LALPA HNENA TLUKLUH MAI HI KAN TIH TUR A LO NI
- Rev Dr Lalzarliana
1.
Thuhma: Khawvel hun tawnga thil thleng zen zen lo leh a thlen chang pawh a khawvel huap a buai luih luih tur khawp ni lo, a huam chin ramte erawh an buai em em na thin hripuiin khawvel pumpui min han len khum thut ta mai hi a mak tih mai loh chu sawi dan tur hriat thiam a har hle mai. Khawvel ram ropui, ram hausa leh thiltithei te pawh inchhuang thei leh inveng thei reng an awm lo. An ralthuam ropui leh thil tithei, ram dang rum thaih nana an hman leh an chhuan em em pawh chuan awmzia a nei ta lo. Khawvel ram ropui America, Russuia leh Chinate chu a tuar tuar an lo ni ta. Chutih laiin ram rethei te tan phei chuan a inenkawlna leh buaipui man a to tham em avangin theih tawp a inkharkhip chungin buaipui loh theih a ni si lova. He hri tluka khawvel timangang leh tibuai hi history ah sawi tur a tam lo tawp ang.
Hun khirh tak: Kan hun tawng mek hi engtin nge keini hian kan lo ngaih ve le? Engtiangin nge kan lo dawnsawn ve le? Sikul kan hawng thei lo, naupang nun a pangai thei lo, hna tam tak kan bahlah, nunphung a buai, khawsak pawh a khaihlak ta riau a. Chawlhni vawi 12 zet Pathian mite Pathian chibai buk leh chawimawi turin Biakinah kan inkhawm thei ta lo va (Israel fate Babulon sal a an tan lai a Jerusalem an ngai, ‘Jerusalem nang ka theihnghilh ai che chuan…’ an tih vel kha ka inchan deuh roh a, lung a leng riau ta mai) Heng hun te hi chu a reh ve leh mai ang chu tiin kan rilru kan ti thlamuang nge? Kan hun tawn thlirin hma hun hi a lungngaihthlak, tam leh buaiin min chim mai ang tih rilru puin kan inralring dawn? Nihnuhnung a thil thleng tur kan Pathian thuin a sawi lo thleng mek zel ah hian engangin nge kan hun leh nun hian hma lam a thlir dawn le? Buai, phili leh hlau vin kan lo hmachhawn dawn nge? chung lam thlir chungin Lalpa lam hawi mai hi kan tih tur ni zawk ang le? Kan tihtur dik tak ilo en teh ang.
Engang hun harsaah pawh belh tur dik tak hriat ava pawimawh em: Jehosaphata chu Moaba thlahte leh Amona thlah ten bei an tum a, ‘Nangmah bei turin mipui tam tak mai, tuifinriat ral Suria atangin an lo thawk chiam mai…’ ti a an hrilh chuan a hlauva, a mangang a. Indo tura inbuatsaih a, a sipai hotute ko khawm a lo inralrin lam a lang thei tlat lo. A do zawh rual loh do puitu tur a tan tudang a thlang lo. ‘Lalpa zawng turin a inpe a’ tih leh a mipui tepawh Lalpa tanpuina zawng a pung khawm turin a ti a. Pathian an au va, anmahni lam in dah tha in ‘Aw kan Pathian, an chungah ro i rel dawn lawm ni? Mi chu zozai, mi rawn bei tura lo thawkte chu lo han bei thei ziazang kan ni si lova; a tih ngaihna reng reng kan hre bawk hek lo, I lam kan lo hawi mai zawk a ni e’ tiin Pathian lam an hawi ta zawk a nih kha.
Innghahna tur dang a awm lo ve: Tun hunah hian innghana tur kan van ta hle mai, sum ngah leh hausak avanga Covid 19 laka dam theih ni ta sela, Grammy award dawng khawp Country singer lar Joe Diffie te, American Rock musician Allan Merrill, he hri avanga thi tate khan an sum neih zozai kha an nun chhan nan an hmang ngei ang. Lalna, thuneihna leh thiltihtheih ang zawnga do theih ni se, UK Prime Minister te, Russia Prime Minister leh Israel Health Ministerte khan Covid 19 hri an tuar kher lovang. Thiamna leh hriatna hman nghal mai theih nise Shillong a kan Mizo Doctor tha takte khan mual an liam kher lovang.
Lalpa lam hawi mai loh chu:‘Ka Innghahna a tawp hunin amah chauh ka beisei ang’ tih hla hi ka duh thin khawp mai. Khawvelah hian innghahna tur kan zawng a, engemaw chen atan hi chuan a hmuh pawh kan hmu awm asin. Kan dam vervawr a, mamawh kan hmuh a, khawsak pangaia khawsak theih hi chuan tudang kan ngai bik teh chiam awm lo ve. Nimahsela, chung zawng zawng a tawp hnu a, beisei tur awm tawh lova natna khum a thih hmabaka han mut bam tawh chuan Lalpa lam hawi mai loh hi chu innghahna dang a awm thei tawh lo.
Hnehna chu Lalpa ta a ni: ‘Nangni thawkrim leh…ka chawlhtir ang che u’ Lal Isuan a tih hi, kan innghahna ni theuh thei se. Jehosaphata leh a mite pawh Lalpa lam an hawi avangin an tawngtai chhanna chu ‘Hlau suh ula, chung mipui tam tak avang chuan zam hek suh u; Indona chu nangni indona a ni lo va, Pathian indona a ni zawk si a’ tiin bei chiam pawh ngai lovin Lalpa hnathawh a lo lang a nih kha. Khawvelah hian Isuaah chauh lo chuan muanna leh himna a awm lova, lungawina pawh a awm hek lo. Kan tihtheih tawk chu Lalpa hnena tluk luh a, ‘Lalpa i lam kan lo hawi mai a ni’ ti a, rilru leh thinlung zawng zawnga amaha kan tlukluh hi a ni e. Lalpan a thu malsawm rawh se. AMEN.
Hla sak hona: Khb No 454 : Ka hmaah luiral khawmawi chu a awm.
Ka hmaah lui ral khaw mawi chu a awm
Ka hmaah lui ral khaw mawi chu a awm,
Thlen ka nghakhlel khawpui mawi chu;
Lungduh zawng zawng an kimna hmun,
Hmuh chakin ka thlir bang thei lo.
Aw kal lai kan ni,
I chawl lo vang,
Lalpa chakna ringin,
Khawpui mawi i pan ang.
Chu khawpui lam chu i pan zel ang,
Chau lovin i kal zel ang u;
Ralmuang hmun reng hi a awm lo,
Lalpa hnen kan thlen hma hi zawng.
Hre chiang teh ila aw, ka fak ning lo'ng,
Raltitnaah leng mah ila,
Van hmun ropui thlen hunah chuan,
Fakna hla daiin ka ring lo.
Aw, van Thlarau thianghlim, lo leng ang che,
Thinlung sual kalh hawng leh ang che;
I ram mawiah min hruai ang che,
Lawmna kin tawh lohnaah chuan.
LALPA TAWNGTAINA
