SERKAWN TUALCHHUNG KOHHRAN

CHANCHIN THA MI TIN TAN

PROGRAMME






PATHIANNI ZING INKHAWM PROGRAMME:

10:00 AM, 1ST AUGUST 2021

PROGRAMME:




KOHHRAN MEMBERTE HNENA HRIATTIRNA : 1st AUGUST 2021

Call to Worship :

Thlalera mi aurawl chuan, Lalpa lamlian sial ula a kawngte tingil rawh u a ti.

Tawngtaina :

Lalpa kan Pathian, Vawin nithar lawmawm tak mai min hmuh tir avangin lawmthu kan hrilh a che. Vawinah hian i Biak In thianghlimah kalin i thute ngaithlaho thei lo mah ila, Keimahni hmun theuhah hian Thlarau Thianghlimin min pawl la. I thuchah kan ngaihthlak turte hi kan Thlarau tan mal minsawm sak ang che. Isua Krista hmingin kan dil a che Amen.

Pathian fakna hla:-KHB No 294 ‘Ka chenna ram thlaler a ni, Lalpa,’

Kan sak chhung hian Pathian hnena kan thilpek lakkhawm ni se.

Ka chenna ram thlaler a ni, Lalpa,
Thlemna chum leh lungngaihnate;
An hliah fo Chhamdamtu hmel duhawm,
Lalpa, i hnena awm reng ka duh.

Ka tawngtai ngaithla la,
Ka dil malsawm ang che;
I aw nem nghakin ka lo thu,
I thlamuanna, i thlamuanna aw chu.

Hmanah Gethsemani-ah lungngaiin,
I tan venpuitu an awm lo;
Keipawh i hniakhnung rawn zui vein,
Lalpa, i tanpui ka ngai a ni.

Buaina chum kara ni eng mawi tak chuan,
Ka thinlung thim chu a rawn en;
Kalvari-a hmangaih lo lang kha,
Hril turin Lalpa min pui ang che.

Hrehawm mahse i ta ka ni Lalpa,
I tan nung turin min pui la;
Ka hun zawng i tana hman ka duh,
I tan chauh min tithianghlim ang che.

TAWNGTAI RUALNA

    Tawngtaina a hriat turte
  1. Vawiin thlenga Pathian malsawmna leh venhimna kan chan avangin lawmthu i sawi ang u. Pathian nung leh egkimtithei, min chhandamtu kan nei hi a tharin lawmthu i sawi ang u. Mimal tinte Amah tawk tura inpeih turin Pathian Thlarau thianghlim tanpuina i dil ang u.
  2. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
  3. Covid19 min tuam chhoh mek lai hian fimkhur lehzuala nun dan leh awm dan kan hriat theih nan leh thuawih taka kan khawsak theih nan Pathian tanpuina i dil ang u. Vawiin thlenga Pathian venhimna nasa tak a khua leh a kohhran anga kan la chan avangin lawmthu i sawi ila, Veng/khua covid 19 in nasa taka a tihbuai te i hre reng ang u.
  4. Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan l
  5. Kan ramri buai Pathian hnenah i thlen ila, Ama duhdana chinfel a nih theihnan i dil ila, kan hruaitute pawh remhriatna leh finna a thuam turin Pathian hnenah i dil ang u.
  6. Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
  7. Lockdown kan hmachhawn leh dawn a, siam a nih chhan ang ngeia awmze nei alo nih theih nan i dil ang u.
  8. Kan thawhlawm, inkhawmna leh keimahni Pathian hnenah I hlan ang u.

Lalpa ina awm chak

Aw Sipaihote Lalpa,
I awmnate chu ava duhawm em!
Ka nunna hian Lalpa biak in hung chhung kawtlaite chu a ngai em a, a ni a chauh phah hial a;
Ka thinlung leh ka tisa hi Pathian nung hnenah chuan a au chhuak a.
Aw sipaihote Lalpa ka Lal leh ka Pathian
I maicham bulahte chuan chawngzawngin bu an chhep a,
Vamur pawhin bu a nei, a no dahna turin, i ina awmte chu an eng a thawl e,
Nang chu an fak fo vang che.


Nangmaha chakna nei mi chu a eng a thawl e,

A thinlunga Zion panna lamliante awma chu.
Tahna ruam chu an zawhin tuihna awmnate an siam thin a,
A ni, ruahtui tla hmasate chuan malsawmnain a khuh thin.
Chakna atangin chak lehzualnaah an kal thin a,
Zion-ah an Pathian hmaah chuan an inlan theuh thin.






THUCHAH

Thupui : ‘Zion panna lamlian’ .

- Upa Lalbiakthanga Chawngthu

Audio



Chibai bukna:

Pathian Kohhranho te in vaiin Pa leh Fapa leh Thlarau Thianghlim hmingin chibai ka buk a che u. Pathian hruaina zarah kum 2021 Thitin Thla kan lo chuangkai leh ta reng mai. Vawiin thlenga min hruaitu Lalpa Pathian chu fakin awm rawh se.

