THUPUI: ‘LAL ISUA ZUI – RALDO NUN’

Kohhran hote kan Lalpa Isua Krista hmingin chibai ka buk a che u. Tunlai kan boruak tawn mek te ka ngaihtuahin ka rilru ah Lal Isua zuitute tan chuan he khawvel hi raldo na hmun anih zia ka thinlungah a thar hle mai a, chuvangin tukin zingah pawh hian kan thupui atan chuan, “Lal Isua zui – raldo nun” tiin kan dahchhuak ve ngawt mai a ni.

Covid-19 avangin khawvel hmun hrang hrangah leh kan ramah ngei pawh harsatna namen lovin min chim mek a, nunphung a khaihlakin kan khawsak leh kan nun dan pangngai ang pawhin kan awm thei tawh lova; Kohhran, Pisa, leh Sumdawnna etc hrang hrangte pawh khuahkhirhna hnuai ah kal a lo ngai ta a,mihring kan zalen lova hlauhna leh fimkhurnain kan rilru a luah nasa hle a,chu chu engvangnge kan tih chuan Covid-19 hri kai kan hlauh vang a ni ber mai.

Theih tawpin kan ram hruaituten he hripui lak atanga kan him theihna turin ruahmanna te an siam a, tihtur leh tihloh turte an an sawi chamchi a; chung hmang chuan he hripui hi kan do mek a ni. Enge kan an zel dawn chu kan hre lova, kan hneh dawn nge? he hripui hian min man belh zel dawn? Kan invenna tura kan mithiam ten kawng min kawhhmuh hi kan zawm leh zawm loh ah nasa takin a innghat dawn niin a lang. Chuvangin tukin zingah hian khawvelin a a buaipui em em hripui kan hmachhawn mek atang hian ringtuten zir tur pawimawh tak kan nei a chu chu kan zir ho dawn a ni.

Pathian thu i lo ngaithla ang u. (Ephesi 6:12-13) Kan buante hi tisa leh thisen an ni si lo, lalnate leh thuneihnate leh, he thim chunga khawvel roreltute leh, van hmunahte thlarau sualho awmte an ni zawk e. Chuvangin, ni tha lovah chuan in do zawhna tur leh, in tih zawh vek hnu pawha in din theihna turin, Pathian ralthuam famkim chu la rawh u.

Tunlai khawvelin tisa lama kan hmelma/ral kan beih lian ber mai pakhat chu covid-19 (virus/bacteria) te tak te, mit lawng pawh a hmuh tham loh mi tam tak nunna suattu hi a ni ti ila kan sawi sual awm lo ve. Ram hrang hrang kan thlirin he hripui hian min tibuaiin harsatna min thlen nasa hle tih kan hria a, mihausa leh rethei a thliar lova, Pastor leh Upa, Rawngbawltu, pitar leh putar, thalai leh naupang thlengin thliar bik nei lovin a man zel a, tahna leh lungngaihna ruam ah min hruailut mek zel a ni.

Chutiang deuh chiah chuan thlarau lama kan hmelma lian ber chu,Setana a ni tih chiang takin kan Pathian thu chhiar atang khan kan hre thei awm e. Setana chuan, he hripui ang mai hian kan ram min sawisa a; sual kawng hrang hrang hmangin min run a, kan sakhaw rawngbawltute zingah te kan nu leh pate zingah te kan thalai leh naupang zingah te nasa takin a pawngtal a ni tawh mai e. Kan khawvel changkanna leh hmasawnna mil ang zelin thiam takin min bei mek a ni.

Kan hmelmapa hi a fing em em a, thudik chanve hmangin min bei thin a,ngaihtuah chianloh phei chuan kawng dik emaw tih a awl hle thin a ni. Kan panna zawn hi a hre em em a, kan nuam tih zawng tak leh kan tuina tak hmang te hian thiam takin min bei reng thin a ni. Lalna te, thuneihnate, ropuinate, lansarh duhna hmangtein min bei thin a. A chang chuan mahni inkhawngaihnate, rethei dawn a inhriatnate, rualpawllo riau dawn a inhriatnate hmangin min bei thin a ni. Mahse heng zawng zawng hi setana min bumna vek a ni. Kan nitin hun hman dan han in chhuilet ta theuh ila sual hian min va bei nasa thin teh reng em. Setana chu tunge ni? kan tih chuan, a hming awmzia chu ‘hmelmapa’ ‘dotua’ tihna a ni. Ramhuai lalber a ni a. Vantirhkoh zinga tel a ni; vantirhkoh tam tak nen a hovin Pathian lakah an hel a, van atangin hnawhchhuah an ni a,englai pawha Pathian dodaltu an ni.

