Khawngaihna mak mawi leh duhawm,
Sual riangvai chhandamna
Suala bo hnu min zawng hmu ta,
Mitdel mit varna chu.

Hlauhna hmuna ka awm min hrilh,
Ka hlauh min hneh sak ta;
Ka rin veleh a khawngaihna
Duhawm a lo lang ta.

Thawhrim, thlemna hlauh karah,
Thui tak ka lo kal ta;
Khawngaihna mak min hruaitu tur,
Ka van in thlen thlengin.

Chutah, kum sang sawm ral hnuin,
Ni eng mawi takah chuan;
Fakna hun tan ang a ni ang,
Chatuana zual zel tur.

TAWNGTAI RUALNA

Tawngtaina a hriat turte
1. Vawiin thlenga Pathian malsawmna leh venhimna kan chan avangin lawmthu i sawi ang u. Pathian nung leh egkimtithei, min chhandamtu kan nei hi a tharin lawmthu i sawi ang u.
2. Kan kohhrana member damlo, a bik takin Covid-19 positive te, BCCC leh CCC a awm te, quarantine mek lai te tan i tawngtaisak ang u.
3. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ila, keimahni pawhin tan i la thar ang u.
4. Kan Biak in sak chhunzawm zel a ni a, thawktu leh a buaipuitute tan i tawngtai ang u.
5. Serkawn VLTF memberte tan i tawngtai ila, Contact tracing , transportation leh relief ang zawnga hma an lakna hrang hrangah Pathian tih chakna i dil sak ang u.
6. Kan tualchhung kohhran committee leh a hnuaia Fellowship hrang hrang, KNP, Jr TKP, TKP ,BMP leh BKHP ten an theih ang angin hma an la ve reng a, an hmalakna ah Pathian awmpuina i dil sak ang u.
7. Kan kohhranah khawhar chhungte kan nei a, an tan Pathian thlamuanna leh awmpuina thahnemngai takin i dil sak ang u.
8. Kan thawhlawm, inkhawmna leh keimahni Pathian hnenah I hlan ang u.

THUCHAH

Thupui : "LALPA I TIH ANG U”

Audio

Thuhmahruai:
Pathian khawngaihna leh Kohhran hruaitute duhsakna avanga tukin zing hun tha tak mai ka hmang thei hi ka lawm hle mai. Hripui in min nuai a, keimah ngei pawh hri vei zingah ka han tel ve a, mahse in mi tawngtaisakna tam tak ka dawnte Pathianin chhangin a khawngaihna avangin min ti dam a, he hun hi ka han hmang ve thei a. Min tawngtaisaktu zawng zawngte chungah lawmthu ka sawi a, Damna min petu Lalpa chu fakin awm rawh se. Hripui avangin Pathian thuchah sawi a khat hle a, he hun ka chang dawn tih ka hriat atangin engnge Kohhrante tana sawi tur pawimawh ni ang tih te ngaihtuahin Pathian ka rawn a. Rilrua Pathian Thu hrang hrang lo lut zingah Pathian tih tulna leh chu chu Krista hnung zuitu kan nihna anga mimal tin leh kan ram leh hnam pawhin kan ngaihpawimawh tur niin ka hria a. ‘Isua zuitu rinawm’ tih thupui hmangin beirual thuzir kan zir zo hlim hlawt a ni a. Isua zuitu rinawm kan nih theihna tura pawimawh ber pakhat chu Lalpa tihna nena kan zui hi niin ka hria a, chuvangin ‘Lalpa i tih ang u’ tih thupui hmangin a then tetna Lalpa tihtute awmdan tih leh Lalpa tih hlawkna tiin Pathian Thu chah kan ngaithla dawn a ni.

Naupang Pual: A hmasain naupang pual han sawi ila. Vawiina kan sawi tur hi Lal Isua zahpui lo tu Sydney chanchin a ni. Naupang ho khan Olympic hi kan hre tawh em aw. Olympic chu khawvela infiammite inelna ropui ber a ni a, chutah chuan ram tam tak atangin infiammi tam takin thei ber leh thiam ber nih tumin an inel thin a ni. Heta ber nih kai hi a har em em a, chumi ti chiang em em tu chu India hi Olympic-a kum 121 a tel ve tawhnaah kumina Tokyo Olympic-ah chauh khan mimal angin Gold Medal a la ve thei a ni.

