SERKAWN TUALCHHUNG KOHHRAN

PATHIANNI ZING PROGRAMME

10:00 AM, 15th November, 2020

PROGRAMME:

Hla sak hona:Khb N0.1. : Thianghlim, Thianghlim, Thianghlim! Engkimtithei Pathian(Thilpek lakkhawmna)

TAWNGTAI RUALNA

Tawngtaina a Hriat Turte
1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan, a hruaia awm zel turin mimal tin a hnenah vawiinah hian i in tulut thar ang u.
2. Covid19 avangin a huhovin la inkhawm thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila. Pathianin rem a tih chuan a huhova Amah Biakna hun kan neih leh thuai theih nan Pathian hnenah i dil ang u.
3. Kan ramri buai chungchang Pathian hnenah thlen ila, Pathian duhdana kan hruaituten fing leh thiam taka ramri chungchanga hma an lak theih nan Pathian hnenah i dil ang u. Kan ram chin dik tak hi kan neih ngei theih nan Pathian i dil zel ang u.
4. Tunah chuan Covid19 hian Mizoram min lo luh chilh ve tak tak ta a, thihpui leh ICU a enkawl ngai engemawzat kan lo awm ta a. A tuartu te leh an chhungte zawng zawng tan tawngtai sak ila. Tin, community spread hi a nasat zel lohna turin Pathian venhimna dil chhunzawm zel ila.
5. Covid19 vei enkawltu zawng zawngte tan Pathian venhimna leh Pathian atanga chakna thar leh hmangaihna nena covid19 vei damlo te an enkawl theihna turin dil sak ila. Tin, mipuite hian thuawih taka kan himna tur te kan zawm a, kan fimkhur zel theihna turin Pathian tanpuina dil ila.
6. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
7. Kan member damlo te Hospital leh mahni in lama in enkawl te tan tawngtai sak ila.
8. Kan thuchah ngaihthlak tur kan hlawk pui ngei theih nan Pathian malsawmna dil ila, kan thawhlawm te Pathian hnenah kan hlan bawk dawn nia.

THUCHAH

THUPUI: “Van Khawpui Thianghlimah khian tute nge lut ang? ”

Audio

Thuhmahruai: Tukinah kohhran hote kan Lalpa Isua Krista hmingin chibai ka buk a che u. Kan thupui tur chu Van khawpui Thianghlimah khian tute nge lut ang? tih a ni ang. Ringtuten thih hnu piah lam rama kan beisei leh kan innghahna chu Vanram a ni a. Nimahsela mi zawng zawng tan hetia kan awm dan ang ngawt hi chuan luh theih a ni lova, hmanlai kan pi leh pute hun laia Pialral lut tura thangchhuah a ngai ang khan Vanram lut tur hian mathei lova tih tur kan nei ve a ni.

Kan Pathian hi a thianghlim a, a chenna 'Vanram' pawh khi a thianghlim em em a, a chhungah chuan mi tumah fellohna, bawlhhlawh kai chung leh sualna zakzeh a, paipawn chung chuan kan lut thei hauh lovang tih kan Pathian thuin min hrilh. Sam 24:3-5, "Lalpa tlangah chuan tunge chho vang a, a hmun thianghlimah chuan tunge ding ang? Kut fai leh thinlung thianghlim nei a, a rilru engmah lo mai mai lama dah ngai lo va, bum tuma chhechham ngai lo mi chu. Ani chuan Lalpa hnen ata malsawmna a dawng ang" a ti.

Hmasang kohhran hote atanga tunlai kohhran thleng hian, Pathian thuah hian a pawm nuam zawng leh a thiangzau zawng a inzirtirna a tam hle mai a, a khawngaihna leh a hmangaihna chauh tuipui a, ringtu tena kan tih ve tur lam te, thianghlim tura koh kan nihna te, kan thawhchhuah ve tur lam te, kan tawrh ve na tur lam te, tui pui tlat lo ringtu zingah tam tak an awm. Kan ramah ngei pawh pawl din tham hial an lo awm ta!

