SERKAWN TUALCHHUNG KOHHRAN

PATHIANNI ZING PROGRAMME

10:00 AM, 20th September, 2020

PROGRAMME:

Hla sak hona:Khb No 445: I hun tithianghlim la, Lalpa pawl fo rawh (Thilpek lakkhawmna)

I hun tithianghlim la, Lalpa pawl fo rawh,
Amah chu kumkhuain ring tlat zel ang che;
Pathian fate thian la, chak lo tanpuiin,
Ama malsawmna chu i lo chan theih nan.

I hun tithianghlim la, khawvel a ral mek,
I hun hlu zawng zawngte Isua tan hmang rawh;
Amah i an theih nan Isua en fo rawh,
I thiltih zawng zawngah amah ang turin.

I hun tithianghlim la, Lalpa thu thuin,
A hnen atang chuanin vak bo tawh suh la;
Lungngaih leh lawm laiin amah chu zui la,
Isua lam en fovin a thu ring tlat rawh.

I hun tithianghlim la, i rilru zawng nen,
I ngaihtuah a piangte ama thu thuin;
Hmangaih tuikhur hluah aman a hruai ang,
Van lamah ama rawng i bawl thei thuai ang.

TAWNGTAI RUALNA

Tawngtaina a Hriat Turte
1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
2. Covid19 avangin a huhova inkhawmna la nei thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila.
3. Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin lawmthu sawi ila. Pathian venhimna dil chhunzawm zel ang u.
4. Covid19 veitu zawng zawngte taksa, rilru leh thlarau damna dil sak ila. Anmahni enkawl tute tawngtai sak ila. Covid19 kaihhnawih harsatna tuartu zawng zawngte tawngtai sak ila.
5. Sawrkar, Kohhran leh tlawmngai pawl te tan Covid19 dona kawnga hma fing leh tha tak an lak thiam theihna turin dil sak ang u.
6. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
7. Kan Kohhrana khawhar chhungte leh kan member damlo te Hospital leh mahni in lama inenkawl te tan tawngtai sak ila. Kan thuchah ngaihthlak tur atan Pathian malsawmna dil ila, kan thawhlawm te Pathian hnenah kan hlan bawk dawn nia.n hi kan ram siam thatna tur bul a ni. Pathian Thlarau Thianghlim khawih nawnna an chan theih nan
8. Kan thuchah ngaihthlak tur atan Pathian malsawmna dil ila, kan thawhlawm te Pathian hnenah kan hlan bawk dawn nia.n hi kan ram siam thatna tur bul a ni. Pathian Thlarau Thianghlim khawih nawnna an chan theih nan

THUCHAH

THUPUI: Lawmna hlirah ngai rawh u

Music Track

Kohhran member te kan Lalpa Isua Krista hmingin chibai ka buk a che u.
Jakoba 1:2-5 kan chhiar ah khan "Ka unaute u, in rinna fiahna chuan chhelna a siam tih hriain, thlemna tinreng in tawh hunin lawmna hlirah ngai rawh u" tih kan hmu a.(I Petera 1:6,7 ah pawh khan he thu ang tho hi kan hmu a ni.) Kristiante tana thil tih har tak mai, Jakoba’n a lehkhathawna ti tura min tih chu- thlemna tinreng kan tawh huna lawmna hlira ngaih hi a ni awm e.
Eng vangin nge thlemna a lo kal huna lawm tur kan nih tlat mai le? Thlemna, harsatna, lungngaihnate hian ringtute min tlakbuak thin a, chungah pawh chuan lawm tura tih kan ni tlat si a, a mak hle mai!

Helai Bible thu hi chhiar liam mai tur nge, ngaihkhata ngaih mai tur nge, a tak taka hman tur tihte pawh zawh mai a awl rum rum awm e. Mahse, ‘A taka kan hman tur’ a ni ngei ang. Malsawmna tam tak a inphum pawh a ni ngei ang. Chuvangin helai thu hi i han zirho dawn teh ang.

