THUCHAH:

Min hnaih rengtu, Lalpa

Chhungtinte, Kan Lalpa Isua Krista hmingin chibai ka buk a che u. Kei ni ringtute tan a ni ropui leh pawimawh em em Good Friday leh Easter Sundayte kan lo hmang zo leh ta a. Kumin a kan hman dan erawhchu a danglam hle mai a; mahni inchhung lum atangin kan tan a Krista tuarnate, kan sual thawi nana thih thleng a a inpek zawh veknate leh, chu sual vanga thihna chu hneh a, ropui tak a a thawhlehna chanchinte kan zirin kan hre thar leh ta a. Kumin a kan hun hmandan hi a ropui danglam hle in ka hria a, Pathian min hmangaihzia leh a remruatna felzia min hmuh tir niin ka hria a ni. Lalpa chu fakin awm rawh se. Amen.

Kan hun tawn mek hian rilru a luah lo thei lova, chuvangin tukin a Pathian thu zir ho atana ka han thlanchhuah chu, “Min hnaih rengtu, Lalpa” tiin a thupui atan ka han dah chhuak a ni. A tlukpui thupui a dah theih pawh awm nualin ka hria a, ‘Min thlahthlam ngai lotu, Pathian’ tih pawhin dah ila a sual lo chuan ka hria a ni.

Pathian thu Ilo chhiar ang u:

Isaia 41:9-10 nangni leilung tawpna ata ka mi hruai, a kil ata ka mi koh, ‘Ka chhiahhlawhte in ni,paih thla lovin ka thlang zawk che u.’ ka tihate u, hlau suh u, kei in hnenah ka awm si a. Ka tichak ang che u a, a ni, ka tanpui ang che u; ka felna kut dinglamin ka chelh reng ang che u.

Kan Pathian lehkhabu thianghlimah hian, ‘hlau suh u, kei in hnenah ka awm si a.’ tih hi hmun hrang hrangah leh hun hrang hrangah kan hmu hnem em em a. Bible chik mite chuan, ‘Hlau suh’ tih hi kan Bible ah hian vawi 365 lai a inziak niin an sawi a, a pawmawm khawpin ka hria a, Kumkhat chhung (Ni 365) hian nitin ‘Hlau suh’ tiin Pathian chuan min thlamuan thin a ni ti pawhin a ngaih theih hialin ka hria a ni.

He a thutiam hian, Pathianin khawvel leh mihringte, kan nihphung leh awmdan min hriat chian zia a tilang fiah hle in ka hria a ni. Sual a tlu tawh hnu khawvelah hian hlauh tur leh manganna tur a tam em em a;engkim, engmah hi he khawvelah hi chuan a dikin a tha famkim theilo tih hretute theuh kan nih ka ring. Hlimna a awm chuan lungngaihna in a zui a, hlawhtlinna ah chuan hlawhchhamna a tel ngei ngei a, lawmna chu tahna in a zui thin. Hetiang ang khawvel a cheng kan nih avang hian min hmangaihtu Pathian chuan kan thlamuanna turin kan hnena a awm reng thin thu vawi tam tak kan Pathian lehkhabu hmang hian min hrilh a ni.

Sam 125:2 ah chuan ‘Tlangte chu Jerusalem vela a awm angin, Lalpa chu a mite velah a awm thin,tun atanga kumkhuain’ tih kan hmu a. Kan lawm lai leh kan lungngaih lai pawhin, kan mangan leh kan hlim lai pawhin Amah chu kan hnenah a awm reng a, min thlamuan turin a hnai reng thin a ni.Tuarna leh harsatna kan tawh mek lai pawhin ani chuan min hnaih satliah ringawt pawh ni lovin,Amah ngei hian a takin min tuarpuiin, min manganpui thin ani tih Zawlnei Isaia chuan a lo sawi a, bung 63:9 ah ‘an manganna zawng zawng ah chuan ani chu a mangang ve thin a, tiin alo sawi ani.Tun ang hun harsa leh hlauhna in min tuam vel lai pawh hian kan hnenah a awm reng a;kan in, kan chhungkua hi min chenchilh reng a ni tih hi i hre reng ang u.

Tun a kan tarlan tak Bible pahnihkhat lek pawh hi thlamuanna tham chu a ni ti rawh u? Nimahsela, thlamuang tur kan nih inhre reng chunga kan thlamuan theihloh fo nachhan hi enge ni ang ? He hun tawite ah hian kan sawivek seng lovin, ka hre veklo tih chu ka hria a, mahse, kan ngaihtuah chhunzawm atan kawngkhat lek tal a han tarlan tha in ka hria ani.

Kan rilru/ngaihtuahna avangin :- Rinna kawng kan zawh mekna ah hian kan rilru pawimawhzia hretute theuh kan nih ka ring.A khaikhawm nan chuan, ‘kan rilru/thinlung a awm chu alo langchhuak thin a, chu kan rilru put hmang ang zel chuan kan nung theuh a ni.’…i ngaihtuah chhunzawm ang u. Zawlnei Jeremia chuan(17:6) ‘Thinlung hi thil zawng zawng aia bum hmang ber, chhe lailet der a ni a; tuin nge hrethiam thei ang?’ alo ti a ni. Mahni pawh hi inhriatthiam a har thin a ni ti rawh u. He thinlung bum hmang hian min bumin,ka ringhlel tih pawh inngaihtuah chang lovin, rinhlelhna khurah hian ka awm fo thin. Rin tur dang neih vang pawh ni lo hian,sual bumna avang hian ringhlel a awm hi awl duh khawpin ka hria a ni. Krista thisen avanga thiamchang kan ni tawh reng chung hian, Setana chuan kan rilruah hian thiamloh min chantir a tum fo thin tih hi I hria ang u. Rinhlelhna hian i nun a tibuai thin em? Isua zirtir Thoma khan a thawhlehna kha a ring mai thei tlat lova, mahse a hnu ah chuan Amah Isua ngeiin a nak zen tirin, a kut a hliamte a entir anih kha. Tin,Marka ziak a kan hmuh Pa pakhat, a fapa Isua hnena rawn hruaitu pawh khan a ring ngam chiah lova, Marka 9:24 ah, ‘ka ring e, ka rinhlelhna ah hian min pui ang che’ titu pawh kha a ropuizia a hmuh tir tho kha hre reng ila….Tho leh kan Lalpa Isua Krista chuan ringhlel thinte pawh hi min la lawm tho va, tun hunah hian amah ring turin hun tha, khawngaihna hun min la hawn sak a ni tih i hria ang u.

