Vawiin thlenga Pathian malsawmna leh venhimna kan chan avangin lawmthu i sawi ila, midangte tana malsawmna kan nih ve ngei theih nan Pathian hnenah i inhlan ang u.
A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
Covid 19 avanga thi chhungte tan te, a bik takin kan kohhran rawngbawltu pawimawh tak tak kalsan tak chhungte tan.
Lockdown kan hmachhawn leh dawn a, fimkhur tak leh thuawih taka kan awm thiam theih nan.
Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
Kan thawhlawm, inkhawmna leh keimahni Pathian hnenah I hlan ang u.
Sam 41:1-2
Retheite ngaihtuah mi chu a eng a thawl e, mangan ni chuan Lalpan a ni chu a chhanhim ang. Lalpan a ni chu humhimin a tinung ang a, leiah hian malsawmin a awm ang: Amah dotute duh duha tihah pe suh ang che.
T
Sam Marka 10:21.
in, Isuan amah chu a en a, a hmangaih ta a, a hnenah, “Kawng khat i la bak e; kal la i neih apiang hralh la, pachhiate hnenah pe rawh, chutichuan vanah ro i nei ang; tin, lo kal la, mi zui ang che,” a ti a.
THUCHAH
Thupui : RETHEITE NGAIHTUAH MI CHU MALSAWMIN A AWM ANG
- Rev R Lalbiakliana
Audio
Naupang pual:
Bawnghnute no khat (A cup of milk)
Tuk khat chu chhungkaw rethei em em a naupang kum sawm mi lek hi thil zuarin a kal a, a rei deuh hnu chuan a riltamin a tuihal hle mai a. In pakhatah a va lut a, tui in tur a dil a, chuta hmeichhe naupang lo awm chuan a khawngaih em em avangin ama in tur bawnghnute chu a pe a, mipa naupang chuan a la in phak ngai loh bawnghnute chu a in a, tui a tiin a lawm em em mai a, hlim takin a kal leh ta a. Kum tam tak hnuah chuan nu pakhat hi damdawiinah sum tam taka enkawlin a awm a, a chhuah dawn chuan a inenkawlna man (bill) chu a lo tam em em mai a, pek tur daih pawisa a nei ta lo a, lungngai taka a awm lai chuan a hnenah doctor pakhat a lo kal a, a hnenah, ‘I bill zawng zawng chu bawnghnute no khat avangin pektlak vek a ni e’ tiin a hrilh a, lawm avanga mittui luangin chungin damdawi in chu a chhuahsan ta a. (chu doctor chu hmana naupang thil zuartu kha a ni a, dam lo nu chu hmana hmeichhe naupang bawnghnute lo petu kha a ni). He thu hian rethei leh harsate tanpui thatzia leh hlutna min zirtir a, naupangte pawhin kan theih tawkin midangte kan tanpui thin tur a ni.
Tunlai khawvelah hian mi rethei leh chan hai, tanpui ngai an tam em em a, chubakah chhiatna hrang hrang a thlen reng avangin chung mite tanpui leh chhawmdawl tura ngenna leh sawmna thu hi englai mai pawh hian a ri reng a ni ber. Tunhnai a zirchiannain a sawi danin kawvelah hian rethei (extreme poverty) hi maktaduai 689 an awm a. Tun covid 19 hian 2021 chhungin mi rethei maktaduai 150 a siam belh dawna hriat a ni. Mizoramah hian kum 2021-ah mihring 1,331,921 kan awm, survey in a tarlan danin chhungkaw 56,584 te chu mi rethei an ni. Tun hripui leng avangin chhungkaw tam tak chu rethei list-ah an lut mek bawk.
Tukina kan thupui chu ‘Retheite ngaihtuah mi chu malsawmin a awm ang’ tih a ni a, he thupui hi kan Pathian thupui a ni pawh kan ti thei ang. Bible-ah hian rethei leh chanhaite chhawmdawl tura zirtirna hi kan hmu tam hle, mi rethei/rethei tih thumal hi vawi 200 chuang kan hmu, Bible hian hemi tlukpui, fahrah leh hmeithai tih a hmang tam em em bawk. Kan Pathian hian rethei leh chanhaite hi a hmangaihin a ngaihsak em em a, chuvangin mi retheite Pathian tih pawhin lam ila a inhmeh hle ang. Pathian chuan retheite ngaihsak chu a lawmzawng tak a ni a, chu hna pawimawh tak chu thawk turin a mite chu a hrilh a ni.