He lehkhathawn khal el awl tak ziaktu hi tunge a nih reng reng le? He lehkhathawn ziaktu hi Jakoba a ni a. Bible ah hian Jakoba an awm ve nual a, he lehkhathawn ziaktu hi chu Jakoba, Isua Krista unaupa a ni. AD 60-na bawr vela Jerusalem kohhran hruaitu a ni. A lehkhathawn hi a khalin a tlang hle a, a ziaktu Jakoba hi Bible a thufingte leh Amah Isua Krista thusawite hian a hneh hle a ni tih he lehkhathawn atang hian a lang thei a ni. Amah hi , a tak ram duh mi a ni a, mi tlang a ni a, thu mai ni lova a taka thil hmuh duh mi a ni. Tunlai tawng takin mi practical tak a ni. “Rinna chu thiltih nei lovin amah chauhvin a awm chuan thi a ni” titu kha a ni.

“Thlemna tinreng in tawh hunin lawmna hlirah ngai rawh u” a ti mauh mai si. Heta thlemna a tih hi enge a nih chiah? Thlemna kan tih hi Setana’n min tuartir a min sawisak a tumna a nih laiin Pathian lam atang chuan min fiahna leh Amaha thuk zawka kan innghahna hmanrua alo ni ve leh thung thin. Hei hi Joba chungchangah pawh kan hmu awm e.

Heta “thlemna tinreng” a tih hi a tawng bul lama a awmzia chu, suala pawt lut tura thlemna nilovin, tih chakna leh tih thianghlimna hmanrua zawk a ni. Tluk tir a tum a nilova, sang taka mu anga len tir a tumna a ni.

Jakoba hian a lehkhathawnah hian chibai bukna an sawi zo chiah tihah he thu hi a sawi hmasa nghal vat mai hi a ngai pawimawh viau a ni tih a lang. Ringtu tam tak hi chuan Isua zui tura thutlukna kan siam hnu hian engkim hi tluang purh mai tura ngaihna lian tak kan nei thin a, hahdam leh thlamuang taka awm tawh tur emaw kan inti deuh mai thin. Tichuan, fiahna kha thlemna angin emaw harsatna angin emaw a lo thlenin kan hrethiam lo va kan vui fo thin a ni. Vui chu sawi loh Jakoba chuan “lawmna hlira ngai turin min ti tlat mai”.

Ringtute hian he thlemna hi kan tawk ngei ngei dawn a ni. Kan Pathian thu hian in tawh chuan ti lovin, in tawh hunin a ti a. Thlemna /harsatna hi kan tawh palh hlauh chuan tih lam ni lovin, kan tawk ngei ngei dawn a ni.
Chutiang bawkin Jakoba hian “thlemna” ti mai lovin “thlemna tinreng” a ti kher a ni. Thlemna, harsatna, fiahnate hi kawng khat chauhvin a lo kal dawn lo. Kan rin loh leh beisei loh lam atangte hian a lo kal tup tup dawn a ni. An sawi thin a, thlemna/harsatna hi a fun hrang hrang, a rawng hrang hrangin kan hmaah hian alo kal ngei ngei thin a ni.

Tichuan kan hriat tur ni ta ber chu, thlemna leh fiahna kan tawh hian sawisel tur kan ni lo va, ringhlel tur kan ni lova, hlau tur kan ni lo va, thinrima lungawilo tur kan ni lo a ni. Tin, kan tawngpawng tuar chhuah ngawt tur pawh a ni bawk hek lo. Chumi a hnekin “Lawmna hlirah kan ngai tur a ni”. Kan rilrua lo lang thin leh kan duh thin letling chiah ti turin min ti tlat mai!

Kan nuna thil duhawm lo a lo thlen hian lawmna tura ngai lo hian thil danga ngaih zawk a awl hle mai. A chang chuan thil diklo (fair lo) kan chunga lo thlengah kan ngai a, chutiang taka hmachhawn chu kan tum thin. A chang leh Pathian min hremnaah ngaiin, kan chungah Pathian a thinur tak avanga Pathianin min kalsan avanga kan chunga thil thlengah kan ngai bawk. A chang leh kan tuar chhelzia tarlana remchangah hman tumin kan mihring chaknaa beih let chiam turah te kan ngai a, kan tisual der fo bawk.

Thlemna a lo kal hian kan lo hmachhawn dan hi a pawimawh em em a, chumi azir chuan rah duhawm tak kan hmu thei a ni.

