SERKAWN TUALCHHUNG KOHHRAN

CHANCHIN THA MITIN TAN

PATHIANNI ZING PROGRAMME

10:00 AM, 24th May, 2020

PROGRAMME:


HUN KAIHRUAITU:

Special Item (Nei thei remchangte tan)

  • Bible chhiar tur:
  • THUCHAH: LALBER SIPAI
    - Rev.F.Ramdinmawia

    Kohhran hote Covid-19 avangin kan inkhawm theilo rei ta viau va, inkhawm leh theih thuai a chakawm hle mai. Lalpan hun tha min la pe leh ngei ang. Lockdown chhungin inkhawm thei lo mah ila Serkawn Tualchhung kohhranin Sunday inkhawm programme mumal tak leh sermon te chhungtin ten mahni hmun theuh a kan lo hman theih tur a buatsaih thin hi lawmawm ka ti takzet a ni. Kohhran hote in zavaiin chibai ka buk a che u.

    Vawiin a kohhran hote hnena ka thuchah sawi duh chu Lal ber Sipai tih a ni.

    Text: “Krista Isua sipai tha tak angin hreawm mi tuarpui rawh. Sipaia awm tur a thlangtu chu a tihlawm theih nan sipai tumah indo laiin tun damchhung khawsaknate hian a tihnawk ngai lo va” (2 Tim. 2: 3-4)

    Paual’an ringtu nun chu raldo tura sorkarin a lak sipai nun nen a tehkhin a. Chu sipai nun ngei chu Timothea pawhin rawng a bawlnaah nei turin a fuih a ni. Hei hi ringtu zawng zawng tan pawh a ni.

    Engvangin nge sipai nun dan chu Kristiante nun dan tur atan a thlan tlat? A chhan chu khanglai huna Rom mite leh Greek hote ngaihsan ber chu sipaite hi an ni. Phil. 1: 21-a Paul’an “Kei atan erawh zawng nun hi Krista a ni si a, thih pawh hlawkna a ni” a tih ang khan Rom ho leh Greek hote chuan ‘Kei atan zawng nun hi sipai (raldo nun) a ni’ an ti a ni (Seneca: epistles 96: 5).

    Paula hian Kristian Hruaitu langsar zualte sawi nan ngat phei chuan SIPAI tih hi a hmang uar hle a ni, entir nan:-
    • Arkippa - “Kan Sipaipui” (Philemona v.2)
    • Epaphrodita - “Ka Sipaipui” (Philipi 2:25)

    SIPAI NUNA THIL THA (QUALITY) PAULA’N A TARLANTE:-

    Paula chuan Sipai chu ral do tura lak a nih angin ringtu pawh setana do tur a ni. Sipai nun chu Kristian nunah hian a hmu tlat a ni. Chumi avang chuan Timothe-a a fuihnaah pawh a rilru a Sipai background nei tlatin indona tha bei turin a fuih a ni. (1 Tim. 1: 18)

    1. Sipai chuan a nihna hre rengin a sipai hna chauhah ngaihtuahna a seng a ni (Concentrated Service). Sipai tumah indo laiin tun damchhung khawsaknate hian a in tihnawk ngai lo (Sipai a awm tura thlangtu chu a tihlawm theih nan) - 2 Tim. 2: 4. Mipa sipai a tangte chu Civil hna a an inhman khap tlat a ni - The Roman code of Theodosius. Sipai chu sipai a ni ringawt mai a ni. Chutiang chuan Paula chuan Kristiante chu an Kristianna chauh ngai pawimawh ber turin a beisei a ni. A nih leh chutiang chu a lo nih chuan Kristiante chuan he khawvel hnate leh thilte hi a buaipui ve ngailo tur tihna em ni ang? Nilove, he khawvelah hian a la chen tlat avangin a nitin mamawh pawh a ngaihtuahin hnate pawh a thawk ang. Mahse, eng hna pawh thawk se, chu ngei chuan a Kristian nihna chu a tarlang (demonstrate) thin zawk tur a ni a ti.

    2.Sipai chuan thuawina nun a nei (obedience):- Sipai Training-na a Trainee tana thil pawimawh hmasa ber chu - a Commander-in tih tur a hrilh chu zawhna siam lova awi tawp mai hi a ni. A chhan leh vang pawh a hriat a ngai lo. Chu thuawina chu engtikah emaw chuan ama nun ngei leh midangte nun chhanhim nan a la tangkai dawn a ni. Sipai chuan indona hmun a thil awmdan zawng zawng (over-all-picture) hre ve vekin thutlukna a siam ve tur a nilo. A tihtur chungchang a thutlukna chu Indona Field pumpui hmutu, Commander kut a dah mai kha a ni.
    Chutiang chiah chuan Tirhkoh Paula’n Kristian awm dan tur a hriatthiam dan chu Pathian aw ngaihthlak a, a hriat thiamloh zawng pawh nise thuawi taka pawm leh zawm mai hi a ni.