Retheite tanpui leh ngaihtuah hi keini kristiante chauh ni lovin ringlote pawhin a pawimawhna an hria ni mai lovin nasa takin an zirtir ve tho mai. Buddhism chuan thupek sawm zinga pakhat-ah an nei a, Islam chuan an pathian tilawm tura miin thil phal taka a pek chuan pathianin a rul leh ngei ang tih chiang takin Quran 34:39 ah ziah a ni. Khawvelah he rawngbawlna pawimawh tak hi miin an thawhna turin nasa takin miten an thawk (campaign) a, Pawl tam tak a piang bawk, chung avang chuan mi rethei sang tam tak ten tisa leh thlaraua chhanchhuahna an chan phah reng a, thawh tur tam tak a la awm reng bawk.
Retheite ngaihtuah lama kan kohhran (BCM) hmalakna langsar deuh te lo tarlang ila. BCM Assembly level atanga kan thawhna langsar ber chu Social Concern Department te, Medical & Health leh Relief & Development Department hmangin a ni deuh ber. Social Concern Dept hnuaiah hnuchham enkawlna (BCO) kan nei a, heta tan hian kum tin cheng nuai sawm li chuang budget siam thin a ni. R&D dept hian Grant-in-Aid & Relief-ah kumin hian cheng nuai sawmnga dah a ni bawk. Heng bakah Charity Fund leh tun hnaiah ‘Covid Relief’ kan siam thar bawk (covid relief hi BCM thawktu hri veite pual a ni). Tin, hospital kal tlangin Poor Patient Fund kan nei a, hemi hmang hian damlo an awmna man pe thei lo tam tak kan peksak thin bawk. He damlo rethei tanpuina atan hian nikum (2020-2021) khan damlo 339 tan Rs.31,51,830/- pekchhuah a ni. Kumin (2021-2022) kal mekah mi 63 tan Rs.7,94,060/- mi 63 tan pek tawh a ni bawk. ABC leh Bial ang in kan che chhuak lian vak lo, Tualchhung kohhrante R&D committee hmangin kan che chhuak zung zung thei a, hei hi a lawmawm em em.
Tunlaia hripui leng avanga harsatna nasa tak kan tawh mek lai hian he rawngbawlna tul zia leh pawimawhzia a lang chiang hle. Rethei leh harsa, chhuanchham tam tak an awm mek a, chung mite zawn chhuah a, tanpui turin kohhrante pawh kan in san mar a kan sum neih ang angte pawh chhawmdawlna turin kan ui loh a hunin a tul hle. ‘Lal nihna i lo chan hi hetih hun atan ngei hian a ni dawn lawm ni’ (Esther 4:14) tih ang khan kohhran nihna tak lantir hun a ni e. Puithiam leh Levia chi ten an programme kal lai ti tura tanpui ngai an kalsan anga ti lovin samari mi ang khan suamhmang tawkte i tanpui ang u (Lk.10:37). Pathian thu chuan “Chutichuan remchang hun kan neihzia ang zelin mi zawng zawng chungah thil tha i ti ang u, rinna chhungte zinga mi chungah i ti deuh ber ang u” (Gal.6:10) tiin min hirlh a, chuvangin chhawmdawlna kalpui danah pawh kan chhungte, kan kohhrante, kan lamhnaite kan ngaihtuah hle tur a ni.
Tunlai hian he rawngbawlna lamah hian hma kan sawn viau a, a lawmawm hle. Mi thahnemngai ten social media hmangin tanpui ngaite tan vehbur an khawnsak thin pawh miin an ngaipawimawh thin hle. Entirna pakhat chu- tunhnaite a covid 19 vanga thi (Pi B. Lallawmzuali) ralna tur leh a kalsan fate puala vehbur khawnah June10, 2021 thleng khan cheng 12,20,560 hmuh a ni a, a ropuiin a lawmawm hle. Mi rethei, fahrah leh piangsual tanpui ngaite kan puih hian anmahni chauh ni mai lovin amah kan Lal Isua tan kan ti ani tih amah ngeiin ti hian a sawi. “Heng ka unau te berte zinga mi pakhat chunga in tih chu ka chunga ti in ni” (Mt.25:40) tiin. Chutih laiin kan thil tha tih (thilpek leh rawngbawlna dangte) mi hriat leh hmuh tura mahni in phochhuah thuah erawh tihawm leh tih awmlohte kan thliarthiam a tha hle. Lal Isuan, “Nang erawh chuan mi hnena englo i pekin, i kut ding lamin a tih chu i kut vei lamin hre suh se” (Mt.6:3) a ti si a.
Mi retheite tanpui ve tur kan nih kan tih lai hian mi thenkhat chuan mi lian leh hausate tih tura dah a mahni in rel awl mai hi awl tak a ni. Midangte thilpek pek tur nei lo khawpa rethei hi an awm lo tiin an sawi thin. Kan theih tawk erawhchu a in ang lo thei hle ang. Bible zirtirna hian a tam lam aiin kan tih leh tih loh lam hi a ngaih pawimawh zawk a ni tih hria ila. Tin, kan harsa emaw rethei hle nia kan inngaih lai hian keini aia rethei leh harsa hi an lo awm teuh zel.
