1. Thlarau Thianghlim nunna ber,
Awm dan danglamtirtu tur;
I vanram hmu ve tlakah,
Zaidamin min thlem ve la;
Thlarau Thianghlim sawmna chuan,
Ka kiang vela lo kalin,
Ka rilru-ah a sawi thin,
“Min zui rawh, ka hruai ang che.”
2. Kan thian rinawm tak hianin,
Nitinin min sawm fo thin;
Kan rinhlelh thin avangin,
Amah kan phat leh mai thin,
Hlauhawm kan tawh lai chauhin,
Kan thlaphan mangan laiin,
Amah kan hre leh si thin,
Chu mai chu a tawk loving.
3. Aman kan thatna a hria,
Kan rilru zawng zawngte pawh,
Amah kan zui phawt chuanin,
Ram thianghlim kan chang ve ang;
Nang pawh Pialral kai tumin,
A sawmna che awih zelin,
Chatuan nunna kawng zawh la,
Aman a phat lovang che.
TAWNGTAI RUALNA
Tawngtaina a Hriat Turte
Vawiin thlenga Pathian malsawmna leh venhimna kan chan avangin lawmthu i sawi ang u. Kan nunah theuh Thlarau Thianghlim tana hun kan ken thiam a, A hruaia kan awm theih nan i dil ang u.
Pathianin A hnena pek let ve tur malsawmna tam taka min vur avangin lawmthu i sawi ang u.
Covid 19 thawh hnihna lo thleng mek lak atanga kan him theih nan leh mipui ten a do let kawnga kan mawhphurhna kan hriat theih nan.
Covid 19 avanga enkawl lai mek, a bikin kan kohhran memberte leh kan missionary leh thawktu te tan.
Covid 19 avanga thi chhungte tan te, chhiatna hrang hrang avanga tuar mek Mizoram hmun hrang hrang a mi te tan.
Lockdown kan hmachhawn leh dawn a, fimkhur tak leh thuawih taka kan awm thiam theih nan.
Kan thawhlawm, inkhawmna leh keimahni Pathian hnenah I hlan ang u.
Tirhkohte 2:1-4
‘Tin, Pentikos ni a lo thlenin an zain hmunkhatah an awmkhawm vek a. Tin, thawkleh khatan van ata ri, thlipui tleh angin a lo thlengta phut a; chu chuan an thutna in chu a ti khat vek a. Tin, Leite Amaha insem darhin, mei angin an hnenah a lo in lar ta a. Tin, an chungah a chuang theuh va, an zain Thlarau Thianghlimin an khat ta vek a. Thlarauvin a tawngtir ang zelin tawng dangin an lo tawng ta a.’
THUCHAH
Thupui : THLARAU THIANGHLIM LEH A HNATHAWH
- Rbt B Singpari
Audio:
Kohhran hote Lal Isua hmingin chibai ka buk a che u. Vawiin Thlarau Thianghlim thlen ni ah hian Pathian chibai bukna hun tha tak mahni chhungkua theuhva kan nei leh theite hi Pathian malsawmna leh khawngaihna a ni a, Pathian hnenah lawmthu i sawi ang u.
Naupang pual:
Pathian ni zinga kan tih thin angin Naupang Pual lo sawi hmasa ila.
German Khawchhak lama Sikul pakhata an zirtirtu zinga pakhat chu Communist ruh tak, Pathian awm ring lo mi a ni. Ni khat chu Sikul Naupangte hnenah “Ding ula, ’Pathian a awm lo’ tih hi ring takin sawi rawh u,” a ti a. Kristian hmeichhe Naupang Pakhat hian a sawi ve duh lova, An zirtirtu chu a thinrim hle a, nasa taka a vau ngial pawhin chu hmeichhe naupang chuan a sawi ve duh tlat lo mai a. Hmeichhe naupang hnenah chuan, “Pathian a awm lo tih vawi 50 rawn ziak ang che, naktukah I ziah chu rawn keng la, ka en leh vek ang,” a ti a.
A tukah chuan Zirtirtu chuan hmeichhe Naupang chu, “thil ziak tura ka tih che kha I ziak em? Min rawn entir rawh,” a ti a. Hmeichhe Naupang chuan a thil ziak chu a va pe a. Hmeichhe Naupang thil ziah a va hmuh chuan an zirtirtu chu a thinrim hle mai a. Hmeichhe Naupang chuan PATHIAN A AWM tih hi vawi 50 a lo ziak a. Zirtirtu chuan, Zaninah Pathian a awm lo tih vawi 500 rawn ziak chhuak ngei ngei ang che a ti a.