Sydney hi a hming pum chu Sydney Michelle McLaughlin a ni a. Tokyo Olympic ah khan 400m hurdle leh 400X4m relay race-ah te Gold Medal a la a, 400m hurdle-ah phei chuan record thar a siam a ni. A ngaihsanawm hle mai. Hemi bakah pawh infiamnaa a telnaah medal hrang hrang a lo la tawh bawk a. Amah hi American nula kum 22 a upa, naupan lai atanga piangthar, nu leh pate thu awih tak a ni a. Lal Isua zahpui hauh lo tu, Pathian zahna nena seilian a ni. Olympic-a a hlawhtlinnaah pawh khan Pathian ropui ber se a duh a ni.

Pathian hruaina a chanah a lungawiin, intihsiakna ah beisei angin hlawhtling vek thin lo mah se Pathian hruaina ah a lawm em em thin a. “Ka beisei anga medal ka lak loh avangin Pathian hian min thlathlam a ni lo va. Ka Pathian hian vawi khat mah min la hlawhchham tir lo. Gold medal te hi a hluin, infiammi tan chuan lak ngei kan tum tur pawh a ni. Mahse, Gold medal ka lak ai chuan, Isua neitu ka ni hi a hluin, ka lawm zawk daih a ni,” a ti a ni.

Sydney chuan, “Kum 21 chhung Pathian lak atangin ka phuloh thil tam tak ka dawng a, A khawngaihna zarah chhandam ka ni a. Keimah ah hian Krista a chen tlat avangin hun kal tawhah pawh inchhirna tur thil sual leh ser tha lo pawh nei lovin vawiin ka thleng hi, a khawngaihna leh hruaina vang liau liau a ni,” tiin Pathian hruaina ah lawmthu a sawi a ni.

Khawi hmunah leh eng hunah pawh Isua neitu a nihna hi zahpui hauh lovin a puang chhuak zawk thin a, a entawn tlakin, a ngaihsan awm em em a ni. Hlawhtlinna ropui a neih pawhin a chapopui mai lo va, Pathian ropuina atan a hlan zel thin.

Sydney anga Isua hi zahpui lova, atana kan rinawm tlat a pawimawh hle a ni.

Lalpa tih awmzia: Aw le, tunah chuan kan thupuiah lo lut tawh ila. ‘Lalpa tih’ tih hi “Pathian zahna leh a duh zawnga awm tura hmangaihna avanga thuawihna” tiin Pathian Thu thiamte chuan an hrilhfiah a. Pathian chu a zahawmna te, a ropuina te, a thianghlimna te, a thuneihna te, a lalna te, a hmangaihna te avanga amah hmangaih let a, chumi avanga a thu awihna hi ‘Lalpa tih’ awmzia chu a ni. Lalpa tih chu ‘Pathian hlau’ tihna mai ni lovin, Pathian chu zahawm a nihna te, hmangaihtu a nihna te, roreltu a nihna te hriatna avanga hmangaihna leh thuawihna avanga a tana nun hi a ni. Lalpa tih hi a tha em em a, chuvangin tukin zingah pawh hian he thupui pawimawh tak hi kan zir ho dawn a ni.

Lalpa tihtute awm dan: A hmasain Lalpa tihtute awm dan kawng thum chauhvin lo ngaihtuah hmasa ila:- 1. Sual an hua: Thuf 8:13-ah chuan ‘LALPA tih chu sual huat hi a ni’ tiin a sawi a, chumi chuan a tarlan tum chu sual leh Pathian hi inmil thei ngai lo a ni a, chuvangin miin Pathian a tih chuan sual a haw ngei ngei thin tihna a ni. Chutichuan Pathian tih awmzia chu Pathian hmangaih avanga a thupek te awih a, sual huat hi a ni tiin kan sawi thei ang. Miin Lalpa a tih chuan sual a haw ngei ngei tur a ni a, Sual kan huat leh huat loh hian Lalpa tihtu kan nih leh nih loh a hril chiang viau a ni. Lalpa tihtu inti si, sual haw lo chu thil inhmehlo leh thil awm thei lo a ni.