Kohhran hote a huhoin Pathian Biak Inah engemaw chen inkhawm thei tawh lo mah ila, kan hruaitu ten a rual tlanga Chhungtinte kan inkhawmna theih dan tur ruahmanna fel tak an siam a. A lawmawm khawp mai. Tukinah hian, ‘Zion panna lamlian’ tuh thupuia hmangin Pathian thu chah kan ngaihthlakho dawn a ni.

A hmasain Naupang pual han sawi hmasa ila :
Em in hria em? Em hria zawng ban han phar teh u… tih mai a chakawm hle mai. Biak ina inkhawm kan nih loh avangin kan inhmu phak mang si lova. Hman lai, kan pi leh pute hunlai chuan motor te ala awm loh avangin, an mamawh chi hrang hrang phurh khawm nan Em an hmang thin. Tui chawi nan, (Tui um phurh nan) thing phurh nan, buh phurh nan, lo lama thlai phurh haw nan, zin kawnga thuamhnaw phurh nan kan hmang thin. Mizoin Em hi chi hrang hrang kan nei a. Pai em, Paikawng, Dawrawn, Tlam em, ti tein kan sawi tlangpui. A tangkaiin a pawimawh em em a ni, Hmeichhia pasal nei tur reng reng chuan em leh hnam hi an pasalte inah an chhawm lut ngei ngei tur a ni. Tunlai chuan motor-te a awm tawh avangin khawpuiah chuan emin thil kan phur khat tawh khawp mai. Kawngpui kan tih hi kan pi leh pu te chuan, ‘Lamlian’ tiin an sawi thin.

Lamlian pawimawh zia leh tangkai zia hi kan hre theuh awm e. Tunhma chuan zin kawng te hi zim te te, ke a kal theihna tawk chauh a ni thin a, Zinnah te hian mahni thuamhnaw phurin kan kal thin. Kawngpui a lo tlang hnu chuan motorin awlsam takin kan zin thei tawh a, kan thil te pawh motorin kan phur thei tawh a ni. Tunah phei chuan kawngpui tha tak tak kan nei a, Motor lian pui pui, ke sawm pahnih aia tam nei te’n kan mamawh min rawn phurh sak ta zut zut mai.

Heta tanga hian, Ringtute leh Pathian inpawhna tha neih a tul zia kan hre thei mai awm e.

Zion hi Jerusalem-a tlang pakhat, Israel faten Pathian an biakna hmun pawimawh tak a ni a. Chutah chuan Pathian be turin leh inthawina hlan turin kum khatah vawithum an kal thin. Sam ziaktu pawh hian chulai chu a ngaihluin a ngai pawimawh em em a. Chulai hmuna kal chu a chakin chuta awm reng te chu a thlahleh hle a, chu hmuna awm reng chawngzawng leh vamurte takngial pawh chu awtin nihlawh a ti em em a ni. Lalpa ina awma amah fak te pawh chu a thlahlel hle a ni.

Kan fiah tlan zawk theih nan kan thuchah hi kawng thumin emaw sawifiah dawn ila a tha awm e.

Pakhatnaah chuan, Zion panna lamlian : Israel fate hi hmun hran hran leh khaw hrang hranga awm an nih avangin, Pathian be tur leh inthawina hlan tura Jerusalem, Zion tlang an panna kawng theuh chu an tan chuan Zion panna lamlian a ni mai awm e. Chu kawng mai piahlamah chuan an thinlunga Pathian pan duhna leh ngaihna tak tak nei a, chulai hmun pan thinte chu Sam ziaktu chuan nihlawh a ti a. ‘Nangmaha chakna nei mi chu a eng a thawl e; A thinlunga Zion panna lamliante awma chu’ a ti a ni. Pathian ngaia amah nena inpawlna nun tak tak neih duh a, Pathian pan thinte chuan Pathianah lawmna famkim an chang thin a ni.

Pahnihnaah chuan, Tahna ruam : Zion pantute hian kawng hrang hrang atangin an pan ngei ang. Chuvangin hmun pakhat hei hi Tahna ruam chu a nih hi tia han kawh chiah tur chu a awm lo mai thei. Mahse Sam ziaktu hian, Zion pana kal ten harsatna hrang hrang an tawh a sawina a nih a rinawm. A thente chuan thlaler ram ro, tui intur leh han hahchawlhna tur hmun rem awm lohna te an pal tlang a. A thente chuan kawng mumal pawh awm lohna ramhnuai pik leh ransa hlauhawm awmna te pawh an kal tlang a ngai mai thei. Mahse chutiang hmunah pawh beidawnga kir san mai lovin Zion panin an kal zel a. Sam ziaktu vek hian tui hna awmna te an siam thin a ti. A awmzia chu, beiseinain Zion an thlir a, Pathian an au va, chakna thar an lo nei leh thin a ni. Chutiang mite chuan Pathian malsawmna ruahtui tla hmasa te an dawng thin a ni.