A tukah chuan hmeichhe Naupang chu a pain a kalpui a, an sikul Principal hnenah chuan an zirtirtu-in a tih dan leh thil awmziate chu an hrilh a. Principal chuan Naupang hnenah chuan, “I rilru tihah duh tawh suh, rilru nuam takin Class room ah va thu rawh, nizan khan in zirtirtu chu bike accident-ah a thi a ni,” a lo ti a.
He hmeichhe Naupang hian Pathian a awm thu huaisen takin an zirtirtu bulah a sawi a ni.
Vawiina kan thupui tur chu ‘Thlarau Thianghlim leh A hnathawh’ tih a ni.
Pathian thu I lo ngaithla ang u:-
Tirhkohte 2:1-4 ‘Tin, Pentikos ni a lo thlenin an zain hmunkhatah an awmkhawm vek a. Tin, thawkleh khatan van ata ri, thlipui tleh angin a lo thlengta phut a; chu chuan an thutna in chu a ti khat vek a. Tin, Leite Amaha insem darhin, mei angin an hnenah a lo in lar ta a. Tin, an chungah a chuang theuh va, an zain Thlarau Thianghlimin an khat ta vek a. Thlarauvin a tawngtir ang zelin tawng dangin an lo tawng ta a.’
Thlarau Thianghlim Awmzia:
Thlarau Thianghlim chu Pathiana mi nung Pathumte zinga pakhat a ni. BCM Thurin puanchhuah ah chuan Thlarau Thianghlim chu Pa leh fapa atanga lo chhuak, Pathian dik tak a ni a. A ni chuan mihringte chu an sualzia leh an chunga hremna lo thleng turte a hriat chiantira a. Krista hriatna lamah an rilru tivarin, Krista duhawmna a tarlanga a. Lal leh Chhandamtu a pawm turin a puia, rah tha tinreng chhuah turin a thawhsak thin. (Gen 1:1-3, John 14:26)
Thlarau Thianghlim thlen ni:
Lal Isuan a zirtirte vana a lawnsan dawn khan Thlarau Thianghlim an chunga a lo thlen hma loh chuan Jerusalem chhuahsan lo turin a hrilh a (Tirh 1:4, 24:49).Tichuan Penticost ni takah Thlarau Thianghlim chu a lo thleng ta a ni.
Pentikos hi Judate Kutpui zinga pakhat a ni a, Kalhlen kut atanga ni 50 naah an hmang thin. Judate chuan ‘Pawl kut’ tiin an vuah a (Ex 23:16) A chang chuan Chawlhkar kut an ti bawk. (Ex 34:22). He ni hi Isua Krista thawhleh ni atanga ni 50 na a ni.
Thlarau Thianghlim thlenna hmun:
Tirhkohte Bung 2-ah hian Thlarau Thianghlim thlen thu hi chiang takin kan hmu a, Lal Isua thusawi zawmin zirtirte chu Thlarau Thianghlim nghakin mi 120 lai an awm khawm a, He lai an awm khawmna hmun hi ‘Pindan chungnung‘ niin a lang. Isuan a zirtirte zanriah buatsaih tura a tirh khan ‘Pindan chungnung zau tak’ ah an buatsaih thu kan hmu a ni (Mk 14:15) Tichuan, Isua leh a zirtir ten zanriah an eina hmun kha Penticost nia a Thlarau Thianghlim lo thlenna hmun niin a lang.
Thlarau Thianghlim lo thlen dan: Thlarau Thianghlim lo thlen dan hi a mak khawp mai a:-
1) Thawk leh khatan van ata ri, thlipui tleh angin a lo thleng ta phut a. Thli na takin thil a rawn chhem ri hum hum angin thawm nasa tak nen Thlarau Thianghlim hi a lo thleng a ni.
2) Thlarau Thianghlim chuan an awmna in chu a ti khat ta vek a.
3) Leite amaha insem darhin mei angin an hnenah a lo in lar a. Thuthlung hlui atangin Mei hian Pathian thiltihtheihna, chakna leh tihthianghlimna a entir. (Ex 3:2-6)
4) Chuta awm zawng zawng chu Thlarau Thianghlim a tihkhah in an awm ta vek a, Thlarau Thianghlim chuan tumah thlei bik nei lovin chuta awm zawng zawngte a luah khat vek a ni.