IPetera 5:8 ah chuan, “Ngaihven ula, fimkhur rawh u; in khingpui Diabola chu sakeibaknei rum thin angin, a ei theih tur zawngin a phi ruai thin.” tih kan hmu a.

He covid-19 hripuiin mihringte min run a min bei mek ang hian, kan khingpui diabola pawhin a ei theih tur zawngin thahnemngai takin a phi ruai a ni tih kan hria a, kan zavai mai hian hremhmuna min hruai luh vek mai hi a duh dan a ni a, a thiltum pawh a ni reng a ni.Hetiang khop a thahnemngai a min beih reng chuan hremhmunah hian min la hruailut teuh thei dawn a ni. Chuvangin, Pathian thu chuan ‘Ngaihven ula, fimkhur rawh u’ min tih lawm lawm a, kan nitin hun hmanna ah hian fimkhur tak leh Pathian duh zawng ngaihven chunga kan inven reng a ngai a ni.

Ephesi 6:11 ah chuan, ‘Diabola ngamthlemnate chu in do zawh nan Pathian ralthuam famkimin inthuam rawh u.’tiin min hrilh a. Covid-19 kan hnehna tura kan ralthuam kan mithiam ten min chhawp chhuah sak hi ralthuam a kan hman tlat chuan he hripui hian min hneh ngai lovang. Chutiang chiah chuan Setana min beihna chu kan do zawh nan leh kan hneh theih nan chuan Pathian ralthuam famkim a kan inthuam reng a ngai a, amaherawh chu he mihring hian a inthuam reng peih thin loh avangin sual ral hnehin kan lo awm leh thin a ni.

Ephesi 6:14-18 ah chuan, “Chutichuan, in kawng te chu thutaka hrengin, felna awmphaw chu hain ,remna Chanchin tha inbuatsaihna chu in keah bunin ding rawh u; chung lo pawh rinna phaw la ula, chu chuan mi sual thal alh thei zawng zawng chu in timit thei ang. Tin, Chhandamna lukhum leh Thlarau ngunhnam (Pathian thu chu) la ula, tawngtaina leh dilna tinrengin eng hun pawha Thlarauva tawngtaiin, chumi kawngah chuan mi thianghlim zawng zawng tan thahnemngai tak leh dil tlatin ngaihven rawh u” tiin min hrilh a ni.

He Covid-19 hripui lak atanga kan him theih nan kan mithiamten kan tihtur leh tihloh turte min kawhhmuh a, chungte chu thil tih harsa lo tak, mihausa leh rethei te te te pawhin a kan tih theih vek tur; kut silfai, hmai tuam, midang hnaih loh, pawnchhuah tam loh, etc tih te hi zawm tha ila he hripui atang hian kan lo him mai dawn a , kan zawm thatloh erawh chuan kan kai mai dawn a ni.

Chuvangin kan mithiam rual ten he hripui lak atanga kan him theihna tura tihtur min ruatsak ang hian, setana min beihna lak atanga kan him theihna turin Pathian thu chuan ‘Pathian ralthuam famkim’ a inthuam reng turin min duh a ni. Chungte chu engtenge ni ta ang?

Thutak: Johana 17:17 ‘I thu chu thutak a ni’ a ti a. Pathian thu hi thutak chu a ni. Lal Isua pawh thlaler a thlemna a tawh lai khan mawi takin Pathian thu hmangin setana hi a lo hneh tawh a ni. Felna awmphaw: Lal Isua thu min pek te kan zawm a, Pathian felna kan tawmpui tlat chuan sual leh ramhuai ten kan nun ah hmun an chang thei dawn lo a ni.

Remna chanchin tha: Pathian leh mihring inremna chanchin tha kan puan apiangin sualin min kalsan thin.
Rinna: Pathian ah kan rinna kan nghah tlat chuan sualin min hneh ngai lovang.
Chhandamna lukhum: Chhandam fate kan nih tawh avangin nun thianghlim um zel tur kan nihna chu chhandamna lukhum ah kan hmang zel tur a ni.
Thlarau ngunhnam: Sual hneh nan Thlarau ngunhnam (Pathian thu) hi kan hmang zel tur a ni.
Thlarauva tawngtai: Thlarauva tawngtaina hian Pathian nena inzawm tlatna neih a pawimawh zia min hrilh a, tawngtai satliah ni lova Pathian nena inpawlna nung tak tak kan neih reng chuan sualin min hneh ngai lovang.
Heng’ Pathian ralthuam famkim’ te a kan inthuam reng chuan englai mahin sual hian min hneh dawn lo a ni tih Pathian thuin min hrilh a, a va han pawimawh teh lul em.

