Engvangin nge mipuite chu,
Hmanhmawh takin an lo kal khawm,
Kawtthlerah leh daiahte pawh,
Chhiar sen loh nunauten an zui;
An thawm mitdelte hriat khawpin? ]2
Nazareth Isua a kal a ni. ]
Ram tin, khawtin, hmun tina mi,
Lo pungin an lo kal khawm thin;
An zingah damlo, mitdelte,
Kebai kal thei lo tam tak pawh;
Eng vangin nge an lo tel ve? ]2
Nazaret Isua a kal a ni. ]
Mitthite an lo nung leh ta,
Pharte tihthianghlimin an awm;
Ramhuaizawlten ngai an awh leh;
Thlipui leh tuifawn pawh a bang, ] 2
Nazaret Isua a kal a ni. ]
Inpeih lote inpeih a hun,
Sual tihchah pawh a hun ta a,
Kan tan khua a lo tlai hma hian,
Hnung lam paiha hma lam umin;
Tawngtai leh pianthar a hun ta. ]2
Nazaret Isua a kal lai hian.
Mipui an thuhmun fo thei lo,
Dam leh dam lote an awm thin;
Tlai luatte hian pawina a nei;
Tling thleh apiang pawi tih a zual
'A tlai lu ta.' an la ti ang, ]2
Nazaret Isua a kal liam ta. ]
TAWNGTAI RUALNA
Tawngtaina a Hriat Turte
Kristian Hospital min pek avangin Pathian hnenah lawmthu i sawi ang u.
Kan Post Graduate zirlaite tan Dr. HS Lalchungnunga (Chandigarh), Dr. Laldinsangi Hnamte (Delhi), Dr. Vanlalhmuna Kompa(Agra), Dr.LH.Lallawmsanga(Vellore),Dr. Lalhmingsanga(Vellore)
Kuminah MBBS zir tur leh Post Graduate zirtur inziak tling kan neih leh ngei theih nan.
Kan Nursing school in hma kan sawn zel theih nan
Kohhranten inkhawmna hun tha kan neih thuai theih nan. Kan ram ringtu nun hi a inthahdah zel loh nan Thlarau Thianghlim hnathawh dil ila.
Thuchah kan ngaihthlak tur hmangin malsawmna dil ila, kan thawhlawmte Pathian hnenah i hlan ang u.
THUCHAH
Thupui : Pathian duhzawng inthawina
- Upa Dr Lalramzauva
Audio
Vawiin Hospital pual Pathianni ah hian Kohhran hote tidamtu kan Lalpa Isua Krista hmingin BCM medical and health department a thawktu leh zirlai zawng zawng aiawhin chibai ka buk a che u.
Vawiin hi Hospital pual Pathianni kan hman thin kha a ni a, kan inkhawm thawhlawmte hospital a damlo rethei zualte pualin Poor Patient fund atan kan la khawm thin a, kuminah hian inkhawmna pangngai leh thawhlawm thawh pangngai kan nei thei lo va, amaherawhchu he retheite pual, poor patient fund ah hian theih ang anga chhunglut thin turin chhungtin te ka han ngen che u a ni.
Kan Hospital hi tunah chuan kum za a lo tling ve dawn tep ta a, Nakkum kum leh lawkahb khian a kum za na Centenary kan tih thin kha kan hmang ve dawn ta reng mai, Pathianin min hruai ang a.
Kan Hospital-ah hian a tir atanga chhiar chhoh zelin doctor thawk tawh 30 lai kan lo awm ve reng tawh a, tun dinhmunah chuan medical doctor 15 leh dental doctor 2, kan vaiin doctor 17 kan thawk mek a, heng zingah hian mi 5 ten, PG kan tih specialist an zir mek a, Tichuan tunah hian Serkawn leh Lawngtlaiah medical doctor 10 leh dental doctor 2 kan awm mek a ni. Tin, Doctor zirlai internship ti mek pakhat lo chhuak tep Vellore ah kan nei a, MBBS zirlai hi 3 kan nei bawk a, hun lo kal zelah chuan doctor tam zawk neiin kan la phuisui chho zel ang tih kan beisei a ni.
Nurse te, Manager lam te leh thawktu pawimawh tak tak dang tamtak an awm bawk a, a chipchiarin kan sawi hman lo ang a.
