Pathian fakna hla:- KHB No. 507,- 'Aw, vân Thlarau thianghlim lo lêng ang che,'
1 Aw, vân Thlarau thianghlim lo lêng ang che,
Min awmpuia v ênghim thintu kha;
Khawngaihna aw haider thin mah ila,
Sual tuipuia kan pil min phal suh la.
Vâkvai leh kal bo tate,
Hnehna puang chhuak thei lo hliam tuar m êkte,
Hruai kîin kan tidam zo si lo,
Tlaini l ên a har ngei e, i tel lo chuan.
2. Vân hmangaihna pâr tlâna l êng hnu pawh,
Sual vânga rûm châng ni tawn châng hian,
Auvin i lam hi kan lo hawi zêl dâwn,
Kan lam hawiin chakna thar min siam rawh.,
3. Kohhrante hi thawkrim thin mah ila,
Nangman i duhzawng min zirtir rawh;
Kawng dik emaw kan tih dik lo si hi,
Rinna mitin min hmuh fiahtir ang che.
4. Aw, Nang chatuan Lalpa, i tel lo chuan,
He leia ro sum leh engkim hian,
Rolpuina leh awmzia rêng a nei lo,
Kan chakna leh lâwmna i lo ni e.
TAWNGTAI RUALNA
Tawngtaina a hriat turte
Vawiin thlenga Pathian malsawmna leh venhimna kan chan avangin lawmthu i sawi leh ang u.
Chhungtinin Pathian biakna nung leh tha mahni in lamah kan buatsaih theih nan Thlarau thianghlim awmpuina i dil ang u.
Kohhran member tinte Pathian thutak hriatna leh nunpui kawnga hma kan sawn zel theih nan Pathian tanpuina i dil ang u.
Kan kohhrana member damlo, a bik takin Covid-19 positive home isolation a awm leh quarantine mek lai te tan i tawngtaisak ang u. Kan khawtlangah Covid case a tam chho ve ta hle a, Pathian tanpuina dil ila, alo ziaawm theih nan i ngen zel ang u.
Kan khawtlanga khawhar chhungte tan Pathian thlamuanna leh awmpuina i dil chhunzawm sak zel ang u.
Sikul naupang Board exam hmachhawn turte tan i dil sak ang u.
Kan thawhlawm, inkhawmna leh keimahni Pathian hnenah I hlan ang u.
THUCHAH
Thupui : “ “Pathian thuah i kir leh ang u””
- Rev P.C. Liandula
Audio
Hripui avangin Biak In-ah kan inkhawm thei lo leh ta a. Mahse, kan hotute’n thuchah sawina hun remchang tak an buatsaih leh ta hi ka lawm hle. Tun tumah hian “Pathian thuah i kir leh ang u” tih thupui kan sawi dawn a, kan ngaihtuahho dawn a ni.
Pathian thu i lo ngaithla ang u. Isaia 59:12-14; 2 Tim 3:14-17.
Kan ram hi kum za zet kan kristian ve ta a. Thil tha tam tak keimahniah hmuh tur a awm a, ramthim rawngbawlna lamah te nasa takin hma kan la a. Chutih laiin a Side B lam kan en chuan thil tha lo tam tak hmuh tur a awm bawk. Sex leh ruihhlo tamna ramah kan siam mek a, Jezebeli fate an pung nasa hle a (Thup 2:20). India rama pawngsual rate sanna state zingah kan awm leh ta. Kristian ram tan chuan rapthlak hle. Setana khawpui leh kulhpuiah kan siam ang tih hlauh thawnawm khawpin Setana biakna (setanic worshiping) hial kan ramah a lo piang ve ta. Chu bakah Kohhran tam tak a piang a, zirtirna tha leh inkaihhruaina mumal tak kan inpe leh si lo va. Kohhran hruaitu leh member-te thlarau nun a ro hle lawi si. Kan nun a zalen a, ‘it’s my life’ kan ti a. Mi dang nun vei ngam lohna ramah kan siam mek a, mi nun veitu chu mi sual leh mi dik lovah kan inchhuah tan mek a. Kohhran hruaitute pawhin mi nun kan vei ngam ta meuh lo a nih hi. Chuavang hian “Pathian thutak-ah i kir leh ang u” tiin kan insawm a, thupuiah ka han thlang a ni.
Kan ram hian Pathian thu hi kawrah kan hmang nasa hle a, chhangchhe puanpui an sawi angin pawhna lam apiang tlin zelah kan ngai a. Zu leh sa hmunah pawh kan pawttling zel a, Jezebeli fate pawhin an pawttling zel a ni. Kan duh danin kan hrilhfiah a, kan rilru rilrem zawngin kan hrilhfiah mai mai a ni. Tidik turin kan nung peih lo va, sawi erawh chu kan sawi tam hle thung. Kan nun khalh ngil tur leh kan nuna roreltuah kan hmang thei der lo.
