THUPUI: “PATHIAN CHU KAN INHUMHIMNA”

Tunlai khawvel harsatna leh buaina hrang hrangin a tuam vel Ringtute Lalpan malsawmin veng zel che u sela, Lalpan inlam lo hawi sela a hmel chu in chungah ni angin entir zel rawh se. Kohhranhote Pathian Biak Ina kan inpawlho thin dan pangngai anga kan inpawlho theih loh chhung hi chawlhkar 22 lai a lo ni ta reng mai. He hun chhungah hian hun harsa leh hlimnate, lungngaihna leh lawmna te kan paltlang theuh awm e. A thente phei chuan thlaphhang leh zam reng rengin hun kan hmang awm e. Chuvangin vawinah hian, “PATHIAN CHU KAN INHUMHIMNA” tih thupui hmangin thuchah puanchhuah kan tum dawn a ni.

Kohhran rawngbawlna kal pangngai a thu thup a, “Babulon lui kamahte, chutah kan thu a, a ni, kan tap thin, Zion kan ngaihtuahin,” (Sam 137:1) Israel faten an tih ang mai khan Biak In ngaiin kan awm thup mai a nih hi. Israel fate khan an sal tanna hmun atang khan Jerusalema Pathian Temple kha an ngai hle thin a ni ang tih a rinawm. He hun khirh tak hnuaia kan awm lai hian mi tinin Beiseina (hope) nung kan neih a va tul em! Vawiin atana kan thupuiah “Hun khirh karah beiseina,” tih ka han thlang a ni. Kan thinlung zawng zawngin Pathian chibai i buk ila, A lam hawi ang u. Amahah kan beiseina i nghat tlat ang u

Naupang pual :
Indopui pahnihna hun lai khan Sap sipai leh an hmelmate chu nasa takin an indo a. Sap sipai engemaw zat an thi a. Hliam tuar engemaw zat an awm bawk a. Hliam pakhat chu a thian ten enkawl tura lak an tum a. Mahse hmelma lam ten nasa taka an lo kah zel avangin an la thei mail ova. Sap sipai zingah chuan Sipai tleirawl tak pakhat hi a awm a. Ani chuan a sana hi a en leh zeuh thin a. Tlai dar 4 a rik chiah chuan chu Sipai tleirawl chu an thianpa hliam tuar la tur chuan a tlan chhuak a. Silaimu karah chuan him takin an thianpa hliam tuara mu reng chu a va la ta a. An hotupa chuan, ‘Tlangval, sana kha I en zeuh zeuh a, a tawpah khan I tlan ta phut mai a, engnge a chhan’? a ti a. Chu sipai chuan, ‘Ka pu, ka nu hi tlailam dar 4-ah chiah hian ka tan a tawngtai thin a. Ka nuin min min tawngtai sak lai chuan Pathianin min veng dawn tih ka hria a ni’ a ti a. Pathian chuan silaimu hlauhawm tak lakah chuan a venghim a ni. Pathian hian eng hlauawm lakah pawh min venghim thei a ni.

Pathian thu Sam 46 : 1-4 I lo ngaithla ang u.
Tunlai khawvel kan thlir chuan Covid 19 avang te, Lirnghing leh indona avangte leh chhiatna hrang hrang avang te hian thlabar mangangin kan awm a. Kan nunphung a buai zo a, mahni inchhungkhurah pawh kan thlamuang ta lo. He hunah hian kan duh leh mamawh ber chu Thlamuanna famkim a ni. Chu chu khawiatangin nge kan neih theih ang. Thenawm khawvengte hnen atanga hmuh theih a ni lova. Dawrpuiah lei tur a awm hek lo.

Kan pi leh pu hunah khan Mizote hian tlangchhip hmun rem laiah khua an din thin. Hei hi a chhan ber chu hmelma leh ransa hlauhawm lakah te inven awlsam nan, an him nan an ti ni deuh berin alang.Kan pi leh pute khan Inthawi te an ching a. Hei pawh hi an mahni tinatu lakah an himna leh damna an neih theih nan a ni. Hripui a len changte phei chuan Hri Dai theuin nasa takin an him nan an bei thin. Khawvel hmun hrang hrangte kan thlir chuan Lalin kulh ropui tak tak te an siam thin a. Bible-ah pawh hian kulh nei khua tih te, kulh tihte hi kan hmu zing khawp mai. Tunlai thleng pawha khawvelin mak an tih pakhat chu China Bangpui (Great wall of China) hi a ni. Hei pawh hi China lalin an ram hmelma ten an run mai theih loh nan a siam a ni.