Nikum 2020 kha kan hriat theuh angina kum lungngaihthlak tak a ni a, doctor duhawm tak tak 2 in chatuan ram min pan san ta a nia, kan khua a har em em a ni. Tin, hripui lengin min han nuai chhova hospital rawngbawlna nasa takin a ti thuanawpin a ti khaihlak ve a. Damlo te pawh an lo kal tha ngam lo va, damlote an tlem avangin kan sum hmuhte pawh a tlem a.
Tin, Kan nursing school pawh zirna In a nih angin khar a ni ve a, chuvangin indaihlohna nasa tak a awm a, thawktu nidanga kan la neih ngai lohte in lak belh te a ngai bawk a, Chutiang chuan engemawchenah hospital rawngbawlna han khaihlakin buai deuh mahsela Pathianin min hruai a vawiin hi dam takin ka thleng a kan lawm hle a ni.
Tichuan, vawiinah Hospital sunday hi mahni awmna hmun theuhah awmze nei leh tangkai taka in lo hman theuh pawh kan duhsak che u a ni.
Awle vawiin hi Pathian ni zing inkhawm kha a ni a, chuvangin naupang pual thawnthu tawi han sawi ka duh a, thawnthu lar tak , mi sawi ka hriat a ni a, hria pawh in awm ve nual tawh ka ringa.
Chhungkaw pakhat hi an awma, an hna ah an buai viau mai a, an nu leh pa, tar chaklo ve tawh chu kan enkawl tha hman lo, kan buai deuh avangin anmahni tan pawh a nuam zawk ang e, tih beiseiin Tar dahna in ah an dah ve ta a , tar ho enkawlna a ni a, an nu leh pa te pawh chuan an lo pawm ve mai a.
Tichuan an ni nupa hna a buai ve tak leh lo chhangchhe chho mek bawk si chuan an nu leh pa tar dahna in a awm chu an va kan zen zen hman lo va, an kan khat telh telh a, mamawhte in nei em, in tha em, tiin an va phone thin a, a, kan tha e, an ti mai thin a. Amaherawhchu a tawpah chuan, Lo kal ula min rawn tlawh teh u, an ti a, Tichuan a pa chu a fapa chuan a va kan a chumi tum chuan a fapa chuan , Kapa engnge in mamawhte a han tih chuan mamawh eng engemaw an lo nei nual mai a, chawhmeh dah thatna tur Fridge te kan neih loh avangin chawhmeh hing te kan ei phah a, Tin, hei AC te kan neih loh avangin khawlum te hi a hrehawm bik em em mai a, Tin thutna tha Sofa nuam deuh te hi kan nei lo va, a han ti ta nual mai a, a fapa chu a hrilhhai hle mai a, ka pa kha leh chen kha heng thilte hi in nei lo tih ka lo hre lo va kan zawh che in kan tha e, in ti mai thin si a, a han ti a.
A pa chuan, Mama keini chu kan ngaihtuahawm lo va, keini tan kan ti lo ve. Nangmah hi I kum a lo tam ve tan a, I lo tar ve dawn hnai tawh a, nakinah chuan helai tar dahkhawmna inah hian I faten an la dah ve ang chenga chutih hunah chuan ka han sawi tak, Fridge te AC te leh eng engemaw kha I la mamawh em em dawn si a ka duhsak vang zawk che in ka sawi a nih hi, a ti e, an ti. Chu chuan a fapa chu nasa takin a inngaihtuah chhuah tir a ni.
He thawnthu ah hian kan zavaia kan zir tur chu, keini kum naupang zawkte hian kan nu leh pa te leh tar te, kan pi leh pu, kan nu leh pa te hi kan enkawl ngunin kan hmangaih hle tur a ni. Chuti lova kan enkawl that tawk loh chuan chutiang bawk chuan kan chungah kan fate, kan tuten an la rawn ti ve dawn a ni, tih hi I lo zir theuh ang u.
Pathian thu kan ngaithla ang a Zawlnei Isaia lehkhabu bung 58 atang hian, “Hei hi chawngheina ka duhzawnga chu a ni lawmni, nghawngkawl hruite hlih sak leh hnehchhiahho chhuah tir leh nghawngkawl tinreng tih tliah sak hi, mahni chaw mi riltamte hnena sem leh rethei hnawhchhuah ho mahni ina hruai hi a ni lawm ni? Mi saruak hmuh a puan vawm leh mahni tisa ang pu laka bihruk loh hi a ni lawmni…” kan kal kan hlek anga a tawpah hian, “ Tichuan I laka lo la chhuak turte chuan hmun hlui chhe tawhte chu an rem leh ang a, chhuan tamtak lungphumah te chuan I rem chho leh ang. Tichuan nang chu a chhe lai siamtha tu, mi awmna tura kawngte siamtha tu an ti ang che.
