Lal Isua, kan Thian tha berin,
Kan mangan laiin min lawm;
Ama hnena kan tawngtaiin,
Kan thlen apiang hi a pawm.
Muanna tam tak kan chân fo va,
Lungngaih, mangan kan tuar thlawn;
Engkimah Lal Isua ringa,
Kan tawngtai loh avangin.

Thil hrehawm leh thlemna tawkin,
Buaina lo awm bawk sela;
Tuilairapa lungngaih aiin,
Isua lam tawngtai ila.
Amah tluk thian hlu leh rinawm,
Min pui tur kan hmu lovang;
Kan sual, kan chaklohna zawng zawng,
A hre vek tawngtai ila.

Rilru lamah chak lo ila,
Mangan, ritphurh nei pawhin;
Isua hlu hi kan humhimna,
Lamah tawngtai ilangin.
Chhûngten min tuithlar mah sela.
Thianten min hmusit sela;
Isua hnenah thu thlen ila,
Kan phaw hian min thlamuan ang.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi leh ang u. Pathian nung leh egkimtithei, min chhandamtu kan nei hi a tharin lawmthu i sawi ang u.
2. Kan kohhrana member damlo, a bik takin Covid-19 positive te, BCCC leh CCC a awm te, home isolation a awm leh quarantine mek lai te tan i tawngtaisak ang u.
3. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
4. Kan Biak in sak chhunzawm zel a ni a, thawktu leh a buaipuitute tan i tawngtai ang u.
5. Serkawn VLTF memberte tan i tawngtai ila, Contact tracing , transportation leh relief ang zawnga hma an lakna hrang hrangah Pathian tih chakna i dil sak ang u.
6. Kan tualchhung kohhran committee leh a hnuaia Fellowship hrang hrang, KNP, Jr TKP, TKP ,BMP leh BKHP ten an theih ang angin hma an la ve reng a, an hmalakna ah Pathian awmpuina i dil sak ang u. Vawiina Fellowship prog awm turte tan pawh tawngtaina i hmang ang u.
7. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : LALPA CHENNA – BIAK IN

Audio

Kohhran hote kan Lalpa Isua Krista hmingin chibai ka buk a che u.
Tukina kan thupui tur chu ‘Lalpa chenna – Biak In’ tih a ni a. Lalpa chenna chu kawng hrang hrang – mimal, chhungkua leh kohhran angte pawhin a sawi theih awm e. Tun tumah erawh chuan Biak In bik hi tawi tein thlur bing kan tum dawn a ni.

Kan hriat theuh angin Biak In sa lai kan ni a, kan Annual Plan-ah pawh thapui kan thawhna tur (main project) atana ruahman a ni a. Covid hripui avanga Biak In kan luah lum loh lai pawh hian Biak In sak hna chu a theih ang anga kalpui reng a ni a. Chutiang a nih avang chuan helam hawi zawng te hi Pathianni tuk thuchahahte hian sawi ve thin ni se tih hi a ri ve fo mai a. Pathian zarah Biak In sak lama mawhphurtute zinga mi lo nih ve takah chuan inthlahrung tak chung siin hemi chungchang hi ka rawn chhawp chhuak tel dawn bawk a ni.

Naupang Pual: Hman deuh lawka kan rawngbawlpui pakhatin naupang pual a rawn tih dan ang deuh khan tun tumah pawh hian kan ti ve ang a. An chanchin ka sawi ang a, naupangte khan ring takin tunge an nih in lo sawi dawn nia aw.

1. Mipa naupang pakhat chu a nuin Pathian hnenah hlanin, puithiam Elia tanpui turin Biak In (temple)-ah a awmtir a. Zan khat chu Pathianin a rawn ko ta a. Chu naupang te chuan, “Thu sawi rawh, i chhiahhlawhin a ngaithla e” tiin a lo chhang a. Tunge a nih le?
(Ans: Samuela)

2. Mipa naupang bawk a ni a. A nu leh pate nen Jerusalem-ah an kal a. An haw lamah chuan naupang chu a tel ve ta hauh lo mai a. An zawn vak vak hnuah chuan Biak In-a Pathianthu a ngaithla lai an va hmu ta a. “Engah nge mi zawn ni? Ka Pa ina ka awm tur in hre lo vem ni?” tiin a lo chhang a. Tunge a nih le?
(Ans: Isua)

Heng mipa naupang pahnihte atang hian Pathian biak in hi naupangte tan pawh Pathianthu kan hriatna leh kan zirna hmun pawimawh tak a ni a, a hlu em em a ni tih kan hre thei a ni.