2. Midangte tih ang an ti ve duh lo: Nehemia hun laiin a hmaa ram awptute chuan chhiah pawisa bakah mipui rethei tak tak te hnen atangin buh (chhang) leh uain te an laksak thin a, an chhiahhlawhte chenin mite chungah an intilal hle thin a ni. Hetih lai hian ram awptu tan buh chhiah lak chu midangte harsatna siamna ni tho mah se, tih dan phung pangngai a ni a. Amaherawhchu Nehemia chuan “kei zawngin Pathian tihna avangin chutiang chuan ka ti ve lo” (Neh 5:15b) tiin buh chhiah pawh la lo vin, ram awptu tan ram lei a awlsam hle laiin a tan ram pawh a lei lo a ni. Hetiang hian Pathian tihtute chuan midangten an tih ang ‘mite pawhin an ti thin alawm’ tia inthiam chawpin an ti ve lo a ni.

3. Sual an tlanchhiatsan: Pathian tihtu Josepha chuan a pu Potiphara nupuiin a thlem lai khan tlangval thalai, tisa chakna pawh a neih san lai tak a ni ngei ang, uirena sual a tlanchhiatsan ani. Mihring tumahin hmu lo mah se, Pathian a tiha chuan a hmu a nih tih hriain chu sual chu a ti thei lo va, pawh luih a nih hial pawhin a tlanchhiatsan a ni tih ka hre theuh awm e. Pathian tihtute chuan sual chu a lang emaw lang lo emaw tih an duh lo va, an tlanchhiatsan zawk thin a ni. Thuf 16:6-ah chuan Zahngaihna leh thutakin khawlohna chu tlenfai a ni a, LALPA tihnain miin sual a kalsan thin tiin kan hmu a, sual kan kalsan theihna chu Lalpa kan tih hi a lo ni.

Heng kan tarlan bakah hian Lalpa tihtute chu dikna ngaina mi, mi rinawm leh huaisen an nih thu te leh kawng tam tak sawi tur a awm a, amaherawchu tun tumah hian sawi vek hman lo ni sela.

Lalpa tih hlawkna: Kan thupui then hnihna Lalpa tih hlawkna tih lo sawi le hila. Pathian Thu-ah hian Lalpa tihtute tan Lalpa tih man, a hlawkna hrang hrang kan hmu a, chung zinga thenkhat lo chhui ila;-

1. Finna bul a ni: Pathian Thuin finna a tih hi khawvel thila finna mai ni lovin Pathian hriatna finna a ni a, chu chu finna dik, thlarauva Pathian hriatna a ni. Thuf 1:7-ah chuan LALPA tih hi finna bul a ni a, nimahsela mi âte chuan finna leh zirtirna an hmusit thin tiin kan hmu a. Chumi awmzia chu finna bul chu Lalpa tih a ni a, chuvangin Lalpa tihtu chu mi fing a ni a, Lalpa tih lohtu chu mi â an ni tihna a ni. Mi fing nih chu a hlu em em a, mi â nih erawh chu a hlu lovin a pawi em em a ni. Chuvangin finna dik kan neih theih nan Lalpa i tih ang u. 2. Malsawmna leh Chawimawina dawnna a a ni: Sam 128:1-4 kan chhiar chuan Lalpa tihtute chuan an hnathawhnaah te leh an chhungkuaah pawh malsawmna an dawng dawn a ni tiin LALPA tih apiang chu an eng a thawl e, A kawng zawhtute chu.
I kut thawhrim rah chu i ei dawn si a: lawm takin i awm ang a, thawvengin i awm bawk ang.
I nupui chu, i in chhûng rilah chuan, Grêp hrui rah duh mi tak angin a awm ang a:
I fate chu, i dawhkan vêlah chuan, oliv tiakte angin an awm ang.
Ngai teh, LALPA tih mi chu chutiang chuan malsawmin an awm ang tiin kan hmu a.

Chubakah Inngaihtlawmna leh LALPA tih man chu sum te, chawimawina te, nunna te a ni tiin Thufingte 22:4 -ah kan hmu bawk a. Lalpa tih chu malsawmna a nih mai bakah chawimawi dawnna pawh a ni. Malsawmna dawn kan duh vek awm e, chumai ni lovin chawimawina dawn pawh duh lo kan awm awm lo ve. Hawh u, malsawmna leh chawimawina kan dawn theih nan Lalpa i tih ang u.

