THUCHAH
THUPUI: “Kan ram mamawh”
- Rev.Sangliankhuma Chinzah
Tukin zinga Pathian thuchah sawi thei tura huntha Pathianin min pek avangin Pathian hnenah lawmthu ka sawi a ni.
Pastorte leh Evangelist thenkhatten Pulpita Pathian thu an sawi changin kan ram sualna tam tawh ziate an sawi lang fo. Kan rama sualna tam tawh zia an han sawi tak tak hi chuan Mizoram hi awmna tlak pawh a ni tawh meuh thin lo. Chutih laiin khawvel pumpui leh kan Mizoram ngei pawh Civid- 19 avangin kan buaia, mipui thinlungah hlauhna leh thlaphanna a awm a.Mizoram pumpuia total lockdown an neih dawnte phei khachuan ; Mizoram mipuite chu kan buaiin Panic buying kan nei a a hri kai kha kan hlau em em vek a nih kha.Dt 28/10/2020 (Wednesday)-ah phei kha chuan Covid-19 avanga Mizoramah mitthi kan lo nei ve ta reng mai a, a va pawi tak em.
Hetiang hun harsa tak kan tawh lai hian Mizoram hian engthilte nge a mamawh le?
1. Mi thil phal :-
Bible pumpui kan en chuan Pathian mi hman tak tak hote hi mi
thilphal leh tanpui ngaite tanpui thintu an ni fo mai. Pathian hian mi kawm lutuk leh duham lutuk te hi a hmang duh meuh lo.Khawvel leh kan ramin hripui kan tuar mek lai hian kan khawtlangahte, kan thenawmahte tanpui ngai an awm ngei ang. Heng tanpui ngaite hi kan tanpui loh chuan tunge tanpui chuang ang.
Luka 10 : 25-37-ah chuan Samari mitha chungchang kan hmu a ni. He Samari mi tha hian a hmelhriatpawh nilo, an chhungte pawh nilo, tanpuingai a hmuh khan a kal pe thei lova,a sa chungah a chuantir a, khualbukah a kalpui a, a awm mante a pe vek bawk a ni kha.Lal Isuan dan hremi hnenah chuan,
“Nang pawh chutiang bawk chuan va ti ve rawh,” a ti a ni.
Covid-19 hri hi a rem mai hrih lovang a, pun lam a la pan zel ang. Kan Kohhran memberte leh kan khawtlang a mithenkhatte hi chuan tanpui an la ngai tawlh tawlh mai thei.Hetih hunah hian Kohhran leh khawtlanga mite hian tanpui ngaite hi i tanpui zel ang u. Lalpa hnena tanga malsawmna tamtak kan dawnte hi kan chhungkaw tan chauh ni lovin, midangte malsawmna lo ni rawh se.
“ Pe rawh u, tichuan pekin in awm ang,” tih hlain a lo sawi ang khan heng hunharsa tak kan hmachhawn mek lai hian kan ram in a mamawh chu mi thilphal te hi an ni.
2. Mi rinawm leh thudik sawi ngam:-
Mizote hian rinawmna hi kan va tlachham sawt em.Sum leh pai kan hmuh theihna a nih dawn phawt chuan dawt sawite hi kan hreh vak tawh lo niin a lang.Kan faten hna dil sela, a ti theitute hnenah kan sawipui a.Contract hna kan hmuh theihna a nih dawn phawt chuan Politiciante pawh kan be mawlh mawlh tawh a nih hi.
Pu Manzuala kha Mizoramah Chief Secretary a nih lai khan sawrkar hna lak naah memberaah a thu ve dawn a. A fanu chuan, “kapa vawiina sawrkar hna in lak turah khan ka dil ve a, min la ve rawh aw ,” a ti a. Pu Manzuala chuan, “ i tlin chuan kan la ang che anga, i tlin loh chuan kan la lovang che. Chief Secretary fanu i nih avang ringawtin kan lak na tur chhan che a awm lo,” zu ti a. A fanu tan khan duhsakna a lantir lo reng reng a ni. Hetiang ang midik hi kan ram hian a va mamawh tawh tak em.
