THUPUI: “Chanchin tha hi hril rawh u”

1. Thuhma:
Kan Bible chang tarlanah hian Lal Isuan a Thawhleh hnua a ngaih pawimawh ber a zirtirte hnena a thuchah chu Chanchin Tha puan darh a ni a. Hre lo te hnena Chanchin Tha hrilh chu a ngaih pawimawh ber a ni a, “Chutichuan kal ula, hnam tin ami zirtirahte siam ula, Pa leh Fapa leh Thlarau Thianghlim hmingah chuan baptist ula, khawvel tawp thleng pawhin in hnenah ka awm zel ang”, a ti a ni.

1. Chanchin tha hril turin lainatna leh hmangaihna nun kan neih a ngai. (Mathaia 9: 36_38. :
Chutichuan, mipuite chu a hmuhin vengtu nei lo beramte ang a hreawm leh darha a hmuh avangin a khawngaih ta em em a, “Buh sengtur a tam hle sia, nimahsela, a thawktute an tlem, chutichuan a buh seng tura thawktute tir turin buh neitupa hnenah chuan ngen rawh u” a ti a. He mi ni hian vengtu nei lo beram angin mite kha an darh nuai nuai em ni? An nunphung pangngai in an khawsa a, chi thehtute’n an theh a, ran thlahtute’n a pangngai in an thlah a, mahse a hmutu hian a hmuhna mitah chuan mipuiho chu vengtu nei lo beram tla darh angin a hmu a, vengtu nei lo beramte chu an darh a, an khawngaihthlakin an lainat awm em em thin a, Isua hian a lainat in a hmangaih em em a ni. A thlir tu mit atang chuan an lainat awmin an khawngaihthlak em em a, chhandam a duh vek tlat a ni. Khawngaih leh lainatna thuk tak avang chuan chhandam an ni ta ngei a ni.
Hre lote hnen a Chanchin Tha hril tur hian lainatna leh hmangaihna nuna kan chen tak tak a ngai a ni. Hmangaihna leh lainatna atang lo chuan vengtu nei lo beram anga darh an nihna hi hmuh a har khawp mai, hmangaih leh lainat tur chuan hmuhfiah a ngai a ni.

2. Hlawhtling tur chuan veina tak tak a ngai. (Nehemia 1:4) – Jerusalem kulh chim rem rum chanchin a hriat khan Nehemia kha engtin nge a awm kha? “Tin, hetihi a ni a, chung thu chu ka hriat chuan ka thu chawt a, ka tap a, ni engemawzat chu lungngaiin ka awm a, chaw ka nghei a, Van Pathian hmaah ka tawngtai a,”Aw Lalpa Van Pathian, Pathian ropui leh hlauhawm nangmah hmangaih a, i thupek pawmtute thuthlung hlena khawngaihna ti langtu Israelte sualna I chunga kan sualna thupha kan chawi chhung hian I beng lo chhi in I mit lo meng la I chhiahhlawh tawngtaina I hnena a chhun a zana I chhiahhlawh Israela thlahte ka ngensakna hi lo ngaithla teh ang che, kei leh ka pa chhungte chu kan lo sual ta si a, I chungah tha lo takin thil kan lo ti ta si a (Neh 1:4).Jerusalem kulh chim chhe rem rum a awm leh kulh chu siam that a ngai tih – Nehemia chuan an hre thut kha a vei em em mai a,”Ka thu chawt a, ka tap a, ni engemawzat chu lungngaiin ka awm a, chaw ka nghei a, Van Pathian hmaah ka tawngtai a, kei leh ka pa chhungte chu kan lo sual ta si a, I chungah tha lo takin thil kan lo tit a si a(Neh 1: 4). Ama sual miah loh naah pawh a in admit thlap a, a sualna ah a pawm hmak thei a ni. “Kei leh ka pa chhungte chu kan lo sual ta si a, kan tih ngam a ngaia, kan in pawm ngam a ngai tlat a ni. Nehemia chuan Jerusalem kulh chim rem rum kha a vei em em a, a chanchin chu an hriat khan,”Ka thu chawt a,ni engemawzat chaw ka nghei a, Van Pathian hnenah a tawngtai a, a mission hna thawh tur hi a va vei em, Lalpa’n mal a sawm ta ngei a, Jerusalem kulh chim chhe vek tawh chu an siam tha leh ta ngei a, harsatna erawh an tawk tam hle a ni.

