SEM DARH CHU PUN LEHZUALNA
- Upa K. Lalnuntluanga
1.
Thuhma: Serkawn khua hi khaw dang ang lo takin Zosâp missionary-ten awmhmun an lo khuarna a nih avângin mi tlêmtê khawsain bul an lo tan a. Atirah Zosâpte bâkah chuan Chirhdiakkâwn (CHDK) kan tih laiah hian chhûngkaw tlêmtê an awm a ni. Serkawn phei vêlah hian ram sêr (Sêrfâng) kan tih ang hi a tam viau thîn a. Zosâp missionary-te khan a lawh hunah lovin chhûng tinte kha an sem thîn a ni tih thute kan hre thîn. Khatih hun lai atang daih tawh khan zosâp missionary-te khan thil insem leh mi tanpui dân kawng hrang hrangin min lo zirtîr tawh a. Mizo pipute pawhin “Sem sem dam dam, Ei bil thi thi” an lo ti tawh rêng a, a awmzia chu - mite tanpuia thil neih ang angte sem ve thin chu Pathianin mal a sâwm a, an dam rei ang a; mahni thil kawmpuitu leh mite pe ve phal lo chu dam pawh an dam rei lovang tihna a ni mai awm e.
Serkawn kohhranah hian Relief kan tih hi hun rei tak atang khan kalpui a lo ni tawh thîn a, tûnah phei chuan Committee hran siamin mumal zâwka inkaihhruainate siamin kalpui mêk a lo ni ta a ni. Mizoram Baptist Kohhram hian Pisa pui lam atangin 1990 atangin BCM Relief and Development a lo din chho tan a. He lama mi thiam min kaihruatu hmasa chu Pu MS Dawngliana, MSW zir zo chu Director atan dah a ni. Ani kaihhruaina hnuaiah hian India ram leh khawvêl pum huapa tanpuina thawktu Pâwlte ko chhuakin Mizoram hmun hrang hrangah pawh thilpêk leh chhawndâwlna chi hrang hrang kalpui a lo ni tawh thîn a ni. He rawngbâwlna huang hi zauh chho zêlin tûnah chuan zau zâwk leh sum leh paiah pawh thahnem zâwka luan chhuah a nih theih nân BCM chuan Charity Fund siamin rawngbâwlna a a kalpui mêk a ni. BCM Charity Fund hi mipui lam hian kan la hlut thiam lutuk lo va, he lamah hian tan lâk pawh a tûl hle a ni. Tanpuina pe duhte tân a pêk theih reng a ni.
Sem darh chu pun lehzualna: Pathianin Mihring a siam khan amaha awm mai mai tûrin a ti lo va, thuneihna leh tihtûr a pe a ni. Eden huanah chuan enkawl leh vêng tûrin a dah a ni. Chutiang chiah chuan khawvêla mihringte, keiniho pawh hi mahnia awm tûr ringawtin min siam lo va, he khawvêl enkawl leh vêng tûr hian Pathianin min dah a ni. Chutiang a nih chuan
kan rilru, taksa leh thlarau hmanga a dik apiangte, a fel apiangte, Pathian mithmuha lawmtlâk ti tûrin khawvêlah hian awm tûr kan ni. Ephesi 2:10-ah chuan “Thil tha ti atân Krista Isuaah chuan siama awmin ama kut chhuak kan ni si a; chu thil tha tih chu kan awmna tûrin Pathianin a buatsaih lâwk a ni” tiin min hrilh a ni.
Pung lehzual tûrin engnge kan sem darh ve ang tih hi kawng thumin sawi ila:
1. Sum leh pai : Sum leh paiah Pathian malsâwmna kan dawng kan tih hian, a thlâwnin Pathianin min rawn pe ringawt lo va. Sum leh pai thawk chhuak thei tûrin dam leh hrisêlnate min pe a, lehkha thiam a, kan thiamnate hmanga sum leh pai thawk chhuak theiin min siam a. Chu Pathian avâng chauh chuan kan nung a, kan che, kan awm a ni tih Pathian thu chuan min hrilh rêng a ni. Khawvêlah hian Pathianin nunna min pe ta lo se, nung lo na nâ nâ chuan engmah a nei lovang. Kan ta emaw kan tih hi Pathian ta a ni a, chûng kan thil neihte pawh chu a duh dâna mi dangte tâna malsâwmna ni ve tûrin min duh a ni. Amaherawhchu, sem ral puat puat ringawt chu a duh dân a ni hauh lo mai. Kan thil neih tinrêng sum leh pai, hrisêlna, thiamna leh finnate hi Thinlunga lâwmna – engkim siamtu leh petu Pathian chunga thinlung taka lâwmna avânga ui lova mi dangte tâna pe chhuak ve tûrin min duh a ni. Pathian chuan hlim taka petu a ni a hmangaih ni, tiin min hrilh a, chutianga kan pêk chuan Pathian khawngaihna tinrêng kan chungah vûrin a awm dâwn a ni. Chutianga thinlunga lâwmna nêna pêk chu “Mi thianghlimte rawngbâwlnaa kan tel vena a ni tiin min hrilh a nih chu, a va ropui si êm !! Mi thianghlimte rawngbâwlnaa kan tel vena tlâka ruat a nihna tûr chu Hmeithai thilpêk tangka dere pahnih pêk chungchânga Isua thusawiah khan a chiang êm êm a ni.