3. Nunna leh lungawina neihna a ni: Pathian tih chu chatuan nunna neih na a ni tiin “LALPA tihna chu nunna tuikhur a ni. Thihna thang hawisanna tûrin tiin Thuf 14:27 ah kan hmu a, chu bakah chuan Thuf 19:23-ah “LALPA tihna chuan nunna a thlen a, A nei apiang chu lungawi takin an awm ang a, Thil tha lo tlâkbuakin a awm lo vang” tih kan hmu. Chatuana nunna neihna tur te, nun lungawi neihna tur chu Lalpa tih hi a ni a. Lalpaah chauh lo chuan nunna tak tak a awm lo va, Khawvelah lungawina tak tak a awm hek lo. Chuvangin chatuana nunna neia nun lungawi kan neih theih nan Lalpa i tih ang u.

4. Hriatthiamna a ni: Lalpa tih chu hriatthiamna neihna a ni a. Sam 111:10-ah chuan “LALPA tihna chu finna bul a ni a; Chutianga ti apiangte chuan hriat thiamna tha an nei” tiin Lalpa tihna avanga finna neitute chuan hriatthiamna an nei thin a ni tih kan hmu a. Joba 28:28 kan en chuan Tin, mihring hnenah,"Ngai rawh, LALPA tih hi, hei ngei hi finna a ni, thil tha lo kalsan hi hriat thiamna a ni," a tih kan hmu a. Lalpa tiha thil tha lo kalsantute chuan hriatthiamna an nei a ni. Nun hi hriatthiam a ngai em em a. Hringnun hrethiam lo chu mi beidawng, mi lungngai an ni fo. Lalpa hnathawh, a nihna leh a rorel dan hriatthiamna te hi amah tihtute chuan an nei thin. Keini pawh Lalpa duh dan hrethiam a, a rorelna kan ‘amen’ reng theih nan Lalpa i tih ang u.

5. Tlakchhamna lohna a ni: Sam 34:9-ah chuan “Aw, a mi thianghlimte u, LALPA chu tih rawh u: Amah tihtute tan chuan tlakchhamna rêng rêng a awm si lo” a ti a, Lalpa tih hi tlakchham lohna a ni. Khawvel thil ro sum leh pai nei rei rui, mahse nuna mamawh ber lungawina te, hlimna te, thlamuanna te tlachham tlat mi tam tak an awm. Chutih laiin Lalpa tihtute tan chuan heng nunnain a mamawh ber te hi an tlachham lo a ni tiin kan hmu. Kan nunin a mamawh berte tlachham lova kan awm theih nan hawh u Lalpa i tih ang u. 6. Dam reina a ni: Mi tin hian dam rei kan duh theuh awm e. Dam rei hi a hlu a, a dam reia tan chauh ni lovin a chhung leh khatte tan pawh a lawmawm a ni. Dam rei hlutzia chu dam loh tuma inenkawl nan kan sum leh pai kan ui loh zia atangin a lang reng mai. Damna channa a nih dawn chuan puk chawp hial pawh kan ngam thin. Thuf 10:27-ah chuan LALPA tihna chuan dam chhûng ni a tisei a, Nimahsela mi suaksual kumte chu tihtawi a ni ang tih kan hmu a. Dam reina thuruk chu Lalpa tihnaah hian a awm a, chutih laiin Lalpa tih lotu mi suaksual te nun chu a tawi thin a ni. Chuvangin dam rei kan duh a nih chuan Lalpa i tih ang u. Tlangkawmna: Aw le, Lal Isua hnung rinawm taka zui turin Lalpa tih a pawimawh a ni tih kan sawi ta a. Lalpa tihna avangin sual kan huain kan kalsan ve em? Kan hnathawhna ah te, kan nitin eizawnnaah te thil dik lo han tih hleka khawvel thila neihnunna chance lo awm thinte hi Nehemia angin Lalpa tihna avangin kan ti lo ve ngam ang em le? Lalpa tihna chu finna, hriatthiamna, malsawmna, chawimawina, nunna, lungawina, tlakchham lohna leh dam reina te a ni tiin kan zir ta a. Lalpa tih hi heti taka hlu a nih avangin hawh u Lalpa hi tih ila, hmangaihna avanga a thuawihin a tan i nung zel ang u. Lalpan kan zaa tan malsawm rawh se. Amen.

Pathian fakna hla:- KHB 16- Aw Pathian nang Lalber i ni