5) Thlarau in a tawngtir ang zelin tawng dangin an lo tawng a. Tawng dang tih hi an mahni hnam tawng theuh bakah hnamdang tawng hriatthiamna an nei tihna niin a lang (chang 6,8)
Thlarau Thianghlim hnathawh:
Thlarau Thianghlim hnathawh leh pawimawhna hi sawi tur tam tak a awm a, thenkhat chauh lo tarlang ila:-
1). Pathian fate kan nih min hriattir:
Thlarau Thianghlim chuan kan nihna min hriatchian tir a, kan dinhmun chiang takin min tarlan sak thin a. ‘Thlarau Thianghlim chuan keimahni Thlarau nen Pathian fate kan nih min hriattir thin’ (Rom 8:16) a ni.
2) Sual hriattirtu:
Sual sual zia leh a rapthlak ziate, Pathian mit hmuha thiamchanna reng a neih loh ziate Thlarau Thianghlim chuan a tarlang thin. ‘A ni chu a lo thlen hunah chuan sual thuah te, fel thuahte, rorel thuahte khawvel an thiam lohzia a hriattir ang’. (Jh 16:8-11) Mosia chuan Kan khawlohna te chu I hmaah I dah a, kan sual zeprukte chu I hmel engah I dah ta a, tiin min hrilh. Paula chuan ‘Thlarau chuan engkim a chhuichhuak si thin’ a ti a (1 Kor 2:10) a ni.
3) Thlamuantu a ni:
Thlarau Thianghlim chu Thlamuantu a ni a. “Thlamuantu Thlarau Thianghlim pa in ka hminga a rawn tirh tur khan chu mi chuan engkim a zirtir ang che u” (John 14:26) Hlau leh dinhmun derthawng taka kan awmlaite, harsatna leh manganna kan tawh lai te, taksa lamah natna leh bawrhsawmna in min tlakbuak laite, rilru lama lungngaihna nasa tak in min chim vel laite a min thlamuantu leh beiseina min neihtirtu chu Thlarau Thianghlim hi a ni. Hun khirh leh harsatna hrang hrang karah Thlarau Thianghlim, min thlamuantu chu kan hnenah a awm a min chenchilh reng a ni.
4) Nun kawngdika hruaitu a ni:
“Thlarau dik tak chu a lo thlen hunah chuan thu tak zawng zawngah chuan a hruai lut ang che u”( John 16:13) tih kan hmu a, Thlarau Thianghlim chu Hriatna dik, Nun kawng dik, Krista duh zawng kawnga Kohhrante, Ringtu mimal tinte hruaitu a ni a, Thil dik lo leh, Sual hriattirtu, Krista hnena min hruaitu a ni a.
5) Tawngtai saktu a ni:
Thlarau nuna kan chauh em em lai pawh a tih tak zeta min tawngtaisaktu chu Thlarau Thianghlim a ni a, a va lawmawm em! ‘Thlarau chuan kan chak lohnahte a pui thin a, engtia tawngtai tur nge kan hre si lova, Nimahsela, Thlarau chuan rum sawi hleih theih lovin min tawngtai sak thin’ (Rom 8:26) tih Bible-ah kan hmu a ni.
6) Krista a chawimawi: Kohhrante chu Krista chawimawi tur leh fak turin a hruai thin. ‘Ani chuan kei mi chawimawi ang’ (Jh 16:14). Thlarau Thianghlim chu ringtuten nun thianghlim kan neih theih nan te, Pathian kan chawimawi theih nana min puitu a ni.
7) Isua Krista Chanchin mite hnena hriattir:
Thlarau Thianghlim a lo thlen khan Tirhkoh-ten hmun hrang hrangah Isua thihna leh thawhlehna an sawi a, mi tam takin Baptisma an chang a. ‘Jerusalem khuaah te, Judai leh Samari ram khawtinah te, Kawlkil thleng pawhin ka thu hretute in ni ang‘ (Tir 1:8) Kohhran hote hian Isua Chanchin puandarh hi tun thlengin hna pawimawh takah kan nei zel a, kan ram chhungahte, India ram leh Khawvel hmun hrang hrangah Missionary kan tir a, Thlarau Thianghlim tanpuina zarah Chanchin tha kan puang zel dawn a ni.
