(Johana 4:24) - “ Pathian chu Thlarau a ni; a chibai buktuten thlarau leh tihtakzetin chibai an buk tur a ni “

Lei leh vanah hriat a ni a,
Ka tan a tha, a dik vangin;
Thawnthu hlui, a thar reng a ni,
Isua chanchin min hrilh rawh.

Isua chanchin min hrilh rawah,
Isua chanchin min hrilh rawh,
Min hmangaihtu chu ka hriat nan,
Isua chanchin min hrilh rawh.

Lei pangpar mawite an lo chuai,
Lungngaihna chhum dum a zam vel:
Nunna duhawm ber a lo chuai,
Isua chanchin min hrilh rawh.

Rin lohnain min hneh hunin,
Phurrit leh lungngai ka nihin;
Min tanpui turin lo kal la,
Isua chanchin min hrilh rawh.

Ram ropui chu ka hmuh hunin,
Hmun buatsaih chu ka chan hunin,
Hei hbi ka chatuan hla ni se-
Isua chanchin min hrilh rawh.

Tawngtaina a Hriat Turte
1. Pathian ropui leh thiltithei, Khawvela thil thleng zawng zawng chunga thuneitu kan neih avangin a hnenah lawmthu sawi ila. Chawimawina leh ropuina i hlan ang u.
2. Covid19 avangin a huhova inkhawmna la nei thei lo mah ila, chhungkua leh mimal anga Pathian biakna hun tha kan la neih theih avangin lawmthu i sawi ang u. Covid19 hripui a reh hunah pawh chhungkua leh mimal nuna Pathian pawlna nung nei chhunzawm thei turin Pathian hnenah inhlan ila.
3. Tun thlenga Mizoramin Pathian ven himna dawnga covid19 thihpui kan la awm loh avangte leh community spread nasa tak kan la tuar loh avangin lawmthu sawi ila. Pathian venhimna dil chhunzawm zel ang u.
4. Covid19 veitu zawng zawngte taksa, rilru leh thlarau damna dil sak ila. Anmahni enkawl tute tawngtai sak ila. Covid19 kaihhnawih harsatna tuartu zawng zawngte tawngtai sak ila.
5. Sawrkar, Kohhran leh tlawmngai pawl te tan Covid19 dona kawnga hma fing leh tha tak an lak thiam theihna turin dil sak ang u.
6. Kan Missionary te tawngtai sak ila. Covid19 in a tihbuai te pawh an awm ta a, Pathian venna leh damna te dil sak ila.
7. Kan Kohhran member damlo te Hospital leh mahni in lama inenkawl te tan tawngtai sak ila. Kan thuchah ngaihthlak tur atan Pathian malsawmna dil ila, kan thawhlawm te Pathian hnenah kan hlan bawk dawn nia.n hi kan ram siam thatna tur bul a ni. Pathian Thlarau Thianghlim khawih nawnna an chan theih nan
8. Kan thuchah ngaihthlak tur atan Pathian malsawmna dil ila, kan thawhlawm te Pathian hnenah kan hlan bawk dawn nia.n hi kan ram siam thatna tur bul a ni. Pathian Thlarau Thianghlim khawih nawnna an chan theih nan

Sam 51:1-6 : Aw Pathian, i ngilneih êm avângin mi khawngaih la; I lainatna nasat avângin ka bawhchhiatnate hi thai bo vang che. Ka khawlohnate hi mi sil faisak var la, Ka sual hi mi tlen faisak ang che. Ka bawhchhiatnate hi ka hre ta si a, Ka sual hi ka hmaah a awm fo ṭhîn a ni. I chungah, i chung chauhvah thil ka tisual a, I mit hmuha thil sual chu ka lo ti ta a: Thu i sawiin thiam i chan theiha, Ro i rêlin sawisêl bo i nih theih nân. Ngai teh, khawlohnaa dinin ka awm a; Ka nun sualin mi pai a. Ngai teh, chhûngril lamahte hian takna i duh ṭhîn a; Tichuan, lang lo lamah hian finna mi hriattîr ang.

