Vawiin thlenga Pathian malsawmna leh venhimna kan chan avangin lawmthu i sawi ang u.
A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
Covid 19 avanga thi chhungte tan te, a bik takin kan kohhran rawngbawltu pawimawh tak tak kalsan tak chhungte tan.
Lockdown kan hmachhawn leh dawn a, fimkhur tak leh thuawih taka kan awm thiam theih nan.
Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
Kan thawhlawm, inkhawmna leh keimahni Pathian hnenah I hlan ang u.
Sam 84:5-7
“Nangmaha chakna nei mi chu a eng a thawl e; A thinlunga Zion panna lamliante awma chu. Tahna ruam chu an zawhin tuihna awmnate an siam thin a, A ni ruahtui tla hmasa chuan malsawmna in a khuh thin. Chakna atangin chak lehzualnaah an kal thin a, Zion ah Pathian hmaah chuan an inlan theuh thin”.
THUCHAH
Thupui : ZION PANNA LAMLIAN
- Rev Lalremsiama Fanai
Audio
Pathian ni kan lo thleng leh ta, kohhran ho hmun hrang hranga awm te kan Lalpa Isua Krista hmingin chibai ka buk a che u. Pathian thu i lo chhiar ang u. Sam 84:5-7 “Nangmaha chakna nei mi chu a eng a thawl e; A thinlunga Zion panna lamliante awma chu. Tahna ruam chu an zawhin tuihna awmnate an siam thin a, A ni ruahtui tla hmasa chuan malsawmna in a khuh thin. Chakna atangin chak lehzualnaah an kal thin a, Zion ah Pathian hmaah chuan an inlan theuh thin”.
Tukin ah hian tunhnai te a ka rilrua thu awm reng “Zion panna lamlian” tih thupuia hmangin Pathian thu kan ngaihtuah ho dawn a ni. Zion panna lamlian chu engnge ni? Khawi ah nge a awm? Kan tan engnge a pawimawhna tihte kan ngaihtuah ho dawn a ni. He Sam hi Kora fate fakna hla tih a ni a. A bung tantir lam kan en chuan“Ka nunna hian Lalpa Biak In hung chhung kawtlaite chu a ngai em em a, a ni, a chauh phah hial a” tiin kan hmu a. Keini ho hian Lalpa Biak In kan ngai ve em, kan nunna hian Lalpa a chak em? tiin kan inzawt hmasa teh ang.
Zion chu khawi laiah nge a awm? Jerusalem ah tlang bawk pali a awm a, chung zinga pakhat chu ‘Zion’ tih a ni a. Chumi hmunah chuan Temple a awm a, chu temple ah chuan kal a, tawngtai a, inthawinate hlan a, Pathian faka zai te kha Juda hote duthusam leh an chak ber thin a ni a. Chuvangin ‘Zion panna lamlian’ han tih hian khawiah pawh Israel mite kha awm sela, chu Zion tlanga temple ah chuan kal ngei an duh thin. An duhthusam ah tak phei chuan khawi hmunah pawh awm sela kum khatah vawi thum tal Zion tlangah chuan tawngtaia, inthawina hlana fakna hla sak ngei ngei kha an duh thin. Juda mipa kum sawm leh pahnih tling tawh phawt chu chumi ti tura phut an ni nghe nghe a ni. Chumi avang chuan an ngai pawimawh em em a, kal ngei pawh an tum thin. Chumi panna kawng chu Zion panna lamlian chu a ni a. Kan Pathian thuah chuan Zion panna lamliante, kawng te (Highways) tih a ni kher a ni. Chuvangin Zion panna lamlian chu thil dang ni lovin, Judaten anmahni awmna hmun theuh atanga Jerusalem an panna kawng kha a ni kan ti phawt teh ang.
