Aw Lalpa, i malsawmna hlu,
Kan engkim chungah a lang;
I thu lo chuan kan nunna hlu,
Kan neih zawng nen a ral ang.
Kan fak a che,
I khawngaihna kan hmuh hian.

Nangma khawngaihna kut ata,
Nunna leh chakkhai tinreng;
Hlobet, pangpar nung tinrengin,
An dawng thin malsawmnate.
Fakna hlate,
I hnenah an hlan kum tluan.

Aw kan Lalpa, engkim Siamtu,
Nangma kut chhuak zawng zawng hian,
Mangan, lungngaiha min vengtu,
Fak tawk lo che mah ila,
Min ensan suh,
I duhzawng min zirtir rawh.

Hunte, nite an ral zel a,
Khawvel thil mawite an chuai;
Kan sualna zawng zawngte Lalpa,
I theihnain a tifai
Hun hmuh kan chak,
I chakna ring zel chung hian.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi ang u. Pathian nung leh egkimtithei, min chhandamtu kan nei hi a tharin lawmthu i sawi ang u.
2. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
3. Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
4. Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
5. Kan khawtlanga khawhar chhungte tan, Pathian thlamuanna leh awmpuina an chan theih nan thahnemngai takin i dilpui ang u.
6. Covid 19 avanga tuar mek te leh lusun zawng zawngte tan. Pathian thlamuanna an chan zel theih nan.
7. Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
8. Lockdown kan hmachhawn leh dawn a, siam a nih chhan ang ngeia awmze nei alo nih theih nan i dil ang u.
9. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : ‘Lal Isua a lo kal leh dawn’ .

Audio

Vawiin July,18,2021 Pathianni-ah hian kohhran hote in zavaiin Lalpa Isua Krista hmingin chibai ka buk a che u. Tukina Pathianthu sawina hun tha tak mai kan hotute kaltlangin Pathianin min buatsaihsak leh ta a, ka lawm hle mai. Hripui leng avangin kohhran hote Biak In-ah la inkhawm thei lo mah ila Media kaltlanga kohhran inkhawm kan nei leh thei hi a lawmawm hle mai. A buaipuitu kan hotute leh Pathian hnenah lawmthu ka sawi a ni. A hmasain kan kohhranin kan tih thin angin naupang pual kan sawi dawn a ni.

NAUPANG PUAL : Vawikhat chu thir zuartu sumdawng pakhat hi a zin dawn a, a thianpa hnenah a zin hlana tha taka a lo kawl that turin thirtiang a pe a. A zin a lo haw chuan thir zuartu chuan a thianpa hnenah chuan a thirtiang kawltir chu a va la dawn a, “Ka thirtiang chu mi han pe leh tawh ta che” a ti a. A thianpa chuan, “A, i thangrei ema i thangbo chhungin sazuin a lo ei zo daih a lawm le” a ti a. Chu veleh thir zuartu chuan mak titak chungin a thianpa hnenah chuan “ka zinnaah thil tha tak tak a awm a, ka rawn hawn che u a sin, i fapa hi rawn lamtir ta che” a ti a. Ani chuan “thir zuartuin thiltha tak tak a hawnsak lam tur chuan a fapa chu a tir ta a.
Thir zuartu chuan a thianpa fapa chu a lo thlen ve leh a thukru bo ta daih mai a, a pa hnenah chuan a haw thei ta reng reng lo mai a. Thir zuartu thianpa chu a mangang ta em em a, a fapa lam tur chuan a kal ta a. Thir zuartu hnen a thlen chuan “ khawnge ka fapa kha” a ti a. Thir zuartu chuan “E khai thianpa a pawi tak tak a ni, mu lianpui mai a lo thlawka i fapa kha a la ta a lawm maw le” a ti a, beidawng takin a haw ta a ni an tia lawm.
(Hei hian mi chunga rinawmloh chu mahni tan ngei a pawizia a entir a ni. Chuvangin naupang zawng zawngte khan in thian te, in nu leh pate hnenah dawtsawi mai mai lovin rinawm takin in awm thin dawn nia.)

THUCHAH : LAL ISUA A LO KAL LEH DAWN.
Tukina kan thupui atana ka rawn thlan chhuah chu ‘Lal Isua a lo kal leh dawn’tih hi a ni. Ka rilrua ka ngaihtuahna ang pawh ka sawi chhuak thiam dawn lova, kohhran hoten rilru tawngtaina nena min lo ngaihthlaksak turin ka ngen che u a ni. Lal Isua lo kal lehna tur thu hi kohhrante tan thu pawimawh tak a ni a, nimahsela kan ngaihthlak khat pawl tak a ni awm e. Lal Isua lokal lehna tur thu hi Bible-ah Thuthlung hlui Bu-ah leh Thuthlung Thar Bu-ah hmun tam takah kan hmu a, kohhrante tan thurin pawimawh tak a ni bawk a ni.

ENG HUNAH NGE LAL ISUA HI A LO KAL LEH DAWN ?
Lal Isua chu eng ni-ah nge a lo kal dawn ? A lo kal leh hun tur hi a hun leh ni chu tuma hriat theih a ni lo tih Pathian thuin min hriattir Mat.24:36. ‘Nimahsela chumi ni leh a hun tur chu Pa chauh lo chuan tuman vana vantirhkohte pawhin fapa pawhin a hre lo.’ I Theso.5:2-3 ‘Lalpa ni chu zanah rukru angin a lo thleng dawn tih nangmahni ngeiin chiang takin in hre si a.Muanna leh hlimna ti-a an sawi lai takin hmeichhe nau vei angin chawplehchilhin boralna an chungah a lo thleng ang a, an pumpelh tawp lovang.’