Thuchah:
Biak In hi Lalpa chenna a ni a, a hlu a ni: Mizoram hi Kristian ram kan nih avangin khaw tina hmun tha lai luahtu chu Biak In a ni a, ralkhat atang pawha langsar ber pawh Biak In a ni zel a ni. Exodus 25: 8-a Pathianin, “Tin, hmun thianghlim mi siamsak rawh se, an zinga ka chen ve theih nan” a tih ang khan amah ringtute chuan kan khawsak hona apiangah Biak In kan din ve zel a ni. Biak In hi Pathian chibai bukna hmun, a aw kan ngaihthlakna hmun leh amah kan pawlna hmun tura din a ni. Building lianpui a ni satliah mai lova, Pathian In, Lal Isua ngei pawhin “Ka Pa in” a tih kha a ni a, a chenna hmun a ni.

Israel fate Aigupta ram atanga an rawn chhuah a, thlalera an kal lai khan Pathianin Biakbuk siam turin a ti a. Leviticus 26:11-ah chuan, “Tin, in zingah ka biak buk chu ka awmtir ang a; ka nunna chuan a hnuchhawn lovang che u. In zingah ka cheng ang a, in Pathian ka ni ang a, tin nangni pawh ka mite in ni ang” tiin chu Biakbuk hmang chuan an hnena awm a, anmahni nena inlaichinna tha tak an neih tur thuin a thlamuan a ni.

Israel fate khan Pathian biakbuk hi an lo ngai pawimawhin an ngaihlu hle a ni tih Sam 84 & 92 –ahte kan hmu a. Sam 92:13-14 –ah chuan, “Lalpa ina phunte chu kan Pathian biak in hung chhung kawtlaiah chuan an duah hluah hluah ang. Tar hnuah pawh an la rah fo vang a; tui pai teuhvin an hring hluah hluah ang”, tiin Pathian Biak In pawimawhzia a rawn tarlang a. Mahni chauhin a ni emaw, chhungkua emaw, thian zahovin emaw, hlim takin Pathian kan pawl thei tho a ni thei e. Chu chu ringtu nih dan tur dik tak pawh a ni reng a ni. Amaherawhchu, Pathian Biak Ina khawsak tam hlawkzia chu helai chang hian min hrilh chiang hle a ni. Sam ziaktu chuan mahni duhna hmuna ni sangkhat hman ai chuan Biak In hung chhunga nikhat awm pawh a tha zawk a, nawm chenna ina khawsak ai chuan Biak In kawngkhar vengtu nih a thlan zawk thu a sawi a (Sam 84:10). Chutiang taka Biak In a dah ropui avang chuan a ngai ngawih ngawih a ni tih a sawi a ni (Sam 84:2).

Covid-19 avangin hun rei tak Biak Inah mumal takin kan inkhawm thei ta lova. Hetih chhung hian Sam ziaktu rilru hi kan tawmpui ve em? Chhungkaw thenkhat chuan kan hruaitute programme rawn siam thin hi tha takin kan hmang thei a, nuam pawh kan ti a, a lawmawm khawp mai. Amaherawhchu, Biak Ina inkhawm thlahlel tawh lo hial khawpin nuam kan ti maithei. Biak Ina inkhawm aia mahni chhungkaw bila inkhawm nuam kan tih zawk chuan a chhan hrang hrang han ngaihtuah ta ila, chungah chuan Lalpa lawmna nge tam ang keimahni lawmna? Thenkhat chuan Covid-19 hi inkhawm peih loh chhuanlam tha takah kan hmang maithei bawk. Lalpa chenna Biak In thlahlel tawh lo khawpin kan lo awm a nih chuan Lalpa hmaah thiam changin kan awm ang em? tih inzawt thar theuh teh ang u.

Lalpa chenna Biak In sak hi kan mawhphurhna a ni: Pathian chu engkim chunga thuneitu, engkim ti thei ni mahse a mite hnena a chenna tur Biak In erawhchu a thiltihtheihna hmanga ama kut ngeia a rawn din a ni ngai lova, a mite hmangin a din thin a ni. Mosia hnenah khan a duh dan chipchiar takin a hrilh a (Exo. 25-27), chutiang chiah chuan Biakbuk kha an sa ta a nih kha.

Israel faten Pathian Biakbuk an sak chanchin han chhiar hian a ngaihnawm hle mai. Exo.35:21-ah chuan, “Tin, mi tin thinlung taka phur sarh apiang leh rilru taka phal apiang chu an lo kal a, inbiakna puan ina hman tur leh rawngbawlna lam atana thil hman tul apiang leh silhfen thianghlim tur chu Lalpa tan an rawn thawh hlawm a” tih kan hmu. Pathian Biakbuk sak nan mipui an che a, an neih ang angte ui lovin an rawn la khawm tih kan hmu a ni. Chu mai a ni lo, Exo. 36:5 kan chhiar leh chuan hna thawktute chuan Mosia hnenah, “Lalpan siam tura thu a pek siam nan mite chuan achuang aliamin thil an rawn la e” tiin an va thlen ta hial a ni.