Juda hote chenna hmarlam lalram Israel chu Assyria hovin an hneh hnu ah chhimlam lalram kha Babulon hovin an hneh veleh a. Hmun hrang hrang ah sala hruai in an awm a, an darh chum chum mai a. Juda ho hmun hrang hranga sala tang mekte thinlunga lian ber chu ‘Zion’ a ni. “Babulon lui kamahte, chutah kan thu a, a ni, kan tap thin, Zion kan ngaihtuahin…” (Sam 137)an ti vawng vawng mai a ni. Zion panna kawng pawh an hre chiang em em a ni. Bible chuan “a thinlunga Zion panna lamliante awm a chu” a ti a. An thinlungah a ti kher a ni. Zion chu an theihnghilh thei lova, an thinlungah zion hi a chiang a, an thinlungah a awm reng a ni.
Juda hote chuan Jerusalem temple-a hmun thianghlim ber ah chauh khan Pathian awmin an ngai a. Hmun danga an tawngtai pawhin Jerusalem lam an hawi kher thin. Chu hmun chu an thinlungah a khat liam em em a, chumi pana kal chu an chak em em thin a ni. Chutichuan heti hian sawi ta ila, Zion panna lamlian chu khawiah nge a awm? tih zawhna kha, a chhanna pahnihna atan chuan Zion panna lamlian chu ‘an thinlungah’ a awm tlat a nih chu. An thinlungah Zion duhna, chakna, tuihalna a awm tlat a ni.
Keini thuthlung thar kohhran, ringtute tan chu chu enge a pawimawhna ni ta ang. Thlarau lam tawngkamah chuan Zion chu vanram sawina atana hman thin a ni a. Kan hla ah te pawh Zion chu vanram sawina atan kan hmang uar viau a nih hi. Ringtu, Isua thisena silfai, mi piangthar te thlen tumna hmun chu vanram a ni a. Kan thinlungah hian Zion panna lamlian, vanram panna lamlian zawh chu Juda hoten Zion panna lamlian zawh an thlahlel ang hian kan thlahlel ve em?
Genesis 28:12 ah chuan Beerseba leh Haran inkara hmun engengemaw ah Jakoba chu lung lukhama a muthilh thu kan hmu a. Chuta a muthilhnaah chuan mumang a lo nei ta a, a mumangah chuan lei atanga van thlenga leilawn indawh a hmu a. Chu leilawn ah chuan Lalpa vantirhkohte an chhovin an chhuk a. A chhipah chuan Lalpa a ding bawk a. Chu hmun hmingah chuan Bethel a vuah ta nghe nghe a ni. Jakoba mumanga leilawn chu lei leh van inkara lamlian, Zion panna lamlian chu a ni. Thuthlung thar lamah, Johana 1:51 ah chuan tihian kan hmu a. “Tih tak meuhvin ka hrilh a che u, van inhawngah, Pathian vantirhkohte Mihring fapa chungah hian chhuk leh chho in la hmu ang,” Isuan a ti a. Mihring fapa Lal Isua Krista chu lei leh van inkara vanram panna leilawn a nih chu. Chumai pawh nilovin Lal Isuan, “Keimah hi kawng leh thutak leh nunna chu ka ni, Keimaha kal lo chu mi tumah Pa hnenah an thleng ngai lo” (Jh. 14:6) a ti a. Isua chu pa hnen thlenna tur ‘kawng’, ‘lamlian’ a nih chu.
Isua Krista khan Kalvary tlang Kraws ah leia miten vanram kan kal ngei theihna turin leilawn a rawn dawh a, vanram, zion panna lamlian a rawn buatsaih ta. Juda hote thinlunga zion panna lamlian a awm tlat ang khan chu zion panna lamlian Isua Krista chu kan thinlungah hian a awm ve reng em? Hei hi zawhna pawimawh tak a ni.