Pathumnaahchuan, Chakna atanga chak leh zualnaa kalin Zion-ah Pathian hmaa inlan : Tahna ruam paltlanga kalzel te chuan Zion tlang an hmuhte chuan thlen hlan nghakhlelin phurna thar nen zaia Pathian thute chham dual dualin tlang lam chu an pan thin. Sam-a Chhoh hla kan hmuh tam takte pawh hi chutiang huna an saka an chham thin chu a ni awm e. Zion Pathian khawpui an thlen chuan hlim leh lawm em emin Pathian an fak a, inthawinate an hlan a, an thlamuangin an hahdam thin.

Pathianin a mite min hruai dan leh min buatsaih thin dan hi a ropuiin a mak thin khawp mai. Kelkang harna in Kohhran tam tak a nuai a, kan kohhrante pawh 2019 chhoah PathianThlarauin nasa takin min buatsaih a. Kum 2020 kan chaunkai meuh chuan, Khawvelin kan hriat ngai loh hripui kan hmachhawn a. Mizoramah pawh he hripui vang hian mi engemaw zatin an nunna an chan a. Chu mai nilovin, ran hri leng te, Loneitute thlai tichhetu hrik te, Ramribuai te, lirnghing te leh harsatna tam tak kan ramin a hmachhawn a. Heng atan hian Pathianin kan Thlarau a lo buatsaih niin a lang. Kan thinlungah Zion panna lamlian min sial sak a, a kawngte min lo tih mam sak diam a lo ni. Heng harsatna te hian engtikah emaw chuan min la kian san ngei ang. Chuti a nih loh pawhin keimahni zawk pawh hian Lalpa hnenah kan la chawlh san dawn a ni.

Israel faten Zion an pan thin ang hian, Ringtute hian Zion panna lamlian zawhin kan Chatuan ram kan pan mek a. Chu hmun thleng tur chuan kan kawng zawhte hi kan en ngun a, kawng dik kan thlan hi a pawimawh a ni. Lal Isuan, ‘Kei hi kawng leh thutak leh nunna ka ni. Keimaha kal lo chu tumah Pa hnenah an thleng lovang’ a ti.

Zion panna lamlian zawh mekte kawngah hian tahna ruam paltlang tur kan hmachhawn mek bawk. A chang chuan kan beidawng a, kan tawngtaina te hi chhanin a awm lo niten kan hria a, kan tunlai tawng takin kan piantharna te kan ringhlel leh thin. A chang chuan mahni inkhawngaihna leh tling lo nia inhriatna te, a chang leh chapona leh rawngbawlpuite aia tha leh tling nia inhriatna te, Thlarau mi nia inhriatna te pawh hian min tibuai thin. Heng hun hi thahnemngai taka Pathian kan auh hun tak a ni. Tirkoh Paula hian chu chu a hmu chiang hle a ni ang, II Korinth 12: 10 ah chuan, ‘Ka chak loh apiangin a ni ka chak thin ni’ tiin a sawi a. A chhuan tur neihte pawh a chak lohna hi a ni tih vawi duai lo a sawi a ni. Keini pawh kan chak lohnaah hian Pathian i au ang u. Lalpaah chakna thar kan hmu leh thei ang.

Zion panna lamlian zawh mek tute, chu kawnga harsatna tinreng tawk thinte hi engtik niah emaw chuan, hlim tak leh lawm takin kan Pathian hmaah kan la inlan ngei dawn a. Harsatna leh manganna kan tuar thin te hi kan Pathian hmaah lawm takin kan nghat ang a. Chatuanin hlimin kan la awm dawn a ni.

Kan thuchah ngaihthlakte kan zaa tan Lalpan mal min sawm sak theuh rawh se.

Pathian fakna hla:- KHB No 250 - ‘Ni ropui a lo thleng dawn ta'

Ni ropui a lo thleng dawn ta,
Kan nghak lal Immanuel;
Sual leh ramhuai tlawmna ni chu,
Chandamfate kan zalenna tur chu.

Chumi hunah chuan hlimin ka zai ang
Lalram buatsaih chatuanhmun ka chang ve anga
Aw, ava nuam dawn em! Aw, ava hlimawm dawn em!
Hlim tawp hlau lovin ka leng ang.

Engtikah nge ni ang Lalpa,
Hnehna ni kan hmuh hun tur;
Thlawkin Jordan ka lo kai a,
I tan van arsi angin ka en ang?

Aw khawpui thar, i mawi mang e,
I chhungah hnehtu an leng,
An hnehna hla thar sak tur chu,
Khawvel ral hun atan an dah ta e.

A ni tak e, Chatuan Lalpa,
I khawpui siam tharah chuan;
I thisena i lei tawh te,
‘Ka hnenah lo kal r’u’ i tih thin kha.



LALPA TAWNGTAINA.