Kan Pathian thu chhiarah khan, Sam ziaktu hian Pathian chu kan inhumhimna leh kan chakna, Mangan laia tanpui vartu hnai reng a nih thu min hrilh a ni.
Kan Pathian thu chhiar atang khan thil kawng thum chauh lo zir bing ta ila;

1. Pathian chu kan Inhmumhimna leh kan chakna : Khawvelah hian ram tin hian mahni ram himna hi an ngaihtuah theuh a. Mahni ram humhim nan sum leh pai tam tak sengin Sipai leh Ralthuam tha thei ang ber an ngaihtuah a. Kan ram India pawh hian ram himna a ngaihtuah a. Hmanni lawkah pawh sum tam tak sengin Indo thlawhna te a lei a. Ralthuam dang lei nante pawh sum tam tak a seng a. Ram venhim nan sipai tam tak a ruai a. Mi tam takin ram venhim nan an nunna pawh an chan hial a ni. Heng ralthuam man to pui puite hian min veng him thei tak tak em. ? Heng hi kan thlamuanpuiin kan himna a ni tak meuh em?.
Kan tunlai boruak hi han thlir tai la, Covid 19 avanga Khawvel kan ralkhel zia leh kan mangan zia te, Lirnghing, tuilian, Tlangkang leh Khuarel chhiatna hrang hrang a tam zia leh heng lakah hian kan inhumhim theih loh zia te hi a takin kan hmu theuh mai. Khawvel ram ropui America meuh pawh Covid 19 lakah hian an tlawm chiang khawp mai. An indo lawnglian leh indo thlawhna leh an ralthuam changkangte leh an Bomb mitnei te hial pawh hian awmzia a nei lo.
Sam ziaktu hian Pathian chu, Kulh ropui tak mai a chhunga chengte himna leh hmelma pawhin engtinmah an tih theih loh leh an hneh theih loh a nih thu a sawi a ni. Kulh chhungah chuan Sipai mai ni lo, nunau leh tar chak lo tak tak raldo chu sawi loh mahni pawh insaseng mumal thei lo te pawhin kulh chakna leh rinawmna avang chuan hmelmalakah pawh him takin an awm thin ang hian Pathian chuan min venghimin chak lo te mah ni ila Ama chakna hmang chuan hmelma te kan hneh thei a, Ama chakna hmang chuan tihchakin kan awm thin a ni tih min hrilh.
Bible-ah hian Michak Samsona chanchin te Davida chanchin te leh Israel faten indona an hmachhawn changa hnehna an chan thin thu tam tak kan hmu. Hengte hian anmahni theihna leh chakna ni lovin Pathian chakna hmangin an hneh thin a ni. Tirhkoh Paula’n, ‘Min tichaktuah chuan engkim ka ti thei’ (Philipi 4:13) tiin a sawi. Pathian hi kan himna leh kan chakna, hmelma leh thlemna kan hneh theihna a ni.

2. Pathian chu mangan laia Tanpui vartu hnai reng a ni :
Mitin hian kan mangan lai leh tanpuitu kan mamawh lai hian tanpuitu tur kan zawng ruai thin. Sam ziaktu hian hlauhawm rapthlak tak tak, leilunga chhiatna lo thleng mihringin kan dan zawh rual loh chhiatna te, Tuifawn nasa tak te lirnghing te a lo thlen changte hian tanpuitu kan nei a ni tih a sawi a ni. Sam 121:2-ah chuan, ‘Min tapuina tur chu Lalpa, lei leh van siamtu hnena mi a lo thleng ang’ a ti.
Pathianin Aigupta sal atanga Israel fate hruaichhuak tura Mosia a tirh dawn khan, Mosian Pathian hnenah, Israel fate chuan tunge ni kan Pathian chu lo tise engtin nge ka chhan ang? a tih khan Pathianin a nihna a sawi chu ‘AWMA ka ni’ a ti a ni.(Exod 3:14)
Israel fate an saltanna hmuna manganga an rum lai khan, an rum rite hre turin an zingah Pathian kha a lo awm reng a. Jona chu nghapui kawchhunga mangang taka a awm lai khan a bulah Pathian a lo awm reng. Jeremia chu lalnu Jejebli hlaua thlalera puka a bihrukna hmunah khan Pathian chu a bulah a lo awm reng a. Kross lera thi tura misual an khenbeh bulah khan Pathian chu a lo awm reng a. Zirtirte Galili dila thlipuiin a nuai lai khan Thlipui hau reh thei Pathian chu an bulah a lo awm reng a ni.
Buaina leh manganna in min chim lai, kan thiamna leh theihna ten engmah an tih theih lohva kan sum leh paiin awmzia a neih loh lai pawh hian engkim chunga thuneitu Pathian hi kan bulah a awm reng a ni.