3. Mi chanchin a tha zawng a sawi thin:
Khawvelah hian mizote ai baka inrel ching hnam hi kan awm kher lovang.Kan
thiante, kan thenawmte, kan thawhpuite kan rel kan rel thin.
1.In thar an sak in, an ei ru a ni ang kan ti.
2.An faten sawrkar hna thar hmu sela, an ni chhûngkua chuan Politician hmel hriat an ngah em a lawm kan ti leh mai.
3.An fate sual deuh sela,a nu leh a pa pawh a sual em a lawm, a faten an chhun a nih saw kan ti leh mai bawk.
4.Nikum kha Compensate lak hunlai a ni a, Zobawk, Tawipui, Thingfal etc ten compensate an la chur chur mai, an lawmpui hle a ni.Mahse, titia ka hriat dan chuan nuai 20/30 la ho pawhin, kei chu ka la tlem bik, ka ram a zau nen, kei aia ram nei zim zawkin a la tam zâwk tih thawm riva hriat tur a
tam leh hle mai.
Mizoram Kristianten kan mamawh ber ni a ka hriat chu mi dangte fak leh an chanchin a thalai sawi thin hi a ni.Kan inrel kan inrel a,kan thihni a ruang chungah erawh hi chuan,kan in fak leh nasa em em si thin. Kan ruang chunga infak vak thin lo hian kan damchhung hian i inchawimawi zawk thawh thin teh ang u.
Pastor-ah kum 20 chuang fe ka thawk ve tawh a,Pastor posting an siam dawnin Pastoral Committee memberte hnenah vawikhat mah chutah /khatah chuan min dah ve tawh te u ka la ti miah lo. Pathian rawngbawl turin ka in pe tawh a, min dahna apiangah hian ka kal zel dawn a ni tih hi Pathian hnena ka in tiamna a ni tlat a ni.
1 Lalte 19:18-a Pathianin Zawlnei Elija hnenah, “Israel ramah hian Baal hmaa la thingthi ngai lo leh la fawp ngai lo mi sangsarih ka tan ka zuah dawn a ni,” a tih ang khan kan ramah hian mitha leh rinawm an va la tam em. Krista avanga tuar ngam,Krista avanga rethei ngam nih te hi i hlau lovang u.
“Krista avanga ropuina chuah hi chang tur kan lo ni lo,”
4. Mahni dinhmun ang zela lungawi ching kan mamawh:-
Tirhkoh Paula chu lehkhathiam leh mi inzirsang a ni.Khawvel lamah tlan duh sela chuan in leh lo tha tak neiin nuam takin a awm thei.Mahse, khawvel ropui leh mawinate ai chuan Krista rawngbawl a thlang zawk a, khawvel lama thlir chuan a rethei a ni. Mahse Paula chuan, “Engkim ka neia ka ngah a ni,” zu ti thei a.Mi fate hi chu an thil neihah an lo lungawi a, an hlim
em em thin.
Khawvel hi materialismah a tlan chho tam tulh tulh a, kan Mizoram ngei pawh hi in leh lo tha, sum leh pai ngah etc-ahte kan in tlan siak tan ta. Sum leh pai ngah hi ka sawisel reng reng lo, mahse,kan in leh lo din nate, sum leh pai kan lak luh dante hi a thianghlim tur a ni.Kristian piangthar tha kan nih avang ringawt hian kan rethei bik tur a nilova, Lalpa zarah kan thawhrim chuan kan hausa ve thei tho a ni. Mahse, mi thenkhat chu thenawm leh veng ten car thar, in leh lo tha etc an neih avang ringawta unfair mean atanga neih kan tum ve ringawt te hi a dik ber em.
Kan Mizoram zimte a kan mamawh em em mai chu mahni chantawk a lungawina neih hi a ni ta.He khawvelah hian tumah kan kumhlun dawn lova, he khawvel hi kan la chhuahsan ang. He khawvel kan chhuahsan hma ngei hian Lal Isua hi Lal leh Chhandamtuah nei ila, chutiang mi kan nih chuan midang thil neih kan it lovang a, khawvela mi hlim thei ber kan lo ni mai dawn a ni.