LAL ISUA A LO KAL LEH DAWNAH ENG NGE LO THLENG DAWN ?
Mat.24:7 & Luka 21:10,11 kan chhiar chuan Lal Isua tawk tura kan inpeih theihna tura kan lo inbuatsaih theih nan Lal Isuan a lo kal leh dawna thil thleng turte a zirtirte hnenah a lo sawi lawk vek tawh. Hengte hi keini tunlai khawvela la cham mekte tan kan lo inbuatsaih theihna tura fuihna thu pawimawh em em a ni. Chungte chu hengte hi an ni :-

1. Indo thuthang : Kan khawvel hun liam tawh leh kan tunlai hun kan thlir chuan indona avanga mihring maktaduai tam tak an thih thu kan hre thei awm e. Khawvel thil thleng ziaktu pakhat chuan kum zabi sawmhnihna chu mihring thisen chhuah hnem ber kum zabi a lo ti hial a ni.

2. Tamte a thla ang : Zirmiten an chhun dan chuan khawvel hmun thenkhat ram reitheiahte chuan mi tluklehdingawn khat chuangte chu nikhata dollar khat emaw, aia tlem emaw chauh hman tur neiin an nitin hun an hmang thin a ni. Chung zinga a tam zawkte chuan hun rei tak chhung riltamin an awm thin a ni. World Health Organisation chuan kumtina naupang maktaduai nga aia tam thi zinga a tam zawk hi ei tur neih loh vanga thi an nih thu a sawi.

3. Lirnghing : US Geological Survey-in a tarlan danin kum 1990 atang chauhva chhut pawhin kumtin in tichhe thei leh lei tikhi thei khawpa na leh chak lirnghing chawhrualin vawi 17 thleng ang a ni a ti. A khat tawk hian lirnghing avanga chhiatna rapthlak tak tak hi khawvelah hian a thleng mek a ni.

4. Hrileng :Tunlai khawvelah damdawi lam thiamna a sang em em tawhna chung hian natna hriat tawh thin leh kan hriat thar chi hrang hrangte chuan mihring a la zarbuai nasa em em a. Chung zinga natna thenkhat phei chu damdawi pawh awm lo, thihpui ngei ngeina chi natna an ni. Tunlai khawvel pum huap hrileng Covid 19 te hian mihring nunna a va la hnem tawh tak em! Dt.16 July,2021 thlenga Covid 19 avanga thi pawh mi 40,84,260 an awm tawh a ni. Covid 19 hian nunphung a tidanglama khawvel economic a tichhe nasa em em a, mihring nunphung kohhran, khawtlang, ram inrelbawlna a tidanglamin min tiralmuang lo em em a ni. Hun khirhtakah min awmtir mek a ni. Engtikah nge a reh dawn tih pawh a hriat si lo.

ENG TI TURIN NGE A LO KAL LEH DAWN ? Rorel turin a lo kal dawn. Lal Isua rorel tura a lo kal lehna tur hi hmangaihtu leh hmangaihte inthenna hun tur, hun rapthlak leh hrehawm tak a ni dawn a ni. Khawvela kan awm chhunga in chhungkhur chhuahsana nupui pasal, fanau, tu leh fate, kan hmangaihte kan zin bosan chang a awm fo thin. Chutiang hun reilote chhung pawh chuan kan hmangaihte chu kan ngaiin haw thuai thuai kan duh thin a ni. Chatuana inthenhlenna hun Lal Isua rorel tura a lo kal huna inthen lova a hnena kan kal tlan theihna tura khawvela kan cham chhung hian chhungkua kan inbuatsaih hi ava pawimawh tak em ! Mahni chhungkua theuh i inbihchiang teh ang u, lokal tura chu a lo kal thuai dawn si a.

Lal Isua a lo kal leh hun chu sumdawngtuin a sum zawng zawng a kalsan hun tur, lo neituin a thawhrimna a chawlhsan hun tur, mi zawng zawng kan nih tur ang kan nih hun tur, kan pan tur lam lam kan pan hun tur, chatuana nunna vanram emaw, chatuana boralna hremhmun emaw kan pan hun tur a ni.

Lal Isua pawh khan a lo kal lehna hun tur hi a ngaipawimawh em em mai a, kan lo inrinlawk theihna turin a lo kal hmaa khawvela thil thleng tur hi thahnemngai takin a lo sawi lawk vek tawh a ni. (Mat.25:32. kan chhiar chuan, A hmaah chuan hnamtin an inkhawm ang a, beram vengtuin kel zinga a beramte a hlir angin anni ho chu a hlir ang a, beramte chu a ding lamah, kelte erawh chu a vei lamah) Heta beram a tih hi ringtu amah Lal Isua ringtute a tihna a ni. Kel a tih chu Lal Isua amah ringlotu a tihna a ni.

Kan hmalam hun tuman kan sawi thei lo, dam reng tura inngai, thih thut thutna khawvelah kan cheng mek a, naktukah eng nge lo thleng dawn tuman kan sawi thei lo. Kan ram hian chhiatna rapthlak a tawng dawn em ? engnge kan hmabak Covid 19 hrileng avangin hun khirh takah kan awm mek lai hian Lal Isua lo kal kan hnaih tial tial a, khawvel hi a pangngai reng pawhin awm sela, keimahni zawk hi kan ral tho tho dawn tih ngaihtuahin Lalpa tawk tura inpeih hi a hun tawh takzet a ni. Lalpa lo kal ni-a a hnena chatuana chawl tura kan inbuaisaih hi ava pawimawh tak em ! Tun hi hun lawmawm chhandamna ni a ni. Amen, lo kal ta che Lalpa Isu tithei turin i inbuatsaih thar theuh ang u.

Lalpan a thu malsawm rawh se.

Pathian fakna hla:- KHB No 238 - ‘Lalpa chu a lo kal leh ang,’