THUPUI: CHHUNGRIL LAM TAKNA

- Upa R Lalrosanga

Kohhran member te kan Lalpa Isua Krista hmingin chibai ule. Tukin September ni 13 Pathianni zing hi kohhran hote’n Pathian Biak Ina Amah pawl ho thei lova hun kan hman vawi 26 na tur a lo ni ta a. A huhova Biak Ina Pathian thuchah kan ngaihthlak theih lohna ni 176 lai a lo ni ta hial mai a. Khawvel pumpuiin hetiang hun khirh tak kan tawn mek hi thil danglam tak mai a ni a. Engvangin nge hetiang hun hi kan hma chhawn tak? Pathianin hetiang hun min pek hian chhan a nei ang em? tih hi mitinin kan ngaihtuahin ka ring a. Hun danga kan lo tih thin – Biak Ina inkhawm te, Sunday School kal te, kohhran hovin a huhova ‘rawngbawlna’ tia kan lo tih ho thin tam tak chu kan ti hlei thei ta lo va. Mimal tinin kan tih theih theuh, mahnia Pathian au va thinlung leih buaa Amah kan auh va, kan thlarau nun kan in lak muk a, kan in cher nghehna hun remchang Pathianin min pek hi i hmang tangkai zel ang u.

Kan thupui atan Chhungril lam takna tih ka han vuah a. Kan changthlan chu chang 6-na : “ Ngai teh, chhungril lamahte hian takna i duh thin a; Tichuan, lang lo lamah hian finna mi hriattir ang “ tih hi a ni.

Sam 51-na hi “Davida Fakna Hla, Bathsebi a pawl hnua zawlnei Nathana a hnena a lo kal laia mi” tiin Bible-ah Thuhmahruai-a dah a ni a. A thu tlangpui pawh Ngaihdam dilna tih a ni.

Helaia ‘Ngai teh’ a han tih hian a thusawi zinga a ngaih pawimawh leh hmaih thelh a hlauh em em chu anihna ang taka a dawn sawn ngei theihna tura a sawi hawnna niin a lang a. ‘chhungril’ tih hi mihring thinlung lairil leh laimu, kan ngaihtuahna, kan thusawi leh kan thiltih zawng zawng lo irh chhuahna hi niin a lang (I Petera 3:4). ‘Takna’ tih hi Thutak, Rinawmna, Tih tak takna, Tih tak zet, Lemchanna tel lo, Thianghlimna dik tak, Thinlunga rinawmna, Lepse ngam, Nget leh tawih awm lo, ti te pawhin a sawi theih ang. ‘Duh’ tih hi Pathian lungawina leh mihringte laka a beisei leh kan awmdan tur (standard) a sawina a ni. ‘Lang lo lamah te hian’ tih hi khawvelin a hriat thiam pui loh Pathian chauh vin mihringte hnena a pek theih, Thlarau Thianghlim hnathawh dik tak Pathian atang chauhva chhuak niin mithiamte chuan an sawi. ‘Finna’ tih hi finna dik tak, chatuan hawlh tlang, Pa atanga chhuak, hlauh leh tih tur dik tak hriatna, Pathian tihna tak tak sawina a ni.

Tun lai mite hian kristianna leh kristian nun hi inthlah chhawn thil ang deuhvin kan kalpui tan ta mek a ang ta hle a. Kan thinlung chhungrila Pathian nen kan inzawmna vawn nun aia kan tih phung (practices) ngaih pawimawhna hian min kaihruai nasa ta zawk em? Kan kristianna pawh hi Pathian chibai buk tak takna aiin sakhaw thil anga ngai kan ni ta hial em? Hetia kan nihna dik tak, hundanga miin min hmuh pui loh kan zia kan thup thin te chu pho lana a awm mek lai hian Pathian aw hriat tuma tan kan lak hi a hun a ni lawm ni? Khawvel hian ‘hun tha’ kan tih hi kan tawng leh ang nge, chhiat lam kan pan mek, tih chu Pathian chauh vin a hria. Engpawh ni sela, sap thufingin “ A tha ber beisei la, a chhe ber tawk turin inbuatsaih rawh” an lo tih anga kan inbuatsaihna a hun ta hle a ni. Hun khirh chi hrang hrang – tun tum hri leng te, lirnghing te, ramri chungchanga kan ralmuan lohna zawng zawng te kan hmachhawn lai hian kan sahimna ringawt dila Pathian hnena tawngtai reng mai hi Pathianin A mite tana a ruat kan ti dawn nge, A mite awmdan tura a beisei leh a phut hi kan zawng ang a, hriat kan tum zawk dawn? tih kan ngaihtuah a, kan zawn hi a hun takzet tawh a ni lawm ni? Pathian duh dana nung turin eng chen nge hma kan lak a, mihring chak lo kan ni chung chung hian Ama hnena nitin athara tlulut mai tur kan nih zia hi kan inhriat chhuah nawn fo loh chuan tun aia hun khirh leh zual hi lo thleng palh ta se, engtin nge kan awm ang le?