    3. Sipai chuan nunhlan huamin a thawk thin (Sacrifice):- Indonaah sipaite chuan a tul ang zelin ram tan a nun an thap thin. Hei hian kan Lalpa Isua Krista thusawi “HEI HI KA TAKSA IN TAN A TIHCHHIAT VEK TUR A NI” a tih kha kan ngaihtuahnaah rawn lanthar tir leh se ka va han duh em!
    Kristian chu a duhzawngte, a vanneihnate, a beiseina zawng zawngte, amah ngei pawh Pathian leh a mihringpuite tan a hlan tur niin, hlan tur pawhin a inpeih reng tur a ni. Chu chu a zui Lal Isua tihdan a nih avangin.

    4. Sipai chu a rinawm tur a ni:- Rome sipai chuan sipai hna a zawm tirh a, a thiltih ngei ngei tur pakhat chu – lalpa (Emperor) laka rinawm tur a thutiam a ni.
    Indopui 1-na (1914 – 1918) a Marshal Foch leh a Officer pakhat Aghash inbiakna han tarlang ila-
    Marshal Foch : Engvang pawh nise in hna kha chawlhsan tur a nilo, in chhunzawm zel mai tur a ni.
    Officer Aghast: Chumi awmzia chu kan thi vek mai dawn tihna em ni?
    Marshal Foch : Aw, chu chiah chu.
    Sipai quality chungchuanna leh danglamna tak chu THIH THLENG A RINAWM hi a ni.
    Christian nun chu he khawvel nun danglam zelah hian eng hun pawha Lal Isua tan a rinawm hi a ni a, thihna kawtchhuah thleng pawhin.

    Kei ni hi enge kan dinhmun le? Lal Isua tan sipai tha kan ni ve em tih hi in enfiah a tulin ka hria. Sipai chu –
    - A hna chauha ngaihtuahna seng thin
    - Thu awi thin
    - Nun hlan huam a thawk thin
    - Rinawm thin a ni.
    - Krista leh a kohhran tana rawng kan bawlna kawngah hian sipai tha niin kan in hre ve em le? Khawngaihna vanga rawngbawlhna kan chan hrang hrangah te hian ti puitling turin - ngaihtuahna kan seng thin em?
    - thu kan awi thin em?
    - kan rinawm thin em?
    - nunhlan huam tak takin kan thawk thin em?
    Tirhkoh Paula chuan Krista sipai tha a nih angin hengte hi a tipuitling
    1) Intihsiakna tha
    2) Tlansiakna kawng hlen
    3) Rinna phatsan loh
    Heng thil ropui tak tak a tihtheihna chhan chu Rinna a vawn nun reng vang a ni. Rinna vawn nun reng hi thil harsa tak a nih chang a awm thin. Harsa ti ve tho chunga rinna a vawn nun theih tlatna chhan chu a rin Lal Isua Krista a hriatchian vang a ni. Chhimbal-ah rang pasarih kan hmu thin angin Paula chuan Lal Isua Krista -ah hian thil ropui tak tak pasarih a hmu a, chungte chu:-
    1) Krista mihringa a rawn channa
    2) Krista nun tlawm
    3) Krista nun thilphal
    4) Krista inpuanchhuahna thute
    5) Mihringte tlanna atana Krista thihna,
    6) Thihna hneha Krista thawhlehna ropui,
    7) A lo kal leh dawn (Second Coming)
    Hei hi Tirhkoh Paula rinna rawng pasarih te (Seven colours of faith) an ti thin. Paula chuan Kristaah thil hlu tak tak pasarih a hmuhte avang hian hreawm leh hlauhawm karah pawh Isua Krista a rinna chu a phatsan ngai lo a ni. Keini pawhin Krista a Paula thil hmuh pasarihte hi kan hmuha, kan pawm a, kan rinna min khalhkaltu a kan hman thiam chuan Krista sipai tha tak kan ni ngei ang tih hi i hria u. Hun harsa leh hlauhawmah te hlei hlei hian chhel leh rinawm taka kohhranhote hi kan tan lehzual a ngai, a tul a nih chuan Lal Krista tan dopui turin hrehawm pawh kan tuar zel ang. Lal Krista tan sipai tha tak nih i tum theuh ang u.
    LALPAN MAL SAWM CHE U RAWH SE

  • Hla sak hona: Khb No :408 Lalber Sipai kan ni
  • Lalber sipai kan ni

    Lalber sipai kan ni,
    Thisena tlan kan ni;
    Lal Krista tan dopui turin,
    Sipaiah kan insiam.
    Thih hlauhawmah kan awm,
    Mahse hlimin kan zai;
    Lalber sipai pawl Hruaitu chuan,
    Kan thinlung a tichak.

    Lalber sipai kan ni,
    A fak hla kan sa ang;
    Rinawmin a rawng kan bawl ang,
    Kan Lalber ropui chu.

    Lalber sipai kan ni,
    A hming lawmin kan pu
    Kan Lal Isua an khenbehha,
    A chunga hming awm chu,
    Lal sipai kan ni a,
    Kan hloh hlepah kan chhiar;
    Kan Lal Isua hming chawimawi nan,
    Hrehawm pawh kan lawm ang.

    Lalber sipai kan ni,
    A hnenah kan lang ang;
    A retheihna kan chan ve nan,
    A hnenah kan tuar ang.
    Mahse, kraws tan ila,
    Ni rei a ni lo vang;
    Ropuina ni a lo hnai ta,
    Lalber sipaite tan.

    LALPA TAWNGTAINA