Kan kohhranah pawh kum 2005 vel atang khan Biak In thar sak tul tihna a lo awm tan a. Tichuan, kum 2012-ah Kohhran Committee-in Biak In sak chu a lo rel ta a, a sakna turin sum te pawh khawl chhoh a ni ta a ni. Kohhran Committee-in vawi tam tak ngaihtuahin, Committee kaltlangin Pathianin a duh dan a rawn tarlang zel a. Chungte chu hre reng chungin kan kohhran member lo ni tawh thin Pu Lalthanpuia (Design Plus Architects) ten mi 1130 vel leng thei tur, a dung 100ft leh a vang 82ft –a lianin min rawn design sak ta a. A chhawng sanglai berah hian chhuat (floor) te neuh neuh tiamin chhuat 7 a awm ang a, a chhuat 6-na hi Biak In chhuat tur chu a ni dawn a ni. Tichuan, 29th April, 2019 (Sap Upa leh Pu Buanga ten Serkawn an rawn luah tan ni champha)-ah a Lungphum chu phum niin bul kan lo tan chho thei ta a ni.

He Lalpa chenna In sa tur hian kohhran member tinte hian talent pek kan nih ang zelin mawhphurhna kan nei theuh a. Thenkhat chu remruat thiamna te, thenkhat kut themthiamna te, thenkhat thahrui chakna te, thenkhat chu sum leh pai te min pe hlawm a ni. Pathianin theihna min pek zawn zelah hian a tana kan pek let ve hi kan bat a ni dawn lawm ni? Hun eng emaw ti chhung chu thla tin envelope te, Pathianni thawhlawm te leh special appeal hmangin he rawngbawlna hi kan lo tan tawh a. Chhungkaw tam takin kan ngai pawimawh a ni tih kan thawhlawm thawh dan atangin a hmuh theih a, a lawmawm takzet a ni. Chu bakah kan kohhran pawn lam atang pawhin chhungkaw 3 vel chuan Biak In thar sak nan hian sum eng emaw zat an rawn thawh ve tawh bawk a ni. Kan budget chu Rs 686 Lakh a ni a, duhthusama kan zawh meuh hunah chuan Rs 1,000/- Lakh vel chu kan hmang ngeiin a rinawm a. Chu chu tuna kan hun tawng leh kan sum hmuh dan atanga chhut chuan huphurhawm hlein a lang. Amaherawhchu, Lalpan hna a thawh chuan a daih tawk chiah mai ni lovin a chuang liamin a lo thleng thin a ni tih Exo. 36:5 –ah khan a chiang a ni. Chutiang bawkin Solomona’n finna a dil chungchangah te, tui Uaiina chantir chungchangah te leh mipui sangnga hrai chungchangah te Pathian hnathawh thin dan kan hmu bawk a ni.
v Kan phak tawk leka rawngbawl tur ni ila Rinna hi awmze neilo a lo ni ang. Kan theih chin nia kan ngaih piah lam thlenga pen turin min ko thin a ni. Chutah chiah chuan Pathian thiltihtheihnaah kan innghat tawh ang a, Lalpa rinna nunah kan lut chiah dawn tihna a lo ni. Chu nun ngei chu alawm nei tura min duh chu. Chumi hunah chuan a hausak ren rual loh chu kan chang tawh ang a. Kan Biak In sakah pawh hian a duh zawng a nih phawt chuan amah leh amah a rawn intum zel dawn tih hi i ring ngam ang u.

Tlangkawmna : Tun ang khawvel hmawr tawng tawhah hian Biak In mawi leh ropui tak hi engnge sak a tulna? tite pawh awm theih a ni. Lalpa hian kan nuna a chhe lai ber pawh min pawm theih rualin a tha ber pawh a duh asin. Tih theihna min pek atanga a tha ber kan tihsak ve hi a lawm em em dawn lawm ni? Biak In hi Chanchintha puan darh hna thawh kawnga a bul tanna pawimawh tak pakhat a ni tih hre chunga kan sak a tul zawk a ni. Chu bakah, lei leh vana lal ber chenna tur Biak In hi kan tello pawha sak theih a nih laia khawngaihna avanga tawngtai, thilpek leh kan theihna zawn theuha a satute zinga kan tel ve thei hi a va lawmawm em. Lawmthu hril chungin i thawk zel ang u tiin kan insawm a ni. Kan thusawi takte kan zavai atan Lalpan mal min sawmsak rawh se. Amen.

Pathian fakna hla:- KHB 370- Chatuan lungpui, aw Krista