, Vantirhkohin “Hlau suh ulang, ngai rawh u, mi tin ta tur Chanchin Tha lawmawm em em ka rawn thlen che u a ni. Vawinah hian in tan Davida khuaah Chhandamtu a piang ta, Lal Krista chu. Tin, hei hi in tan chhinchhiahna tur a ni; nausen puana tuam, ran chaw pekna thlênga mu in hmu ang”(Lk. 2:10-12) ti a, an rawn hrilh thut ta mai kha beram vengtute khan mak an va han ti dawn em. Chu chang a la ni lo, thawklehkhatah vantirhkoh hnenah chuan vana miho mipui an lo awm ta chiam a, an la hriah ngai loh hla thar sain Pathian an fak a, “Chungnung berah Pathian ropui takin awm rawh se, Lei chunga a lawm em em mihringte hnenah rem thu leng rawh se,” (Lk.2:14) tia van mipuite zai tunlai tawng taka live-a han hmuh chu a va han ropui dawn em... Beram vengtute pawhin eng dang an ngaihtuah thei tawh lo va, Vantirhkohin a hrilh ang ngeia, nausen Lal Krista lo piang chu hmuh tumin an kal thuai thuai a, an va hmu ta ngei a, lawm em emin an hâwng leh ta a nih kha. Eng vangin nge Krista lo piang hi beram vengtute hnenah a bik taka hrilh an nih kher le? tih ngaihtuah châng hian pa pakhatin, ‘Pathian chu miretheite Pathian alawm’ a lo ti hi a sawi dikna lai hi a awm tlat a ni. A chunga kan târlan ang khian beram vengtute chu mi pangngaiin an thawh duh loh an dinhmun leh khawsak danin a zir loh avanga miten hna hnuaihnunga an ngaih thawktute an ni. An rethei a, tisa lama innghahna leh chhuan tur nei lo, hma lam êng thlir tur nei lote pawh an ni ta ve ang. Chung rethei leh riangvaite tan hmalam beiseina kâwl lo êng leh chhandamtu Lal Krista lo piang chu Pathian pawh hian hriattir thuai hi a duhte pawh a ni mahna... Keini miretheite ban phâk leh chan/pawl phaka Lalpa rawn Inphah hnuai a, kan tan a rawn inngaitlâwm hi kan va vannei tehlul em...

2) Mifingte:Judai rama Bethlehem khuaa Isua a lo pianin heng khawchhak lam mi fingte hian Arsi danglam tak mai an han hmu ta chu Lal Arsi, Lal thar piang an awm a ni tih hre thiam nghâlin chu Lal thar lo piang chu chibai buk tura lo chhuakin a arsi chu an rawn zui ta zel mai a ni. Lal Krista lo piang lawma chibai buk tur hian mirethei leh hna hnuaihnung ber thawktu beram vengtute/ berampute hriattir an nih laiin khawvela mi fingte pawh a arsi hmanga hriattir leh koh an ni hi a va ropui em. Chu mai a ni lo, Judai ram lal pawhin chibai bûk a duh ve tlat mai le...

3) Lal Heroda:Heroda hi Isua lo pian laia Judai ram lal a ni. Judate Lal thar lo pian thu hi beram vengtute khan Lal Heroda hi va hrilh ta ni sela, Heroda hian a lo bengkhawn duh kher lo mai thei a ni. Mahse, khawchhak lam ata mi fingte meuhin Lal thar lo piang lawma, chibai buk tura kawng thui tak zawha lo kal, Lal chu lal Ina piang tura ngaihna an neih avanga Jerusalema lal In rawn pan an ni tih lalin a lo hriat chuan a mangang ta hle mai. Jerusalam-a mi zawng zawng pawh a timangang a ni. “Kal ta ula, naute thu chu dilchhut takin zâwt chhuak rawh u; tin, kei pawhin amah chu chibai ka rawn bûk ve theih nan, in hmuh veleh mi rawn hrilh ang che u” (Mt. 2:8) tih thuin lal chuan mi fingte chu a thlah ta hial mai. A beisei anga nausen chanchin a hriat mai tâk loh avangin tihboral ngei na turin a ram chhûnga nau piang kum hnih chin râwt thu a pe ta hial a ni. Heroda hian a lalram sawh ngheh nan, a lalna rawn dip dâl thei âwm tûr chu atana thenfai chu a tih âwm tak a ni a, lal thar dang lo piang awm chu a tan a rem thei lo a ni. He Lal thar lo piang hi khawvela lal dang lo piangte ang lo takin a pian vel atangin hmelma leh dotu neiin tihhlum lo tum nghal mah se Zawlnei Isaia’n, “A ram a zau zêl ang a, a ramah remnain tâwpintai a nei lo ang: Davida lalthutthlengah a thu ang a, dik tak leh fel taka rorelin a rawn tinghet ang, tun atanga kumkhuain.” (Isaia 9:7) a lo tih hian a dikzia a rawn tinghet ta zêl a ni...
Kan han sawi tâk ang hian Lal Krista lo piang anga piang hi he khawvelah hian tu mah an la awm ngai lo va, mirethei leh hnuaihnung berte tana hei tluka Chanchin tha a awm lo va. A hmangaih thûkzia leh zauzia hi khawvel mi fingte chh chhût chhuah phâk rual a ni hek lo. Lei lalten do mah sela, a ram a zau zel ang a, a ramah remnain tawpintai a nei lo ang, dik tak leh fel taka rorelin a rawn tinghet ang, tun atanga kumkhuain. Lalpa ropui ber rawh se. Lalpan malsawm rawh se. Amen.

Hla sak hona: KHB: 115 “Khawvelah hian lal tam tak an lo piang ta a”

1. Khawvelah hian lal tam tak an lo piang ta a,
Mahse, Lal Krista ang hi an la piang ngai lo;
Van Lal Fa a lo piang, Lal kraun min khumtir tur,
Van mi zawng zawng pawhin min lawmpui ve rawh u.

I hlim ang, I lawm ang, van Lal Fa I fak ang,
A pianna lawmin leilung hi zaiin khat se;
Van Lal Fa a lo piang, Lal kraun min khumtir tur,
Van mi zawng zawng pawhin min lawmpui ve rawh u.

2. Van mipui chhiar sen lohten fak hla an rawn sa,
An aw mawi thangkhawk vel chu berampu’n an hria; Lal Krista pianna chu fiah takin an hrilh a,
An beram kalsanin Lal chibai an buk a.

3. Khawchhak mi fing pawh rimtui chawiin an lo kal, Thangvana arsi engin hma a hruai zel a;
A chun riang Mari chawi lai nau chu an va hmu,
An ro bawmte hawngin Lal chibai an buk a.

4. Lal Heroda’n a hriatin a manganpui a,
Mi fingte a râwn, dera chibai bûk tumin;
A pheisen râl a khâwm Judai ram vela mi,
Chibai bukna rapthlak pek tumin an chhuak ta.

5. Isu, vawiinah hian kan thinlung bawng inah,
Lo piang thar leh la, Nang kan chatuan Lal turin;
Kan kut riang hi I chun Mari kut chantir la,
Chatuanin kan lawmin kan hlim kumkhua tawh ang.

Lalpa Tawngtaina