2. Kan tih theih tâwk (Talent) Pathian hnêna hlan: Luka 19:11-27 thu-ah hian
Rangkachak talent tehkhin thu kan hmu a, Rangkachak Talent tipungtu leh tipung miah lo tehkhin thu kan hmu a ni. Talent tipung apiangte chu a lêtin pêk belhchhah a ni a, tipung lo chu a neih chhun pawh laksak a ni ta a ni. Pathian siam mihringte hi tumah kan in ang hauh lo va, Pathianin talent hrang hrang min pe theuh a. Chu kan talent theuh hmang chuan he khawvêlah hian a duhna tipung tûrin min duh a ni.
Naupangte khan engmah tih theih kan nei ve hleinêm inti a ni mai thei. Mahse chutiang a ni lo, mi dangte tân in tawngtai thei a, mi dangte tân pawh malsâwmna in ni thei a nia. Serkawn KNP te hian krismas lai hian mission Field-ah thilpêk rawngbâwlna kan nei thîn a. Naupangten an thawmhnaw hâk lai leh an Toys duh lai an rawn la khâwm a, Mission Field pakhata kan thawn chu report an rawn thawn a. Naupang kawr tha hâk tûr leh pheikhawk bun tûr pawh nei lo krismas tûka pheikhawk leh kawr mawi nêna an inkhâwm thlalâk an rawn thawn ta a. A petute kan lâwm bawk, a dawngtute leh Missionary-te lâwm bawk, lâwm avângin biangah mittui a luang lo thei lo a ni. In thawmhnaw leh Toys in pêkte kha maw a nei ve phâk loten an hlimpuizia leh in thilpêk avânga Pathian hnêna lâwmthu an sawinate kha a hlu êm êm asin, khang zawng zawng kha Pathianin a hre vek a nih chu.
Kohhran, Krista taksa tipuitlinga tifamkim tûr hian amah ringtute hi Lalpan Talent hrang hrang a pe a, Ephesi 4:13 “Krista taksa siam tha tûrin thenkhat chu tirhkoh atân te, thenkhat chu zâwlnei atân te, thenkhat chu Chanchin tha hriltu atân te, thenkhat chu kohhran châwmtu leh zirtîrtu atân te a pe a” tiin.
3. Chhandamna No ka la ang a: Mi zawng zawngin kan tih theiha awm chu hei hi a ni. Sâm 116:12-13 “Ka chunga a thiltih that zawng zawng avâng hian Lalpa chu engnge ka pêk ve ang; Chhandamna No ka la ang a, Lalpa hming chu ka lam ang” tih hi. Sual thim thuneihna lak ata min chhandamna chu fakin Lalpa hming chu ka tan tlat ang. Pathian Lei leh vân siamtu, a thisen hlua min tlantu a ni si a, tia eng hunah pawh, eng dinhmunah pawh awm ila; retheiin awm mah ila, hausain awm mah ila, eng pawh lo thleng se, ka lâwm zêl ang Lalpaah chuan, ka chhandamna Pathianah chuan ka lâwm cheu dâwn tia Habakuka‟n a lo sawi ang khan Pathiana lâwmte nunah hian kan Pathian zia hi a lo lang thîn a ni. Chu Pathian zia chu khawvêlah hian i sem darh zêl ang u.
Tlângkawmna: Khawvêla hri lêng mêk Covid 19 hi kan tân chhiatna leh manganna nia kan hriat lai hian kan hmuh leh kan hriat angin vawiina kan thupui tidiktu a nihna lai a awm tlat mai. Lal Isuan Vâna ro khâwl tûrin min ti a. Matthaia 6:20 “Vânah sûlrûl leh tuiêkin a ei chhiat lohnaah, rûkruten an reh pawha an rûk hek lohnaah in tân rote khâwlkhâwm rawh u” tia min hrilh hi hre tharin kan thil neihte sum leh pai leh thlai thar thlengin mi dangte tân kan sem ta ur ur mai. He hrilêng hi lo thleng ta lo se, hetiang thil hi kan ramah a thleng lo mai thei a ni. Tuarna phêna malsâwmna lo lang hian Pathian a chawimawi thîn a ni. I Petera 2:12-ah chuan “Jentailte zinga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihthat an hmuhte avângin fanin an awm hunah chuan Pathian an chawimawi thei ang” tiin min hrilh a ni.
Lalpan a thu malsâwm rawh se.
Hla sak hona: Khb No 590 : Khawvêl suala bo hnu tlan chhuak leh tûrin
Khawvêl suala bo hnu tlan chhuak leh tûrin
Khawvêl suala bo hnu tlan chhuak leh tûrin,
Pathianin a Fapa neihchhun min pe
A tlansa, suala boten nunna kawng an hriat theih nan,
THilpeka rawngbawl turin Lalpan min ko
Pe rawh u, tichuan, pekin in awm ang,
Pekah Pathian i hnehban thei lovang;
Pathianin mihring lei a ba ngai lo,
Malsawmna hnar a lo ni si.
Ringtute u, thupek khauh tak mai kan hmu,
"Kal ula, chanchintha hril rawh u" a ti.
Kal chhuak theilo te pawhin, mawhphurhna lian tak kan nei
Thilpeka rawngbawl turin Lalpan min ko
Ringtute u, khawnge ro in khawlkhawm dawn?
Thlarau bova i khawlkhawm chu i hum ang;
Rinna a i pek tur chu Lalpan a nghak reng a ni,
"Eng zatah nge min rin ngam dawn le?" a ti.
Ka lo hre ta Lalpa, i sawmna aw hi,
Kristian tin missionary atan min ko;
Ka hlan che, ka neih zawng leh ka taksa,ka nunna nen
I ta ka ni, thisenin min lei tawh si
LALPA TAWNGTAINA