3. Thlarau bote hmufiah tur chuan kan thlir dan leh kan ngaih dan kan tizau tur a ni. “Dak ulang lote en rawh u, tun apangin seng turin an eng a ni. Kan awmdan p[angngai a kan hmuh phak loh hi kan han hawi zau deuh a, dak a kan han en chuan kan hmu thei thin, dak ulang lote en rawh u, tun apangin sengturin an eng ani”. Buh sengna tur thla li a la awm an tih lai khan Lal Isua chuan tun apangin seng turin an eng a ti. Thlarau nunna riltam pakhatmah an hmuhloh lai in Lal Isua chuan kha samari hmeichhia chauh ni lovin samari khua a mi te Lal Isua Pathian fapa rawn ringtu turte thlengin a hmu tlang vek a, tun apangin seng turin an eng a ni (Johana 4: 34). Samari miten Pathian fapa Lal Isua an rawn rin dan hi a ngaihnawm hle mai. Mass Conversion an ti hial a ni.”Tunah zet chuan I thu sawi avanga ring kan ni ta lo, keimahni ngei in a thu kan hria a, he mi hi khawvel chhandamtu ngei a ni tih kan hre ta”,an ti a.Thlarau atang chuan dik tak in an thlir kual a,buh seng mai tur buh hmin an hmu thin calendar atang chuan buh sengna turin thla li a la awm an tih laiin kan Lal Isua chuan “Tun apangin seng turin an eng a ni” a ti thei a ni. In sangmarin dakin I thlir ang u,kan nun zawi tak a engmah kan hmuh loh na ah khan ring fan ula, dakin han thlir vel i la, buh seng mai tur buh hmin kan hmu maithei a sin. Buh hmin kan hmuh lohna ah khan tawngtaina nen ngun takin han thlir nawn leh ila, buh seng mai tur kan hmu leh teuh maithei a sin. Zirtirte khan zankhua a an hlawhchhamna hmunah tho khan ani hlawhtlinna ropui tak sangha tam tak an man leh tho kha. Buh seng hun, buh hmin hun kan tih pawh thla li la awm a kan hriat lai hian seng m,ai turin an lo eng hle tawh maithei a ni. Dak meuhin lo I thlir thar le hang u, buh hmin kan hmu maithei a sin. Tawngtaina nen hian lo i thlir leh ang u.

4. Tlangkawmna :: Mizoram Baptist Kohhran hi tun hma atangin ramthim vei kohhran, Chanchin Tha puan darh kawng a hma la nasa leh ram thim vei kohhran kan ti thin a, kan thawhlawm pawh ramthim rawngbawlna atan kan hman ral, percentage pawh kohhran dang ai chuan a sang hle thin a. Missionary Kohhran kan ti hial thin a, tunah pawh hian mission lam a kan hmalakna hi a lian in kan sum hman pawh a lian tham hle a ni. Hma i sawn zel ang u.
Thlarau bote Krista ke bula hruai a, hlawhtling tak a rawngbawlna nei tur chuan thlarau nun chhungril tak atanga, thlarau bo hmangaihna leh lainatna kan neih a ngai a, thinlungchhungril tak atanga veina kan neih a ngai a, Thalrau bote hmu thei turin thlarau atanga kan mit kan men a, buh hmin hmu thei turin kan dak chhuakin lo kan thlir fo tur a ni.
“I lawman ber Lalpa thlarau bo chhandam,
I hna tul ber khawvel chanchin tha hril…..”
Veina tak tak nen a kan thawh hi a ngai takzet a ni.
Thlarau bo hmu thei turin Lalpa’n kan mit min tih men sak theuh rawh se.

Hla sak hona: KHB No: 520 : Min ngaidam rawh aw, Lalpa, min ngaidam rawh.

Min ngaidam rawh aw, Lalpa min ngaidam rawh

Min ngaidam rawh aw, Lalpa min ngaidam rawh,
Ka tihtur hre lovin rei tak ka lo thu;
Ka lawm nan mai ka lo bel che, Lalpa,
Min ngaidam rawh, Lalpa, min ngaidam rawh.

Keimah vangin thlarau chhiar sen loh,
An boral tawh chatuan thim hnuaiah hian,
I hmaah eng nge ka sawi ve ang?
Min ngai dam rawh, Lalpa, min ngaidam rawh.

I chhandamna a thlawnin ka lo nei tawh,
I malsawmna chhiar sen lohvin min vur thin;
Mahse, ka tan mai hian ka lo hmang zo,
Min ngaidam rawh, Lalpa, min ngaidam rawh.

I lawmna ber, Lalpa, thlarau bo chhandam,
I hna tul ber khawvela Chanchin Tha hril;
Mahse tumah ka la rawn hruai si lo,
Min ngaidam rawh, Lalpa, min ngaidam rawh.

I kohna hi haider thei ka lo ni lo,
Nangin min tir, thlarau bo chhandam turin;
I thlarau Thianghlimin min hruai zel la,
I ram tan ka rawn inpe e, Lalpa.

Lalpa Tawngtaina