Hla sak hona:KHB No 63. “Aw mi sang tam tak zaite chu”.(Thilpek lakkhawmna)
Aw mi sang tam tak zaite chu
Aw mi sang tam tak zaite chu,
Tlantu ropui fakin;
Kan Pathian ropui ber Tlantu
Hmangaihna chu fakin.
Aw, kan Lalber, min hruaitu chuan,
Chakna min pe ang che;
Hemi khawvel zawng chungah hian,
I thu puang darh turin.
Lal Isua hming min muantu hi,
Kan lungngaih tikiangtu;
Mi sual tan pawh ri mawi a ni,
Min thlamuantu ber hi.
Sualna zawng zawng hnehtu chuanin,
Mi tangte a chhan chhuak;
A thisen hlu tak a pe,
Keini min chhandam nan.
TAWNGTAI RUALNA
Tawngtaina a Hriat Turte
Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. A huhova Pathian Biakna hun kan neih leh thuai theih nan Pathian hnenah i dil ang u.
Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin Pathian hnenah thinlung takin lawmthu sawi ila. Pathian venhimna dil chhunzawm zel ang u.
Sawrkar, Kohhran leh tlawmngai pawl te tan tawngtai zel ila. Covid19 dona kawnga fing leh tha taka hma an lak thiam theihna turin i dil sak ang u.
Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
Kan member damlo te Hospital leh mahni in lama in enkawl te tan tawngtai sak ila.
Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.
Rom 6:3-11: 3-Krista Isuaa baptisma chang apiangte chu a thihnaah baptis-in kan awm zêl tih in hre lâwm ni? 4-Baptisma kan chanin a hnênah phûmin kan awm ve a, a thihna chu kan ṭâwmpui a ni; chutiang bawkin, Pain mitthi zîng ata ropui taka Krista chu a kaihthawh ang khân, keini pawh nun tharin kan lêng tawh ang. 5-Keini pawh amah nên inzawma, a thih anga kan thih ve chuan, amah a tho leh ang bawkin amah nêna inzawmin keini pawh kaihthawhin kan awm ve ang. 6-Sual bawiha kan awm tawh loh nân sual pu taksa hi tihlum tûrin, kan mihring hlui chu a hnênah khenbehin a awm tawh tih kan hre si a. 7-Thi tawh chu sual lakah a fihlîm a ni. 8-Tin, Krista hnêna kan thih ve tawh chuan, a hnênah kan nung ve bawk ang tih kan ring a ni. 9-Krista chu mitthi zîng ata kaihthawhin a awm a, a thi leh dâwn tawh lo tih kan hria, thihna chuan a chungah thu a nei tawh lo. 10-A thihna chu sual lama thih hlen vang vangna a ni a, a nunna chu Pathian hnêna nun hlenna a ni. 11-Chutiang bawkin nangni pawh sual lama thi tawhah inngai ula, Krista Isuaah Pathian lama nungah inngai rawh u.
THUCHAH
THUPUI: “Ringtu Baptisma”
- Rev V. Laltlanzuala
Intro: Vawinah hian kan unauten Lal Isua an rinna puangchhuakin baptisma an chang dawn a. Baptisma hi thinlung lama Lal Isua kan rinna vantlang, Kohhran zinga puanchhuahna a nih avangin a pawimawh em em a ni. Kan boruak minchim mektu Covid 19 avangin vantlang Inkhawmna buatsaih remchang lo mahse, Heng kan unau baptisma changte hi keimahni chhungkua inkhawmnaah hriatpuitu ni theuh turin kan insawm a; Baptisma changte leh a buaipui tuten Amah kan Lal Isua, a taksa leh nunna ngei hlana Baptisma min siam saka, Sacrament min buatsaihtu hmingin Kohhran chhungtinte chibai kan buk a che u.
Aw le, “Ringtu dik tak chhinchhiahna chu Ringtu Baptisma hi a ni” an ti thin.
Penticost ni a baptisma changte chu an sualte sima, Isua ringtute an ni a, sual sim lo ring bawk si lo, baptisma chan hian awmzia a nei thui lo hle ang. Kum 250AD thleng khan baptisma chan hi hnimphuma chan thin a ni a, damlo leh tar chak lo te chu tuia leihin emaw an chan an phalsak chauh thin. Roman Catholic Kohhran chuan kum 1311 –ah thlawr hi an phal sak a, chumi hma zawng chuan baptisma chan reng rengah hnimphum ngeiin an chang thin. Greek tawng ‘Baptizo’ tih hi hnimpil, chiahpil, phum, silfai tihna anih avangin hminphum ngei hi baptisma chan dan dik chu a ni.
Baptisma awmzia: Baptisma hi piantharna emaw sual ngaihdamna emaw a ni lo va, chhungril lam nihna dik tak, pawn lam chhinchhiahna hmanga tihlanna a ni. A hma a thil thleng tawh ... dik taka puanchhuahna turin tuiah inhnimphumin baptisma chan a ni thin a ni.
Baptisma chan hi eng nge a nih? Kawng 3 (thum) lo tarlang ta ila.
1. Krista thupek zawmna a ni: “... Chanchin Tha hi hril rawh u. Aringa baptisma chang chu chhandamin an awm ang a; a ring lo erawh chu thiam loh changin an awm ang” (Mk 16:15, 16) Baptisma hmaah hian rin tur min kawhhmuh a ni...