Thuthlungthar lamah hian chanchintha Luka ziak bung 10 ah khan, chang 25 ah Samari mitha tehklhin thu kan hmu a, thawnthu ngaihnawm tak a ni a, a tluanin kan chhiar lo ang a, a tawpna laite ah khan Lal Isuan dan hremi hnenah “ Chumite pathum zingah chuan suamhmangho tawka vengte chu tu ber nge ni a I rin ? a ti a, Tin, ani chuan “ a khawngaihtu chu” a ti a, Tin, Isuan a hnenah “ Nang pawh chu ang bawk chuan va ti ve rawh,” a ti a.
Tukin zinga thupui ngaihtuah ho atan a ka duh chu “Pathian lawmzawng inthawina” tih a ni.
Pathianin mihringte hi eng anga inthawi turin nge, eng anga chaw nghei turin nge, eng anga Ama rawng bawl turin nge min duh, tih helai thu kan chhiar hmun 2 atang hian chiang takin a langin ka hria a. chutah chuan Pathian hian a hranpa a rau tak mai a amah be tur leh maksak taka inthawi a mite hmuh a langsar zawnga programme chi hrang hrang buaipui turin min duh lem lova, kan mihringpuite, kan rawngbawlna mamawhtu, keini aia dinhmun chhia leh hniamzawk a khawsa te tuamhlawm tur leh tanpui a chhan chhuah ngaite chhanchhuak a, tih dam ngai te ti dam a, tanpui ngai apiangte tanpui tur hian Pathian hian a rawngbawltute hi min ko a ni tih heng kan thu chhiar atang hian a lang chiang em em a ni.
Thuthlunghlui hunah khan inti sakhawmite, Puithiamte leh Pharisaite khan Pathian rawng ka bawl, tiin langsar tak a bawl tum leh langsar taka lan tumin a langsar zawng hlirin Pathian rawng an bawl a, anmahni an inti hrehawma, chaw an nghei a, an inti thur a, kawtthler lun laiah te an tawngtai a, amaherawhchu a taka an nun tak takah chuan tanpui ngaite kha an tanpui lem lova an hel mai mai thin niin a lang a, Samari mitha thawnthu, Lal Isua tehkhinthu mawi leh ropui takah hian, harsatna tawk, suamhmang tawk tanpui ngai chu Pathian mite, Puithiamte chuan tanpui lovin kawng sir lehlamah an hel a, miin engahmah an ngaih loh, Judate phei chuan an ngaihsan loh em em Samari mi khan a neih sengin, a hun hlu tak sengin, a sum sengin suamhmang tawk leh damlo hi a tanpui ta zawk a, chu chu Lal Isua rawngbawlna duhzawng a ni a, nang pawh chutiang bawk chuan va ti ve rawh tiin a thu ngaithla tute a hrilh hial a nih kha.
Tichuan, keini pawhin kan neih sengin, kan harsat phahna khawp rawk thleng pawhin Pathian rawng hi bawla midang kan hmangaihn leh tanpui kan duhna hi ti lang turin Lalpan min phut a ni.
Kristian pasaltha hmingthang tak, tunhnai lawk a mi, a chanchin keini te pawhin kan la hriat phak, hman deuh lawka boral ta, Mother Theressa-i thusawi ropui tak, an tar chhuah thin pakhat hi ka rilru ah a lian hle a, chutah chuan, ( sap tawng a dah a ni a) “ Love till it hurts” a ti a ni, a nat em em thlengin, I tuarna tur khawp thlengin i hmangaih tur a ni, tiin Pathian kan hmangaih dan tur leh Pathian kan hmangaihna midangte chunga kan lan tir dan tur hi min zirtir a ni.
Hei hi a ropui hle a, a langsar chin ngawta rawng bawl lovin kan neih te pawhin tuar khawpin, kan taksa ngei pawhin tuar khawpin Pathian rawng hi bawla midangte tanpui ve tura koh kan ni, tih hi I hre thar leh theuh ang u, Lalpan kan za atan mal sawm rawh se.