3. Pathian chu kan lawmna a ni: Mitinreng hi hlimna leh lawmna zawngin kan tlan a. Hausakna hi lawman nia ngai ten an hausak theih nan theihtawp an chhuah a. Ruitheih thil hi lawmna nia ngai ten nasa takin an chen a. A thenin hmingthan leh larna te, nulat tlangvalna kawngte, in leh lo tha leh lirthei changkang chhuak thar te hmangin lawmna an zawng thin. Hengte hian engemaw chen chu hlimna leh lawmna pawh a p eve a ni ngei ang. Mahse hlimna leh lawmna famkim an nei em tih hi chhut ila. Khawvela milar leh hausa te, ruihtheih thila nasa taka tlan thinte tawpna hi a rapthlak thin tih hi chiang takin kan hmu. Entirna sawi tur pawh tam tak kan hre awm e.
Sam Ziaktu chuan Pathian chu, Pathian khawpui an tih Jerusalem hual vela luipui tui thianghlim luang, chu lui thianghlim atanga khawpui chhunga mi ten an mamawh anga luitui la penga an mamawh anga hlim taka an hmang leh chung tui thianghlim avanga an lawmna chu tehkhin thuah hmangin Pathian hmangaihna luipui kan mamawh ang zel a hun taka min tihlima lawmna min thlen tura a luan reng thu min hrilh a ni. Pathian atang chauh hian lawmna leh hlimna famkim chu kan hmu a ni.

Tlangkawmna:
Khawvela kan awm chhung hian manganna leh lungngaihna te, hrehawmna leh harsatna kawng hrang hrangte hian min tuam thin a. Keimahni chuan heng lakah hian kan inhumhim thei lova, hneh turin chakna kan nei hek lo. Chuvang chuan kan manganga kan thlaphang thin a nih hi. Nimahse ringtute chu thlaphanga mangang tur kan ni love. Lalpa kan Pathian hi harsatna leh mangangna kara kan inhumhimna, kan hneh lohte hneh thei tura kan chakna kan thlaphan leh mangan laia min tanpui vartu lawmna famkim min thlentu Pathian kan nei a ni. Lalpa chu fakin awm rawh se.
Kan thuchah te Lalpan kan za atan mal min sawm sak theuh rawh se .. AMEN.

Tawngtaina
Hla sak hona: Lal Isua chaknaa innghatin, (KHB No 149)

Lal Isua chaknaa innghatin,

Lal Isua chaknaa innghatin,
A tanpui ang che, a pui ang che;
A hmangaih thlawn lo I rin tlat chuan,
An zai hlim tir ang che.

A chakna leh a hmangaih ring la,
A chakna leh a hmangaih a lang;
A chakna leh van in khi en la,
Chhandamtu chu I hmu ang.

Lal Isua chaknaa innghatin;
Kawng a tieng ang, a tieng ang,
A hruaina che lawma zuiin
A aw nem awih zel rawh

Lal Isua chaknaa innghatin,
I buaina pe rawh, amah pe rawh;
I phur chu rite m mah selangin,
Lal hnenah tawngtai rawh;<

KLal Isua chaknaa innghatin,
I engkim pe la, engkim pe la;
Hmangaih leh khawngaihin a khat e,
A ensan loving che.

Lalpa Tawngtaina