“Lawmna hlirah ngai rawh u” a tih hian, kha thlemna, harsatna/fiahna a ni emaw, kha thil lo thleng kha a lawmawm em mai tihna lam a ni lo a. Tuarnate kha lawmawm kan ti tur a ni lo. Chutianga kan lawm a nih chuan kan chiang lo hial zawk a ni mai thei a ni.

Jakoba’n “ngai rawh u” a tih pawh hian he thlemna chunga kan rilru put dan tur a sawina a ni.
Jakoba chuan Thlemna hi rinna fiahna a ni a, chu chuan chhelna a siam a ni a ti a. Heta chhelna a tih hi hreawm tuar theih viauna satliah a ni lova. Thil tha leh chhenfakawma chantir theihna a ni. He rinna fiahnain chhelna a pek changtute chuan thil harsa lehzual a lo thlen hunah pawh an paltlang thei thin a ni.
He rinna fiahna hian a tawp khawkah chuan thil duhawm tak tak a thlen thei a, chung chu kan lawm chhan tur chu a ni, chungte chu:

Famkimna kawngah a pen tir: Rinna fiahna hian mi famkimna lamah ti thanglian zelin, khawvela dah a nih chhante ti hlawhtling thei turin a buatsaih thin a ni. Nitina kan chunga thil thleng kan hmachhawn dan azir hian Pathianin kan hmaa tih tur a ruat belh zel hi kan ti hlawhtling thei dawn a ni.

A Puma himah a siam: Pathian hnena halral thil hlan tur chu a puma him a nih a ngai thin. Rinna fiahnain a siam chhelna hian, a tawpa a pek duhawm em em chu ni tina zawi zawia sual hneh theihna, a tawpah Pathian anna a hruai luh a, Pathian lawmtlaka inthawina famkim hlan tura buatsaihna a ni.

Engmah tlachham lovah a siam: Engmah tlachham lova siam tih hian a tum tak chu, mi, a nih tur ang a nih phak lohna tur atanga chhanchhuaha hnehtu nih theihna pek a, Isua anna nuna hruai thlen a ni.

Chutichuan, kan hmuh chian tak em em mai chu, thlemna kan tawh hian kan tluksawp derna tura tih a ni lova, ringtu tha zawk kan lo nih theihna tura Pathian remruat, malsawmna inphum haichhuahna hmanrua a ni tih hi a ni. Thlemna hi chaklova min siamtu tur a ni lova, chak zawka min thuamtu tur a ni. Min hneh der tura ruahman a ni lova, hnehtu dinhmun min siam saktu hmanrua a ni. Chuvangin thlemna kan tawhin kan lungngai mai tur a ni lo va Lawmna hlirah kan ngai zawk tur a lo ni.

Thlemna leh harsatna lo kalte hi kan indelh tluktir der dawn nge Jakoba leh Petera te min duh ang hian lawmna turah kan ngai ve thei dawn? Zawhna lianpui awm ta chu he thil hi “Kan ti thei ang em le?” tih a ni. A chhanna dik leh tawi tak chu, “Keimahni chuan thei lo ve” tih a ni. Pathian atanga finna kan mamawh a ni. Keimahni chuan finna leh hriatthiamna tak tak kan nei si lo.

Jakoba lehkhathawn kan chhiar zawm zel chuan, (Jak 1:5) “In zingah tupawhin finna a tlakchham chuan hau lo leh ui lova pe thintu Pathian dil rawh se; chutichuan a hnenah pek a ni ang” tih kan hmu a. He finna hi kumina Sunday school -Thufingte a FINNA kan tih kha a ni. Pathian atanga chhuak finna kha a ni.

He finna dil tur erawh hi chuan thil pahnih kan hriat a ngai a:

1. Pathianin a pek dan kan hriat reng a tul. Pathian thil pek dan hi hau lo leh ui lovin a pe thin. Beisei letna nen a pe lo va, a hmangaihna luangliam atangin a pe thin. Ama hamthatna atan a pe lo va, kan tana tha tur ang zelin min pe thin. Thilpek hi a mizia leh nihna a bet tlat a ni.

2. A diltu dil dan tur kan hriat reng a tul. Rinhlelhna tel lovin kan dil tur a ni. Pathianin a pe thei chiang em em a ni tih leh thil tha chu a pe duh em em a ni tih ringhlel lovin kan dil tur a ni. Ringhlel chunga kan dil chuan kan thil dil kan hmu lo vang tih min hrilh chiang hle a ni.