Ka ngaihtuah thin a, Setana hian tun hun hi remchang ah a va la nasa dawn teh reng em. Kohhran huangchhung atanga kan activity zawng zawng mai chawlhsan a lo ngai a; pulpit sermon ringawt a lo innghat thin tan chuan kha tiang kha a lo awm tawh si lo. Sunday School lah kan nei thei tawh bawk si lo.Thenkhat tan chuan inthlahdahna hun remchang tak mai a ni dawn a, Thlarau lam nun thlengin a chau ngei ang. Chutah tak chuan Setana hi rang takin a rawn che a nga min hneh mai ang tih hi a va hlauhawm em.

Kan kohhran hi kan vannei hle in ka hria, Pathian ni tinin social media hmangin thuchah te kan la ngaithla thei zawk a. Hetianga hun khirh leh harsa ah pawh kan kohhran hruaituten kohhran hote tana thlarau lam malsawmna kan neih theihna tura hma an la hi lawmna chang leh hlut nachang i hria ang u. Kohhran tam zawk ah chuan engmah hmalakna hi a awm tawh lo a ni. Chuvangin,Pathian lak atangin kan bo palh mai ang tih a hlauhawm hle in ka hria, kan Thlarau nun chawm lian a ti thang lian zel turin mimal kan pawimawh a, chhungkua kan pawimawh hle bawk. Chuvangin chhungkua a Pathian chibai buk hona tak tak nei thei tura kan inbuatsaih fo hi a ngai a ni.

Nitin a Covid-19 hripui darh zel tur kan do ang hian ringtuten Lal Isua kan zuina kawng ah hian nitin thlarau lam ral do tur (diabola) kan nei ve reng a ni tih hi hrenawn ila, Lal Isua Krista hnathawh leh amah zuitute nun kan enin ni tin thlarau lam indona an bei a ni ber mai. Sual thiltihtheihna hi englai pawhin a thawk reng a,ringtu tan inthlahdah theih a ni lo. Hneh tawh tih pawh a awm lo va, dam chhungin sual do tur kan nei a ni. Sual hneh leh khawvela Pathian ram din hna hi ringtu mimal tih tur a ni mai lo va, kohhran ho leh ringtu zawng zawngte inpumkhata beih ho ngai a ni a,kan tanrual a ngai a, tha thlah lo va kan beih a ngai a ni.

Lal Isua zuitute chu ral do reng kan nih avangin hahchawlh leh nuam chen hman kan ni lo, chumi a hnekin tuarna kawng kan zawh ngei ngei a ngai a. IITimothea 2:3 ah chuan, “Krista Isua sipaitha tak angin hreawm mi tuarpui rawh” tih kan hmu. Chuvangin ringtu chuan Lal Isua a rin avangin hreawm a paltlang ngei ngei a ngai zawk a ni. Ral dona a ralthuam inbel nachang hre lo chu ralin rang takin an hneh mai thin.

Chuvangin ringtuten Lal Isua hnung kan zuina kawng hi raldo nun a ni tih kan hriat a, ral hneh tura Pathian ralthuam famkim a kan inthuam reng a ngai a ni. kan dam chhungin tisa lamah ral do tur kan neih ang chiahin thlarau lamah pawh kan nei a ni tih hria ila, Krista Isua sipai tha tak ni turin hreawm tuar huamin; thuawihna nen Pathian thupek ang zel a kal thei turin ral (Setana) i bei zel ang u.

Lalpan a thu malsawm rawh se. Amen

Tawngtaina
Hla sak hona: Lalpa, I aw nema (KHB No 324)

Lalpa, I aw nema min kohna chu ka hria

Lalpa, I aw nema
Min kohna chu ka hria;
I thisen hlua lo fai nan,
Kalvari-a luang khan.

Lalpa, ka lo kal,
Nangmah bel turin;
Bualin, silin ,min tleng la,
I thisen hlu luang khan.

Chaklo leh sual berin,
Lo kal mah ilangin,
Nangmah ka chakna ber I ni,
Ka sual I tleng fai ang.

He lei leh vanah khian,
Beiseina leh remna;
Rinna leh khawngaihna famkim
Atan Isuan min ko.

Fak r'u, thisen hlu chu,
Fak r'u, tlanna duhawm; Fak r'u,
Krista kan Lal lawm pek,
Kan chakna, felna chu.

Lalpa Tawngtaina