Isua a lokal khan kan hnena a awm vangin “Kan hnena Pathian awm Immanuela” tih a ni a. A thih dawn khan tihian a sawi thlap, “Tin, Pa ka dil anga, a ni chuan thlamuantu dang a pe ang che u, chatuana in hnena awm turin” (Jh.14:16). Chu chu Thlarau thianghlim, thlarau dik tak ‘spirit of truth’ a ni. Isua chu thihna hneha a thawh leh hnuin vanah a lawn tawh tih kan hria. Tuna khawvela Pathian awm mek hi Thlarau Thianghlim a ni. Tirkoh Paula chuan kan taksa hi thlarau thianghlim in a ni a lo ti leh a (IKor.6:19). Tuna khawvel a awm mek Pathian (Thlarau thianghlim) chu i pianthar tawh chuan i chhungah a awm a nih chu, i la pianthar loh chuan i bulah a awm. A hnai lutuk a ni.
Zirtir sawm leh pahnih te tana Isua nih dan chiah chiah kha Thlarau Thianghlim hi kan tan a lo ni. Galilee dila zirtirte lawnga an chuan lai khan thlipui a lo thawk, tuifawn ah boral mai dawn in an in hria a. ‘Zirtirtu kan boral dawn hi’ tiin mangang takin Isua an ko va. Isuan thlipui leh tuifawn a hauva, an reh ta mai. Zirtirte tan khan Isua a va hnai em! Isua hi thlarauvin a lo hnai a, tunah kan chhungah a awm. I kawchhunga i pumpui leh i chuap kha i hre thei (feel) chuang lo, mahse a awm. Thlarau thianghlim kha i hre (feel) kher lo a ni thei. Mahse thlarauva i pian tawh chuan i chhungah a awm. Thlarau Thianghlim chu khawvela Pathian awm mek kan tih tawh kha. Khitah, hla taka awm a ni lo, a hnai lutuk.
Hripui leng avangin kohhran leh khawtlang anga kan thiltih thinte kan ti thei lo. Juda hoten an in quarantine na hmun, an saltanna hmun atang khan Zion an thlahlel a, Biak buka tawngtaia, inthawi a, fakna hla sak an chak ang mai khan khawhar takin i lo awm a ni maithei. Mangang takin tanpuitu leh hnemtu ngai ngawih ngawih in i awm a ni mai thei. I kawng a buai zova, kawng kawhhmuhtu i mamawh a ni thei. Tanpuitu, tawngtaisaktu, sawipuitu leh tichaktu he hripui leng hnuaiah hian i ngai ngawih ngawih a ni mai thei. Mi zawng zawngin an kalsan che a, laina leh thian kawm tur pawh nei lovin i inhria. I thiltih sual thin avangin Pathian in a kalsan tawh che a, a duh tawh lo che niin i inhria. Mangang suh. “Kei kumkhua pawhin khawvel tawp thleng pawhin in hnenah ka awm zel ang” a ti. A thlarauvin a awmpui che a ni. A hnai a sin. Thinlunga Zion panna lamlian awma te chuan Lalpaah chakna an nei thin, an eng a thawl thin. Chakna atangin chak lehzual naah an local thin a lo ni. A thain a va thlamuan thlak em!
“Hmatiang hmulawk loh kawng,
Hlauhawm a hnai thei,
A hnai zawk chhandam tu’n
Thlamuang rawh min ti”
A thu kan sawite Lalpan mal min sawm sak theuh rawh se. Amen.
KHB 433 “Ka Chhandamtu min vengin a hnai reng,”
Music Track
Ka Chhandamtu min vengin a hnai reng,
1. Ka Chhandamtu min vengin a hnai reng,
Thil eng pawh lo thleng se ka him a ni;
Thlipui leh ruahpuian min thukru a,
A kutphah ropui chhungah.
A kutphah ropui chhungah,
A kutphah ropui chhungah;
Thil eng pawh lo thleng se ka him a ni,
A kutphah ropui chhungah.
2. A hmangaihna angchhungah chuan min pawm,
Muanna thute a awin min hrilh tawh;
Pathian ngei chuan min ven vangin ka him,
A kutphah ropui chhungah.
3. Ka thlarau vengin min kalsan lo vang,
A hmangaih lakan eng man min then lo'ng;
Aman min vawng kumkhua ang tih ka hria,
A kutphah ropui chhungah.