Pathian thuah hian Pathian nihna leh a rilru, a thiltumte kan hmu a, mihring nihna leh nunho dan leh khawsakho dan tur te, kohhran nihphung leh a hmabak lo awm turte min kawhhmuh bawk a. Tin, chhungkaw nihphung tur pawh chiang takin min kawhhmuh bawk. Eng dinhmunah nge Pathian thu hi kan dah ang le? Chhungkua hi Pathian rel leh din a ni. Keini kristiante chuan Krista hming chawiin Kristian chhungkua kan inti a. Chu chu Pathian chibai buktu chhungkua a ni tur a ni. Kohhran chuan Bible kohhran a nih a inhre tur a ni. Pathian thu chu kohhrana thuneitu ber a ni tur a ni. Engvangin nge Pathian thuah i kir leh ang u kan tih? Pathian thu hi thu nung, thiltithei a ni (cf. Heb 4:12). Tuma tihdanglam thei loh, chantuana awm tur a ni. Legislative-in a tidanglam thei lova, Parliament leh Supreme Court-in an tidanglam thei bawk hek lo. Miin ral lakna hriamhrei zum eng ang pawhin chhun thler chuk mah se, a danglam ve ngai lo va, meipuiah thlak daih mah se, a thiltihtheihna chu far khat te pawhin a kiam ve ngai lo. Chatuana thu nung chu a ni a, chu thutakah chuan i kir leh ang u.
Hripui-in min tuam a, hlauvin kan khawsa mek a. Kan thil hriat lar em em chu Sanitizer a ni. Mi tinin Sanitizer hmangin hri tha lo lakah inven leh intihthianghlim kan tum a. Kan inah kan dah a, kan office-ah te, kan biak inah te kan dah a, thenkhat phei chuan kan kalna apiangah kan pai a, kan hmang nasa hle mai. Kan han inchulh chu taksa chhungril a fan raih raih a, hri tha lo a tihlum thin a ni awm e. A hmangtu tana a thatna chu kawng khat ni se, bula mite tan a hluin a tha em em a, a rim lah chu a tui zek lehnghal a. Vawiin hian Pathian thuah kir leh hi la, i hmang tangkai ve ang u.
Kan hringnun kawng zawh mekah hian Eden natna hripui laka inven nan te, kan nun sual laka inven nan leh tihthianghlim nan te hian Pathian thu hi i hmang ang u. A aia invenna tha a awm lo vang. Kan nun sual laka kan venhim (sanitize)-na tur a ni a. Sual tur leh hri tha lo laka kan himna tur a ni. Sual tur tihhlumna tur atana thlarau ngunhnam chu a ni. Chu aia ngaihpawimawh zawk kan neih chuan Pathian lungphum kan tawlh bosan mek a ni ang. Hun harsa kan tawh pawhin Pathian thu hmangin kan chhungkua leh kohhran, mimal nun hi sanitize thin ila, political issue-in na taka min nuai pawhin Pathian thu bawk kan rawngbawlna sanitize nan hmang zel ang u.
Zawlnei Isaia hian Israel hnam chhiatna chu an hmelma leh ram dang mite vang ni lovin, Pathian thu an awih loh vang a ni tiin, anmahni sualna leh bawhchhiatna avang a ni e, a ti a. Thutak chu kawtthlerah a tlu reng a, dikna a luh thei lo a ni tiin, chu an sualna chuan Pathian hmaah a hek reng thin a ni tih thu a sawi a. Lalpa thu chatuana awm tur chu tungding tur leh Pathian thutakah chuan kir leh turin a ti a ni. Kan ramah hian thutak chu kawtthlerah a tlu reng a, dikna a lut thei ta lo va. Mi dik lote huangtau takin an rawn lang chhuak ta zel a nih hi. Hawh u, dikna tungding leh turin Pathian thutakah i kir leh ang u.
Paula pawh hian a hun hnuhnung lamah Timothea hnenah fuihna hnuhnung atan Pathian thutak chu hmang tangkai a, tungding tlat turin a ti a ni. Kan khawvel hian hun khirh a hmachhawn zel a, hemi karah hian thutak chu kawtthlerah a tlu reng a, dikna a lut thei ta lo. Hawh u, Pathian thu hmang tangkai zel turin Pathian thutak chu vuan tlat ila, kohhran mite Pathian thutakah chuan i kir leh ang u. “Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan,” (II Tim 3:16ff). tih a ni si a.
Lalpa’n a thu malsawm rawh se. Amen.
Pathian fakna hla:- KHB No. 565- 'Pathian Lehkha ka ring e'
Pathian Lehkha ka ring e,
Isua thutak a hril e;
Vân kalna kawng ber a ni e,
Vânah kan lâwn thei e.
Aw Baibul, Aw Baibul,
Ka ngai, ka thlahlel êm e;
Aw Baibul, Aw Baibul,
Pathian Lehkhabu hi.
2. Pathian rilru thûk awmzia,
Kan sual leh mihring chêtzia;
Kan damna pawh a hrilh fiah a,
Thu hlu ber a ni e.
3. Isua Baibul a tha e,
Pathian thilpêk a ni e;
Thiha thawhlehna a hril e,
Nunna thu a ni e.
4. Zâna khâwnvâr êng angin,
I thuin rilru a ên;
Ro tha aiin a hlu êm e,
Thinlungah ka vawng ang.