He rawngbawlnaah hian mimal leh chhungkua anga kan luanchhuahnate sawi tur kan nei em? mahni theuh in zawt ila, thenkhat chuan sawi tur kan nei lo hle mai thei! Retheite kan tanpui theih dan hi pawisa kher lo pawhin kawng tam tak a awm thei. Kan thawhpui pakhat chuan ‘ka bazarin a zuartute tanpui ve nan ka lei teuh a, midangte ka pe ve leh thin’ a ti. Upa M. Thansiama chuan bazara chawhmeh zuarte a dawn ngai loh bakah an chhiar aia to in a leisak thin tih a sawi. Shillong kan awmlai khan mi pakhat chuan kutdawh a hmuhin pawisa; a tlem emaw a tam emaw engmah pe lovin a kalsan ngai lo tih ka hria. Hengte hi inenfiah nan hmang ila. Pathian thu chuan “Mi rethei hneh chhiahtu chu a Siamtu hnehchhiah a ni a, tlachhamte khawngaihtu chuan a chawimawi a ni” (Thufingte 14:31) tiin min hrilh. Thu leh hla hmanga Lalpa chawimawi thiam lote pawhin he rawngbawlna hmang hian kan chawimawi thei a lo ni.
Khawvelin mi retheite tanpui tura a zirtirnaah a petu lam chanvo aiin a dawngtu mamawhna a sawi ber thin. Thilpek (giving/charity) tih awmzia pawh hi ‘a mamawhtute hnena phut let engmah nei lova tanpuina kan hlan hi a ni’ tiin an sawi thin. He rawngbawlna hi kristiante chauh lo pawhin an tuipui em em a, mi hausa leh mi lar (celebrity) tam tak pawh he huangah hian an inhmang nasa hle. Tin, mimal bakah ram leh pawl ho bakah chhungkuaa che chhuak pawh tam tak an awm. Engpawhnise, kan theih tawk ang theuh a retheite tanpuina hna kan thawh chuan khawvel nuam zawk (better world) kan siam ngei ang.
Kan thupuia kan hmuh angin retheite ngaihsakna chuan an tan malsawmna a thlen rualin a puitu pawhin malsawmna a dawng ang tih a ni, chutih rualin kan ngaihthah erawh chuan tlakrannain a zui dawn a ni. Mi uikawm leh thilpek hlan ngailote nun aiin mite tanpui thintu nun chu a hlim zawk fo thin. Thilpek hlan thintu chuan pek avanga hlimna (joy of giving) an chang thin. Pathian thu chuan, “Mi thilphal nunna chu tihthauvin a awm a, tui leih thintu chuan mahni pawh a inleih a ni” (Thufingte 11:25). “A sem darh a, retheite hnenah a pe a, a felna chu kumkhuain a awm reng ang” (Sam 119:9) tiin min hrilh.
Ringtu ten retheite ngaihtuah chu kan tihtur (duty) ni mai lovin malsawm dawnna a ni tih kan hriat rualin lawmman it a pek tur erawh a ni lo. Hei hi khawvel zirtirna lam chuan a thlen phak chiah loh laiin he leilung dan atang pawhin petu chuan engtikawng emaw tal chuan malsawmna an dawng tho thin.
Kan thupuia malsawmna tih hian hmuh leh khawihtheih thil (material) lama hausakna lam ai mahin rilru leh thlarau lama hausakna, lungawina leh hlimna hi a sawi uar fo zawk. Retheite ngaihtuahtu chuan hmangaih lettu a nei a, thian tha a siam a, amah tanpuitu a insiam bakah vanah ro a khawl khawm thin.
‘The Power of Giving’ tih ziaktu chuan, retheite tanpuinain kan nun ngei hi a siam tha thei tiin a ziak a, ‘mite tanpui hi mahni tan leh midangte tana kan tih theih hlu leh tha ber chu a ni’ tih a ni bawk. Pathianin mihringte min siam dan rengah pawh tumah hi mahni chauhva nung thei kan ni lo, in tanpui tawn a, kan thil neih hrang hrangte in pe (share) tawn tur kan ni tlat mai. Pe rawh u, chutichuan pekin in awm ang, thahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dawn si che u a (Lk. 6:38).
A tawp berah chuan mi tin tan malsawmna emaw anchhia dawn theihna tur a awm a, thlan tur dik i thlang theuh ang u. Chu chu hei hi a ni - “Mi rethei thil petu chu a tlachham lo vang a, maimitchhinsantu erawh chuan anchhia nasa tak a dawng ang”. (Thufingte 28:27).
LALPAN A THU KAN SAWITE MALSAWM RAWH SE.