Tun tum hrilengin min suasam dan chu sawi ngai lovin kan hre vek a. Thil pakhat lang chiang em em a ka hriat chu he hrileng avang hian kan nihna dik tak, nidanga kan thup thin te chu pholanin a awm, tih hi a ni. A huho ni lo, mahni mimal ngeia nasa lehzuala Pathian dawr hun remchang ani, tih ka rilru-ah a lo lut a. Tun hi Pathian kan hnaih lehzual hun, thinlung leh tih takzeta A hmaa kan in leih buak hun a ni lawm ni? tiin ngaihtuahna a kal a. Heti taka mi tam ber kan phawk lek lai hian Pathian aia hlauh hi kan ngah ta lutuk a ni thei ang em? Thil pawimawh hmasa ber hmaiha pawimawh ve tho kan ngaih pawimawh zawk theihna tur hian Setana hian ringtute hi min bei fo thin a. Pathian chuan Amah kan tih a, A duhzawng tih duh tak takna thinlung kan put hi a ngai pawimawh hmasa ber a. Pathian tih aia kan mihring puite laka lan mawi loh te, rual pawl loh te, target tlin loh te, Covid-19 te leh lirnghing te hi kan hlau zawk anih chuan sual bumin kan awm a ni mai lo maw? Chuvangin mitin hian mahni nun theuh kan in enfiah nawn hi thil pawimawh tawp khawk a niin ka hria. Amaha nun hahchawl, khawlum lo thleng tur pawh hlau lo, tuiluang kianga thingphun kan nih theihna tura Pathian hnena kan tluk luh hi tun dinhmunah hian thil pawimawh ber a ni. A pawimawh ber, Pathianin mihringte nihna tura min beisei chu “chhungril lama takna” – thinlung laimu-a Pathian tih tak takna, finna dik leh chatuan hawlh tlang chu nei thei tura mitinin tan kan lak theuh hi a hun tak zet a ni.

1912 April ni 14 khan lawng pakhat SS Californian-a signal officer Cyril Furmstone Evans chuan an bul hnaia awm RMS Titanic lawng chu an hma lawka vur tlang awm thu hrilh tumin ‘warning’ pek tumin signal thawn a tum a. Titanic lawnga signal officer Jack Phillips-a chuan,” Ka buai rih, min lo be buai suh” a lo tih avangin Evans-a chuan hreh tak chungin a wireless chu a ‘off’ ta a. Minute 10 hnu lekah Titanic chuan vur tlang lian tak mai a su a, an lawng a keh ta. Chhanchhuaktu an mamawh thu Phillips-a’n signal a thawn chhuah te chu tumah dawngtu an awm ta lo, Evans-a’n a wireless a lo ‘off’ hman tawh a ni. A hun laia Pathian aw dawng sawng tur hian kan lo buai lutuk ve mai ang tih a hlauhawm mang e.

Pathianin mihringte min siam chhan ti hlawhtling a, Amaha nun tak nei turin khawngaihna hun tlemte kan la neih lai hi buh lu chuha chuh hun, tih takzeta kan zawn a, kan dap hun a ni e. Chumi kan zawn hmuh hun chuan Pu Rokunga’n
“Damlai tuipui Galili
Tuifawnin min khuh mahse,
Ka chhungah Van Lal a mu,
A tawk e, Lalpa nang nen “ a lo tih ang nun thlamuanna dik tak, van nun tem lawkna – zakhamna – chu kan chan theuh theihna turin Lalpa’n kan za atan mal min sak rawh se. Amen.

“Chak lo leh rethei takin”

Chak lo leh rethei tak hi,
Kraws panin ka lo kal e;
Ka neih zawngte kalsanin,
Chhandamna kim ka hmu ang.

Rei tak sualah ka lo tang,
Aw Lalpa, min tichhuak la;
I sualte ka tleng fai ang,
Khawngaihin min rawn ti la.

I henah ka inpe e,
He khawvel atang hianin;
Ka thlarau leh taksa te,
Ka pumin min nei langin.

Lal Isuan min fan chhuak a,
Amahah ka famkim ta;
Ka pumin min tidam ta,
Beramno ropui rawh se.