Khawvel miten min thlir reng,
Ka nu kawng har tak hi Beisei tur nei lo min ti
An va hre lo em,
Chhungrilah hian ka hlim si
Aw min han hmu thei se
Ka lawm e,Lalpa i malsawmna vangin.
Hausakna chhuan tur ka nei lo,
Silhfen tha nei lovin.
Sum leh pai tam ka nei lo,
Mahse, nang ka nei.
Chu mawlh chu ka tan a hlu ber, Miten hmu lo mahse;
Ka lawm e Lalpa i malsawmna vangin.
5. Kohhran leh khawtlangah hruaitu tha kan mamawh:
Kan Mizoram zimteah hian Kohhran hrang hrangte hi a va tam tawh tak em.Kan Kohhran theuhte hi tha ber kan ti a,beramte hi kan inruk sak fo a nih tak hi. Hetiang ram zimte a, Kohhran pawl hrang hrang tam ta lutukte hi tumawh nge ni ang?
Kan ramah nitinHIV/AIDs,Drugs addicts leh Ks an pung tual tual.A bik takin Mizoram phei chu India ram pumpuia mihring tam lama chhutin HIV/AIDS darh chakna ber a ni ta. Heng mite han hmangaihtu leh khawngaihtu an mamawh asin. Kohhran hruaitute hian heng mite hi kan tanpuiin kan hmangaih tak tak em? Ram pawn leh chhungah Missionary kan intirte hi ka sawisel lo, mahse,heng KS, Drugs Addict etc te Kohhran in kan hlamchhiah leh si chuan a va pawi dawn em. Heng ho hmangaihtu leh an zinga thleng pha Kohhran hruitute hi kan ram mamawh chu a ni ta a ni.
Nehemia 2: 17 An hnenah chuan heti hian ka han tib ta a: “Jerusalem kulh chu a chhe vek a, kawngkharte lah a chhe vek a, thil tha lo tinrengin min tlakbuak ta a nih hi. Khawpui kulh hi i siam tha ang u khai. Heti taka nuihzatbur hi kan ni dawn lo nia,” ka ti a
Nehemia ho chuan Jerusalem kulh chim rem rum tawh chu an siam tha leh thei a ni. Silchar kawng a pin hlekin ei leh in tur leh Petrol leh dieselah kan buai fo ta mai. Kan ram chhunga ei leh in, in todelhatheia min siam thei tu Nehemia ang mi hi kan va mamawh tak em. Kan ram zimte mihring pawh nuai 12 la tling lo tan hian tan han la tak tak sela, kawng engkimah hian kanla intodelh thei in ka hria. Party-ah ringawt hian buai lova, kan ram economics siam tha theitu tur hruaitu tha hi kan mamawhtawh a ni.
A chunga kan ram mamawh thenkhat kan sawi bak khian sawi tur tam tak a la awm teuh , mahse chung zawng zawngte chu kan sawiseng hrih lo a ni. Lalpa zawnchhuah ram Mizoram hi Lalpan min hre reng a, a ram mipuite hian Lalpa kan auh a,a hnena kan tluk luh chuan lalpan kan ram hi a tidam leh dawn a ni.
Lalpan kan zavai atan malsawm rawh se. Amen
Hla sak hona: “Ka lawm e LALPA, I malsawmna vangin”
Khawvel miten min thlir reng
Ka nunkawng har tak hi
Beisei tur nei lo min ti
An va hre lo em
Chhungrilah hian ka hlim si
Aw min han hmu thei se
Ka lawm e LALPA
I malsawmna vangin.
Chenna in tur min buatsaih
Hahchawlhna tur min pe
Ei leh in tur min pe in
Silh leh fen min pe a
Hmangaihnain min hruai thin
Chhungkaw duhawm min pe
Ka lawm e LALPA
I malsawmna vangin.
Hausakna chhuan tur ka nei lo
Silhfen tha nei lovin
Sum leh pai tam ka nei lo
Mahse nang ka nei
Chu mawlh chu ka tan a hlu ber
Miten hmu lo mah se
Ka lawm e LALPA
I malsawmna vangin.
Lalpa Tawngtaina