Tichuan, kan nuna kan thil tawn hrang hrang, thlemna emaw harsatna emaw kan tana thil duhawm taka kan chantir theihna tur chu Pathian hnen ata finna kan dil hi a ni. Pathian thilphalna leh thiltihtheihna ringhlel lo chungin kan dil tur a ni. Chumi Pathian pek finna atang chuan thlemna leh harsatnate hi Lawmna hlirah a ngaih theih a lo ni dawn a ni.

Covid 19 lo thleng te, thihna te, khuarel chhiatna lo thleng te hi kan lawmna tur a ni em? Covid 19 te, thihna te, chhiatna te avang hrim hrim hi chuan lawm tur chu a ni hauh lo ang. Amaherawhchu Rom 8:28a kan hmuh angin kan Pathian, Amah hmangaihtute thatna tura engkima rel felsaktu hian he covid boruakah pawh hian kan thatna tura remruat fel tak hi a nei ngei ngei ang tih hi i pawm thlap ang u. Chumi ringtu chuan Covid 19 avanga lawmthu sawi lovin, Covid19 a leng chung pawhin lawmthu a sawi thei dawn a ni. Thihna avangin a lawm bik reng reng lo vang a, amaherawhchu thihna thlen lai pawhin a thinlungin Pathian a fak thei dawn a ni. Chu Pathian thutiam, rinna nunga a rin vang a ni. Hei hi a tawi zawngin Pathiana lawmna a ni. Chumi atang zawk chuan engkim hi lawmna hlirah a ngaih theih zawk a ni.

Khawvel thilah leh thil thlengah hian a tha hlang a awm lo ang bawkin a chhe hlang a awm lo. Harsatna kara lawmthu sawi thei tur leh lawmna hmu zel thei tur erawh chuan Isua ke bula kan thut tam a, a aw kan ngaihthlak takzet a ngai a ni. Chutichuan Lalpaa kan lawmna a pung zel dawn a ni.

Ringtu philosopher ropui CS Lewis chuan heti hian a sawi. “Lal Isua ringtute leh ringlotute kan danglamna em em chu ringtute tan chuan HLIMNA hi a lairil ah a awm a, lunngaihna hi a pawnlangah a awm thung. Ringlotute tan chuan hlimna hi a pawnlangah a awm a, a chhungrilah lungngaihna a awm thung. A chhan chu ringlotute chuan hlimna leh lawmna tam tak hmu ve bawk mah se chhungril lamah fello a awm tlat avangin an nun a ruak a, hlimna tak tak an hmu thei lo. Ringtute tan erawh chuan pawn lamah lungngaihna tur tam tak awm ve tho mah se mihring nuna pawimawh ber, an thlarauvin a zawn ber chin felin a awm tlat a, chuvang chuan hlimna leh lawmna tak tak an nei thin”, a ti.
Hla phuahtuin “Amah nen kan nih phawt chuan, Damchhung ka tawh apiang hi, Lawmna tur hlir alo ni si. “ a lo tih hi thinlunga tawmpuitu leh a taka hmangchhuaktu kan nih theih nan Pathianin kan thuchah malsawm rawh se. Amen.

Hla sak hona:Khb No 404 : Lalpaah lawm la, a zahngaihnna vang chuan

Music Track

Lalpaah lawm la, a zahngaihnna vang chuan,
Pawl ropui tak chu min thlang a;
A thihna tlanin eng nge kan hlauh vang le?
Isua kan engkim a ni a.

Pathianin min tan (3)
Tu nge min do thei ang?
Tu in nge?
Tu nge min do thei ang, do thei ang?

Lalpaah chak la, a theihnaa lawmin,
Rinawm takin fak deuh deuh la;
Thudik tan tlat rawh, Setana'n a beihin,
Isua kan chakna a ni ang.

Ama thu ring rawh, a thutiam nghet tak kha,
Kristaah 'Amen' a ni e;
Lei hi ral mah se, a ral ve dawn lo ve,
Chung chu Baibulah a chuang e.

Lalpaah awm la, a thuneihna ring rawh,
Chatuan nun bul chu a ni a;
Thla chak lo leh khur, Lal Isua kuta awm,
Tu man an tawk thei tawp lo vang.