Pathian thu chuan thianghlimna khawpuia lut thei turte chu hetiang hian min hrilh a, "Thil bawlhhlawh reng reng a lut hauh lovang a, thil tenawm ti te leh dawt hmangte pawh an lut hek lovang; Beram No Nunna Bu a hming ziak te chauh an lut ang" tiin (Thupuan 21:27)

Pathian thuin "Thil bawlhhlawh leh tenawm" a tih hi hre fiah tura ngun taka ngaihtuah chungin, chung thilah chuan kan fihlim em? tiin mahni ngei kan in enfiah ava tul tak em. Biblein-a 'Thilbawlhhlawh leh tenawm' a tih te chu, inngaihna te, bawlhhlawhna te, hurna te, milem biakna te, huatna te, rinhranna te, itsikna te, zu ruihna te, zu hmun hlimna te an ni (Gal.5:19-21). Tin, sum ngainat (l Tim.6:10) te pawh a ni ang, heng thilah te hian kan fihlim tak zet em le? Van khawpui sual awm tawh lohnaah chuan , thil bawlhhlawh reng reng a awm thei tawh lo a ni.

Adama thlah kal zel lei mihringte hian mahni tlin lohna leh fellohna inhmuh hi har kan ti thin hle mai, midangte nena kan inteh phei chuan inteh tlin hi awl tak a ni. Nimahsela kan awm dan leh kan rilru put hmangte, kan ngaihtuahna chhungril ber thleng mai hian chiang taka, mi zawng zawng hmuh theih tura tar lan kilh kelh ni ta se la, zak ngawih ngawih tur hi kan tam hle awm e.

Aw le, Pathian thuin, 'Thil bawlhhlawh leh tenawm' a tih hi sual langsar chauh ni lovin, mite hmuh pui phak loh mimal chhungril nun bawlhhlawh rukna a ni ber zawk. Kan Pathian thianghlim leh duh fir tak hian Zoram Kristian tam tak ten Lalpa hnung kan zui duh dan tawk hi a pawm zam thei ang em tih hi ngaihtuah tham tak a ni. Chhandamna hi khawngaihna changchawia chhungril nun bawlhhlawh tak chung si a awlsam taka hlawh chhuah chi a ni hauh lovang.Mihring zingah famkim (perfect) tumah a awm theih loh tih hi inthiam chawp nan hman a awl hle nimahsela hei hi inhnemna tha lo tak a ni.

That tum thei si lo, fel tum thei si lo an awm laiin, that tum hauh lo, tha lo te, dik tum hauh lo dik lo te an awm a. Pathian duh dana nun tum hram hram chunga mi chak lo an awm laiin Pathian ngaihsak peih lo, nun fello an awm bawk. Chaklohnain a phuar vel chung chung pawh a ti ve hram hram, that duh, fel duh, chaklohnain a phuar vel avanga tluk leh dingawn chunga kal ve tawk tawk an awm laiin, Pathian laka inthlahrunna nei hauh lova hlepruk, uire, nawmchen, duham, mi bum, dawtsawi pawh pawisa hauh lova kohhran a inhmang reng ngam pawh an awm bawk.

Aw le, hmeichhe chhul atanga piang mihring zingah Lal Isua chauh lo chu tumah tha leh fel famkim a awm theih loh tih hi thudik a ni a nimahsela hei hi inhnem nana hmanga fellohna sim tum lova inthiam chawp zel mai mi chu Thianghlimna khawpuiah khian pawm zam a ni hauh lovang. Pathian chuan mahni intithianghlim zo lo kan ni tih min hriat sak em em a chuvangin inti thianghlim zo lo chung pawha amah ngai tlat tute hi a khawngaihnain tlingah min pawm a, kan nun min luhchilhin nitin felna kawngah min hruai zel thin. Tichuan keimahni chakna leh theihna ni lovin, Thlarau Thianghlim zarah nitin thianghlima awm zelin Thianghlimna khawpuiah khian kan la lut dawn zawk a lo ni. Lalpan a thu malsawm rawh se. Amen.

Hla sak hona: KhB No 501: “Vanram ngaihtuah hian min tilawm a”

Lalpa Tawngtaina