Thlarau Thianghlim lo thlena Ringtute awmdan:
1.Thiltihtheihna an nei:
Thlarau Thianghlim a lo thlen chuan Tirhkohte chuan Thilmak leh chhinchhiahna tam tak an ti a, Thlarau Thianghlima thuama an awm avangin an thu hrilhte chuan mite thinlungah nungin thu a sawi a, mite nun a hneh em em a, Petera thu sawiah pawh mi sangthum laiin Baptisma an chan thu kan hmu a ni.
2. An Huaisen:
Ringtute kha roreltute hlauin a rukin an inpawl thin a, Mahse Thlarau Thianghlim a lo thlen a Thlarauva an khah hnu chuan Isua Thawhleh thu huai takin an sawi a, Petera-te pawh Isua hminga thu sawi tawh lo tura an tih pawhin ‘Keini zawng thil kan hmuh leh kan hriatte hi sawi lovin kan awm thei lo’ tiin huaisen takin Isua hming an tan tlat a.(Tirh 4:20) Lal Isua thawh leh thu chu thih huamin an puang ta a ni.
3. Pathian chibai buk an ngaina:
Ringtute chu rilru hmun khat pu-in Pathian Biak Inah thahnemngai takin hun an hmang thin a, Pathian fak leh tawngtaiin Pathian chibai an buk thin.
4. An In pawh ho thin:
Kohhran hote khan Inpawl ho an uar a, a huhoin Pathian an be thin a, a huhova Pathian chibai buk an ngai pawimawh em em a ni.
5. An inpumkhat:
Ringtute chuan an thil neihte an intawm a, an zingah tlachham bik an awm loh nan an thil neihte an hralh a, an mamawh ang theuhin an in sem thin tih kan hmu (Tirh 4:32-34).
Awle, Hripui leng avangin Biak inah kan inkhawm thei lova, Nitin kan thil tawn leh hriatte chu mi tam tak thih thu te, hri kai thar zat te, khawvel thil thleng rapthlak tak takte a ni thin, kan thenawm Myanmar ram buaina te, Israel leh Palestinean inkara buainate hriattur a awm reng mai a, Khawvel ralmuan loh zia leh khawvel hi kumhlun tur a nih loh zia a chiang em em a ni. Sorkar ropui leh chak ber berte pawh hripui lengin a tih buai nasat zia kan hre theuh va. Chutiang Boruaka kan awmlai hian Penticost ni a Thlarau Thianghlim lo thleng kha vawiin a Kohhran hote, Ringtute min chenchilh rengtu a ni a, tanpui kan ngaih huna min tanpuitu, lungngaihna leh buaina kan neih lai pawha min ‘Thlamuantu Thlarau Thianghlim’ kan nei hi a va lawmawm em! Pathian hnenah Lawmthu i sawi ang u.
Thlarau Thianghlim chuan kan chak lohna a hria a, tawngtai dan tur kan hriat loh lai pawhin rum sawi hleih theih lovin min tawngtai sak thin a ni.
Thlarau Thianghlim hruai theiha kan awm erawh a pawimawh hle. Thlarau chuan Thutaka min hruai a duh a, inthlahdah tak leh Amah hawisan zawnga kan nun a rem lova, Ama hruai theih tura kan inpek erawh a ngai a ni.
A huho-in Pathian Chibai buk thei rih lo mahila Mahni hmun theuhah chhungkua leh mimal ang pawhin Pathian Pawlna neih tam tum ila, tawngtai leh Bible chhiar-in Pathian nen inpawlna hun tam zawk hman tum theuh ila, chu chuan kan thlarau nunah hmasawnna min neih tir ngei ang.
Tumahin Thlarau Thianghlimah chauh lo chuan, ‘Isua chu Lalpa a ni, an ti thei ngai lo’.(I Kor 12:3) Chuvangin Thlarau Thianghlim chu min hnemtu, min veng himtu a ni a, min zirtiru a ni a. Kan hmangaihin amah nen kan inpawl thin tur a ni.
A tawp ber atan chuan Thlarau Thianghlim chuan A kohhran hote min vengin min chenchilhin min awmpui theuh rawhse.
A thu kan sawite Lalpan mal min sawmsak rawh se. Amen.
No.308 - Aw Thlarau Thianghlim lo kal la kan tha tichak ang che