2. Sual lak atanga thihna a tihhran na a ni: “In thi tawh a, in nunna chu Pathianah chuan Krista hnenah thuhrukin a awm si a” (Kol. 3:3). “... Khawvel hi ka tan khenbehin a awm ta, kei pawh Khawvel tan khenbehin ka awm ta” (Gal. 6:14) Paulan a lo ti a ni.
3. Krista nena inzawmna a ni(Rom 6:3-14):
1) A thihna a inzawmna a ni. “A thihna anpuiin a mah nen kan inzawm tawh si chuan...” (v-5) 2) Amah phumna nena inzawmna a ni. “A thihnaah baptisma kan chanin a hnena phum ve in kan awm...” (v-4)
3) A thawhlehna nena inzawmna a ni: “A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang” (V-5).
Krista thihna a thi, Krista phumna a phum leh Krista thawhlehna a tholeh nun neitu nihna min puanchhuah sakna a ni.
Baptist Kohhranin ringtu Baptisma a ngaih pawimawhna chhan hrang hrangte Pathian Thu a kan hmuh dan atangin tarlang ta ila, achunga kan sawi nen pawh khian a in hlat lo viaua mahse, a chhan a inan loh avangin kan sawi tel tho ang.
1. Sual ngaihdam entirna a ni: Petera sermon chuan, “Sim ula, in sual ngaihdam nan Isua Krista hmingin Baptisma chang theuh rawh u, tichuan Thlarau Thianghlim pek hi in hmu ang” (Tirh. 2:38) a tih te. Paula’n, “Tho la ama hming lam chungin baptisma chang la, I sualte tleng fai ta che” mi ti a’. (Tirh. 22:16) a tih te hi sual ngaihdamna channa a ni.
2. Sual thihsana, nunthara nun leh rinna a nun a entir a ni. (Rom 6:3, 4). Chu mai ni lovin: Hnimphum hian ringtute chu sual avanga an thihna, phumna leh sual hneha Krista zara an thawh lehna a entir a ni. (Rom 6:3, 4...).
3. Krista thihna, phum anihna leh a thawhlehna thuruk ropui tak puan chhuahna a entir a ni. (Rom 6:3, 4)
4. Krista nun tawmpuina leh amah nena pumkhat nih lantirna a ni. “Baptisma-ah chuan a hnena phum in lo ni ve tawh si a, chu mi vekah chuan amah kaihthawh rin avanga a hnena kaihthawh innih ve kha” (Kol 2:12) tiin Krista nun tawmpuitu nihna min puanchhuah sak a. Chutih rual chuan amah nen taksa inpeng tawn, pumkhat kan nihna min tarlan sak bawk a ni, “Taksa hi pumkhat a ni a, peng tam tak a nei a, taksa pengte zawng zawng chu tam hle mahsela, taksa chu pumkhat a ni si a. Krista chu chutiang bawk chu a ni” (1Kor.12:12). Kan zain, Juda emaw Greek emaw, bawih emaw bawih lo emaw, taksa pumkhata awm turin Thlarau pakhat chauh vah baptis-in kan awm theuh si a. Thlarau pakhat chauh min intir theuh bawk a. (I Kor. 12:13) –ah min tarlan sak bawk a ni.
5. Baptisma chan hi rinna puan chhuahna a ni: Baptisma chan hi rinna puan chhuahna a nih avangin Thlarau Thianghlim malsawm dawnna nen a inzawm tlat a ni. “Sim ula insual ngaihdam nan Isua Krista hmingin baptisma chang theuh rawh u. Tichuan Thlarau Thianghlim pek hi in hmu ang” (Tirh. 2:33).
Atawp berah chuan “Ringtuten Isua Krista an rinna, an nun a Lal leh Thuneitu a nih zia an puan chhuahna leh atana nung tur an nih zia lantir nan baptistma an chang thin a ni”. Kan baptistma chan thu chham pawh, “Isua Krista chu i LAL leh Chhandamtu-ah i pawm tak avangin, Pa leh Fapa leh Thlarauthianghlim hmingah chuan lawm takin ka baptis a che” tiin kanin hmimphum ta thin a ni hi. Vawinah hian kan unaute mi 20(sawmhnih) lai,
Lal Isua an rinna puangchhuaka baptisma an chan hi Lalpan kohhranhote tan malsawm rawh se.
Hla KHB No 57: “Krista thisen hlu tak chhuak chu”.
Hla sak hona:Khb No 57: “Krista thisen hlu tak chhuak chu”
Krista thisen hlu tak chhuak chu
Krista thisen hlu tak chhuak chu,
Ka tan a hlu a ni;
Hlauhna leh rinhlelhna ata,
Ka thlarau a chawl ta.
Aw, thisen lui mak tak a luang,
Chhandamna atang chuan;
Van thlen thlenga ka hla tur chu
Aw thisen, thisen hlu.
"An sualna leh atnate chu,
Ka hre reng tawh lo vang;
An tan ka Fapa a thi si,"
Lal Pathianin a ti.
Ka sual ka hriat chhuah fote hian,
Min tithlaphang lo vang;
Chu thisen hlu chuan a tleng fai,
A kai dum zawngte nen.
He ka taksa chak lo tak hian,
Natnate tawk mah se,
Chu thisen hlua ka chawlh chuan,
Thlamuangin ka thi ang.