Mahni nun kan en a, tlinlohna leh fel lohna tam tak kan nei tih kan inhria a, Setana chuan chung kan fellohnate hmang chuan beidawnnna ah min hruai lut fo thin. Kan sualna leh fel lohnate kan hmu zut zut a, Pathian chuan min ngaihsak ta lo riau leh min ensan ta a ngaih maite pawh hi thil awm thei tak niin ka hria a. Mak deuh mai chu kan Bible chang hriat lar em em Johana 3:16-17,kan hriatchian em em tawhte hi min hmuh thelh tir leh tlat thin..Pathianin khawvel a hmangaih em em a, tihah hian ka tel ve ta lo emaw intihte hi thil awm thei tak niin ka hria a ni.Hemi chungchang Rev.Vanlalbela an sawi hi ka rilru ah alo lut a, a sawi ang diak diak chuan sawi chhawng thiam lo mahila han tarlan hram ka duh a ni. “A chang chuan Pathian hi kan dik leh dikloh min enthla rengtu, kan dikloh chuan min hrem nghal mai tur leh kan tih that chuan kan chung a lawm deuh hluai tura ang a ngaih mai te hi thil awm thei tak niin ka hria ani.Mahse tun khawngaihna hun, Isua Krista lokal vawikhatna ah hi chuan, thiamloh min chantir turin a lokal lo…..Pathian hian min hre chiang lutuk a, misual mai kan nih pawh hi a hrechiang lutuk a,kan sual leh sual loh min thlithlai thar thut hi a ngai lo,boral tur, tanpuitu, chhandamtu ngai kan nihzia hi a chiang lutuk a , chuvang alawm a fapa mal neih chhun min pek,han hrem tharthut leh khawihzui tlak kan awm lo’ ti a uar tak a a sawi hian a ti fiah riauvin ka hria a ni. Tirhkoh Paula chuan, ..a ni chuan min hlat lo theuh si a (Tirh.17:26-27)…ti a Atheni khua mite hnena a sawi ang khan,tun hunah hi chuan mifel leh fellote ala thiar lova, a hnen kan pan theih nan mi tinte hi min hnaih theuh zawk a ni. Amah Isua Krista ngei in, ‘Mifel takte lam tura lokal ka ni lova, misualte lam a sim tir tura lokal ka ni zawk’ a tihte kha I hre reng ang u. Inthiamlohna leh inthlarun avanga amah pan ngamlo leh ban phak ve lo a inngaite hian kan lo awm ang tih hi ava hlauhawm em! Ani chuan min hnaih theuh si. Thupuan 3:20 ah chuan, “Ngaiteh,kawngkhar bula dingin ka kik hi;tupawhin ka aw hriaa kawng a hawn chuan a hnenah ka lut ang a,a hnenah zanriah ka ei ang a, ani pawhin ka hnenah a ei bawk ang. ”tiin Isua chuan min sawm zawk a ni. Hla tak atanga min sawm ni lovin, kan bula awmin kan thinlung kawngkhar hawnsak turin min ngen a ni.

Hemi rual vek hian, kan sawi tak letling chiah in, mifel lo/tlinglo ka ni tih intheihnghilh thak a, ka duh dan leh ngaihdante, tha leh dik ka tih zawngte hi Pathian duhzawng ang a ngaih maite pawh hi thil awm thei tak niin ka hre bawk a ni. Setana chuan he kan rilru hmang hian nasa takin min bei thin ani tih hi kan hriat reng a, kan fimkhur a tul khawpin ka hria a ni.

Awle, Pathian chuan mi tinte hi min hnaih theuh va, kan bulah, kan ban phakin a awm reng tih hi i hre reng ang u. Rom 8:28 ah chuan, ‘Tin,Pathian hmangaihtu, Ama ruat anga a kohvate tan chuan, an thatna turin engkimin a thawhsak zawk thin tih kan hria’ tih kan hmuh ang hian,kan chunga thil lo thleng reng reng hi kan thatna tur zel ani tih hi ringhlel lo ila, Ama hriatpui lohin engmah kan chungah a thleng dawn lo tih hi i hria ang u. Chutiang a a chenchilhna kan chan avang chuan engmah hi I huphurh lutuk lo ang u. Isua nen chuan engkim hi a paltlang theih tih hre tute kan nih kha. Tukin ah hian min hmangaihtu Pathian chuan, hlau suh u, kei in hnenah ka awm si a, tiin min hrilh thar leh ta anih hi. Lalpan a thu kan sawite kan za atan malsawm rawh se. Amen.

Tawpna Hla : KHB No.433 “Ka Chhandamtu min vengin a hnai reng”

LALPA TAWNGTAINA